ARTÍCULO DE ESTUDIU 37
CANCIÓN 118 «Dané laadu jma fe»
Ti carta ni zacané laanu guni huantarnu ne cadi guixélenu de Dios
«Zacaanu ni maʼ gucuaa Cristu ora gueeda fin pa qué guirá confianza ni nápanu dede dxi biʼniʼ crenu laa» (HEB. 3:14).
TEMA
Zacané carta ni gucuá para ca hebreu laanu guni huantarnu ne cadi guixélenu de Dios dede ora gueeda fin stiʼ guidxilayú riʼ.
1, 2. a) ¿Ximodo nuu ca xpinni Cristu ora bicaa Pablo carta ra nuucaʼ? b) ¿Xiñee biaʼsi peʼ yendá carta que ora caquiiñecabe ni?
LU IZA 33 guti si Jesús, bidxagalú ca xpinni Cristu hebreu stale guendanagana. Despué de guca formar congregación ni nuu ndaaniʼ guidxi Jerusalén, bizulú guzanándacabe ca xpinni Cristu (Hech. 8:1). Biaʼ 20 iza despué gudiʼdiʼ ca xpinni Cristu de guidxi Judea lu guendanagana purtiʼ huaxiéʼ bueltu gúpacaʼ, zándaca pur hambre ni guyuu ndaaniʼ guidxi que (Hech. 11:27-30). Peru biaʼ lu iza 61 que ruluíʼ si gupa ca xpinni Cristu ti tiempu de paz, purtiʼ jma naroʼbaʼ ca guendanagana ni chiguidxaagalucaʼ despué. Ne tiempu que nga gucuaacabe ti carta ni bicaa apóstol Pablo pur espíritu santu. Yendá carta que ora peʼ caquiiñecabe ni. ¿Xiñee yaʼ?
2 Biaʼsi peʼ ora yendá carta que purtiʼ maʼ cadi candaa zazanándacabe ca xpinni Cristu que sti biaje. Bidii Pablo conseju ca xpinni Cristu ni zacané laacaʼ guni huantarcaʼ ca guendanagana ni chiguidxagalucaʼ. Guizáʼ maʼ gaxha nuu dxi guinitilú guidxi Jerusalén ni maca bizeeteʼ Jesús chiguizaaca (Luc. 21:20). Dxandíʼ, qué ganna Pablo nin ca xpinni Cristu de Judea que padxí peʼ chiguizaaca ni. Peru tiempu que nga caquiiñeʼ guquidxi ca xpinni Cristu que fe sticaʼ ti chuʼcaʼ listu ne ganda guni huantarcaʼ (Heb. 10:25; 12:1, 2).
3. ¿Xiñee laaca zanda gacané carta ni gucuá para ca xpinni Cristu hebreu laanu?
3 Maʼ cadi candaa zadxaagalunu ti guendanagana jma naroʼbaʼ que ca ni bidxaagalú ca xpinni Cristu hebreu (Mat. 24:21; Apoc. 16:14, 16). Nga runi, guidúʼyanu chupa chonna conseju ni bidii Jehová ca xpinni Cristu que ni laaca zanda gacané laanu.
«GUNI SEGUIRNU DEDE RA GÁCANU TI BINNI HUANIISI»
4. ¿Xi guendanagana bidxagalú ca xpinni Cristu judíu? (Biiyaʼ imagen ca).
4 Cumu bisaana ca hebreu ni bicaa Pablo ra nuucaʼ que religión stiʼ ca judíu para gácacaʼ xpinni Cristu la? ngue runi bidxaagalucaʼ stale guendanagana. Ca judíu ca nga beeda gácacaʼ guidxi ni gulí Jehová. Pur stale iza guca guidxi Jerusalén ti guidxi nabé risaca purtiʼ raqué nga guyuu ca rey ni gulí Jehová para guni mandar xquidxi ne raqué nga guyuu templu que. Rinanda guiráʼ ca Judíu ni runi ni ná Dios Ley stiʼ Moisés ne ca regla ni riguixhe ca xaíque yuʼduʼ que. Casi regla ra nexheʼ xi zanda gócabe, ximodo gúʼyacabe circuncisión ne ximodo guni tratárcabe binni de xcaadxi guidxi ni cadi naca judíu. Despué de guti Jesús maʼ qué niná Jehová nicaa ca sacrificiu ni rudiicabe ndaaniʼ templu que. Ngue runi guca nagana para ca judíu ni beeda gaca xpinni Cristu guchaacaʼ modo runi adorarcaʼ Jehová purtiʼ maʼ biaacaʼ chinándacaʼ ni ná Ley (Heb. 10:1, 4, 10). Dede ca xpinni Cristu ni maʼ naguidxi fe sticaʼ casi apóstol Pedro, guca nagana para laacaʼ guchaacaʼ modo runi adorarcaʼ Dios (Hech. 10:9-14; Gál. 2:11-14). Pur ca cosa nacubi bizulú biʼniʼ cré ca xpinni Cristu riʼ bizulú guzananda ca xaíque yuʼduʼ stiʼ ca judíu que laacaʼ.
Para cadi guixeleʼ ca xpinni Cristu de ni dxandíʼ rusiidiʼ Biblia, caquiiñeʼ gucaanácabe guiráʼ ca cosa ni cadi dxandíʼ rusiidiʼ ca xaíque yuʼduʼ stiʼ ca judíu. (Biiyaʼ párrafo 4 ne 5).
5. ¿Gunáʼ nga guiropaʼ grupu de binni ni bicaalú ca xpinni Cristu?
5 Guyuu chupa grupu de binni ni bicaalú ca xpinni Cristu de Judea. Ti grupu que nga ca xaíque yuʼduʼ stiʼ ca judíu ni riniʼcaʼ nácacabe apóstata. Sti grupu que nga cani ná naca xpinni Cristu ne nacaʼ caquiiñeruʼ chinándacabe Ley stiʼ Moisés, zándaca para cadi sanándacabe laacaʼ (Gál. 6:12). Yanna, ¿xi zacané ca xpinni Cristu que guni huantarcaʼ para cadi guixélecaʼ de Dios yaʼ?
6. ¿Xi gudxi Pablo ca xpinni Cristu gúnicaʼ? (Hebreos 5:14–6:1).
6 Lu carta ni bicaa Pablo ra nuu ca hebreu guluube gana laacaʼ guni estudiar chaahuicaʼ Stiidxaʼ Dios (biindaʼ Hebreos 5:14–6:1). Biquiiñebe Stiidxaʼ Dios ni gucuá lu diidxaʼ hebreu para gusiénebe jma risaca modo runi adorar ca xpinni Cristu Dios que modo runi adorar ca judíu Dios. a Nánnabe ra gánnacaʼ ne guiene chaahuicaʼ ni dxandíʼ zacaneni laacaʼ para gucaanacaʼ guiráʼ cosa ni zeeda de xquendabiaaniʼ binni ni zanda guxheleʼ laacaʼ de Dios.
7. ¿Xi guendanagana ridxaagalunu ca dxi riʼ?
7 Ca dxi stinu riʼ nuu stale binni ni riníʼ ni cadi dxandíʼ o rusiidicaʼ cosa ni qué riuulaʼdxiʼ Jehová ne rucaalucaʼ laanu. Stale binni riníʼ mal de ca testigu stiʼ Jehová, riniʼcaʼ rúninu menu xcaadxi binni ne nacaʼ cadi jneza ni rúninu purtiʼ rinándanu ni rusiidiʼ Biblia de sexo. Modo riníʼ ique binni guidxilayú ne guiráʼ ni rúnicaʼ guizáʼ maʼ gadxé ni de modo riníʼ ique Jehová (Prov. 17:15). Nga runi naquiiñeʼ guzuhuaʼnu dxiichiʼ lu ni runi crenu para gudiʼnu cuenta ne gucáʼnanu ca cosa ni cadi dxandíʼ rusiidiʼ caadxi binni para cueecaʼ gana ne guxhélecaʼ laanu de ni dxandíʼ rusiidiʼ Stiidxaʼ Dios (Heb. 13:9).
8. ¿Xi zanda gúninu para cadi gusaana de guiniisinu lu Stiidxaʼ Dios?
8 Gudxi Pablo ca xpinni Cristu que naquiiñeʼ guiniisicaʼ lu Stiidxaʼ Dios ne laanu laaca caquiiñeʼ gúninu ni. ¿Ximodo yaʼ? Zanda gúninu ni ra guni estudiar chaahuinu Stiidxaʼ Dios ne gúninu stipa guiníʼ íquenu modo riníʼ ique Jehová. Cadi naquiiñeʼ gusaana de gúninu ndiʼ neca maʼ bidiʼnu xquendanabáninu Jehová ne maʼ guyuunísanu. Nga runi guiranu caquiiñeʼ guidúʼndanu ne guni estudiarnu Stiidxaʼ Dios guiráʼ dxi biaʼ tiica iza zinenu ndaaniʼ xquidxi Jehová (Sal. 1:2). Guni estudiarnu Stiidxaʼ Dios guiráʼ dxi zacaneni laanu iguidxi fe stinu, ti cualidad ni gudxi Pablo ca xpinni Cristu hebreu naquiiñeʼ gápacaʼ (Heb. 11:1, 6).
«BINNI NI NAPA FE NE NI RULÁ XQUENDANABANI»
9. ¿Xiñee caquiiñeʼ gapa ca xpinni Cristu que ti fe naguidxi?
9 Caquiiñeʼ gaca fe stiʼ ca xpinni Cristu que naguidxi para ganda guilacaʼ pur ni chiguizaaca ndaaniʼ guidxi Judea (Heb. 10:37-39). Gudxi Jesús ca xpinni, ora gúʼyacaʼ maʼ nuu campamentu stiʼ ca ejércitu guidubi buelta Jerusalén naquiiñeʼ guxooñecaʼ lu ca dani que. Ca diidxaʼ ni guniʼbe riʼ zeni para guiráʼ ca xpinni Cristu, ca ni nabeza ndaaniʼ guidxi Jerusalén, ca ni nuu fuera ne ca ni nuu lu ca layú (Lucas 21:20-24). Tiempu que, ora gucaalú ti ejércitu ti guidxi, ca binni que ruyúbicaʼ guilacaʼ ndaaniʼ ti guidxi ni napa muru casi guidxi Jerusalén. Guxooñecabe lu ca dani que lugar de guiaanacabe ndaaniʼ guidxi Jerusalén, ruluíʼ si cadi ngue nga ni jma jneza gúnicabe. Ngue runi caquiiñeʼ gápacabe ti fe naguidxi para guzuubacabe stiidxaʼ Jesús.
10. ¿Xi zuni ca xpinni Cristu ni napa ti fe naguidxi? (Hebreos 13:17).
10 Ca xpinni Cristu que caquiiñeʼ gápacabe confianza ca hermanu ni maʼ gulí Jesús para guni dirigir congregación. Zándaca bidii ca hermanu riʼ laacabe instrucción pora peʼ naquiiñeʼ guxooñecabe ne ximodo gúnicabe ni (biindaʼ Hebreos 13:17). Diidxaʼ griegu ni biquiiñeʼ lu Hebreos 13:17 para guiníʼcabe «laguzuubaʼ stiidxaʼ» rusihuínnini ruzuubaʼ ti binni stiidxaʼ tuuxa purtiʼ nápabe confianza binni ca, ne cadi purtiʼ si caquiiñeʼ gúnibe ni. Ngue runi caquiiñeʼ uquidxi ca xpinni Cristu que confianza ni nápacaʼ ca ancianu ante gueeda ca guendanagana. Pa guzuubacabe diidxaʼ ora gastiʼ cazaaca la? qué zaca nagana para laacabe gúnicabe ni ora guidxaagalúcabe guendanagana.
11. ¿Xiñee caquiiñeʼ gaca fe stinu naguidxi?
11 Caquiiñeʼ gápanu fe cásica gupa ca xpinni Cristu ni bicaa Pablo carta que ra nuucaʼ. Nabáninu ti tiempu ra stale binni qué runi crecaʼ pa maʼ gaxha nuu fin stiʼ guidxilayú riʼ ne dede runi búrlacaʼ laanu purtiʼ runi crenu ni (2 Ped. 3:3, 4). Neca ruzeeteʼ Biblia caadxi cosa ni zazaaca lu gran tribulación, peru nuu stale ni qué gánnanu. Caquiiñeʼ gápanu ti fe naguidxi para guni crenu zedandá fin stiʼ guidxilayú riʼ ora peʼ maʼ gudixhe Jehová guni ni ne chuʼnu seguru zápabe laanu (Hab. 2:3).
12. ¿Xi zacané laanu guilanu lu gran tribulación?
12 Laaca naquiiñeʼ guni crenu caquiiñeʼ Jehová «mozo ni nuu xpiaaniʼ ne ni runi jneza» para guni dirigir laanu ca dxi riʼ (Mat. 24:45). Cásica ca xpinni Cristu hebreu que zándaca gucuaacaʼ instrucción ora yendá ejércitu romanu guidxi que, laanu laaca zándaca zacaanu instrucción para gulanu xquendanabáninu ora guzulú gran tribulación. Yanna nga caquiiñeʼ guquídxinu confianza ni nápanu ca ni zániru ndaaniʼ organización stiʼ Jehová. Pa dede yanna guzúʼbanu stiidxaʼ ca hermanu ne gápanu confianza laacaʼ la? qué zaca nagana para laanu chinándanu ca instrucción ni guicaanu ora maʼ nuunu lu gran tribulación.
13. ¿Xiñee biaʼsi conseju ni zeeda lu Hebreos 13:5 para ca xpinni Cristu que?
13 Laga cabeza ca xpinni Cristu que gúʼyacaʼ señal para guireecaʼ ndaaniʼ guidxi que, naquiiñeʼ guibánicaʼ né huaxiéʼ cosa ne cadi gannaxhiicaʼ bueltu (biindaʼ Hebreos 13:5). Nuu de laacabe gudiʼdiʼ hambre ne guendapobre (Heb. 10:32-34). Neca guyuu ti tiempu gudixhe íquecabe guni huantárcabe ca guendanagana que pur ca noticia galán, peru nuu de laaca zándaca gudixhe íquecaʼ gápacaʼ jma bueltu purtiʼ guníʼ íquecaʼ zacá zápacaʼ ni iquiiñecaʼ ne qué ziaanacaʼ pobre. Peru qué zanda gulá bueltu xquendanabánicabe ora guinitilú Jerusalén (Sant. 5:3). Pa nadxiicabe bueltu, zaca nagana para laacabe gusaanacabe lídxicabe o ca cosa ni nápacabe ora caquiiñeʼ guxooñecabe lu ca dani que.
14. ¿Xi decisión zacaanu pa naguidxi fe stinu?
14 Pa gápanu fe maʼ cadi candaa para guinitilú guidxilayú malu riʼ, zacaneni laanu cadi guicá íquenu gápanu bueltu o cosa risaca. Ora guzulú gran tribulación qué zasaca bueltu. Biblia ruzeeteʼ zulaa binni plata stiʼ lu calle ora gudiicaʼ cuenta qué zanda gulá plata nin oro stícabe laacabe dxi gueeda xiana stiʼ Jehová (Ezeq. 7:19). Lugar de guicá íquenu guni ganarnu bueltu, ni jma galán gúninu nga guicaanu decisión ni zacané laanu guibaninenu huaxiéʼ cosa ne cadi gúninu gastu jma de ni nápanu. Gúninu stipa cadi guzáʼbinu o cadi guicá íquenu gápanu cosa risaca dede maʼ qué gápanu tiempu para gúninu xcaadxi cosa. Laaca naquiiñeʼ gápanu cuidadu cadi gannaxhiinu ca cosa ni nápanu (Mat. 6:19, 24). Zándaca ra jma zedadxiña fin caquiiñeʼ gusihuínninu pa jma nápanu confianza Jehová o ca cosa ni nápanu.
«CAQUIIÑEʼ GUNI HUANTARTU»
15. ¿Xiñee nabé risaca guni huantar ca xpinni Cristu?
15 Ra jma maʼ nagana modo nabani ca xpinni Cristu de Judea que, caquiiñeʼ gusihuínnicaʼ naguidxi fe sticaʼ para guni huantarcaʼ ca prueba ni gueeda que (Heb. 10:36). Neca nuu de laacaʼ maʼ biʼniʼ huantarcaʼ ora guzanándacabe laacaʼ, peru stale de laacabe biziidiʼ ni dxandíʼ zeeda lu Biblia dxi gupa congregación ti tiempu de paz. Ngue runi bisietenalaʼdxiʼ Pablo laacabe jmaruʼ si zazananda binni laacabe ne caquiiñeʼ chúʼcabe listu para cadi guixélecabe de Dios dede ra gáticabe casi biʼniʼ Jesús (Heb. 12:4). Cumu zidale ca xpinni Cristu la? stale de ca judíu que guizáʼ bidxiichicaʼ. Caadxi iza ante, bicaalú caadxi binni Pablo ra cayuni predicar ndaaniʼ guidxi Jerusalén. Ne jma de 40 judíu «bíʼnicaʼ ti juramentu, nacaʼ qué zocaʼ ne qué zeʼcaʼ pa qué guuticaʼ Pablo» (Hech. 22:22; 23:12-14). Neca nuu ca xpinni Cristu que lade binni ni nanalaʼdxiʼ laacaʼ, peru naquiiñeʼ gúnicaʼ stipa cadi gusaana de gaca reunircaʼ, guni predicarcaʼ ne guquídxicaʼ fe sticaʼ.
16. ¿Ximodo zanda gacané carta ni gucuá para ca hebreu laanu? (Hebreos 12:7).
16 ¿Xi zacané ca xpinni Cristu que guni huantarcaʼ ora sanándacabe laacaʼ? Racalaʼdxiʼ Pablo gacané ca xpinni Cristu gúʼyacaʼ xi ndaayaʼ zanda guicaacaʼ ra guni huantarcaʼ ca guendanagana que. Ngue runi bisiénebe laacaʼ rudii Dios lugar tidiʼ ca xpinni Cristu lu guendanagana para gacaneni laacaʼ guiniisicaʼ lu Stiidxaʼ Dios (biindaʼ Hebreos 12:7). Caquiiñeʼ gúʼyacabe ni casi ti entrenamientu ni gacané laacabe cadi gusaana de gápacabe ca cualidad ni caquiiñeʼ gapa ca xpinni Cristu. Zaqué qué zaca nagana para laacabe guni huantárcabe ca guendanagana que ra gúʼyacabe zacaneni laacabe guiniisicabe lu Stiidxaʼ Dios (Heb. 12:11).
17. ¿Xiñee nanna Pablo xi caquiiñeʼ guni ca xpinni Cristu para guni huantarcaʼ ora sanándacabe laacaʼ?
17 Guluu Pablo gana ca xpinni Cristu que guni huantarcaʼ ne cadi guireecaʼ gana. Ne nuu razón para gúnibe ni. ¿Xiñee yaʼ? Purtiʼ laapebe guzanándabe ca xpinni Cristu, ngue runi nánnabe xi peʼ ngue cadxaagalucaʼ. Ne laaca purtiʼ stale biaje guzanándacabe laabe dxi nacubi gúcabe xpinni Cristu (2 Cor. 11:23-25). Nanna Pablo xi caquiiñeʼ gúnicabe para guni huantárcabe. Ngue runi bisietenalaʼdxiʼ laacabe caquiiñeʼ gápacabe confianza Jehová ne cadi laca laacabe. Né stale valor guníʼ Pablo ca diidxaʼ riʼ: «Jehová nga racané naa. Qué zadxibeʼ diaʼ» (Heb. 13:6).
18. ¿Xi cadi naquiiñeʼ guiaandaʼ laanu, ne xi naquiiñeʼ gúninu?
18 Ca dxi riʼ, nuu de ca hermanu stinu cayuni huantarcaʼ neca canazanándacabe laacaʼ. Zanda gusihuínninu nadxiinu laacabe ra guni orarnu ne guyúbinu modo gacanenu laacabe (Heb. 10:33). Biblia ná : «Guiráʼ ca ni racalaʼdxiʼ chuʼ tobi si né Cristu Jesús ne ca ni racalaʼdxiʼ guni adorar Dios, laaca zazanándacabe laacaʼ» (2 Tim. 3:12). Ndiʼ riníʼ guiranu caquiiñeʼ chuʼnu listu para ora gueeda tiempu nagana. Caquiiñeʼ gápanu confianza Jehová ne chuʼnu seguru zacanebe laanu guni huantarnu intiica si ni gueeda. Zaguixhedxibe ladxidóʼ ca xpínnibe ni qué gusaana laabe ora peʼ caquiiñecaʼ ni (2 Tes. 1:7, 8).
19. ¿Xi caquiiñeʼ gúninu para chuʼnu listu ora gueeda gran tribulación? (Biiyaʼ imagen ca).
19 Guizáʼ gucané carta ni bicaa Pablo ra nuu ca xpinni Cristu hebreu que laaca para ganda gudxiilucaʼ ca guendanagana ni gueeda despué. Guluu Pablo gana laacabe guiziidiʼ chaahuicabe ne guiénecabe ni zeeda lu Stiidxaʼ Dios. Zacá zánnacabe gunáʼ nga ca cosa ni cadi dxandíʼ rusiidiʼ binni ne gucaanácabe cani purtiʼ zanda gusirácani fe stícabe. Laaca gúdxibe laacaʼ guquídxicaʼ fe sticaʼ ti chinándacaʼ instrucción stiʼ Jesús ne stiʼ ca ni zániru ndaaniʼ congregación. Ne gúdxibe laacaʼ qué zaca nagana para laacaʼ guni huantarcaʼ pa gúʼyacaʼ ca guendanagana ca casi xiixa ni zacané laacaʼ, ni caninu nga pa gúʼyacabe ni casi xiixa ni caquiiñeʼ Bixhózecabe ni nadxii laacabe para gacané laacabe guiniisicabe lu Stiidxaʼ Dios. Laanu, laaca naquiiñeʼ chinándanu conseju ni zeeda lu Biblia riʼ para ganda guni huantarnu sin guixélenu de Dios dede ora gueeda fin (Heb. 3:14).
Guluu Jehová ndaayaʼ ca xpinni Cristu ni qué nixeleʼ de laa pur biʼniʼ huantarcaʼ. Qué nusaana de ñaca reunírcabe despué de bixooñecabe de ndaaniʼ guidxi Judea. ¿Xi rizíʼdinu yaʼ? (Biiyaʼ párrafo 19).
CANCIÓN 126 ¡Bizuhuaa dxiichiʼ, gutaná ne cadi guidxiʼbuʼ!
a Lu primé si capítulo ni bicaa Pablo guníʼ biaʼ gadxe biaje ni zeeda lu Stiidxaʼ Dios ni gucuá lu hebreu para gusihuinni jma risaca modo runi adorar ca xpinni Cristu Dios que modo runi adorar ca judíu (Heb. 1:5-13).
