Rihuinni gunáʼ nga religión ni dxandíʼ purtiʼ nuu ca xpinni tobi si
Rihuinni gunáʼ nga religión ni dxandíʼ purtiʼ nuu ca xpinni tobi si
«Zuneʼ laacabe tobi si, casi dendxuʼ ni nuu ndaaniʼ currá.» (MIQ. 2:12)
1. Xi rusihuinni nuu xpiaaniʼ Dios pur guiráʼ cani bizáʼ.
SICARÍʼ guníʼ ti salmista: «¡Biaa pabiáʼ nga cani maʼ bíʼniluʼ Jiobá! Ne guendabiaaniʼ nga bíʼniluʼ de guirani. Guidxilayú riʼ dxaʼ de guiráʼ ni bizaʼluʼ» (Sal. 104:24). Rihuinni dxíchica pabiáʼ nuu xpiaaniʼ Dios pur modo bizáʼ guiráʼ cosa. Ximodo rihuinni ni yaʼ. Pur modo riquiiñesaa ca cosa ni nabani de xcaadxi cosa ni nabani para ganda guibánicaʼ, casi ca yaga, ca bacteria, ca manihuiiniʼ ne xcaadxi maniʼ. Laaca zacagá nga runi xcuerpu binni dxiiñaʼ, dede ca célula jma nahuiiniʼ hasta ca órganu jma naroʼbaʼ ni napa binni para guibani, tobi si modo runi guirácani dxiiñaʼ para ganda chuʼnu nazaaca ne ganda gúninu stale cosa.
2. Casi ridúʼyanu lu dibuju ni zeeda lu yaza 13, xiñee biiyaʼ ca binni de dxiqué casi ñaca guca ti milagru lade ca xpinni Cristu pur guyuucaʼ tobi si.
2 Binni laaca riquiiñeʼ de stobi para ganda guibani purtiʼ zacá nga bizáʼ Dios laacaʼ. Bizaʼbe binni de gadxé gadxé raza, gadxé gadxé modo laacaʼ, ne gadxé gadxé ni zanda gúnicaʼ, ti ganda gacanésaacaʼ. Ne laaca bíʼnibe laacaʼ casi laabe, bidiibe ca guenda ni gacané laacaʼ gacanésaacaʼ (Gén. 1:27; 2:18). Peru binni guidxilayú nuucaʼ zitu de Dios ne qué huayuu dxi ganda chuʼcaʼ tobi si (1 Juan 5:19). Nga runi, lu primé siglu que ruluíʼ casi ñaca guca ti milagru lade ca xpinni Cristu purtiʼ guyuucaʼ tobi si neca guyuu binni risaca ládecaʼ casi ca gunaa de Grecia, ca judíu ni nanna stale, ca esclavu ne cani biʼniʼ adorar bidóʼ ante (Hech. 13:1; 17:4; 1 Tes. 1:9; 1 Tim. 6:1).
3. 1) Xi ejemplu riquiiñeʼ Biblia para gusiene modo nuu ca xpinni Cristu tobi si. 2) Xi guendarinabadiidxaʼ zacábinu lu tema riʼ.
3 Religión ni dxandíʼ racaneni laanu gúninu dxiiñaʼ tobi si cásica tobi si runi guiráʼ ni napa binni lu cuerpu stiʼ dxiiñaʼ (biindaʼ 1 Corintios 12:12, 13). Lu tema riʼ zacábinu ca guendarinabadiidxaʼ riʼ: Ximodo racané religión ni dxandíʼ ca laanu chuʼnu tobi si. Xiñee Jiobá si nga zanda gacané millón de binni de guiráʼ guidxi chuʼcaʼ tobi si. Xii nga cani zanda gucaa laanu cadi chuʼnu tobi si, ne ximodo racané Jiobá laanu ti cadi gusaananu de chuʼnu tobi si. Ne últimu la? xiñee cadi nuu ca religión ni nacaʼ zinándacaʼ Cristu ca tobi si cásica nuunu laanu cani dxandíʼ xpinni Cristu.
Ximodo racané religión ni dxandíʼ ca laanu chuʼnu tobi si
4. Ximodo racané religión ni dxandíʼ ca laanu chuʼnu tobi si.
4 Laanu, cani dxandíʼ xpinni Cristu, nánnanu Jiobá nga bizáʼ guiráʼ xixé cosa, laabe nga ni jma risaca lu guidubi naca guibáʼ ne Guidxilayú (Apo. 4:11). Nga runi, neca gadxé gadxé modo nabani ca xpinni Cristu ne de gadxé gadxé guidxi laacaʼ, guiracaʼ runi respetarcaʼ ca ley ne ca conseju ni zeeda lu Biblia. Jnézapeʼ nga modo rinínenu Jiobá purtiʼ rábinu laabe «Bixhoze[nu]» (Isa. 64:8; Mat. 6:9). Pur nga, guiranu ni nuunu ndaaniʼ xquídxibe reeda gácanu casi bíʼchinu ne bizáʼnanu ne nuunu tobi si casi modo guníʼ salmista riʼ: «¡Laguuyaʼ! ¡Pabiáʼ galán ne sicarú nga chuʼ ca bíʼchinu ne ca bizáʼnanu tobi si!» (Sal. 133:1).
5. Xi guenda nga zacané chuʼ cani dxandíʼ xpinni Cristu tobi si.
5 Neca gulené ca xpinni Cristu donda, cayúnicaʼ ni na Dios tobi si purtiʼ maʼ biziidicaʼ gannaxhiisaacaʼ. Jiobá nga cusiidiʼ laanu ne guirútiruʼ zanda gúnini jma galán que laabe (biindaʼ 1 Juan 4:7, 8). Stiidxabe cusiene laanu sicaríʼ: «Laguiá binni ne lagaca nachaʼhui ne laacaʼ. Cadi udxiiba tu laca laatu, lagaca nadóʼ, cadi idxiichi tu neca uyubi cabe uchiichi cabe laatu. Cadi ixhacalaʼdxi saa tu, ne laguni perdonar ni guni stobi laatu. Casi bini perdonar [Jiobá] laatu, zacaca laguni. Peru jma naquiiñe ganaxhii saa tu, purti zacá zaca pe tu tobi si» (Col. 3:12-14). Casi maʼ bidúʼyanu ca, guendarannaxhii ca nga ti guenda ni rusihuinni tuu nga cani dxandíʼ naca xpinni Cristu ne laani nga racaneni laanu chuʼnu tobi si. Ñee cadi dxandíʼ maʼ bidúʼyanu stale biaje zacá ni la? (Juan 13:35.)
6. Ximodo racané cani chigueedané Reinu ca laanu chuʼnu tobi si.
6 Cani dxandíʼ xpinni Cristu laaca nuunu tobi si purtiʼ runi crenu Reinu si stiʼ Dios nga zanda gacané binni guidxilayú. Nánnanu qué zandaa ziuu gobiernu ca lugar stiʼ guiráʼ ca políticu ni nuu lu guidxilayú riʼ, ne zaguube ndaayaʼ guiráʼ ca binni ni guzuubaʼ stiidxabe ora gudiibe laacaʼ guendariuudxi ni qué zaluxe (Isa. 11:4-9; Dan. 2:44). Nga runi nabáninu casi na ca diidxaʼ guníʼ Jesús: «Cásica naa cadi zinanda guidxilayú zaqueca [ca discípulo stinneʼ] cadi zinanda cabe guidxilayú» (Juan 17:16). Randa riuu ca xpinni Cristu tobi si purtiʼ qué riecaʼ lu guendaridinde neca nuu stale guidxi cadinde lu guidxilayú riʼ.
Ti modo si zanda guizíʼdinu de Dios
7, 8. Ximodo racané cani rizíʼdinu de lu Biblia laanu para chuʼnu tobi si.
7 Ca xpinni Cristu de primé siglu que guyuucaʼ tobi si, purtiʼ tobi si ni biziidicaʼ. Gúnnacabe biquiiñeʼ Jesús ti grupu de hombre ra zeeda ca apóstol ne ca binnigola de Jerusalén para gusiidicaʼ ne guluiʼcaʼ ca xpinni Cristu xi naquiiñeʼ gúnicaʼ. Grupu de hombre ni biʼniʼ adorar Dios que yenándacabe ni na Stiidxaʼ Dios ora gudíxhecabe gaca xiixa, ne para gunda gúdxicabe ca neza binni ridagulisaa que xi gudixhe íquecabe gaca la? biquiiñecabe ca binnigola ni yeganna ca neza binni ridagulisaa que. Ne Biblia ruzeeteʼ de caadxi de laacabe ne ca diidxaʼ riʼ: «Ne irá guidxi ra udiʼdi cabe byuíʼ né cabe ca binni que ni gudixhe ca apóstol ne ca hermanu gola ni nuu Jerusalén guni ca xpinni Cristu» (Hech. 15:6, 19-22; 16:4).
8 Ca dxi nabáninu riʼ laaca nuu ti grupu de hombre ni rabi laanu xi naquiiñeʼ gúninu, laacabe nga Grupu ni Zaniruʼ, ne ca xpinni Cristu ni bibí nga nuu lu grupu ca ne laacabe racanécabe ca binni ridagulisaa ni nuu lu guidubi naca Guidxilayú chuʼcaʼ tobi si. Ne para gacanécabe ca xpinni Cristu chuʼcaʼ tobi si ribeecabe libru ne revista lu stale diidxaʼ para uquídxicabe fe sticaʼ. Ne cumu lu Stiidxaʼ Dios nga ribeecabe guiráʼ ni rusiidicabe ca xpinni Cristu la? zanda guininu Jiobá nga cusiidiʼ laacabe ne cadi hombre (Isa. 54:13).
9. Ximodo racané dxiiñaʼ bisaanané Dios laanu chuʼnu tobi si.
9 Ca binnigola ni nuu ndaaniʼ ca neza binni ridagulisaa ca laaca racanécabe para chuʼ ca xpinni Cristu tobi si. Ximodo rúnicabe ni yaʼ. Ra rizanírucabe lu dxiiñaʼ ni cayaca de guireeche diidxaʼ. Ni racané ca xpinni Cristu para chuʼcaʼ tobi si ti gúnicaʼ ni na Dios jma nadipaʼ ni que ca cosa ni rucaa binni guidxilayú chuʼcaʼ nayecheʼ ti ratu. Ca xpinni Cristu qué ridagulisaacaʼ para si guni sentircaʼ galán ti ratu lade ti grupu de binni, sínuque nácacaʼ ti guidxi ni naguixhe ique gusisácacaʼ Jiobá, gucheechecaʼ diidxaʼ, gacanecaʼ binni gaca xpinni Cristu ne gacanésaacaʼ para iguidxi fe sticaʼ (Rom. 1:11, 12; 1 Tes. 5:11; Heb. 10:24, 25). Nga runi gunda guníʼ Pablu ca diidxaʼ riʼ de ca biʼchiʼ ne bizaʼnaʼ: «Zuhuaa chaahui tu, ne irá xixé tu naca tu tobi si, cucaa lú tu para ireeche stiidxa Cristu ni ma bini cre tu» (Fili. 1:27).
10. Xiñee nuu xquidxi Dios tobi si.
10 Casi maʼ bidúʼyanu ca, guiráʼ ca xpinni Cristu nuunu tobi si purtiʼ Jiobá nga Rey stinu, nadxiisaanu, runi crenu Reinu stibe ne runi respetarnu cani gudixhe Dios sániruʼ ndaaniʼ xquidxi. Peru cumu binni ruchee laanu la? zándaca pur xpiaʼnu maʼ cadi chuʼnu tobi si ne ca xpinni Cristu. Guidúʼyanu caadxi de laacani ne guidúʼyanu ximodo racané Jiobá laanu para gudxíʼlunu cani (Rom. 12:2).
Ximodo gusaananu de guni crenu laca laanu ne de gápanu envidia
11. Xiñee maʼ qué riuu binni tobi si ora rudxiibaʼ laca laa, ne ximodo racané Jiobá laanu para cadi gácanu zacá.
11 Ora gudxiibaʼ tuuxa laca laa ruxheleʼ ni laa de sti binni, purtiʼ rucaani laa guni cré jma risaca que sti binni ne ruchá bi yanni pur xiixa ni bigaanda lu xquendanabani. Peru ora gaca ti binni zacá maʼ qué zanda chuʼné xcaadxi binni tobi si, purtiʼ zándaca gueeda gucaabe xcaadxi gapa envidia laabe. Discípulo Santiagu guníʼ ca diidxaʼ riʼ: «Ne irá ni guni zacá [ni gudxiibaʼ laa] la? cuchee» (Sant. 4:16). Pa guininu qué risaca tuuxa binni la? cusihuínninu cadi nadxiinu laabe. Jiobá qué rudxiibaʼ laca laa ne nácabe ti ejemplu nabé risaca para laanu purtiʼ rucaadiágabe laanu neca nácanu binni ruchee. David gudxi Dios ca diidxaʼ riʼ: «Ni rusisaca naa nga gannaʼ qué rudxiibaluʼ lii» (2 Sam. 22:36). Biblia racané laanu para cadi gudxíʼbanu laca laanu purtiʼ rusiidini laanu guidúʼyanu ca cosa ca jneza. Casi Pablu gucané espíritu santu laa guinabadiidxaʼ sicaríʼ: «Tu na jma risaca lu que stobi. Lácaxa ñapu xiixa pa qué nudii Dios ni lii. Yanna pa laabe bidii be ni lii la? cadi uchá lu enda naróʼ stiuʼ. Ruluíʼ pe gupu ni de lii siouʼ» (1 Cor. 4:7).
12, 13. 1) Xiñee qué raca nagana para laanu gápanu envidia tuuxa. 2) Xi zabeendunu pa guidúʼyanu ca bíʼchinu ne bizáʼnanu casi modo ruuyaʼ Jiobá laacabe.
12 Sti cosa ni rindasaa binni ni nuu tobi si nga envidia. Pur donda ni gulenenu, guiranu ricá íquenu gápanu envidia (Sant. 4:5, NM). Dede ca xpinni Cristu ni zuhuaa dxiichiʼ ndaaniʼ xquidxi Dios zanda gápacaʼ envidia tuuxa xpinni Cristu pur modo nabani, pur ca cosa risaca ni napa, pur ca dxiiñaʼ runi ndaaniʼ xquidxi Dios ne pur cani nanna. Casi ti hombre ni napa xiiñiʼ, zándaca gápabe envidia ti xpinni Cristu ni runi jma lu xhiiñaʼ Dios pur ca guenda ni napa, peru sin gudiibe cuenta xpinni Cristu ca laaca zanda gapa envidia laabe purtiʼ nápabe xiiñibe. Xi zacané laanu para cadi guiníʼ íquenu zacá yaʼ.
13 Ti cosa ni racané laanu cadi gápanu envidia nga, guietenaláʼdxinu ruchaaga Biblia ca xpinni Cristu ni bibí pur espíritu santu ne guiráʼ ca ndaa ni nápanu lu xcuérpunu (biindaʼ 1 Corintios 12:14-18). Guiníʼ íquenu de guielunu ne ladxidoʼno. Zanda guʼyaʼ guiráʼ binni guielunu peru ladxidoʼno qué zanda diʼ. Neca zacá, ñee cadi dxandíʼ rusisácanu guiropaʼ cani la? Zacaca nga rusisaca Jiobá guiráʼ ca xpinni, neca nuu de laacaʼ jma rihuinni ni cayúnicaʼ que xcaadxi. Nga runi, naquiiñeʼ gúninu stipa pur guidúʼyanu ca bíʼchinu ne bizáʼnanu casi modo ruuyaʼ Jiobá laacabe. Guizaaláʼdxinu laacabe lugar de gápanu envidia laacabe. Pa gúninu zacá la? zahuinni gadxé laanu de ca binni ni nuu ndaaniʼ ca religión ni nacaʼ zinándacaʼ Cristu.
Ca religión ni nacaʼ xpinni Cristu laacaʼ cadi nuucaʼ tobi si
14, 15. Ximodo bixeleʼ ca binni ni nacaʼ zinándacaʼ Cristu de guidxi Roma.
14 Ca xpinni Cristu tobi si nuucaʼ ne rihuinni gadxé laacaʼ de ca binni ni nuu ndaaniʼ ca religión ni nacaʼ xpinni Cristu laacaʼ purtiʼ nabé ridíndecaʼ. Bizulú bidale ca clase religión riʼ guidubi ra biʼniʼ mandar imperiu stiʼ Roma lu siglu IV. Dxi guníʼ ti emperador —ni qué runi adorar Dios— maʼ laa guni mandar guiráʼ ca binni ni nacaʼ zinándacaʼ Cristu, peru maʼ bidxiidéchecaʼ Dios, ne para ca tiempu que maʼ bireeche ca religión que guidubi ra runi mandarbe. Ra gudiʼdiʼ tiempu, stale de ca guidxi ra biʼniʼ mandar Roma que bixélecaʼ ne bizaʼcaʼ yuʼduʼ sticaʼ.
15 Pur stale gayuaa de iza gudindesaa ca guidxi ni bixeleʼ de Roma. Lu siglu XVII ne XVIII, Gran Bretaña, Francia ne Estados Unidos biyúbicaʼ modo guni adorar binni xquidxi, ni bíʼnicabe que beeda gácani casi ti religión para ca binni que. Lu siglu XIX ne XX, nabé maʼ stale binni de guiráʼ ladu riníʼ íquecaʼ zaqué. Stale lugar gulaasaa ca binni de ca yuʼduʼ que ne beeda chuu gayuaa de secta ne stale de laacaʼ rusisácacaʼ xquídxicaʼ. Ne ca xpinni ca yuʼduʼ ca huayecaʼ lu guendaridinde ne huadíndenecaʼ xcaadxi binni ni napa laaca religión sticaʼ. Yanna riʼ, cani nacaʼ xpinni Cristu laacaʼ gadxé gadxé ni runi crecaʼ ne nuu de laacaʼ runi adorarcaʼ xquídxicaʼ.
16. Xi pur qué randa riuu ca religión ni nacaʼ xpinni Cristu laacaʼ tobi si.
16 Lu siglu XX que guyuu caadxi secta ni gucaláʼdxicaʼ nutagulisaacaʼ guiráʼ ca secta ra nuu binni ni na xpinni Cristu laa. Peru despué de stale iza caadxi si de laacani huayuucani tobi si, ne ca binni ni nuu ndaaniʼ ca religión ca cadi tobi si ni runi crecaʼ, purtiʼ nuu de laacaʼ runi crecaʼ zeeda binni de ti maniʼ. Ne nuu tu na zanda gutiidiʼ xiiñiʼ binni, zanda gaca binni muxeʼ, ne nuu de ca religión ca racaláʼdxicaʼ gaca ca gunaa ca xaíque ndaaniʼ cani. Nuu de ca xaíque yuʼduʼ ca racaláʼdxicaʼ gutagulisaacaʼ ca binni ni nuu ndaaniʼ gadxé gadxé religión, ne para gúnicani nuu tiru dede rusiaandacaʼ ca cosa ni biʼniʼ crecaʼ ni bitinde laacaʼ dxiqué. Peru qué ribeendúcabe gastiʼ, ni rúnicabe nga rusirácabe fe stiʼ ca xpínnicabe. Ni dxandíʼ nga qué ganda gutagulisaacabe ca binni ni nuu ndaaniʼ ca religión ni nacaʼ xpinni Cristu laacaʼ.
Ndaaniʼ religión ni dxandíʼ nuu binni de gadxé gadxé guidxi
17. Xi diidxaʼ riguixhená cusihuinni zutagulisaa religión ni dxandíʼ binni ra mayaca guiluxe ca dxi riʼ.
17 Neca qué ganda chuʼ binni guidxilayú tobi si, peru cani dxandíʼ xpinni Cristu qué huasaana de chuʼcaʼ tobi si. Jiobá maca guniʼni dxi gudxi Miqueas gucaa ca diidxaʼ riʼ: «Zuneʼ laacabe tobi si, casi dendxuʼ ni nuu ndaaniʼ currá» (Miq. 2:12). Ne Miqueas laaca guníʼ zahuinni dxichi gunáʼ nga religión ni dxandíʼ lade xcaadxi religión, cásica ca religión ni runi adorar ca dios ni cadi dxandíʼ ne zaqueca ca religión ni napa ca gobiernu ca casi dios sticaʼ. «Ra mayaca guiluxe ca dxi ca dani ra nuu lidxi Jiobá napa xidé guzuhuaa dxiichiʼ ni luguiáʼ stuudxi dani ne ra nuuni zadxiña stale guidxi.» De raqué guniʼbe: «Purtiʼ guiráʼ ca guidxi ca la? cada tobi zazá lu lá dios stiʼ; peru laadu la? qué ziuu diʼ dxi gusaanadu de sadu lu lá Jiobá, Dios stidu» (Miq. 4:1, 5).
18. Xi guiráʼ maʼ huayacané religión ni rusiidiʼ ni dxandíʼ ca laanu guchaʼnu lu xquendanabáninu.
18 Miqueas laaca bisiene dede né ca binni ni gúcacaʼ enemigu ante zacané religión ni dxandíʼ ca laacaʼ chuʼcaʼ tobi si, casi na ca diidxaʼ riʼ: «Ne [binni de] stale guidxi dxandipeʼ ziecaʼ ne zaniʼcaʼ: “Latáʼ, ne quíbanu lu dani stiʼ Jiobá ne ralidxi Dios stiʼ Jacob; ne laabe zuluiʼbe laanu ca neza stibe, ne dxandipeʼ zazanu lu cani”. [...] Ne zúnicabe espada stícabe guiibaʼ ni chuʼ ruaa aradu, ne lanza stícabe zúnicabe ni guiibaʼ duxhuʼ para uganécabe guixi. Qué zadinde guidxi roʼ ne sti guidxi roʼ ne guiibaʼ duxhuʼ, ne qué zaziidirucaʼ tíndecaʼ» (Miq. 4:2, 3). Ne zacá huazaaca ni. Lu guidubi naca Guidxilayú nuu binni ni maʼ bisaana de gapa xquidxi casi dios stiʼ o maʼ qué runi adorarcaʼ ca dios ni bizáʼ binni guidxilayú ne maʼ guyuucaʼ ndaaniʼ religión ni rusiidiʼ ni dxandíʼ. Guirácabe nuucabe tobi si, purtiʼ rusiidiʼ Jiobá laacabe gannaxhiisaacabe.
19. Xi racané millón de xpinni Cristu chuʼcaʼ tobi si.
19 Laanu, cani dxandíʼ xpinni Cristu, laasinu nuunu tobi si lu guidubi naca Guidxilayú ne nga rusihuinni caquiiñeʼ Jiobá espíritu santu stiʼ para gabi laanu xi caquiiñeʼ gúninu. Ne ca binni de guiráʼ guidxi ni maʼ nuucaʼ tobi si, jma maʼ cadálecabe yanna riʼ. Ca dxi riʼ nga jma cahuinni cayaca ni na ca diidxaʼ ni zeeda lu Apocalipsis 7:9, 14, ne nga cusihuinni mayaca gundaa ca ángel stiʼ Dios bi ni chigunitilú guidxilayú malu riʼ (biindaʼ Apocalipsis 7:1-4, 9, 10, 14). ¡Nabé sicarú nga nácanu de xquidxi Dios ni nuu lu guidubi naca Guidxilayú! Yanna, xi naquiiñeʼ guni cada tobi de laanu para chuʼnu tobi si yaʼ. Zadúʼyanu ni lu sti tema ca.
Xi nicábiluʼ
• Ximodo racané religión ni rusiidiʼ ni dxandíʼ binni chuʼ tobi si.
• Xi caquiiñeʼ gúninu para cadi gusaana de chuʼnu tobi si pur gápanu envidia tuuxa.
• Xiñee qué rusaana de chuʼ ca xpinni Cristu tobi si neca de gadxé gadxé guidxi laacaʼ.
[Guendarinabadiidxaʼ stiʼ párrafo]
[Dibuju/foto ni zeeda lu yaza 13]
Ca xpinni Cristu de primé siglu que de gadxé gadxé guidxi laacaʼ
[Ca dibuju/foto ni zeeda lu yaza 15]
Ximodo racanenu chuʼ ca xpinni Cristu tobi si ora gacanenu gacachaahuiʼ Yoo stiʼ Reinu