Ñee rusihuínniluʼ guendanandxóʼ stiʼ Jiobá la?
Ñee rusihuínniluʼ guendanandxóʼ stiʼ Jiobá la?
«Naca nu casi ti espeju ra rihuinni enda nandxóʼ sti [Jiobá].» (2 COR. 3:18)
XI NICÁBILUʼ
Xiñee zanda gusisácanu Jiobá neca binni ruchee laanu.
Ximodo racané ca guendaridagulisaa laanu ne ora runi orarnu para gusihuínninu guendanandxóʼ stiʼ Dios.
Xi zanda gacané laanu para cadi gusaana de gusisácanu Jiobá.
1, 2. Xiñee zanda gusihuínninu guendanandxóʼ stiʼ Jiobá.
GUIRANU nga yendeenu bixhózenu o jñaanu ne nuu tiru nabé rihuínnini. Nga runi, zándaca huayunadiáganu gábicabe ti xcuidi: «Nabé yendeeluʼ bixhoʼzoʼ». O laaca zanda gábicabe ti dxaapahuiiniʼ: «Nabé rusietenaláʼdxiluʼ naa jñaaluʼ». Ne stale biaje riuulaʼdxiʼ xiiñiʼ binni guni ni runi bixhoze o jñaa. Yanna laanu yaʼ, ñee zanda gúninu ni runi Jiobá, Bixhózenu ni nuu guibáʼ la? Neca qué ridúʼyanu laabe, rudiʼnu cuenta pabiáʼ sicarú ca guenda stibe pur guiráʼ ni bizaʼbe, ora ridúʼndanu Stiidxabe ne ora riníʼ íquenu de laani. Ne jma rizíʼdinu de laabe ora ridúʼndanu guiráʼ ni bisiidiʼ Xiiñibe, Jesucristu, ne ejemplu ni bisaana para laanu (Juan 1:18; Rom. 1:20). Nga runi, zanda gusihuínninu guendanandxóʼ stiʼ Jiobá.
2 Ante guzáʼ Dios Adán ne Eva, maca nánnabe zanda guni binni guidxilayú ni nabe, gusihuínnicaʼ modo laabe ne gusisácacaʼ laabe. Biblia na: «Ne guníʼ Dios: “Gúninu binni casi laanu, ne gápacabe ca benda nuu ndaaniʼ nisadóʼ ne ca maniʼ ripapa guibáʼ ne ca maniʼ nadóʼ ne gápacabe guidxilayú ne guiráʼ maniʼ ni riniibi lu guidubi guidxilayú”. Bizulú bizáʼ Dios binni casi laa, casi Dios bizáʼ laacabe; hombre ne gunaa bizaʼbe laacaʼ» (Génesis 1:26, 27). Ora rinándanu ejemplu stiʼ Dios randa rusihuínninu guendanandxóʼ stiʼ Jiobá. Ne zanda gúninu ni neca de gadxé raza laanu, neca gadxé modo biniisinu ne neca huaxiéʼ guyuunu scuela. Xiñee yaʼ. Purtiʼ «biaʼca risaca irá binni nezalú Dios. Tutiica idxibi laabe ne guni jneza, runi xiiñi be laa, gasti naca xi raza laa» (Hech. 10:34, 35).
3. Xi zanda guni sentirnu ora rúninu ni na Jiobá.
3 Ca xpinni Cristu ni bibí rusihuínnicaʼ guendanandxóʼ stiʼ Jiobá. Tobi de laacabe, apóstol Pablu bicaa: «Laanu ma cadi daʼgu lari que lú nu, sínuque ma naca nu casi ti espeju ra rihuinni enda nandxóʼ sti [Jiobá], ne ze dxi zirooba enda nandxóʼ stibe luguiá nu, ziyaca nu casi laabe» (2 Cor. 3:18). Ora bietené Moisés ni riguixhená Chii Mandamientu de lu dani Sinaí, cuzaaniʼ lube purtiʼ guniʼné Jiobá laabe (Éxo. 34:29, 30). Dxandíʼ, nin tobi de ca xpinni Cristu qué huazaaca ni bizaaca Moisés, ne qué ruzaaniʼ lucaʼ casi bizaaniʼ lube. Peru zanda guʼyaʼ binni pabiáʼ nayecheʼ runi sentirnu ora rusíʼdinu laacaʼ de Jiobá, ca guenda stibe ne ca cosa sicarú ni naguixhe íquebe gúnibe para binni guidxilayú. Cásica ti speju de guiibaʼ ni ruzaaniʼ biquiiñecabe dxiqué, ca xpinni Cristu ni bibí pur espíritu ne xcaadxi xpínnibe laaca rusihuínninu guendanandxóʼ stiʼ Dios lu xquendanabáninu ne ora rucheechenu diidxaʼ (2 Cor. 4:1). Nga runi, cada tobi de laanu naquiiñeʼ guinabadiidxaʼ laca laa: «Ñee cusihuinneʼ guendanandxóʼ stiʼ Jiobá pur modo nabaneʼ ne pur modo rucheecheʼ stiidxaʼ Reinu né stale gana la?».
RACALÁʼDXINU GUSIHUÍNNINU GUENDANANDXÓʼ STIʼ JIOBÁ
4, 5. 1) Xi guendanagana napa guiráʼ binni, cásica ni gupa Pablu. 2) Ximodo runiná pecadu laanu.
4 Dxandíʼ, ca xpinni Jiobá racaláʼdxinu gusisácanu laabe lu guiráʼ ni gúninu. Peru stale biaje qué randa diʼ rúninu ni. Laaca gúcani nagana para apóstol Pablu (biindaʼ Romanos 7:21-25). Laabe guniʼbe xiñee raca nagana para guiráʼ binni guni ni jneza: «Guiráʼ xixé binni maʼ bichee ne qué zanda gusihuínnicaʼ ca guenda sicarú stiʼ Dios» (Rom. 3:23, NM). Guiráʼ binni ralené pecadu bisaanané Adán, ni zeeda gaca casi ti rey malu ni cayuni mandar laacaʼ (Rom. 5:12; 6:12).
5 Peru xii nga pecadu ca yaʼ. Laani nga ora qué rusihuinni tuuxa ca guenda sicarú stiʼ Jiobá, ora qué rinanda ca ley stibe ne ora qué runi ni racaláʼdxibe. Ruxheleʼ pecadu riʼ laanu de Jiobá. Pur laani qué randa rusihuínninu guendanandxóʼ stiʼ Jiobá modo racalaʼdxiʼ, cásica ora qué rucuí ti hombre ti flecha ra racalaʼdxiʼ. Nuu biaje laapenu ruyúbinu gucheʼnu ne nuu tiru rucheʼnu sin gudiʼnu cuenta (Núm. 15:27-31). Nabé nadipaʼ nga modo naaze dxiichiʼ pecadu cada tobi de laanu ne ruxhéleni laanu de Dios (Sal. 51:5; Isa. 59:2; Col. 1:21). Stale de ca binni nabani yanna nuucaʼ zitu de Jiobá, nga runi qué randa rusihuínnicaʼ guendanandxóʼ stiʼ Dios. Racá ridúʼyanu ti cosa: pecadu ca nga ni jma runiná binni guidxilayú.
6. Xiñee zanda gusihuínninu guendanandxóʼ stiʼ Dios neca binni ruchee laanu.
6 Neca binni ruchee laanu, Jiobá nga Dios ni «racané laanu para ganda icá lú nu laa» (Rom. 15:13). Maʼ bidiibe Xiiñibe Jesucristu para gulá laanu de pecadu. Ora nápanu fe lu guendaguti riʼ maʼ qué ricanu «yaga lu ná enda ruchee» ne maʼ randa rusihuínninu guendanandxóʼ stiʼ Jiobá (Rom. 5:19; 6:6; Juan 3:16). Pa qué gusaana de gaca xhamígunu Jiobá, zápanu ndaayaʼ stibe yanna, ne despué zácanu binni sin donda ne zacaanu guendanabani ni qué zaluxe. Guníʼ ique si: neca binni ruchee laanu, ruuyaʼ Dios zanda gusihuínninu guendanandxóʼ stiʼ. Cadi dxandíʼ sicarú nga la?
XIMODO GUSIHUÍNNINU GUENDANANDXÓʼ STIʼ DIOS
7. Xi naquiiñeʼ guiénenu pa racaláʼdxinu gusihuínninu guendanandxóʼ stiʼ Dios.
7 Para ganda gusihuínninu guendanandxóʼ stiʼ Dios, naquiiñeʼ gánnanu xi rucaa laanu gucheʼnu (2 Cró. 6:36). Ne ora maʼ nánnanu ni, naquiiñeʼ gúninu stipa pur gucueezanu laanu de gúninu cosa malu. Zacatiʼ zanda gusisácanu Dios. Quíxhenu ti ejemplu. Xi naquiiñeʼ gúninu pa nápanu viciu de gúʼyanu película de idxa guidxa o diidxaʼ dxabaʼ yaʼ. Primé la? naquiiñeʼ guiénenu caquiiñeʼ gacané ca binnigola laanu ne chuunu ra nuucabe (Sant. 5:14, 15). Ngapeʼ nga ni naquiiñeʼ gúninu primé para gusisácanu Dios lu xquendanabáninu. Nga runi, ca xpinni Jiobá, gatigá naquiiñeʼ gúʼyacaʼ pa nabánicaʼ modo na ley stiʼ Jiobá naquiiñeʼ guibani ca xpinni (Pro. 28:18; 1 Cor. 10:12). Pa racaláʼdxinu gusihuínninu guendanandxóʼ stiʼ Dios, naquiiñeʼ gudxíʼlunu guiráʼ ni rucaa laanu gucheʼnu.
8. Xi zanda gúninu neca binni ruchee laanu.
8 Jesús si nga gunda bisiecheʼ Dios ne bisihuinni guendanandxóʼ stibe sin nuchee. Laanu binni ruchee laanu, peru zanda gúninu stipa pur chinándanu ejemplu stibe ne naquiiñeʼ gúninu ni (1 Ped. 2:21). Jiobá nanna pabiáʼ stipa rúninu para gusisácanu laa ne riguube ndaayaʼ laanu.
9. Ximodo racané Biblia ca xpinni Cristu para gusiéchecaʼ Dios.
9 Biblia racané laanu para ganda guiénenu ximodo zanda gusihuínninu guendanandxóʼ stiʼ Dios. Nga runi, nabé risaca nga guidúʼndanu ni, guiníʼ íquenu de laani ne guiénenu cani rusiidini (Sal. 1:1-3). Pa guidúʼndanu ni guiráʼ dxi la? zacaneni laanu ti ganda guibáninu modo naquiiñeʼ guibani ti xpinni Cristu (biindaʼ Santiago 1:22-25). Ora jma gunibiaʼnu Stiidxaʼ Dios, jma zaguidxi fe stinu ne jma zacaneni laanu para cadi gucheʼnu ne gusiéchenu Jiobá (Sal. 119:11, 47, 48).
10. Ximodo racané ca oración ni rúninu para guni adorarnu Jiobá jneza.
10 Para ganda gusihuínninu guendanandxóʼ stiʼ Dios, laaca naquiiñeʼ chinándanu conseju riʼ: «Cadi usaana tu de iníʼ né tu Dios» (Rom. 12:12). Zanda guinábanu Jiobá gacané laanu guni adorarnu laa modo riuulaʼdxiʼ ne naquiiñeʼ gúninu ni. Galán gúninu guinábanu laabe gudiibe laanu espíritu santu stibe, gacanebe laanu gaca fe stinu naguidxi, gudiibe stipa para gucáʼnanu cani ruquiinde laanu ne gacanebe laanu para gusíʼdinu «stiidxa be jneza» (2 Tim. 2:15; Mat. 6:13; Luc. 11:13; 17:5). Naquiiñeʼ guni crenu zanda gacané Bixhózenu ni nuu guibáʼ laanu cásica runi cré ti xcuidi bixhoze. Ora guinábanu laabe gacanebe laanu para gúninu ni nabe, naquiiñeʼ guni crenu dxandíʼ zacábibe laanu. Ne cadi guiníʼ íquenu zuchiichinu laabe ora guni orarnu. ¡Qué ziuu dxi gaca nga! Zanda guni orarnu para gusisácanu laabe, gudiʼnu xquíxepeʼ laabe ne guinábanu laabe guendabiaaniʼ para gudxíʼlunu ca guendanagana stinu. Ne laaca zanda guinábanu laabe gacanebe laanu gusisácanu labe ora maʼ cayuni adorarnu laabe (Sal. 86:12; Sant. 1:5-7).
11. Ximodo racané ca guendaridagulisaa laanu para gusihuínninu guendanandxóʼ stiʼ Dios.
11 Maʼ bisaana Dios lu naʼ «mozo ni nuu xpiaaniʼ ne ni runi jneza» guʼyaʼ ca dendxuʼ stibe (Mat. 24:45-47; Sal. 100:3). Ne racalaʼdxiʼ «mozo» riʼ gusihuínninu guendanandxóʼ stiʼ Jiobá. Cásica zanda guni chaahuiʼ ti sastre traje stinu, o xhábanu, ca guendaridagulisaa stinu racanécani laanu para guni chaahuinu modo nabáninu ti guihuinni dxandíʼ xpinni Cristu laanu (Heb. 10:24, 25). Nga runi, nabé risaca nga chindanu ante guzuluni. Pa puru maʼ huadxí rindanu la? cunítinu stale de ca cosa ni rusiidiʼ Dios, laa ndaʼ cani nga ni caquiiñenu para guni adorarnu Jiobá modo riuulaʼdxiʼ.
CHINÁNDANU EJEMPLU STIʼ DIOS
12. Ximodo rinándanu ejemplu stiʼ Dios.
12 Naquiiñeʼ chinándanu ejemplu stiʼ Jiobá para gusihuínninu guendanandxóʼ stiʼ (Efe. 5:1). Ti modo zanda gúninu ni nga guiníʼ íquenu casi riníʼ íquebe. Pa guibáninu modo racaláʼdxinu ne guiaandaʼ laanu xi riníʼ ique Dios la? zusituinu lube ne zápanu guendanagana. Nabáninu ndaaniʼ ti guidxilayú ni nuu ndaaniʼ náʼ Binidxabaʼ, nga runi naquiiñeʼ guizíʼdinu gaca nanaláʼdxinu guiráʼ ni nanalaʼdxiʼ Jiobá ne gannaxhiinu guiráʼ ca cosa ni nadxiibe (Sal. 97:10; 1 Juan 5:19). Naquiiñeʼ guni crenu ndiʼ: modo jma jneza guni adorarnu Dios nga gúninu guiráʼ dxiiñaʼ stinu para gusisácanu laabe (biindaʼ 1 Corintios 10:31).
13. Xiñee naquiiñeʼ gaca nanaláʼdxinu pecadu, ne xi naquiiñeʼ gúninu.
13 Naquiiñeʼ gaca nanaláʼdxinu pecadu cásica nanalaʼdxiʼ Jiobá ni. Nga runi, galán guixélenu de intiica cosa ni zucaa laanu gucheʼnu, lugar de guiníʼ íquenu qué zuninani laanu. Ti pecadu nga guidxaaganu ca binni ni maʼ bidxiideche Dios ne rucaalucaʼ xquídxibe, purtiʼ qué zacanécabe laanu gusisácanu Dios, nga runi naquiiñeʼ guixélenu de laacabe (Deu. 13:6-9). Cadi liica guidxaaganu laacabe ne cadi guidxaaganu cani na xpinni Cristu laa, peru qué rusihuinni guendanandxóʼ stiʼ Dios. Naquiiñeʼ guixélenu de laacabe neca binnilídxinu laacabe (1 Cor. 5:11). Qué zabeendunu gastiʼ pa gucáʼlunu cani maʼ bidxiideche Dios ne cani riníʼ mal de xquidxi Jiobá. Cadi liica naquiiñeʼ guluíʼ láʼdxinu gánnanu xi riníʼcabe —lu xiixa libru, lu Internet o xcaadxi cosa ni riquiiñecabe para ganna binni de laacabe—, purtiʼ zanda gueeda guxhélecani laanu de Jiobá. Biblia na: «¡Pobre de cani na ni jneza nga cadi jneza ne ni cadi jneza nga jneza, cani na gueelacahui ca biaaniʼ ne biaaniʼ nga gueelacahui, cani riníʼ nanaxhi ni nandáʼ ne nandáʼ nga ni nanaxhi!» (Isaías 5:20; biindaʼ Mateo 7:6).
14. Gunáʼ nga guenda jma risaca stiʼ Jiobá ni naquiiñeʼ gusihuínninu, ne xiñee.
14 Ti modo jma risaca chinándanu ejemplu stiʼ Bixhózenu ni nuu guibáʼ nga gannaxhiinu binni (1 Juan 4:16-19). Ne rusihuínninu nácanu discípulo stiʼ Jesús ne xpinni Jiobá purtiʼ nadxiisaanu (Juan 13:34, 35). Cumu binni ruchee laanu la? nuu tiru zaca nagana para laanu gannaxhiinu binni. Peru naquiiñeʼ gúninu stipa pur gannaxhiisaanu guiráʼ ora. Pa gúninu stipa pur gápanu guenda riʼ ne xcaadxi ni naquiiñeʼ gapa ca xpinni Cristu, qué ziuu dxi gúninu xiixa cosa malu nezalú Jiobá (2 Ped. 1:5-7).
15. Ximodo zanda gusihuínninu nadxiinu sti binni.
15 Laaca rúninu xcaadxi cosa galán purtiʼ nadxiinu binni (Rom. 13:8-10). Pa nadxiinu xheelanu qué ziuu dxi guchéʼnenu laa. Pa nadxiinu ca binnigola ne runi respetarnu laacaʼ pur dxiiñaʼ rúnicaʼ, zuzúʼbanu stiidxacaʼ de guidubi ladxidoʼno. Tuuxa ni nadxii bixhoze ne jñaa la? zusisaca laacabe ne zuzuubaʼ stiidxacabe, ne qué zaníʼ mal de laacabe. Pa nadxiinu sti binni, zuni respetarnu laa ne qué zaníʼ íquenu jma risácanu que laa (Sant. 3:9). Ne pa nadxii ca binnigola ca dendxuʼ huiiniʼ stiʼ Dios la? zácacabe nachaʼhuiʼ né laacaʼ (Hech. 20:28, 29).
16. Ximodo rusihuínninu nadxiinu binni ora maʼ zigucheechenu diidxaʼ.
16 Laaca naquiiñeʼ gusihuínninu nadxiinu binni ora maʼ zigucheechenu diidxaʼ. Cumu nadxiinu Jiobá de guidubi ladxidoʼno la? cucheecherunu ca diidxaʼ nacubi ne galán, ne qué rireʼnu gana neca nuu tiru qué riná binni gucaadiaga laanu o guidxiichinecaʼ laanu. Laaca ridúʼndanu ni chitiidiʼ lu ca guendaridagulisaa dede ante ne rúninu stipa para gucheechenu stiidxaʼ Reinu jma jneza. Pa dxandíʼ nadxiinu Dios ne nadxiinu binni la? qué zadúʼyanu dxiiñaʼ stinu casi xiixa ni nanaa o casi xiixa ni napa xidé gúninu. Zadúʼyanu ni casi ti dxiiñaʼ nabé risaca ne ziéchenu ora gúninu ni (Mat. 10:7).
QUÉ CHUʼ DXI GUSAANA DE GUSISÁCANU JIOBÁ
17. Xi ribeendunu ora riénenu rucueeza pecadu laanu de gusihuínninu guendanandxóʼ stiʼ Dios.
17 Stale de ca binni nabani yanna, qué riénecaʼ pabiáʼ runiná pecadu binni, peru laanu maʼ riénenu ni. Nga runi, naquiiñeʼ gucáʼnanu guiráʼ ni ruquiinde laanu ti ganda gusihuínninu guendanandxóʼ stiʼ Dios. Pa gánnanu xi rucaa laanu gucheʼnu la? zacaneni laanu para gusíʼdinu xquendabiaaninu guni ni jneza cásipeʼ gudiʼnu cuenta nuu xiixa ni zuquiinde laanu gucheʼnu (Rom. 7:22, 23). Neca binni ruchee laanu, zudii Dios stipa laanu para cadi guchéʼnenu laa neca guidxaagalunu intiica guendanagana (2 Cor. 12:10).
18, 19. 1) Ximodo zanda gudxíʼlunu ca espíritu malu. 2) Xi naquiiñeʼ quixhe íquenu gúninu.
18 Sti cosa ni naquiiñeʼ gúninu para gusisácanu Jiobá nga gudxíʼlunu ca espíritu malu, ne para nga naquiiñeʼ guicaanu «irá ni ma bidii Dios» laanu (Efe. 6:11-13). Binidxabaʼ nisi cuyubi ximodo guni stiʼ guendanandxóʼ ni naquiiñeʼ guicaa Jiobá. Ne ruyúbibe stale modo quítebe laanu para ganda guxhélebe laanu de Jiobá. Nga runi, cadi naquiiñeʼ guiaandaʼ ndiʼ laanu: pa nácanu ti hombre, ti gunaa o ti xcuidi, cada biaje guzúʼbanu stiidxaʼ Dios ne gusisácanu laa neca binni ruchee laanu, casi ñaca ñuni ganar Jiobá Binidxabaʼ. ¡Ne millón de xpinni Cristu nga runi zacá! Nga runi, cadi gusaana de gusisácanu Jiobá cásica runi ca ángel nuu guibáʼ ora riniʼcaʼ: «[Jiobá] Señor Dios stidu, lii siouʼ nga naquiiñe udxiʼba du ne usisaca du ne iní du nandxóʼ loʼ. Purti lii bizáʼ lu irá xixé ni nuu. Uyáʼ ni ne nuu ru ni purti nga ni na luʼ» (Apo. 4:11).
19 Quixhe íquenu cadi gusaana de gusisácanu Jiobá, neca guidxaagalunu intiica ni gueeda. Nánnanu riecheʼ Dios ora ruuyaʼ cayuni ca xpinni stipa pur chinándacaʼ ejemplu stibe ne gusihuínnicaʼ guendanandxóʼ stibe (Pro. 27:11). Galán guininu cásica guníʼ David: «Rusisacaʼ lii de guidubi ladxiduáʼ, Dios stinneʼ, ne qué ziuu dxi gusaana de gusisacaʼ laluʼ» (Sal. 86:12). Mayaca gusihuinni guiráʼ ca xpinni Dios ni ruzuubaʼ diidxaʼ guendanandxóʼ stiʼ Jiobá módopeʼ riuulaʼdxiʼ ne qué ziuu dxi gusaana de gusisácacaʼ laabe. ¡Nabé sicarú zácani dxi ca! Ñuuláʼdxiluʼ nusihuínniluʼ guendanandxóʼ stiʼ Jiobá biaʼ dxi guibániluʼ la? Pa zacá ni, ñee maʼ cusihuínniluʼ ni lu guiráʼ ni rúniluʼ yanna riʼ la?
[Guendarinabadiidxaʼ stiʼ párrafo]
[Imagen ni zeeda lu yaza 27]
Ñee cusihuínniluʼ guendanandxóʼ stiʼ Jiobá ora rúniluʼ ca ndiʼ la?
