Cayapa Jiobá laanu ti ganda guilanu
Cayapa Jiobá laanu ti ganda guilanu
«Laatu runi cre tu Dios, nga runi cayapa laatu ne enda nandxóʼ stiʼ laga cabeza tu ulá be laatu de cani nuu ndaani guidxilayú riʼ. Ma nexhe guni be ni dxi izaa xhi guidxilayú.» (1 PED. 1:5)
XI NICÁBINU
Ximodo bichiña Jiobá laanu ndaaniʼ religión ni dxandíʼ.
Ximodo rudiʼnu lugar iquiiñeʼ Jiobá ca conseju stiʼ para guluíʼ laanu paneza chuunu.
Ximodo riguu Jiobá gana laanu.
1, 2. 1) Xiñee nánnanu zanda gacané Dios laanu guzúʼbanu diidxaʼ. 2) Pabiáʼ runibiáʼ Jiobá laanu.
«TU QUÉ ixhacalaʼdxi dede dxi iluxe irá ni la? zalá.» (Mat. 24:13.) Ora guníʼ Jesús ca diidxaʼ riʼ, bisihuínnibe naquiiñeʼ guzúʼbanu stiidxaʼ Dios ti guilanu ora gunitilú Bixhózebe guidxilayú stiʼ Binidxabaʼ. Peru qué riníʼ nga cabeza Jiobá guni huantarnu pur stipa si stinu o purtiʼ si nabé nuu xpiaaninu. Biblia cayabi laanu: «Jneza runi Dios, ne qué zudii lugar gueeda xiixa luguiá tu ni qué zanda gua tu, sínuque laga zacané laatu tidi tu ni ora idxiña tu ni, ti ganda gua tu ni» (1 Cor. 10:13). Xi zanda guiénenu né ca diidxaʼ riʼ yaʼ.
2 Qué zudii Jiobá lugar tiidinu xiixa ni qué zanda guni huantarnu, peru para nga caquiiñeʼ gánnabe xi guendanagana ridídinu, modo laanu ne pabiáʼ zanda guni huantarnu, purtiʼ zacatiʼ nga zanda gacanebe laanu. Peru dxandíʼ nga runibiáʼ chaahuiʼ Dios laanu la? Runibiaʼbe pue. Stiidxaʼ Dios na nánnabe guiráʼ xixé cosa de cada tobi de laanu. Nánnabe xi rúninu guiráʼ dxi ne ca costumbre stinu. Dede nánnabe xi riníʼ íquenu ne cani racaláʼdxinu gúninu. Biblia na: «Jiobá, lii maʼ biiyaʼ chaahuiluʼ ximodo naa, ne runibiaʼluʼ naa. Lii nannuʼ pora ribiéʼ ne pora riasaʼ. Neca zitu nuuluʼ rudiiluʼ cuenta xi nuu ndaaniʼ iqueʼ. Maʼ guluubiaʼluʼ ca viaje runeʼ ne xi runeʼ ora maʼ caziiladxeʼ, ne runibiáʼ chaahuiluʼ guiráʼ neza ra rizayaʼ» (Salmo 139:1-3).
3, 4. 1) Ximodo rusihuinni ni bizaaca David rizaalaʼdxiʼ Jiobá cada binni. 2) Xi dxiiñaʼ risaca cayuni Jiobá ca dxi riʼ.
3 Cadi dxandíʼ nabé ridxagayaanu pur modo rizaalaʼdxiʼ Dios laanu neca gastiʼ nga laanu nezalube la? Ngapeʼ nga ni guníʼ ique David ora gúdxibe Jiobá ca diidxaʼ riʼ: «Ora guuyaʼ guibáʼ stiluʼ, ca dxiiñaʼ ni bizáʼ ca bicuini naluʼ, beeu ne ca beleguí ni bizaʼluʼ, tuu nga binni guidxilayú para guietenalaʼdxuʼ laa [yaʼ]» (Sal. 8:3, 4). Zándaca gunabadiidxaʼ David nga purtiʼ biiyabe pabiáʼ bizaalaʼdxiʼ Jiobá laabe. Neca laabe nga xhuncu stiʼ Jesé, biiyaʼ Jiobá laabe casi «ti hombre ni gusiecheʼ ladxidóʼ» ne gulí laabe para gácabe «xaíque stiʼ guidxi Israel», lugar de chigápabe dendxuʼ (1 Sam. 13:14; 2 Sam. 7:8). ¡Guníʼ ique si ximodo biʼniʼ sentir David ora bidii cuenta nanna Jiobá guiráʼ ni riníʼ ique neca naca ti pastor huiiniʼ!
4 Laaca ridxagayaanu ora ridúʼyanu pabiáʼ rizaalaʼdxiʼ Jiobá laanu ca dxi riʼ. Laabe riquiiñebe religión ni dxandíʼ para gutagulisaabe «ca cosa ni jma risaca stiʼ ca guidxi ca» ne cayacanebe ca binni riʼ para guni adorarcaʼ laabe (Ageo 2:7). Para ganda guiene chaahuinu ximodo racané Jiobá laanu guzúʼbanu diidxaʼ la? primeru guidúʼyanu ximodo nga ruchíñabe binni ndaaniʼ religión ni dxandíʼ.
BICHIÑA DIOS LAANU RA NUU XIIÑIʼ
5. Ximodo ruchiña Jiobá binni ra nuu Xiiñiʼ. Bisiéneni né ti ejemplu.
5 Jesús guníʼ: «Biseenda Bixhoze naa, ne iruti zanda gueeda ra nuaaʼ, pa qué cuidxi be laa» (Juan 6:44). Ca diidxaʼ ca rusihuínnicani gucané Dios laanu para gunda gúcanu discípulo stiʼ Cristu. Peru ximodo nga ruchiña Jiobá binni nadóʼ casi dendxuʼ ra nuu Xiiñiʼ yaʼ. Riquiiñebe cani rucheecheʼ stiidxabe ne laaca riquiiñebe espíritu santu. Casi dxi yeganna Pablu ne xcaadxi misioneru guidxi Filipos, bidxélacabe ti gunaa láʼ Lidia ne bisiidicabe laa ca diidxaʼ nacubi ne galán stiʼ Dios. Biblia cusiene xi bizaaca: «Bicuudxi [Jiobá] ladxidóʼ be para gucuaa be stiidxa Pablu». Casi maʼ bidúʼyanu, bidii Dios espíritu laabe ti guiénebe ni cusiidicabe laabe, despué guyuunísabe ne ca binnilídxibe (Hech. 16:13-15).
6. Ximodo bichiña Dios laanu ra nuu religión ni dxandíʼ.
6 Ñee Lidia si nga bizaaca zacá la? Coʼ. Pa nácanu xpinni Cristu ni maʼ bidii xpida Jiobá la? laaca laabe nga bichíñabe laanu ra nuu religión ni dxandíʼ. Ne cásica biiyaʼ Bixhózenu ni nuu guibáʼ cosa galán ndaaniʼ ladxidóʼ Lidia, laaca maʼ biiyabe ca cosa sicarú nuu ndaaniʼ ladxidoʼno. Ora bicaadiáganu stiidxaʼ Dios primé la? bidii Jiobá laanu espíritu santu stiʼ para gunda biénenu xi cusiidicabe laanu (1 Cor. 2:11, 12). Ra ziyúninu stipa pur gúninu ni zigusiidicabe laanu ne pur gúninu ni nabe la? bidúʼyanu ca ndaayaʼ stibe. Ne dxi bidiʼnu xquendanabáninu laabe, bisiéchenu laabe. Dede dxi biuʼnu lu neza ra zacaanu guendanabani, nuunebe cada tobi de laanu ne cayacanebe laanu guiráʼ ora.
7. Ximodo nánnanu zacané Jiobá laanu para guzúʼbanu diidxaʼ.
7 Ora maʼ gucané Jiobá laanu para sánenu laa, maʼ qué rundaabe nanu. Nánnabe cadi stúbisinu guyuʼnu ndaaniʼ religión ni dxandíʼ, ne laaca qué zanda guiaananu ndaaniʼ ni pur stipa si stinu. Sicaríʼ gudxi apóstol Pedru ca xpinni Cristu ni bibí: «Laatu runi cre tu Dios, nga runi cayapa laatu ne enda nandxóʼ stiʼ laga cabeza tu ulá be laatu de cani nuu ndaani guidxilayú riʼ. Ma nexhe guni be ni dxi izaa xhi guidxilayú» (1 Ped. 1:5). Naquiiñeʼ gánnanu gucuá ca diidxaʼ ca para guiráʼ ca xpinni Cristu, dede né para cani nabani yanna. Xiñee yaʼ. Purtiʼ caquiiñeʼ gacané Dios guiranu para guzúʼbanu diidxaʼ.
RAPA DIOS LAANU PARA CADI GUCHEʼNU
8. Xiñee naquiiñeʼ gúninu stipa para cadi gucheʼnu.
8 Ca cosa ni riguu xizaa laanu ne donda gulenenu zanda gucueeza cani laanu de gúninu ni na Dios. Ne zándaca gucaacani laanu gúninu xiixa ni cadi jneza sin gudiʼnu cuenta (biindaʼ Gálatas 6:1). Ti cosa ni bizaaca David rusihuinni dxandíʼ ni bizéʼtenu ca.
9, 10. Ximodo gucané Jiobá David para cadi nuchee, ne ximodo racanebe laanu yanna.
9 Xi biʼniʼ David dxi canazananda rey Saúl laa yaʼ. Bisihuínnibe pabiáʼ nánnabe gucueezabe laabe ne qué nuquíxebe ni biʼniʼ rey que laabe (1 Sam. 24:2-7). Peru qué nindaa de ngue guca ti cosa ra qué ñanda nucueezabe laabe. Xi laani yaʼ. Cumu caquiiñebe ni gobe ne ni gó ca hombre canazanebe la? né stale respetu gunábabe ti israelita láʼ Nabal gacané laabe. Peru gudindené hombre riʼ laabe ne qué niná ñacané laabe. Bidxiichi David pur ngue ne guníʼ ique chiguuti Nabal ne guiráʼ ca hombre nuu ralidxi para guquixe laabe ni bíʼnibe. Qué liica nidiʼdiʼ ndaaniʼ ique David pa zucheené Dios ora guni zaqué, purtiʼ zuutibe binni qué gapa donda. Ni biʼniʼ Abigail, xheelaʼ Nabal que si nga bicueeza laabe de gucheenebe Dios. Biene David Dios ngue biquiiñeʼ Abigail para gucané laa, ngue runi guníʼ: «¡Guisaca Jiobá, Dios stiʼ Israel, purtiʼ biseendaʼ lii yannadxí para guidxaagaluluʼ naa! Ne guisácaluʼ purtiʼ nuu xpiaaniluʼ, ne uguu Dios ndaayaʼ lii purtiʼ bicueezuʼ naa yannadxí de guuteʼ binni ne pur lii maʼ qué nuquixeʼ binni ni biʼniʼ naa» (1 Sam. 25:9-13, 21, 22, 32, 33).
10 Xi rusiidiʼ historia riʼ laanu yaʼ. Biquiiñeʼ Jiobá Abigail para gucueeza David de guni ni cadi jneza. Ca dxi stinu riʼ, laacaʼ riquiiñebe binni para gacané laanu. Peru cadi naquiiñeʼ diʼ cuézanu guseendabe tuuxa para gacané laanu guiráʼ biaje ruluíʼ zuchéʼnenu laabe. Laaca cadi galán guiníʼ íquenu maʼ nánnanu xi guiráʼ zuni Jiobá lu xiixa ni cadídinu o xi guiráʼ zudiibe lugar gaca para gúnibe ni maʼ gudixhe íquebe (Ecl. 11:5). Peru naquiiñeʼ gánnanu ndiʼ: nanna Jiobá xi guiráʼ cadídinu ne zacanebe laanu para cadi guchéʼnenu laabe. Ne laapebe maʼ guniʼbe: «Zudieeʼ lii guendariene, ne zusiideʼ lii saluʼ lu neza ni naquiiñeʼ cheluʼ. Dxandipeʼ zudieeʼ conseju lii ne qué [zusaanaʼ de guuyadxiéʼ lii]» (Sal. 32:8). Yanna, ximodo rudii Jiobá conseju laanu yaʼ. Ximodo zanda cueendunu ni galán pur laani yaʼ. Xiñee zanda guni crenu ruluíʼ Jiobá xquidxi ca dxi stinu riʼ ximodo naquiiñeʼ sacaʼ yaʼ. Gudiʼnu lugar guicabi libru stiʼ Apocalipsis ca guendarinabadiidxaʼ riʼ.
RAPA DIOS LAANU NÉ CA CONSEJU STIʼ
11. Pabiáʼ nanna Jiobá de guiráʼ ni cazaaca ndaaniʼ ca neza binni ridagulisaa.
11 Lu visión ni zeeda lu capítulo 2 ne 3 stiʼ Apocalipsis, cuzeeteʼ biiyaʼ Jesucristu xi cayaca ndaaniʼ gadxe neza binni ridagulisaa guyuu Asia Menor. Lu visión que rihuinni nanna Jesús ximodo nuu cada binni ni nuu ndaaniʼ cada neza binni ridagulisaa. Nuu tiru dede ruzeetebe lá tuuxa, guluube gana laacaʼ ne bidiibe conseju ni caquiiñecaʼ. Xi rusiidiʼ visión riʼ laanu yaʼ. Bizulú cayaca ni na visión ca dede iza 1914. Gadxe neza binni ridagulisaa ni ruzeeteni nga zeeda gaca ca xpinni Cristu ni bibí, ne riquiiñeʼ guiráʼ ca neza binni ridagulisaa nuu lu Guidxilayú ca conseju rudii Jesús laacabe. Nga runi, zanda guininu riquiiñeʼ Jiobá Xiiñiʼ para gusiene xquidxi xi naquiiñeʼ guni. Ximodo rudiʼnu lugar gusiidiʼ Jiobá laanu yaʼ.
12. Ximodo rudiʼnu lugar gabi Jiobá laanu paneza chuunu.
12 Ti modo rudiʼnu lugar gusiidiʼ Jiobá laanu nga ora ridúʼndanu Stiidxabe. Ne riquiiñebe mozo ni nuu xpiaaniʼ ne ni runi jneza para gudii laanu stale conseju ni zeeda lu Biblia (Mat. 24:45). Pa racaláʼdxinu cueendunu ni galán la? naquiiñeʼ cueenu tiempu para guidúʼndanu cani ne gúninu cani lu xquendanabáninu. Ti modo rapa Jiobá laanu «para cadi guiaba [nu]» nga ora ridúʼndanu Biblia laasinu (Jud. 24). Ñee cadi dxandíʼ nuu tiru rudiiluʼ cuenta ruluíʼ para lii nga gucuá ti conseju ora maʼ cayuundaluʼ ca guiʼchiʼ rudii xquidxi Dios la? Pa zacá ni, gucuaani casi ti conseju ni cudii Jiobá lii. Nuu tiru rigapa huiiniʼ ti xhamígunu xíʼquenu para gabi laanu caquiiñeʼ gúninu xiixa. Zacaca nga zanda iquiiñeʼ Jiobá espíritu stiʼ para gacané laanu gudiʼnu cuenta paraa caquiiñeʼ guchaʼnu. Pa gácanu binni nadóʼ la? zudiʼnu lugar iquiiñeʼ Jiobá espíritu stiʼ para guluíʼ laanu paneza chuunu. Biblia na: «Dios, biiyaʼ chaahuiʼ guidubi nacaʼ, ne biiyaʼ xi nuu ndaaniʼ ladxiduáʼ. Biiyaʼ chaahuiʼ naa, ne biiyaʼ chaahuiʼ xi guiráʼ riníʼ iqueʼ ni riguu xizaa naa, ne biiyaʼ pa canazayaʼ lu ti neza ra zacanaʼyaʼ, ne biluíʼ naa ximodo sayaʼ lu neza ni qué zaluxe» (Salmo 139:23, 24). Yanna, guidúʼyanu pabiáʼ tiempu ribeenu para guidúʼndanu ne guiénenu Stiidxaʼ Dios.
13. Xiñee galán guidúʼyanu pabiáʼ tiempu ribeenu para guidúʼndanu Biblia.
13 Pa ribeenu stale tiempu para chizanu ne para gúninu xiixa ni riuuláʼdxinu la? maʼ qué zápanu tiempu para guidúʼndanu Biblia laasinu. Sicaríʼ guníʼ ti xpinni Cristu: «Cadi nagana nga gusaana binni de guʼndaʼ Biblia. Yanna riʼ jma nagueenda ridxela binni stale cosa ni guni para chuʼ nayecheʼ ne jma baratu cani. Caadxi de laacani nga televisión, computadora ne teléfono. Ne guiráʼ ladu nuucani». Pa qué gatananu, chaahuiʼ chaahuiʼ zará tiempu ribeenu para guidúʼndanu Biblia ne zedandá dxi maʼ qué liica zápanu tiempu para laani (Efe. 5:15-17). Galán guinabadiidxanu laca laanu: «Ñee ribeeʼ tiempu gatigá para guundaʼ ne guieneʼ xi guiráʼ rusiidiʼ Stiidxaʼ Dios la? O runeʼ ni ora si napaʼ ti libana, ne ora rinábacabe naa gutiideʼ xiixa lu ti guendaridagulisaa». Xi caquiiñeʼ gúninu pa nuunu zacá yaʼ. Galán iquiiñeʼ chaahuinu tiempu ribeenu para guni adorarnu Dios né binnilídxinu ne para guidúʼndanu Biblia laasinu ti ganda guiene chaahuinu guiráʼ ni rusiidiʼ Jiobá laanu para ganda gápabe laanu ti guilanu (Pro. 2:1-5).
RACANÉ DIOS LAANU PARA GUNI HUANTARNU
14. Ximodo rusihuinni Biblia nanna Jiobá xi runi sentirnu.
14 Nabé bidxaagalú David stale guendanagana dxi bibani (1 Sam. 30:3-6). Ca diidxaʼ bicaabe lu Biblia rusihuínnicani biene Jiobá ximodo biʼniʼ sentirbe. Biblia na: «Jiobá nuu gaxha de cani maʼ gucadé ladxidóʼ; ne rulabe cani maʼ biree gana». «Laca lii maʼ guniʼluʼ nacaʼ ti binni ni canagucachilú. Gudaa ca nisa rieeteʼ luaʼ ora ruunaʼ ndaaniʼ rii stiluʼ. Cadi zeedacani lu libru stiluʼ la?» (Salmo 34:18 ne 56:8.) Ne laaca nánnabe xi runi sentirnu. Riuu Jiobá gaxha de laanu ora maʼ nuunu triste, ora naná nuu ladxidoʼno ne ora maʼ bireʼnu gana. Racané nga laanu cásica gucaneni David, laa biindaʼ sicaríʼ: «Ziuaaʼ nayecheʼ ne ziecheniáʼ guendanachaʼhuiʼ stiluʼ, purtiʼ maʼ biiyaluʼ guendananá stinneʼ; maʼ nannuʼ xi guiráʼ yuubaʼ cadideʼ» (Sal. 31:7). Peru cadi nanna si Dios xi guendanagana cadxaagalunu, sínuque laaca racanebe laanu ora riguixhedxibe ladxidoʼno ne ora riguube gana laanu. Tobi de cani riquiiñebe para laani nga ca guendaridagulisaa stinu.
15. Xi rusiidiʼ ni bizaaca Asaf laanu.
15 Ni bizaaca Asaf racané laanu guiénenu xi guiráʼ ribeendunu ora chuunu guiráʼ guendaridagulisaa. Ni ruzaaquiʼ guʼxhuʼ riʼ biiyabe stale cosa ni cadi jneza cayuni binni dede guníʼ íquebe pur gana si cayuni adorarbe Dios ne guleeni gana laabe. Laabe guniʼbe: «Maʼ guca ladxiduáʼ casi ti cosa ni maʼ naíʼ [o naguíʼ], ne bineʼ sentir cayuubaʼ ca riñón stinneʼ». Pur ngue bilá nusaanabe de ñuni adorarbe Dios. Peru xi gucané laabe para guchaabe modo caníʼ íquebe yaʼ. «Guyuube ndaaniʼ santuariu nabé nandxóʼ stiʼ Dios.» Bichaabe modo caníʼ íquebe ora bidxaagabe ca bíʼchibe ni runi adorar Dios. Asaf biene zidiʼdiʼ si guiráʼ cani napa ca binni malu ne zadxiña dxi guni chaahuiʼ Jiobá guiráʼ ni cayaca (Sal. 73:2, 13-22). Laaca zacaca nabáninu ca dxi riʼ. Cumu ridúʼyanu cayaca stale cosa cadi jneza ndaaniʼ guidxilayú stiʼ Binidxabaʼ riʼ la? zándaca cueecani gana laanu. Peru ora ridagulisaanenu ca xpinni Cristu ratadxí ladxidoʼno ne racaneni laanu para chuʼnu nayecheʼ ora maʼ cayuni adorarnu Dios.
16. Ximodo racané ejemplu stiʼ Ana laanu.
16 Yanna, pa bizaaca xiixa ra ridagulisaanu ne pur laani cayaca nagana para laanu chuunu cani yaʼ. Zándaca nuunu triste purtiʼ maʼ cadi cayúninu xiixa dxiiñaʼ gúpanu ládecabe dxiqué. O zándaca bidxiichinenu tuuxa xpinni Cristu. Pa zacá nuuluʼ, ejemplu stiʼ Ana zanda gacané lii. Stiidxaʼ Dios na: «Ne bigaanda dxi gudii Elcaná ofrenda, ne bidiibe ni raca caber Peniná xheelabe ne guiráʼ ca xiiñiʼ cásica hombre ne gunaa; peru Ana bidiibe laa ti ndaa si. Yanna, Ana ndaʼ nga nadxiibe, peru casi ora nuseeguʼ Jiobá matriz stiʼ purtiʼ qué ganda gapa xiiñiʼ. Peru nabé rucaalú [Peniná] laabe ne ruchiichi laabe dede rusituílube para chuʼbe triste purtiʼ biseeguʼ Jiobá matriz stibe» (1 Samuel 1:4-8). Guietenaláʼdxinu pabiáʼ gucanabe purtiʼ nabé bichiichi Peniná laabe, sti gunaa ni bichaganáʼ Elqaná. Ne jmaruʼ si naná rácani para laabe ora ganda dxi chécabe ndaaniʼ santuariu nuu Siló para guni adorárcabe Jiobá cásica rúnicabe guiráʼ iza. Nabé rusituí gunaa que lube dede «ruunabe ne qué robe». Peru qué nudiibe lugar nucueeza ngue laabe de ñuni adorarbe Jiobá, laa biiyaʼ pabiáʼ ruzuubabe diidxaʼ ne guluu ndaayaʼ laabe despué (1 Sam. 1:11, 20).
17, 18. 1) Ximodo riguu ca guendaridagulisaa stinu gana laanu. 2) Ximodo runi sentirluʼ ora ruuyaluʼ cayapa Jiobá laanu ne stale guendarannaxhii ti ganda guilanu.
17 Laanu, ca xpinni Cristu nápanu razón para chinándanu ejemplu stiʼ Ana. Naquiiñeʼ chuunu guiráʼ guendaridagulisaa, purtiʼ racá ricaanu guiráʼ stipa ni caquiiñenu ca dxi riʼ (Heb. 10:24, 25). Racá ridúʼyanu pabiáʼ nadxii ca xpinni Cristu laanu ne riguu nga gana laanu. Zándaca gunadiáganu xiixa ni chindá ndaaniʼ ladxidoʼno lu ti libana ne ora guicabi tuuxa. O zándaca ante guzulú ne ora guiluxe ti guendaridagulisaa gucaadiaga ti xpinni Cristu laanu o gabi laanu xiixa ni quixhedxí ladxidoʼno (Pro. 15:23; 17:17). Laaca riuʼnu gana ora ridúʼndanenu laacabe diidxaʼ riuundaʼ para gusisácanu Jiobá. Órapeʼ jma nuu ni cuchiiñaʼ xquendabiaaninu nga jma caquiiñenu stipa ni rudii ca guendaridagulisaa stinu. Racá nga riguixhedxí Jiobá ladxidoʼno ne racané laanu para guzúʼbanu diidxaʼ (Sal. 94:18, 19).
18 Cumu nánnanu rapa Dios laanu né stale guendarannaxhii la? runi sentirnu qué zazaacanu gastiʼ cásica biʼniʼ sentir Asaf ora biindaʼ: «Maʼ naazeluʼ nayaʼ ladu derechu. Né conseju stiluʼ zuluiʼluʼ naa xi guneʼ» (Sal. 73:23, 24). ¡Nabé rudiʼnu xquíxepeʼ Jiobá purtiʼ cayapa laanu ti ganda guilanu!
[Guendarinabadiidxaʼ stiʼ párrafo]
[Imagen ni zeeda lu yaza 28]
Laaca Jiobá nga bichiña lii ra nuu
[Imagen ni zeeda lu yaza 30]
Rapa ca conseju stiʼ Dios laanu
[Imagen ni zeeda lu yaza 31]
Ruzuhuaʼnu dxiichiʼ purtiʼ nuu tu caguu gana laanu
