Rietenalaʼdxuʼ la?

Ñee biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca guendarinabadiidxaʼ riʼ:

• Xiñee gúdxicabe Jesús «Cristu»

Diidxaʼ cristu ca zeedani de griegu kjristós, ne lu hebreu riníʼcabe ni maschíaj (Mesías). Lu guiropaʼ diidxaʼ ca riniʼni «ni bibí». Cumu Jesús nga Mesías ni maca nexheʼ gueeda que la? biáʼsipeʼ laabe nga ni riníʼ pur Jiobá, ne jneza nga labe: «Cristu, Xiiñi Dios ni nabani» (Mat. 16:16; 1/4, yaza 15).

• Ñee Jesús nga arcángel Miguel la?

Lá Miguel ca zeedani gaayuʼ biaje lu Biblia ora riniʼni de ti binni de espíritu ni nabé nadipaʼ. Lu 1 Tesalonicenses 4:16 cusiene naca Jesucristu arcángel, o xaíque stiʼ ca ángel. Lá Miguel ca riniʼni «Tuu Nga Casi Dios», ne lá Jesús ca riniʼni «Jiobá nga ni Rulá binni» (1/4, yaza 19).

• Xiñee qué ñuni castigar Jiobá Aarón pur biʼniʼ ti yuzehuiiniʼ de oro

Aarón qué ñuni ni na ley ra na cadi naquiiñeʼ guni adorar binni bidóʼ (Éxo. 20:3-5). Peru guniʼné Moisés Dios pur laabe ne oración ni bíʼnibe que gúpani «stale stipa» (Sant. 5:16). Stale iza qué nusaanabe de ñúnibe ni na Jiobá. Nécapeʼ bicaa guidxi que laabe gúnibe yuzehuiiniʼ de oro que, despué bisihuínnibe qué ñuuláʼdxidibe ni biʼniʼ guidxi que, purtiʼ bieegube ca xiiñiʼ Leví ora bisihuínnicaʼ nuucaʼ ladu stiʼ Jiobá (Éxo. 32:25-29; 15/5, yaza 21).

• Xi zanda gacané ti xpinni Cristu para gudxiilú yuubaʼ stiʼ ora gucheené xheelaʼ laa

Pa xheelaʼ ni cuchee ca cayuni stipa pur chinanda ca conseju stiʼ Biblia la? cadi naquiiñeʼ guiníʼ íquebe nápabe donda pur gupa xheelaʼ jnadxii. Jiobá nanna caquiiñeʼ xpinni Cristu ca tu gacané laa ne tu quixhedxí ladxidóʼ. Laabe riquiiñebe xcaadxi xpinni Cristu para quixhedxibe ladxidoʼloʼ (15/6, yaza 30, 31).

• Xi zanda guni ca binni ni reʼ ziáʼ nisa dxuʼniʼ para maʼ cadi gueʼ xhaatacaʼ ni

Pa maʼ gudxi tuuxa lii nabé maʼ ziáʼ reʼluʼ la? naquiiñeʼ gucueezaluʼ luni. Ca conseju riʼ zacanécani lii: Biʼniʼ orar gatigá, zanda gudii Biblia stipa lii, biziidiʼ gucueezuʼ lii, biyubi tu guidxaagaluʼ, gudixhe pabiáʼ zanda gueluʼ, naquiiñeʼ gannuʼ pora guiniʼluʼ coʼ, biyubi tu gacané lii ne biʼniʼ ni maʼ gudixhe íqueluʼ. Cani runi stipa pur chinanda ca conseju ni zeeda de Dios ni dxandíʼ maʼ cacaacaʼ stale ndaayaʼ (1/7, yaza 6-10).

• Ñee caníʼ Proverbios 6:30 gastiʼ naca cuanaʼ binni la?

Coʼ, cadi nga diʼ nga ni nani. Sti versículo ca cusiene napa gubaanaʼ ca donda nezalú Dios, nani sicaríʼ: «Pa igaabe la? zaguíxebe gadxe biaje ni guláʼnabe que; zudiibe guiráʼ cosa risaca nápabe ndaaniʼ lídxibe» (Pro. 6:31). Nga runi, tuuxa ni rapa gana chuulaʼdxiʼ Dios ni runi la? cadi liica naquiiñeʼ cuanaʼ (1/7, yaza 14).

• Ñee zanda gacané ca gueʼtuʼ ca laanu la?

Biblia na «cani maʼ guti la? [...] qué liica gánnacabe gastiʼ» ne «maʼ qué zanda diʼ gannaxhiicabe binni nin gacananaláʼdxicabe laa ne gápacabe envidia laa» (Ecl. 9:5, 6). Jesús guníʼ zeeda gaca guendaguti casi ti bacaandaʼ. Ora nisiaasiʼ ti binni la? qué zanda diʼ guni gastiʼ para gacané xcaadxi binni, purtiʼ qué liica ganna xi cayaca (1/7, yaza 21).

• Ximodo zanda gacaneluʼ ca xiiñiluʼ chuuláʼdxicaʼ gúʼndacaʼ ne guiénecaʼ ni gúʼndacaʼ

Zacaneluʼ ca xiiñiluʼ chuuláʼdxicaʼ gúʼndacaʼ pa gusihuínniluʼ nadxiiluʼ laacaʼ ne gácaluʼ ejemplu para laacaʼ. Biiyaʼ gápacabe libru ne revista stícabe. Biindané ca xiiñiluʼ. Guluu gana laacabe guicábicabe ne guniʼné laacabe de ni gúʼndatu. Gunabaʼ laacabe gúʼndacabe ne guluu gana laacabe guinabadiidxacabe de ni biindacabe (15/7, yaza 26, 27).

• Xiñee naquiiñeʼ guni huantarnu guiráʼ ni guiníʼ binni

Purtiʼ binni guidxilayú qué gánnacaʼ ximodo ruuyaʼ Jiobá ni jneza ne ni cadi jneza. Laanu ca xpinni Cristu zinándanu ejemplu stiʼ Xaíque stinu, Jesucristu, purtiʼ bisisácabe Bixhózebe ni nuu guibáʼ ra «qué nizaalaʼdxi be gati be» lu ti yaga (Heb. 12:2; 15/8, yaza 3).

• Xi biquiiñeʼ Jesús para bitiidilaʼdxiʼ guiráʼ ca donda stiʼ gunaa canazá si que

Primé diidxaʼ riguixhená ni bieeteʼ despué de bicaalú Adán ne Eva Jiobá que, bizeeteni naguixhe ique Jiobá guindisaʼ tobi ni za de gunaa que o ti Mesías. Cumu gastiʼ qué zanda gucueeza Jiobá de guni ni naguixhe ique la? para laabe mápeca biaxa pur donda stiʼ binni dede ora bieeteʼ ca diidxaʼ ni zeeda lu Génesis 3: 15. Neca dxiqué caruʼ gudii Cristu xquendanabani pur binni la? peru dxandíʼ zácani, pur ngue gunda bixá stonda binni casi gunaa que (15/8, yaza 6, 7).