Cadi guninanu espíritu santu stiʼ Jiobá

«Cadi guniná tu Espíritu sti Dios, purti uluu Dios [ni] ndaani ladxidó to ti ihuinni ma sti laatu.» (EFE. 4:30)

1. Xi ti cosa nabé risaca maʼ biʼniʼ Jiobá para millón de binni ne xi naquiiñeʼ gúnicabe.

 JIOBÁ maʼ biʼniʼ ti cosa galán para millón de binni ni nabani ndaaniʼ guidxilayú ra nabé nuu guendanagana. Xi laani yaʼ. Guidxíñacabe laabe pur tobi lucha Xiiñibe, Jesús (Juan 6: 44). Pa maʼ bidiiluʼ lii Dios ne cayuʼnu ni bidii stiidxaluʼ laabe guiráʼ dxi la? nga rusihuinni nácaluʼ tobi de ca binni ca. Pa maʼ guyuunísaluʼ lu lá espíritu santu ca la? naquiiñeʼ guibániluʼ modo nani (Mat. 28:19).

2. Xi guendarinabadiidxaʼ chiguicábinu lu tema riʼ.

² Laanu ruyúbinu gúninu «ni na Espíritu Santu», nga runi rinándanu ni na conseju de guchaʼnu modo nabáninu (Gál. 6:8; Efe. 4:17-24). Peru laaca naquiiñeʼ chinándanu ni na xcaadxi conseju bidii apóstol Pablu, ne tobi de laacani nga cadi guninanu espíritu santu (biindaʼ Efesios 4:25-32). Naquiiñeʼ guʼyaʼ chaahuinu ca diidxaʼ guníʼ apóstol ca. Xipeʼ nga riníʼ ca diidxaʼ «cadi guniná tu Espíritu sti Dios» yaʼ. Ximodo zanda guniná ti xpinni  Cristu espíritu ca yaʼ. Xi naquiiñeʼ gúninu para cadi guninanu espíritu ca.

Xii nga caníʼ Pablu ne ca diidxaʼ ca

3. Ximodo nusiéneluʼ Efesios 4:30.

³ Chiguidúʼyanu primeru ca diidxaʼ ni zeeda lu Efesios 4:30: «Cadi guniná tu Espíritu sti Dios, purti uluu Dios [ni] ndaani ladxidó to [«biquiiñeʼ Dios espíritu stiʼ para biʼniʼ sellar laatu», NM] ti ihuinni ma sti laatu. Ne ziaana né [ni] laatu dede dxi gueda [gulá] Cristu ca xpinni». Pablu bidii conseju riʼ ca xpinni Cristu ni nadxii purtiʼ qué racalaʼdxiʼ guixélecabe de Dios. Bisietenaláʼdxibe laacaʼ «biquiiñeʼ Dios espíritu stiʼ para biʼniʼ sellar laa[cabe]». Laani nga ti «seña» o xiixa ni rusihuinni dede ca yanna xi chigaca para ca xpinni Cristu ni bibí pur espíritu santu (2 Cor. 1:22). Sellu ca rusihuinni stiʼ Dios laacabe ne chiguibánicabe guibáʼ. Ne 144,000 binni nga ni napa sellu ca (Apo. 7:2-4).

4. Xiñee naquiiñeʼ gápanu laanu para cadi guninanu espíritu stiʼ Dios.

⁴ Pa guniná ti xpinni Cristu espíritu santu stiʼ Dios la? zándaca despué maʼ qué liica zacané stipa stiʼ Dios ca laa. Ne ca diidxaʼ ni guníʼ David despué de bicheené Bat-seba rusihuinni cani zanda gunítinu espíritu stiʼ Jiobá. Laabe guca arrepentirbe ne gunábabe Jiobá: «Cadi gusáʼbiluʼ naa de ra nuuluʼ, ne cadi gáxhaluʼ espíritu santu stiluʼ naa» (Sal. 51:11). Casi ca xpinni Cristu ni bibí ca la? cadi naquiiñeʼ gusaana de gúnicabe ni na Dios «dede dxi gati[cabe]» para ganda guicaacabe «enda nabani casi ti premiu» guibáʼ (Apo. 2:10; 1 Cor. 15:53). Ca xpinni Cristu ni chiguibani lu Guidxilayú riʼ naquiiñeʼ gusihuínnicaʼ nápacaʼ fe lu rini ni bixhii Cristu ne cadi gucheenecaʼ Dios para ganda guicaacaʼ guendanabani. Ne para ganda gúnicabe zacá caquiiñeʼ gacané espíritu santu laacabe (Juan 3:36; Rom. 5:8; 6:23). Nga runi, guiranu naquiiñeʼ gápanu laanu para cadi guninanu espíritu stiʼ Dios.

Pora nga runinanu espíritu stiʼ Dios

5, 6. Pora nga runiná ti xpinni Cristu espíritu stiʼ Jiobá.

⁵ Laanu, ca xpinni Cristu, xi naquiiñeʼ gúninu para cadi guninanu espíritu stiʼ Dios yaʼ. Naquiiñeʼ sanu «modo rusiidi Espíritu Santu laa[n]u» ne guibáninu casi nani, purtiʼ zacá qué zúninu ni racaláʼdxinu ne qué zúninu ni cadi jneza (Gál. 5:16, 25, 26). Peru naquiiñeʼ chuʼnu cuidadu. Xiñee yaʼ. Purtiʼ sin gudiʼnu cuenta zanda guzulú gúninu xiixa ni na Biblia cadi jneza ne guninanu espíritu santu.

⁶ Pa guiaa ti xpinni cristu cadi guni ni na espíritu santu la? zuninabe ni. Ora gúnibe zacá, laaca zuninabe Jiobá purtiʼ laa nga cudii espíritu santu ca. Xi naquiiñeʼ gúninu para cadi guninanu ni yaʼ. Ra guʼndaʼ chaahuinu Efesios 4:25-32 zacábinu ni gunabadiidxanu ca.

Xi cadi naquiiñeʼ gúninu para cadi guninanu espíritu stiʼ Dios

7, 8. Xiñee naquiiñeʼ guininu ni dxandíʼ guiráʼ biaje.

⁷ Cadi gusiguiinu. Sicaríʼ bicaa Pablu lu Efesios 4:25: «Nga runi lausaana de usiguii tu, ne ora güi tu diidxa lainíʼ ni dxandíʼ, purti irá nu ma naca né nu Cristu tobi si». Cumu «irá nu ma naca né nu Cristu tobi si» la? qué chuʼ dxi gucáʼchinu tu nácanu nezalú ca xpinni Cristu, guchaʼnu modo guca xiixa cosa ne gucaʼnu laacaʼ guni crecaʼ ni caninu neca cadi dxandíʼ ni, purtiʼ pa gúninu zacá cusiguiinu laacabe. Pa tuuxa qué gusaana de guni zacá, maʼ qué zaca xhamigu Dios laa (biindaʼ Proverbios 3:32).

⁸ Cani rininu ne ca cosa ni cadi jneza rúninu zándaca gucaacani ca binni ridagulisaa maʼ cadi chuʼcaʼ tobi si. Nga runi, naquiiñeʼ chinándanu ejemplu stiʼ Daniel ni riguixhená que, ti hombre ni nabé biʼniʼ ni jneza (Dan. 6:4). Guietenaláʼdxinu ni gudxi Pablu ca xpinni Cristu ni cheʼ guibáʼ: Cumu tobi si nga «irá xixé [ca] xpinni» Cristu la? nga runi,  cani dxandíʼ biʼchiʼ Jesús ca naquiiñeʼ chuʼcaʼ tobi si (Efe. 4:11, 12). Laanu ca xpinni Cristu ni racaláʼdxinu guibáninu lu Guidxilayú riʼ sin qué chuʼ dxi gátinu, laaca naquiiñeʼ gacanenu chuʼ xquidxi Jiobá tobi si ra guininu ni dxandíʼ.

9. Xiñee naquiiñeʼ chinándanu conseju ni zeeda lu Efesios 4:26, 27.

⁹ Gudxíʼlunu guiráʼ ni rundaa Binidxabaʼ luguianu ne cadi gudiʼnu lugar guxhélebe laanu de Dios (Sant. 4:7). Espíritu santu ca zacané laanu para gudxíʼlunu Binidxabaʼ. Tobi de ca modo zanda gúninu ni nga gucueezanu laanu ne cadi guidxiichi xhaatanu. Pablu bicaa: «Ne pa idxiichi tu la? cadi udii tu lugar guiaazi gubidxa cadxiichi ru tu, sínuque lauyubi tidi ni nagueenda. Pacaa zuchee tu. Cadi udii tu lugar aca xcustu binidxabaʼ» (Efe. 4:26, 27). Neca napa binni razón para guidxiichi, ni jma jneza gúnibe nga guni orarbe Dios nagueendaca ndaaniʼ ladxidoʼbe. Pa gúnibe zacá la? zucueezabe laabe ne ziuudxibe, ne qué zúnibe xiixa ni guniná espíritu santu stiʼ Dios (Pro. 17:27). Cadi naquiiñeʼ guidaʼnu xiana, purtiʼ oracá zándaca gucaa Binidxabaʼ laanu gúninu ti cosa ni cadi jneza (Sal. 37:8, 9). Sti modo zanda gudxíʼlunu cani rundaa Binidxabaʼ luguianu nga chinándanu conseju stiʼ Jesús ora guníʼ, nagueendaca naquiiñeʼ guni chaahuinu xiixa guendanagana gapanenu xcaadxi binni (Mat. 5:23, 24; 18:15-17).

10, 11. Xiñee cadi naquiiñeʼ cuánanu.

¹⁰ Cadi gudiʼnu lugar uquiinde Binidxabaʼ laanu cuánanu. Pablu bicaa: «Ni uca gubaana la? ma cadi cuanaʼ, sínuque ma iquiiñe ná para guni dxiiña jneza, ti ganda gapa xiixa para acané cani qué gapa gastiʼ» (Efe. 4:28). Pa cuanaʼ ti xpinni Cristu la? qué zusisácabe lá Dios stibe (Pro. 30:7-9). Gastiʼ razón para guni binni zacá, nin ñácabe jma pobre. Cani nadxii Dios ne nadxii binni nannadxíchicaʼ cadi naquiiñeʼ gúnicaʼ nga (Mar. 12:28-31).

¹¹ Peru apóstol ca cadi cayabi si laanu xi cadi naquiiñeʼ gúninu, sínuque laaca cayábibe laanu xi naquiiñeʼ gúninu. Pa nabáninu casi na espíritu santu ca ne cayúninu ni nani la? zúninu dxiiñaʼ nadipaʼ para gudiʼnu ni caquiiñeʼ binnilídxinu ne para «ganda [gápanu] xiixa para [gacanenu] cani qué gapa gastiʼ» (1 Tim. 5:8). Qué zácanu casi Judas Iscariote, purtiʼ laa gulaʼnaʼ bueltu ni caguu chaahuiʼ Jesús ne ca apóstol stiʼ para gacanecaʼ binni pobre (Juan 12:4-6). Rihuinni dxíchica qué ñuni Judas ni na espíritu santu. Peru laanu ca xpinni Cristu ni dxandíʼ zinándanu ni nani rúninu ni «jneza» lu guiráʼ xixé cosa cásica biʼniʼ Pablu (Heb. 13:18). Zacá qué runinanu espíritu stiʼ Jiobá.

 Xiruʼ zanda gúninu para cadi guninanu espíritu ca

12, 13. 1) Xi diidxaʼ nga cayabi Efesios 4:29 laanu cadi naquiiñeʼ guininu. 2) Ximodo naquiiñeʼ guininu.

¹² Chuʼnu cuidadu ni rininu. Pablu guníʼ: «Cadi iníʼ tu diidxa ni guniná stobi, sínuque lainíʼ diidxa jneza ni zanda acané stobi uzuhuaa chaahuiʼ, ne ni acané tutiica guna diaga ni iníʼ tu» (Efe. 4:29). Sti biaje ca, apóstol ca qué niníʼ si xi cadi naquiiñeʼ gúninu, sínuque laaca guniʼbe xi naquiiñeʼ gúninu. Gudiʼnu lugar gacané espíritu stiʼ Dios laanu para guininu diidxaʼ ni gacané ca binni ni gucaadiaga laanu. Ne qué chuʼ ora guiree «diidxa ni guniná stobi» ruaanu. Diidxaʼ griegu ni biquiiñecabe para guníʼcabe «diidxa ni guniná stobi», nabé biquiiñecabe ni para guiníʼcabe de xiixa cuananaxhi, beela o benda ni maʼ cayuʼdxuʼ. Cásica qué riuuláʼdxinu ca cosa ni maʼ biuʼdxuʼ ca, zacaca naquiiñeʼ guidúʼyanu ca diidxaʼ ni qué riuulaʼdxiʼ Jiobá.

¹³ Cada biaje guininu naquiiñeʼ gúninu ni ne respetu ne diidxaʼ nadóʼ. Naquiiñeʼ guininu diidxaʼ «ni guiaba binni» ti chuuláʼdxicaʼ guidxaagacaʼ laanu (Col. 3:8-10; 4:6). Ora gunadiaga binni guininu la? naquiiñeʼ gudiicaʼ cuenta maʼ gadxé laanu. Zanda gacanenu binni pa guininu diidxaʼ ni gacané laacaʼ. Galán gúninu casi biʼniʼ hombre bicaa Salmo que, purtiʼ laa biindaʼ sicaríʼ: «Bidii lugar gusiecheʼ lii pur guiráʼ ni guinieeʼ ne guiráʼ ni guiníʼ iqueʼ, Jiobá, lii nga Guié stinneʼ ne ni Rulá naa» (Sal. 19:14).

14. Xi nga ca cosa ni na Efesios 4: 30, 31 cadi naquiiñeʼ gúninu.

¹⁴ Cadi gaca nanaláʼdxinu binni, cadi guidxiichinenu laacaʼ, cadi guni charnu tuuxa ne gusaana de guyúbinu guizaaca stobi xiixa. Bidii si Pablu conseju ca biʼchiʼ de cadi guninacaʼ espíritu stiʼ Dios gúdxibe laacaʼ sicaríʼ: «Lausaana de aca nanalaʼdxi tu binni, ne de idxiichi né tu laacaʼ, ne de chuʼ tu xiana, ne de guni char tu tuuxa o cuʼ dí tu laa. Lausaana de uyubi tu izaaca stobi xiixa» (Efe. 4:30, 31). Naquiiñeʼ gúninu stipa para gúninu zacá purtiʼ binni ruchee laanu. Pa qué gápanu cuidadu ne cani guiníʼ íquenu ne cani gúninu ne «aca nanalaʼdxi [n]u binni, ne [...] idxiichi né [n]u laacaʼ, ne [...] chuʼ [n]u xiana» la? zuninanu espíritu santu stiʼ Dios. Laaca ngaca nizaaca pa ñácanu binni ni qué ridíʼdiga xiana laa o pa qué nusiáʼndanu ni biʼniʼ tuuxa laanu, pa qué nanu guibiguetaʼ guinínenu binni ni bicheené laanu ca. Pa chaahuiʼ chaahuiʼ guiaʼnu guixélenu de ca conseju ni zeeda lu Biblia la? zándaca guzulú gúninu xiixa ni gucaa laanu guchéʼnenu espíritu ca ne zápanu stale guendanagana.

15. Xi naquiiñeʼ gúninu ora chuʼ tu guiníʼ mal de laanu.

¹⁵ Gácanu nachaʼhuiʼ, guilaseláʼdxinu ne gutiidiláʼdxinu donda stiʼ stobi. Pablu bidii conseju riʼ: «Lagaca nachaʼhui ne stobi, ne lailaselaʼdxi saa. Laguni perdonar saa casi bini perdonar Dios laatu ra guca né tu Cristu tobi si» (Efe. 4:32). Neca chuʼ tu guniná laanu stale, naquiiñeʼ gutiidiláʼdxinu stonda, cásica runi Dios (Luc. 11:4). Guníʼ ique guyuu ti xpinni Cristu guníʼ mal de lii. Cumu racaláʼdxiluʼ guni chaahuiluʼ guendanagana que la? guyeluʼ ra nuube para guiníʼneluʼ laabe. Cumu cadi cayuni sentirbe galán pur ni guca que la? de guidubi ladxidoʼbe gunábabe lii gutiidiláʼdxiluʼ stóndabe. Ñee  naquiiñeʼ si gutiidiláʼdxiluʼ stóndabe la? Coʼ. Nuu sti cosa ni naquiiñeʼ gúniluʼ, casi na Levítico 19:18: «Cadi guquíxeluʼ ni guni tuuxa binni xquídxiluʼ lii ne cadi gapuʼ xiana laabe; ne napuʼ xidé gannaxhiiluʼ sti binni cásica nadxiiluʼ lii. Naa nga Jiobá».

Cadi gusaana de gápanu laanu

16. Bizeeteʼ ti ejemplu ni gusihuinni zanda guchaa binni para cadi guniná espíritu stiʼ Dios.

¹⁶ Laaca zanda uquiinde laanu gúninu xiixa ni qué riuulaʼdxiʼ Dios ora nuunu stúbinu. Casi pa riuuláʼdxinu gucaadiáganu saa ni cadi jneza gucaadiaga ti xpinni Cristu. Guiníʼ íquenu de ti xpinni Cristu ni maʼ biaa guni zacá. Zándaca chuʼ ora guzulú guchiiñaʼ xquendabiaanibe laabe purtiʼ nánnabe cadi zinándabe ca conseju ni zeeda lu ca libru ne ca revista ni rudii «mozo ni nuu xpiaani ne ni runi jneza» (Mat. 24:45). Ne pur nga gudixhe íquebe guni orarbe de ni cayúnibe que ne bietenaláʼdxibe ca diidxaʼ ni zeeda lu Efesios 4:30. Cumu qué racaláʼdxibe gúnibe xiixa ni guniná espíritu santu la? gudixhe íquebe maʼ cadi liica gucaadiágabe clase saa que. Nánnanu zaguu Jiobá ndaayaʼ ni gúnibe ca. Nga runi, guiranu laaca naquiiñeʼ gápanu laanu para cadi guninanu espíritu stiʼ Dios.

17. Xi zanda guizaacanu pa gusaananu de guni orarnu ne qué gápanu laanu.

¹⁷ Pa gusaananu de guni orarnu ne qué gápanu laanu la? zándaca guzulú gúninu xiixa ni cadi jneza ne guninanu espíritu stiʼ Dios. Cadi guiaandaʼ laanu, espíritu ca nga stipa ni riquiiñeʼ Bixhózenu ni nuu guibáʼ para guni ni na. Nga runi, pa guninanu espíritu ca laaca cayuninanu Jiobá, ne qué racaláʼdxinu gúninu nga (Efe. 4:30). Ca escriba judíu ni bibani lu primé siglu que, guniʼcaʼ biʼniʼ Jesús milagru pur poder stiʼ Binidxabaʼ (biindaʼ Marcos 3:22-30). Ra guníʼ ca xhenemigu Cristu zaqué guníʼcabe mal de espíritu santu, ne pur nga qué ziuu dxi gutiidilaʼdxiʼ Dios stóndacabe. ¡Qué chuʼ dxi gúninu nga!

18. Ximodo zanda gánnanu qué huayúninu xiixa cosa malu ni maʼ qué zanda gutiidilaʼdxiʼ Dios.

¹⁸ Pa qué racaláʼdxinu gúninu xiixa cosa nabé malu ne guni laani maʼ qué gutiidilaʼdxiʼ Dios stóndanu la? cadi naquiiñeʼ gusiáʼndanu conseju ni bidii Pablu ra na cadi guninanu espíritu santu stiʼ Dios. Peru pa maʼ bíninu ti cosa nabé malu yaʼ. Ñee maʼ guca arrepentirnu ne maʼ biyúbinu gacané ca binnigola laanu la? Pa maʼ bíninu nga la? zanda guiníʼ íquenu maʼ bitiidilaʼdxiʼ Dios stóndanu ne caruʼ diʼ guchéʼnenu espíritu stibe. Ne laaca zanda guidxíñanu ra nuu Jiobá ne guni crenu zudiibe stipa laanu para cadi gúninu xiixa ni guniná espíritu stibe.

19, 20. 1) Gunáʼ nga caadxi cosa ni cadi naquiiñeʼ gúninu. 2) Xi naquiiñeʼ quixhe íquenu gúninu.

¹⁹ Dios riquiiñeʼ stipa stiʼ para gucaa ca xpinni gannaxhiisaacaʼ, chuʼcaʼ nayecheʼ ne chuʼcaʼ tobi si (Sal. 133:1-3). Nga runi, naquiiñeʼ gánnanu racaná espíritu santu stiʼ Dios ora rininu chisme ne ora rininu mal de ca xpínnibe ni gulibe pur espíritu santu para gaca xaíque (Hech. 20:28; Jud. 8). Lugar de gúninu nga naquiiñeʼ gacanenu chuʼ ca binni ridagulisaa tobi si ne guni respetarsaacaʼ. Cadi galán diʼ guzulú gúninu grupuhuiiniʼ stinu. Pablu bicaa: «Hermanu caʼ, pur Jesucristu Señor stinu, rinaba laatu chuʼ tu tobi si ne cadi indaa saa tu, sínuque lagaca tobi si de irá ni iníʼ ique tu ne ni quixhe tu guni tu» (1 Cor. 1:10).

²⁰ Jiobá zanda gacané laanu ne racalaʼdxiʼ gúnini para cadi guninanu espíritu stiʼ. Laanu laaca naquiiñeʼ quixhe íquenu cadi guninanu espíritu santu stiʼ Dios. Nga runi, cadi gusaananu de guinábanu Dios stipa stiʼ ne guyúbinu gúninu «ni na Espíritu Santu»; zacá zanda gúninu ni na espíritu ca yanna ne guidubi naca xquendanabáninu.

Xi nicábiluʼ

• Xipeʼ nga riníʼ ca diidxaʼ «cadi guniná tu Espíritu sti Dios».

• Ximodo zanda guniná ti xpinni Cristu espíritu ca.

• Xi naquiiñeʼ gúninu para cadi guninanu espíritu ca.

[Guendarinabadiidxaʼ stiʼ párrafo]

[Dibuju/foto ni zeeda lu yaza 30]

Guni chaahuinu ca guendanagana ni gápanenu tuuxa nagueendaca

[Dibuju/foto ni zeeda lu yaza 31]

Gunáʼ de ca cuananaxhi riʼ nga zeeda gaca ca diidxaʼ ni riniʼluʼ