Zanda chuʼluʼ nayecheʼ neca qué runi adorar binnilídxiluʼ Dios

«Purti zándaca ulá lu xheela lu.» (1 COR. 7:16)

BIYUBI XI GUICÁBILUʼ:

Xi zanda gúniluʼ para chuʼluʼ tobi si né binnilídxiluʼ neca qué runi adorarcaʼ Dios.

Xi zanda gúniluʼ ti chuulaʼdxiʼ binnilídxiluʼ guiziidiʼ de Dios.

Ximodo zanda gacanenu ca Testigu ni qué runi adorar binnilidxi Dios.

1. Xi zándaca guizaaca ndaaniʼ ti familia ora guzulú tobi de laacaʼ guiziidiʼ de Reinu.

 DXI biseendaʼ Jesús ca discípulo stiʼ chigucheechecaʼ diidxaʼ gúdxibe laacaʼ gábicaʼ binni: «Ma zeda dxiña dxi guni mandar Dios» (Mat. 10:1, 7). Ca binni ni gucaadiaga ca diidxaʼ riʼ, zusiécheni laacaʼ ne zacaneni laacaʼ chuʼcaʼ tobi si. Peru laaca gudixhená Jesús ca apóstol stiʼ ne gúdxibe laacaʼ ziuu binni zucaalú laacaʼ ora gucheechecaʼ stiidxaʼ Reinu (Mat. 10:16-23). Ne nuu biaje nabé naná zácani, purtiʼ binnilídxipeʼ binni nga zucaalú laa (biindaʼ Mateo 10:34-36).

2. Xiñee zanda chuʼnu nayecheʼ neca qué runi adorar binnilídxinu Dios.

² Ñee riníʼ ca diidxaʼ ni maʼ bizéʼtenu ca qué zanda guibani ca testigu stiʼ Jiobá nayecheʼ pa nabezanecaʼ familia sticaʼ ni qué runi adorar Dios la? Coʼ. Dxandíʼ, nuu tu nabé naná modo rucaalú binnilidxi laa, peru cadi guiráʼ diʼ biaje rácani zacá. Ne zándaca ziuu dxi gusaanacaʼ de gúnicaʼ ni. Yanna, xi zanda gacané laanu para chuʼnu nayecheʼ neca gucaalú binnilídxinu laanu yaʼ. Ni zacané laanu nga modo gúʼyanu cani gúnicabe laanu. Ne neca naná modo guibáninu, pa qué gusaana de gúninu ni na Jiobá la? zaguube ndaayaʼ laanu ne zacanebe laanu chuʼnu nayecheʼ. Guidúʼyanu chupa cosa ni zacané ca xpinni Cristu chuʼcaʼ nayecheʼ: 1) gúnicabe stipa pur chúʼcabe tobi si né binnilídxicabe ne 2) cadi guireecabe gana de guyúbicabe modo gacanécabe binnilídxicabe guni adorar Dios.

BIYUBI XIMODO CHUʼ BINNILÍDXILUʼ NAYECHEʼ

3. Xiñee naquiiñeʼ gúninu stipa pur chúʼnenu binnilídxinu tobi si.

³ Jma nagueenda ziuulaʼdxiʼ ca binnilídxinu guiziidicaʼ de Dios pa ruyúbinu modo chuʼnu tobi si né laacaʼ (biindaʼ Santiago 3:18). Dede pa qué runi adorar binnilídxinu Dios, naquiiñeʼ gúninu stipa pur cadi chuʼdindenenu  laacabe. Ximodo zanda gúninu nga yaʼ.

4. Xi zanda gúninu para gatadxí ladxidoʼno.

⁴ Laanu ca xpinni Cristu naquiiñeʼ gúninu stipa pur chuʼ ladxidoʼno nayecheʼ. Para nga naquiiñeʼ guni orarnu purtiʼ óraca «zaguixhe dxí [Dios] ladxidóʼ [no]» (Fili. 4:6, 7). Laaca ziuʼnu nayecheʼ ne ziuʼnu tobi si né binni ora guizíʼdinu de Jiobá ne gúninu ni na ca conseju zeeda lu Biblia (Isa. 54:13). Ne laaca rápanu ndaayaʼ ora ricábinu lu guendaridagulisaa ne ora rucheechenu diidxaʼ de guidubi ladxidoʼno. Stale de cani napa familia ni qué runi adorar Dios, ridxélacaʼ modo gúnicaʼ ni na Dios. Guzéʼtenu ejemplu stiʼ Enza. a Nabé rucaalú xheelabe laabe purtiʼ runi adorarbe Dios, nga runi, ante chigucheechebe diidxaʼ rúnicabe guiráʼ ni naquiiñeʼ gaca ndaaniʼ lídxibe primeru. Laabe guniʼbe: «Riguu Jiobá ndaayaʼ naa, nga runi cada biaje chigucheecheʼ diidxaʼ ribeenduáʼ ni galán». Cadi guendaridxagayaa nga gúʼyacabe laabe nayecheʼ ne dxátipa ladxidoʼbe.

5. Xi guendanagana ridxaagalú cani nabezané binnilidxi ni qué runi adorar Dios, ne xi zanda gacané laacabe.

⁵ Naquiiñepeʼ nga gúninu stipa para chuʼnu tobi si né ca binnilídxinu ni qué runi adorar Dios. Nuu biaje zácani nagana, purtiʼ zándaca gacaláʼdxicabe gúninu xiixa ni na Biblia cadi jneza. Zándaca nuu de laacabe zadxiichi nécabe laanu ora qué gúninu modo nácabe, peru pa qué gusaana de gúninu ni na Dios zacaneni para chuʼnu tobi si né ca binnilídxinu. Peru pa ni canábacabe laanu gúninu qué zucaani laanu guchéʼnenu ca ley stiʼ Dios la? zanda gúninu ni ne zacá ziúʼnenu laacabe tobi si. Biblia na: «Ora riuulaʼdxiʼ Jiobá neza stiʼ ti binni, rucaabe ca xhenemigu chuʼcaʼ tobi si né binni ca» (Proverbios 16:7). Cada biaje gápanu xiixa guendanagana, galán guinábanu conseju ca binnigola ne guyúbinu lu ca libru ne revista rudii mozo ni nuu xpiaaniʼ ne ni runi jneza (Pro. 11:14).

6, 7. 1) Xiñee qué riná caadxi binni gusiidiʼ ca testigu stiʼ Jiobá binnilídxicaʼ ni cá lu Biblia. 2) Xi naquiiñeʼ guni tuuxa ni cayuundaʼ Biblia o ti Testigu ora gucaalú binnilidxi laa pur caziidiʼ de Dios.

⁶ Para ganda chuʼnu tobi si né ca binnilídxinu ni qué runi adorar Dios naquiiñeʼ guni crenu Jiobá ne guiénenu laacabe (Pro. 16:20). Dede cani deruʼ bizulú cayuundaʼ Biblia naquiiñeʼ gúnicaʼ zacá. Nuu binni qué ridxiichi ora guzulú guiziidiʼ xheelaʼ ni cá lu Biblia, ne nuu dede ruuyaʼ ribeendú binnilidxi ni galán óraca. Peru nuu tu laa ridxiichi. Ngapeʼ nga ni bizaaca Esther, yanna maʼ Testigu laabe. Laa nabé bidxiichi dxi bizulú cusiidiʼ ca testigu stiʼ Jiobá xheelaʼ ni cá lu Biblia. Ester guníʼ: «Bisaabeʼ caadxi de ca libru ne revista stibe lade guixi, ne bicaaguiéʼ xcaadxi». Ti hombre ni láʼ Howard laaca bidxiichi dxi bizulú cayuundaʼ xheelaʼ Stiidxaʼ Dios, laa cusiene: «Stale hombre ridxíbicaʼ purtiʼ riníʼ íquecaʼ zándaca cayuu xheelacaʼ lade ti secta ni caguite laacaʼ. Ne cumu ruzulúcabe zuniná binni xheelacabe la? nga runi, ridxiichicabe.

⁷ Pa ti binni ni cayuundaʼ Biblia gucaalú xheelaʼ laa, ximodo zanda gacanenu laabe yaʼ. Naquiiñeʼ gusiénenu laabe cadi galán gusaana de gúʼndabe Biblia. Zándaca guchaa xheelabe modo riníʼ ique pa gácabe nachaʼhuiʼ né laa ne guni respetarbe laa (1 Ped. 3:15). Sicaríʼ guníʼ Howard: «Rudieeʼ xquíxepeʼ xheelaʼ purtiʼ nabé nadóʼ ne qué ridxiichi nagueenda». Xheelabe guníʼ: «Gúdxibe naa gusaanaʼ de guundaʼ Biblia. Nabe caguítecabe iqueʼ. Bineʼ stipa para cadi tindediidxadu ne gudxeʼ laabe zándaca dxandíʼ ni caniʼbe, peru cadi zaqué diʼ ruuyaʼ ni. Gunabaʼ laabe gúʼndabe libru cayuundaʼ que. Biindasibe ni nabé bidxagayaabe ne maʼ qué ñábirube  naa gastiʼ». Laaca galán guietenaláʼdxinu zanda guni sentir xheelaʼ tuuxa xpinni Cristu ni qué ruundaʼ Biblia stubi o guiníʼ ique zanda guilaa xquendaxheelaʼ pur chigucheecheʼ xheelaʼ diidxaʼ ne pur rié ca guendaridagulisaa. Né diidxaʼ nadóʼ ne diidxaʼ naxhi zanda gacanebe xheelabe cadi chuʼ xizaa.

GUCANÉ LAACABE CHUULÁʼDXICABE GUIZIIDICABE DE DIOS

8. Xi guníʼ Pablu naquiiñeʼ guni ti xpinni Cristu ni qué runi adorar xheelaʼ Dios.

⁸ Apóstol Pablu guníʼ cadi naquiiñeʼ gusaana ti xpinni Cristu xheelaʼ purtiʼ si que runi ni na Dios (biindaʼ 1 Corintios 7:12-16). b Ne laaca rusietenaláʼdxibe ca xpinni Cristu zándaca guidxiña dxi guiziidiʼ xheelacaʼ ni cá lu Biblia, nga zacané laa guibani jma nayecheʼ. Nécapeʼ galán guni tuuxa stipa pur gusiidiʼ xheelaʼ ni cá lu Biblia, naquiiñeʼ gúʼyabe pora zanda gúnibe ni ti cadi cueebe gana laa. Guidúʼyanu caadxi ejemplu ni rusihuinni zacá ni.

9. Xi cadi naquiiñeʼ gúninu ora guinínenu ca binnilídxinu ni cazíʼdinu lu Biblia.

⁹ Ora guiene ca binni ni cayuundaʼ Biblia ca cosa sicarú cusiidini, nabé riéchecaʼ ne nuu tiru guidubi dxi maʼ caniʼcaʼ de ni caziidicaʼ, ne ribézacaʼ pa ñanda dede né ca binnilídxicaʼ niziidiʼ stiidxaʼ Reinu. Nga nga ni bizaaca Fred, laa guníʼ: «¡Pa ñanda si guiráʼ binni ñabeʼ xi caziideʼ!». Peru cadi guiráʼ diʼ biaje ziuuláʼdxicabe ni. Sicaríʼ guníʼ xheelaʼ Fred: «Gucuabe ladxiduáʼ purtiʼ guiráʼ ora maʼ cayábibe naa de ni caziidibe». Guzéʼtenu ejemplu stiʼ ti gunaa ni biziidiʼ ni cá lu Biblia gudiʼdiʼ si 18 iza de guca xheelaʼ Testigu. Gunaa ca cusiene: «Naa racalaʼdxeʼ guiziideʼ peru chaahuiʼ chaahuiʼ». Pa cusíʼdinu tuuxa peru xheelabe qué riuulaʼdxiʼ guiziidiʼ de Dios, galán gusiénenu laabe ximodo gábibe xheelabe de ni caziidibe sin guchiichibe laa. Moisés guníʼ sicaríʼ: «Modo gusiideʼ laatu zeeda gácani casi gota nisaguié, ne ca diidxaʼ ni riniéʼ zeeda gácani casi gupa, casi nisaguié dé ni riaba lu guixi gaʼ ne casi nisaguié ni rugadxe guixi gaʼ» (Deu. 32:2). Chupa chonna diidxaʼ ni guininu órapeʼ caquiiñeʼ jma zindani ndaaniʼ ladxidoʼbe ne zeeda gácani casi gota nisaguié, ne jma galán ni que gundaahuanu laabe ne guiráʼ ni guininu.

10-12. 1) Xi conseju bidii Pedru ca xpinni Cristu ni qué runi adorar xheelaʼ Dios. 2) Ximodo biziidiʼ ti gunaa chinanda conseju ni zeeda lu 1 Pedro 3: 1, 2.

¹⁰ Gucané Dios apóstol Pedru para bidii conseju riʼ ca gunaa ni qué runi cré xheelacaʼ Dios: «Lauzuuba stiidxa xheela tu, purti pa nuu de laaca qué runi cre stiidxa Cristu la? zándaca iguudxi ra guʼya runi xheela jneza ne runi respetar laa. Ne zacá cadi naquiiñe iníʼ pe tu para ucuudxi tu laacaʼ»  (1 Ped. 3:1, 2). Ti gunaa zanda gacané xheelaʼ chuulaʼdxiʼ guiziidiʼ de Dios pa guni respetar laabe, neca xheelabe qué gaca nachaʼhuiʼ né laabe ne qué gusihuinni nadxii laabe. Zacaca nga naquiiñeʼ guni ti hombre ni qué runi adorar xheelaʼ Dios, naquiiñeʼ gusihuínnibe nadxiibe xheelabe neca gucaalú laabe (1 Ped. 3:7-9).

¹¹ Stale xpinni Cristu ni nabani yanna maʼ biiyacaʼ dxandíʼ ni na ca conseju bidii Pedru. Guzéʼtenu ejemplu stiʼ Selma. Steve xheelabe, nabé bidxiichi purtiʼ bizulú cayuundané ca Testigu laabe Biblia. Dede guníʼ Steve: «Nabé bidxiicheʼ, qué nidxelaʼ xi ñuneʼ ne ruluíʼ zuniteʼ xheelaʼ». Selma guníʼ: «Dede ante guiziideʼ de Dios maca nagana modo nabánidu. Nisi maʼ cuyubeʼ ximodo guiniéʼ purtiʼ nabé nagueenda ridxiichibe. Dxi maʼ bizuluáʼ biindaʼ Biblia, beeda gácani jma nagana para naa». Xi gucané Selma para bidxiilú guendanagana que yaʼ.

¹² Qué ñaandaʼ diʼ Selma ca diidxaʼ gudxi Testigu ni cayuundané laabe que: «Gúcani ti dxi huaxiéʼ rapaʼ gana guundaʼ. Ti gueelaʼ ante, naa ne Steve gudinde diidxadu, ne bininabe naa, ngue runi, nabé nuaaʼ triste ne qué gapaʼ gana. Gudxeʼ Testigu que guiráʼ ni gúcadu, óraque gunábabe naa guundaʼ 1 Corintios 13:4-7. Rietenalaʼdxeʼ guniéʼ sicaríʼ: “Qué huayuu dxi gusihuinni Steve nadxii naa casi modo na raríʼ”. Peru gucanebe naa guchaa modo riníʼ iqueʼ né ca diidxaʼ riʼ: “Yanna lii yaʼ. Panda de cani ruzeeteʼ textu ca rúniluʼ pur xheelaluʼ”. Naa gudxeʼ laabe qué runeʼ nin tobi, purtiʼ nabé feu xpiaʼbe. Né diidxaʼ nadóʼ gúdxibe naa sicaríʼ: “Selma, tuu nga caziidiʼ para gaca xpinni Cristu, Steve la? o lii”. Bidieeʼ cuenta caquiiñeʼ guchaaʼ modo naa. Gunabaʼ Jiobá gacané naa gusihuinneʼ jma nadxieeʼ xheelaʼ. Chaahuiʼ chaahuiʼ bichaa modo nabánidu». Gudiʼdiʼ 17 iza para guca Steve xpinni Cristu.

XIMODO ZANDA GACANÉ XCAADXI BINNI

13, 14. Ximodo zanda gacanenu ca xpinni Cristu ni qué runi adorar binnilídxicaʼ Dios.

¹³ Casi gota nisaguié ni rugadxe layú ne racané para igaa ca yaga ca, zacaca nga zeeda gaca ni runi ca binni ridagulisaa para gacanecaʼ guibani ca Testigu nayecheʼ, neca qué runi adorar binnilídxicaʼ Dios. Elvina de Brasil bidii cuenta zacá ni ora guníʼ: «Zuhuaaʼ dxiichiʼ lu stiidxaʼ Dios purtiʼ nadxii ca bizanaʼ ne ca bendaʼ naa».

¹⁴ Peru laaca zanda gacanenu ca binnilídxicabe ni qué runi adorar Dios ora gannaxhiinu laacaʼ ne gácanu nachaʼhuiʼ né laacaʼ. Guidúʼyanu ni bizaaca ti xpinni Cristu de Nigeria, laa bizulú biʼniʼ adorar Dios gudiʼdiʼ si trece iza de bizulú xheelaʼ. Laabe guniʼbe: «Ziniáʼ ti testigu stiʼ Jiobá ndaaniʼ ti carru. Málasi bixiiñeʼ ni, ngue runi guyebe ndaaniʼ ti guidxi ni nuu jma gaxha para  guyúbibe ca Testigu para gacanecaʼ laabe. Gúpacabe laadu de biuuzaʼ ralídxicabe ne bidiicabe guiráʼ ni caquiiñedu, ruluiʼpeʼ nga maʼ xadxí de runibiáʼcabe laadu. ¡Óraque nga biiyaʼ pabiáʼ nadxiisaacabe ne ngue nga ni huayabi xheelaʼ naa maʼ xadxí!». Yanna guzéʼtenu de ti gunaa de Inglaterra ni guca xpinni Cristu gudiʼdiʼ si dieciocho iza de guca xheelaʼ Testigu. Laabe rietenaláʼdxibe: «Nabé runi invitar ca Testigu guirópadu chidoʼdo ralídxicaʼ. Rucaacabe naa guneʼ sentir nayecheʼ ládecabe». Laaca ndaaniʼ guidxi ca nuu ti hombre ni bizaaca xiixa zacagá, laaca guca Testigu casi xheelaʼ. Hombre ca guníʼ: «Reeda ca xpinni Cristu ra lídxidu ne runi invitarcaʼ laadu chuudu ralídxicaʼ. Bisihuínnicabe rizaaláʼdxicabe laadu, jmaruʼ si dxi yegataʼ ra hospital, yeganna stale de laacabe naa raqué». Guiranu zanda guyúbinu xi gúninu para gacanenu ca binnilidxi ca Testigu ni qué runi adorar Dios.

15, 16. Xi zanda guni ca xpinni Cristu para guibánicaʼ nayecheʼ neca qué runi adorar binnilídxicaʼ Dios.

¹⁵ Naquiiñeʼ gánnanu, neca tiidiʼ stale iza de cayuni ti xpinni Cristu casi modo na stiidxaʼ Dios ne guiniʼnécabe laacaʼ de ni caziidicabe la? cadi guiráʼ diʼ biaje zaca xheelacabe, xiiñicabe, bixhózecabe ne xcaadxi binnilídxicabe xpinni Dios. Zándaca qué ziuu dxi chuuláʼdxicabe ni o qué liica zanácabe gucaadiágacabe (Mat. 10:35-37). Neca zacá naquiiñeʼ gácanu nachaʼhuiʼ né laacabe guiráʼ ora. Ti hombre ni guca Testigu despué de xheelaʼ, guníʼ sicaríʼ: «Ora rusihuínninu ca guenda ni napa ca xpinni Cristu, qué gánnanu xi zucaani xheelanu guiníʼ ique. Zándaca despué zindani ndaaniʼ ladxidoʼbe, nga runi, cadi guireʼnu gana».

¹⁶ Peru zanda guibani ti xpinni Cristu nayecheʼ, neca qué guni adorar binnilidxi Dios. Ti gunaa xpinni Cristu, maʼ ziné veintiún iza de cuyubi ximodo chuulaʼdxiʼ xheelaʼ guiziidiʼ de Reinu, peru qué ganda diʼ. Ximodo runi sentirbe yaʼ. «Qué huasaanaʼ de chuaaʼ nayecheʼ purtiʼ runeʼ guiráʼ ni riuulaʼdxiʼ Jiobá, ruzuubaʼ stiidxabe ne runeʼ stipa pur chuaaʼ jma gaxha de laabe. Nabé ribeeʼ tiempu para guundaʼ Biblia, chaaʼ guendaridagulisaa, chigucheecheʼ diidxaʼ ne gacaniáʼ ca xpinni Cristu. Nga racané naa chuaaʼ jma gaxha de Jiobá ne gapaʼ ladxiduáʼ.» (Pro. 4:23.)

¡CADI GUIREELUʼ GANA!

17, 18. Xi zanda cueza ti xpinni Cristu neca qué runi adorar binnilidxi Jiobá.

¹⁷ Pa cayuni adorarluʼ Jiobá peru binnilídxiluʼ qué runi ni la? cadi guireeluʼ gana. Bietenalaʼdxiʼ, «Jiobá qué zusaana xquidxi purtiʼ nabé risaca labe» (1 Sam. 12:22). Ziuube gaxha de lii pa qué guixéleluʼ de laabe. Biblia na: «Ngue runi, bireebe de ra nuu Asá ne gúdxibe laa: “¡Lagucaadiaga naa Asá ne guiráʼ ca binni de Judá ne Benjamín! Jiobá nuuné laatu pa laatu nuunetu laa; pa guyúbitu laabe la? zudiibe lugar guidxélatu laabe; peru pa gusaanatu laabe la? laabe zusaanabe laatu[”]» (2 Crónicas 15:2). Biʼniʼ ni na conseju riʼ: «Guyuu nayecheʼ ora guʼnuʼ ni na Jiobá [...]. Gunabaʼ Jiobá gabi lii modo saluʼ neza stiluʼ, ne gudixhe ladxidoʼloʼ ndaaniʼ nabe, ne laabe zacanebe lii» (Sal. 37:4, 5). Cadi gusaana de guni orarluʼ ne biʼniʼ cré zacané Bixhózeluʼ ni nuu guibáʼ lii para gudxiiluluʼ intiica guendanagana gueeda luguialuʼ (Rom. 12:12).

¹⁸ Gunabaʼ Jiobá gudii lii espíritu santu para ganda guibániluʼ nayecheʼ ralídxiluʼ (Heb. 12:14). Zándaca zadxiña dxi guiale ndaaniʼ ladxidóʼ ca binnilídxiluʼ guiziidicaʼ de Dios. Pa gúniluʼ guiráʼ dxiiñaʼ stiluʼ para gusisácaluʼ Dios la? ziuuluʼ nayecheʼ ne zatadxí ladxidoʼloʼ (1 Cor. 10:31). Qué chuʼ dxi guiaandaʼ ndiʼ lii: nadxii guiráʼ ca xpinni Cristu lii ne zacanecaʼ lii.

[Nota]

[Guendarinabadiidxaʼ stiʼ párrafo]

[Imagen ni zeeda lu yaza 28]

Biyubi pora zanda gusiéneluʼ cani runi creluʼ

[Imagen ni zeeda lu yaza 29]

Bizaalaʼdxiʼ xheelaʼ ca Testigu ni qué runi adorar Dios