Guyuu listu ne zabeenduluʼ stale cosa galán

ÑEE nuuluʼ listu guiráʼ ora para gusiidiluʼ binni de Dios pa guidxélaluʼ xcaadxi modo gácani neza ra rucheecheluʼ diidxaʼ la? Ca xpinni Cristu de Turku —ti guidxi ni nabé runibiáʼ binni ra nuu tobi de ca puertu stiʼ Finlandia— rusihuínnicaʼ nuucaʼ listu guiráʼ ora, ne pur nga maʼ guleenducaʼ stale cosa galán.

Maʼ napa dxi, ca xpinni Cristu de Turku biiyacaʼ beeda ti grupu de hombre de Asia ra puertu que. Ca hombre ca beedacaʼ para gúnicaʼ xcaadxi dxiiñaʼ huiiniʼ ni cayaadxaʼ para guiluxe chaahuiʼ ti barcu naroʼbaʼ ni guca ti lugar ra ruzáʼcabe barcu nuu guidxi que. Tobi de cani rucheeche diidxaʼ que gunna riaanacabe ndaaniʼ ca hotel ni nuu galahuiʼ guidxi ne siadoʼroʼ ricaa caadxi autobús laacabe para chécabe dxiiñaʼ guiráʼ dxi. Nagueendaca yetídxibe ni ca xpinni Cristu ni rié lade ca binni ridagulisaa ni riníʼ inglés ndaaniʼ guidxi Turku.

Ora biiyaʼ ca binnigola de neza binni ridagulisaa que guiráʼ ca binni ni beeda de sti guidxi que la? bidiicaʼ cuenta zanda gusiidicaʼ laacabe de Reinu stiʼ Dios, ngue runi gudíxhecabe ximodo chigucheechecabe diidxaʼ ra nuu ca binni que. Domingu siadóʼ stiʼ semana que, bidagulisaa chii ni rucheeche diidxaʼ a las siete ra ruzuhuaa ca autobús ra rié ca binni ni cheʼ dxiiñaʼ que. Ora yendácabe raqué, qué ñuuyacabe nin tobi de ca binni ni cheʼ dxiiñaʼ, ngue runi gunabadiidxacabe: «Ñee maʼ huadxipeʼ ndiʼ beedandanu la? O maʼ bireecabe de Turku ne maʼ zécabe xquídxicabe». Peru málasi bihuinni tobi de laacabe ti squina que nacu lari dxiiñaʼ. De raqué beeda stobi, ne beeda stobi... Ratu que si maʼ stálecabe. Oraqueca bizulú guniʼné ca Testigu que laacabe de Dios ne bisaananecaʼ laacabe stale guiʼchiʼ lu diidxaʼ inglés. Galán si nga biree ca autobús que ti hora despué, ngue runi bidii tiempu laacabe para guiniʼnécabe ca binni que. Biaʼsi 126 folletu ne 329 revista bisaanané ca Testigu que laacabe ora zécabe.

Cumu biiyaʼ ca Testigu que guleenducaʼ stale cosa galán dxi que la? gudixhe íquecaʼ gúnicaʼ zaqueca sti semana que, ora gueeda ganna binnigola ni riganna ca binni ridagulisaa laacaʼ. Siadoʼroʼ, biaʼ a las seis y media, biʼniʼ binnigola ni zeeda ganna laacabe que ti guendaridagulisaa para chigucheechecabe diidxaʼ, ne guyé veinticuatro de laacabe ra ruzuhuaa ca autobús que, cayaba ndaʼ nisaguié dxi que. Zinécabe stale guiʼchiʼ lu diidxaʼ tagalo, purtiʼ primé biaje guyécabe que bidxélacabe stale binni de Filipinas. Siadoʼroʼ, ante guiree ca autobús que para checaʼ ra puertu que, mápeca bisaananécabe ca binni que 7 libru, 69 folletu ne 479 revista. Guníʼ ique si pabiáʼ nayecheʼ biʼniʼ sentir ca hombre ne ca gunaa xpinni Cristu que purtiʼ yegucheechecaʼ diidxaʼ ra nuu ca binni que.

Ante nibiguetaʼ ca binni que xquídxicaʼ, gunda yeganna ca Testigu que caadxi de laacaʼ ndaaniʼ ca hotel ra biaanacaʼ ne bisiene chaahuicabe laacaʼ de Reinu stiʼ Dios. Stale de ca binni ni beeda guni dxiiñaʼ guidxi que, bizeetecaʼ maruʼ guníʼnecaʼ ca Testigu xcaadxi guidxi huayecaʼ. Laacabe bidiicabe xquíxepeʼ ca xpinni Cristu que pur guyecaʼ ra nuucabe para guiníʼnecaʼ laacabe ca dxi guyuucabe Finlandia.

Yanna, lii yaʼ. Ñee nuuluʼ listu guiráʼ ora para gusiidiluʼ binni de Dios pa guidxélaluʼ xcaadxi modo gácani neza ra rucheecheluʼ diidxaʼ la? Ñee riale de lii guyubuʼ binni ni zeeda de sti guidxi para guiníʼneluʼ laacaʼ de Dios la? Pa zacá ni la? zanda cueenduluʼ stale cosa galán casi ca xpinni Cristu de Turku.

[Dibuju/foto ni zeeda lu yaza 32]

FINLANDIA

Turku

HELSINKI

STX Europe