ARTÍCULO DE ESTUDIU 38
«Latáʼ ra nuaaʼ, [...] ne zudieeʼ lugar guiziiláʼdxitu»
«Latáʼ ra nuaaʼ, guiráʼ ni cayuni dxiiñaʼ nadipaʼ ne ca ni nuáʼ stale cosa nanaa, ne zudieeʼ lugar guiziiláʼdxitu» (MAT. 11:28, TNM).
CANCIÓN sjj 17 Riuuladxeʼ
NI ZAZÍʼDINU *
1. Casi ná Mateo 11:28-30, ¿xi promesa biʼniʼ Jesús?
BIʼNIʼ JESÚS ti promesa galán nezalú stale binni ni cucaadiaga laa. Sicaríʼ guniʼbe: «Latáʼ ra nuaaʼ, [...] ne zudieeʼ lugar guiziiláʼdxitu» (biindaʼ Mateo 11:28-30). Guizáʼ sicarú promesa riʼ. Guidúʼndanu ni bíʼnibe pur ti gunaa ni nabé huará.
2. ¿Ximodo gucané Jesús ti gunaa ni huará?
2 Guizáʼ caquiiñeʼ gunaa que tu gacané laa. Maʼ guyebe ra nuu stale doctor, maʼ gudiʼdiʼ doce iza de huarabe, ne qué ganda guiándabe. Ne cadi nayabe casi ná Ley (Lev. 15:25). Peru gúnnabe cusianda Jesús binni huará, ngue runi yeyúbibe laa. Ora bidxélabe Jesús, gudáʼnabe ñee xhaba ne oraqueca biándabe. Bisianda Jesús laabe, ne laaca bisihuinni nadxii ne runi respetar laabe pur modo biʼniʼ tratar laabe. Ti modo biʼniʼ Jesús ni nga bidxiña ra nuube ne gudxi laabe né diidxaʼ nadóʼ «xiiñeʼ». Nanna dxíchinu guizáʼ gutadxí ladxidóʼ gunaa riʼ (Luc. 8:43-48).
3. ¿Xi chiguicábinu lu artículo riʼ?
3 Gunaa que nga guyé ra nuu Jesús. Ngaca nga naquiiñeʼ gúninu. Caquiiñeʼ gúninu stipa para guidxíñanu Jesús. Tiempu riʼ maʼ qué rúnibe milagru para gusiándabe binni ni ruyubi laabe. Peru cayúnirube invitación riʼ laanu: «Latáʼ ra nuaaʼ, [...] ne zudieeʼ lugar guiziiláʼdxitu». Lu artículo riʼ zacábinu gaayuʼ pregunta: ¿Xi zanda gúninu para guidxíñanu Jesús? ¿Xi gucalaʼdxiʼ Jesús niníʼ né ca diidxaʼ guanu ayubu stiʼ? ¿Xi rizíʼdinu de ejemplu stiʼ Jesús? ¿Xiñee ratadxí ladxidoʼno ora rúninu dxiiñaʼ ni maʼ bidiibe laanu? Ne ¿xi naquiiñeʼ gúninu para cadi gusaana de guanu ayubu stiʼ Jesús ne gatadxí ladxidoʼno?
«LATÁʼ RA NUAAʼ»
4, 5. ¿Xi zanda gúninu para guidxíñanu Jesús?
4 Ti cosa zanda gúninu para guidxíñanu Jesús nga guizíʼdinu guiráʼ ca cosa ni bíʼnibe ne ni guniʼbe (Luc. 1:1-4). Nga runi, caquiiñeʼ guni estudiarnu ca relatu ra riete xi guiráʼ bíʼnibe dxi guyuube lu guidxilayú riʼ. Guirutiʼ zanda gúnini pur laanu. Laaca ridxíñanu Jesús ora rácanu discípulo stibe ne riúʼnisanu.
5 Sti cosa ni zanda gúninu para guidxíñanu Jesús nga guyúbinu ca ancianu ora caquiiñenu gacanécabe laanu. Laacabe nga ti regalu stiʼ Jesús, purtiʼ riquiiñebe laacaʼ para gápacaʼ ca dendxuʼ stiʼ (Juan 21:16; Efes. 4:7, 8, 11; 1 Ped. 5:1-3). Peru qué ganna ca ancianu xi guiráʼ cazaacanu, nga runi caquiiñeʼ guidxíñanu laacabe ne gábinu laacabe gacanécabe laanu. Guidúʼyanu xi guníʼ ti hermanu láʼ Julian: «Bireeʼ de Betel purtiʼ guca huaraʼyaʼ, ne ti xhamiguaʼ gudxi naa guinabaʼ ca ancianu chigánnacaʼ naa. Guníʼ iqueʼ cadi caquiiñeʼ ni, peru despué gudxeʼ laacabe pa zanda chigánnacabe naa. Ne laani nga tobi de ca regalu jma galán huadiicabe naa». Ca ancianu leal, casi guiropaʼ ni yeganna Julian, zanda gacanécabe laanu guiníʼ íquenu modo «riníʼ ique Cristu» o chinándanu modo guca Jesús (1 Cor. 2:16; 1 Ped. 2:21). Regalu riʼ nga tobi de ca ni jma galán zanda gudiicabe laanu.
«LAQUIXHE AYUBU STINNEʼ XAYÁNNITU»
6. ¿Xi gucalaʼdxiʼ Jesús niníʼ né ca diidxaʼ «laquixhe ayubu stinneʼ xayánnitu»?
6 Ora biʼniʼ invitar Jesús laanu guanu ayubu stiʼ la? ni nuube guiniʼbe nga guni respetarnu autoridad stibe. Ne casi ñaca nábibe laanu guanenu laabe ayubu stibe para gúninu ni ná Jiobá tobi si. Nga runi, caquiiñeʼ gúninu stipa pur gúninu ni ná Jiobá.
7. Casi ná Mateo 28:18-20, ¿xi dxiiñaʼ maʼ gucuaanu, ne xi cadi naquiiñeʼ guiaandaʼ laanu?
7 Runi aceptarnu invitación stiʼ Jesús ora rudiʼnu xpídanu Jiobá ne riúʼnisanu. Cayúnibe invitación riʼ guiráʼ binni. Ne qué zucaanabe ca binni ni racalaʼdxiʼ guni ni ná Dios (Juan 6:37, 38). Guiranu ca xpinni Cristu nápanu privilegiu de gúninu dxiiñaʼ ni maʼ bisaana Jiobá lu náʼ Jesús. Nga runi, cadi guiaandaʼ laanu qué zusaana Jesús de gacané laanu (biindaʼ Mateo 28:18-20).
«LAGUIZIIDIʼ DE NAA»
Quixhedxinu ladxidóʼ xcaadxi cásica biʼniʼ Jesús ni dxiqué. (Biiyaʼ párrafo 8 hasta 11). *
8, 9. a) ¿Xiñee guyuulaʼdxiʼ ca binni humilde guidxíñacaʼ Jesús? b) ¿Xi pregunta caquiiñeʼ guiníʼ íquenu?
8 Guizáʼ guyuulaʼdxiʼ ca binni humilde guidxíñacaʼ Jesús (Mat. 19:13, 14; Luc. 7:37, 38). ¿Xiñee yaʼ? Purtiʼ maʼ gadxé laabe de ca fariseu. Qué rannaxhii ca xaíque yuʼduʼ que binni ne nabé orgulloso laacaʼ (Mat. 12:9-14). Guca Jesús humilde ne gunnaxhii binni. Peru ca fariseu que la? puru si para laacaʼ ruyúbicaʼ ne nabé riuuláʼdxicaʼ gunibiáʼ binni laacaʼ. Ni biʼniʼ Jesús nga bisiidiʼ ca discípulo stiʼ cadi guyúbicaʼ para laacaʼ, gácacaʼ humilde ne gacanecaʼ xcaadxi binni (Mat. 23:2, 6-11). Biʼniʼ binni ni ná ca fariseu que purtiʼ bichíbicabe laacaʼ (Juan 9:13, 22). Peru Jesús guca nachaʼhuiʼ né binni ne guniʼné laacabe né diidxaʼ nadóʼ.
9 ¿Ñee rúninu guiráʼ ni biʼniʼ Jesús dxiqué la? Guníʼ ique ndiʼ: «¿Ñee runibiáʼ binni naa casi ti binni humilde ne nadóʼ la? ¿Ñee runeʼ ca dxiiñaʼ ni ruluíʼ huaxiéʼ risaca para gacaniáʼ xcaadxi la? ¿Ñee racaʼ nachaʼhuiʼ né xcaadxi binni la?».
10. ¿Ximodo biʼniʼ sentir ca binni guyuu gaxha de Jesús?
10 Cumu guca Jesús nadóʼ né ca binni guyuu gaxha de laa la? qué nidxíbicaʼ laabe ne biʼniʼ sentircaʼ galán, laaca guyuu Jesús nayecheʼ biaʼ tiempu bisiidiʼ laacabe (Luc. 10:1, 19-21). Bíʼnibe pregunta laacaʼ para gánnabe xi riníʼ íquecaʼ (Mat. 16:13-16). Cásica ora rapa ti binni ti yagahuiiniʼ para gudii cuananaxhi la? zaqueca gupa ne bisiidiʼ Jesús ca discípulo stiʼ ne guleenducaʼ ni galán lu dxiiñaʼ ni bíʼnicaʼ.
Gudiʼnu lugar guidxiña binni laanu ne gácanu nachaʼhuiʼ.
Guni predicarnu né stale gana.
Gúninu dxiiñaʼ stinu jneza ne gácanu humilde. *
11. ¿Xi pregunta caquiiñeʼ guiníʼ íquenu?
11 Pa nápanu autoridad, xi pregunta caquiiñeʼ guiníʼ íquenu: «¿Ximodo runi sentir familia stinneʼ o ca binni runeniaʼ dxiiñaʼ ora nuucaʼ gaxha de naa? ¿Ñee nacaʼ ti binni nadóʼ la? ¿Ñee rudieeʼ lugar guidxiña binni naa para guinabadiidxaʼ naa xiixa la? ¿Ñee rizaaladxeʼ ni rabi xcaadxi naa la?». Qué chuʼ dxi gácanu casi ca fariseu de dxiqué, guizáʼ ridxiichicaʼ ora rinabadiidxaʼ binni laacaʼ xiixa ne rizanándacaʼ ca binni ni qué runi ni rúnicaʼ (Mar. 3:1-6; Juan 9:29-34).
«ZAZIILÁʼDXITU»
12-14. ¿Xiñee riziiláʼdxinu o ratadxí ladxidoʼno ora rúninu dxiiñaʼ bisaanané Jesús laanu?
12 ¿Xiñee riziiláʼdxinu o ratadxí ladxidoʼno ora rúninu dxiiñaʼ bisaanané Jesús laanu yaʼ? Guidúʼyanu caadxi razón.
13 Nápanu ca superintendente ni jma nanna gusiidiʼ. Neca Jiobá nga ni jma risaca la? cadi naduxhuʼ ne rudii xquíxepeʼ laanu. Rusisácabe dxiiñaʼ rúninu (Heb. 6:10). Ne rudiibe stipa ni caquiiñenu para gúninu dxiiñaʼ maʼ bidiibe laanu (2 Cor. 4:7; Gál. 6:5). Jesucristu, Rey stinu nga ejemplu jma galán nápanu para guizíʼdinu guni tratarnu xcaadxi (Juan 13:15). Ne ca ancianu ni riganna laanu rúnicaʼ stipa pur chinándacaʼ ejemplu stiʼ Jesús, «Pastor ni nandxóʼ» (Heb. 13:20; 1 Ped. 5:2). Rúnicaʼ stipa pur uguucaʼ gana laanu, gácacaʼ nachaʼhuiʼ, gápacaʼ ne gusiidicaʼ laanu.
14 Nápanu compañeru ni racané laanu. Ninruʼ sti binni qué gapa xhamigu ni nadxii laa ne ti dxiiñaʼ nabé galán casi ni nápanu. Guníʼ ique ndiʼ: runinenu hermanu ne hermana ni nabé nachaʼhuiʼ dxiiñaʼ, ni qué rudxiibaʼ laca laa, ne neca nápacaʼ habilidad galán qué riníʼ íquecaʼ jma risácacaʼ que xcaadxi. Ruuyacabe laanu casi xhamígunu. Ne nadxiicabe laanu dede nuucabe dispuestu gudiicabe xpídacabe pur laanu.
15. ¿Ximodo naquiiñeʼ guidúʼyanu dxiiñaʼ ni bisaanané Jesús laanu?
15 Rúninu ti dxiiñaʼ nabé galán. Rusíʼdinu binni ni dxandíʼ de Jiobá ne rábinu laacaʼ cadi dxandíʼ ni rusiidiʼ Binidxabaʼ (Juan 8:44). Riguite Binidxabaʼ binni ne rucaabe laacaʼ guni sentircaʼ guirutiʼ zanda gacané laacaʼ. Rucaabe laacaʼ guiníʼ íquecaʼ qué zuni perdonar Jiobá laacaʼ ne guirutiʼ nadxii laacaʼ. Guizáʼ feu ca ni rusiidibe, nga runi stale binni riuu triste. Ora ridxíñanu Cristu la? raca perdonar ca pecadu stinu. Ne guizáʼ nadxii Jiobá laanu (Rom. 8:32, 38, 39). ¡Guizáʼ nayecheʼ nuunu purtiʼ rusíʼdinu xcaadxi gápacaʼ confianza Jiobá ne gudiicaʼ cuenta pabiáʼ racané ni rusiidiʼ Jiobá laacaʼ!
ZATADXÍ LADXIDOʼNO PA QUÉ GUSAANA DE GUANU AYUBU STIʼ JESÚS
16. ¿Xiñee cadi nanaa ayubu ni rinabaʼ Jesús laanu guanu biaʼ nanaa ca cosa ni ridxaagalunu?
16 Cadi nanaa ayubu ni rinabaʼ Jesús laanu guanu biaʼ nanaa ca cosa ni ridxaagalunu. Guzéʼtenu ti ejemplu. Ora maʼ biguétanu de dxiiñaʼ, stale de laanu maʼ bidxáganu ne qué runi sentirnu nayecheʼ. Peru guizáʼ nayecheʼ rúninu dxiiñaʼ ni maʼ bidii Jiobá ne Jesús laanu. Zándaca despué de ti dxi dxiiñaʼ maʼ bidxáganu ne caquiiñeʼ gúninu stipa para chuunu reunión. ¿Peru cadi dxandíʼ ora ribiguétanu de reunión guizáʼ riuʼnu gana la? Zacaca runi sentirnu ora rúninu stipa pur guni predicarnu o gápanu estudiu personal stinu.
17. ¿Xi naquiiñeʼ gánnanu ne xi naquiiñeʼ guiníʼ íquenu?
17 Naquiiñeʼ gánnanu ziuu hora zará stipa stinu. Nga runi, naquiiñeʼ guiníʼ íquenu ximodo caquiiñenu ni. Purtiʼ zándaca caquiiñenu stipa stinu para guyúbinu gápanu stale cosa risaca. Guidúʼyanu ni gudxi Jesús ti joven ricu dxi gunabadiidxaʼ joven riʼ laabe xi caquiiñeʼ guni para guicaa guendanabani ni qué zaluxe. Nachaʼhuiʼ joven que ne runi ni ná Ley, purtiʼ lu Evangeliu stiʼ Marcos ná nadxii Jesús laabe. Ngue runi biʼniʼ Jesús laabe invitación riʼ: «Guyé bitoo irá ni napuʼ, [...] ne dananda naa». Guca nagana para joven riʼ guni ni gudxi Jesús laa, ne zacá bisihuínnibe qué racaláʼdxibe chinándabe Jesús purtiʼ qué ninabe nusaanabe guiráʼ ca cosa risaca nápabe (Mar. 10:17-22). Ne pur nga qué nicaabe invitación stiʼ Jesús ne biyúbibe gápabe jma «bidxichi» (Mat. 6:24). ¿Xi ñúninu pa ñabi Jesús laanu chinándanu laa yaʼ?
18. ¿Xi naquiiñeʼ gúninu gatigá ne xiñee?
18 Gatigá naquiiñeʼ guiníʼ íquenu gunáʼ nga ca cosa ni jma risaca para laanu. ¿Xiñee yaʼ? Purtiʼ zacá zudiʼnu cuenta pa caquiiñenu stipa stinu jneza. Guidúʼyanu ni bizaaca ti joven láʼ Mark. Sicaríʼ guniʼbe: «Xadxí guníʼ iqueʼ nabaneniáʼ ni caquiiñeʼ siaʼ. Peru neca precursor naa, nisi bueltu maʼ cá iqueʼ ne laaca riníʼ iqueʼ xi zándaruʼ guneʼ para guibaneʼ jma galán. Peru gatigá rinabadiidxaʼ xiñee nagana modo nabaneʼ. Oraqueruʼ bidieeʼ cuenta cuyubeʼ puru para naa siaʼ ne cudieeʼ Jiobá tiempu ne stipa ni runi sobra naa». Bichaa Mark modo riníʼ ique ne modo nabani para guni jma lu xhiiñaʼ Jiobá. Laabe guniʼbe: «Nuu biaje riuaaʼ triste. Peru cumu cayacané Jiobá ne Jesús naa la? cadi cusaanaʼ de guneʼ jma lu xhiiñaʼ Dios».
19. ¿Xiñee naquiiñeʼ guidúʼyanu ca cosa ca modo ruuyaʼ Jiobá cani?
19 Guidúʼyanu chonna cosa ni zacané laanu para cadi gusaana de guanu ayubu stiʼ Jesús. Primé, guidúʼyanu ca cosa ca modo ruuyaʼ Jiobá cani. Cayúninu xhiiñaʼ Jiobá, nga runi caquiiñeʼ gúninu ni modo racaláʼdxibe. Laabe nga xpixuaananu ne laanu nga ca trabajador stibe (Luc. 17:10). Pa gúninu dxiiñaʼ stibe modo racaláʼdxinu la? zacananu ora guanu ayubu stiʼ Jesús. Dede ti yuze ni nadipaʼ racaná pa qué cheʼ neza ra racalaʼdxiʼ xpixuaanaʼ. Nga runi, pa gúninu ni gabi Jiobá laanu, zudxíʼlunu intiica guendanagana guidxaagalunu ne zúninu ni qué niníʼ íquenu ñúninu. Cadi guiaandaʼ laanu guirutiʼ zanda gucueeza Jiobá ora maʼ gudixhe ique guni xiixa (Rom. 8:31; 1 Juan 4:4).
20. ¿Xiñee cadi naquiiñeʼ guiaandaʼ laanu xiñee nuanu ayubu stiʼ Jesús?
20 Guiropa, cadi guiaandaʼ laanu xiñee cayúninu xhiiñaʼ Dios. Nuanu ayubu stiʼ Jesús purtiʼ racaláʼdxinu gusisácanu lá Jiobá, Bixhózenu ni nadxii laanu. Lu primé siglu guyuu binni ni biyubi puru para laasi. Ne pur nga guníʼ íquecaʼ cadi nabánicaʼ nayecheʼ ne bisaanacaʼ de guacaʼ ayubu stiʼ Jesús (Juan 6:25-27, 51, 60, 66; Filip. 3:18, 19). Peru guyuu tu laa gucané xcaadxi purtiʼ nadxiicaʼ Dios ne binni. Guyuulaʼdxiʼ ca binni riʼ guacaʼ ayubu stiʼ Jesús, guyuucaʼ nayecheʼ biaʼ tiempu bibánicaʼ lu Guidxilayú riʼ ne gucuaacabe ndaayaʼ de chécabe guibáʼ né Cristu. Laanu laaca zabáninu nayecheʼ pa guanu ayubu stiʼ Jesús ne pa qué guiaandaʼ laanu xiñee nuanu ni.
21. Casi ná Mateo 6:31-33, ¿xi cabézanu guni Jiobá pur laanu?
21 Guionna, cabézanu gacané Jiobá laanu. Maʼ gulinu gúninu xhiiñaʼ Jiobá. Ne guníʼ Jesús zazanándacabe laanu. Neca zacá, nápanu confianza zudii Jiobá laanu stipa ni caquiiñenu para gudxíʼlunu intiica guendanagana. Nga runi, laga jma guni huantarnu, jma nadipaʼ zácanu (Sant. 1:2-4). Laaca naquiiñeʼ cuézanu gudii Jiobá laanu guiráʼ ni caquiiñenu, zapa Jesús laanu ne zaguu ca hermanu stinu gana laanu (biindaʼ Mateo 6:31-33; Juan 10:14; 1 Tes. 5:11). Maʼ nápanu guiráʼ ni caquiiñenu para gudxíʼlunu intiica guendanagana.
22. ¿Xiñee zanda chuʼnu nayecheʼ?
22 Gutadxí ladxidóʼ gunaa ni huará que dxi bisianda Jesús laa. Peru zatadxí ladxidoʼbe pa chinándabe Cristu. ¿Xi bíʼnibe yaʼ? ¿Ñee yenándabe Cristu la? Qué gánnanu, peru pa gulibe guabe ayubu stiʼ Jesús gucuaabe ti ndaayaʼ guizáʼ galán, chebe guibáʼ. Intiica sacrificiu biʼniʼ gunaa riʼ huaxiéʼ risácani, purtiʼ jma galán ni guleendube. Zanda chuʼnu nayecheʼ pa maʼ gucuaanu invitación stiʼ Jesús ora gudxi laanu: «Latáʼ ra nuaaʼ». Purtiʼ nápanu esperanza de guibáninu ndaaniʼ Guidxilayú riʼ o chuunu guibáʼ.
CANCIÓN sjj 13 Chinándanu ejemplu stiʼ Cristu
^ párrafo 5 Cayuni invitar Jesús laanu guidxíñanu laa. Peru ¿xi naquiiñeʼ gúninu para guidxíñanu laabe yaʼ? Lu artículo riʼ zacábinu pregunta riʼ ne zietenaláʼdxinu xiñee ratadxí ladxidoʼno guninenu Cristu dxiiñaʼ.
^ párrafo 60 NI RIHUINNI LU FOTO RIʼ: Gadxé gadxé modo gudixhedxí Jesús ladxidóʼ binni.
^ párrafo 66 NI RIHUINNI LU FOTO RIʼ: Cayuni ti hermanu stipa para chinanda ejemplu stiʼ Jesús.
