1, 2. a) ¿Xi maʼ cadi candaa zaníʼ ca xaíque guidxi? b) ¿Xi zacábinu lu artículo riʼ?

GUXUÍʼLUNU maʼ guníʼ ca xaíque guidxi «maʼ nuu paz ne seguridad». Zándaca zuchácabe bi yánnicabe ne guiníʼcabe pur laacabe napa binni «paz ne seguridad». Ne zacaláʼdxicabe gucaacabe laanu guiníʼ íquenu zanda cueecabe ca guendanagana nuu ndaaniʼ Guidxilayú riʼ. Peru qué zanda diʼ gucueezacabe ca cosa ni chiguizaaca despué. ¿Xiñee coʼ yaʼ? Purtiʼ Biblia ná «málasi zanitilucaʼ [...] ne qué zalá nin tobi de laacaʼ» (1 Tes. 5:3).

² Lu artículo riʼ zacábinu caadxi pregunta nabé risaca: ¿Xi zazaaca lu gran tribulación? ¿Xi ribeza Jiobá gúninu óraca yaʼ? Ne ¿xi caquiiñeʼ gúninu yanna para cadi gusaananu Jiobá lu gran tribulación? (Mat. 24:21).

3. Casi ná Apocalipsis 17:5, 15-18, ¿ximodo zunitilú Dios «Babilonia guidxi roʼ»?

³ (Biindaʼ Apocalipsis 17:5, 15-18, TNM). Zanitilú «Babilonia guidxi roʼ». Casi maca bizéʼtenu, qué zanda guni ca xaíque guidxi gastiʼ para cadi guinitilú Babilonia guidxi roʼ. ¿Xiñee coʼ yaʼ? Purtiʼ zaguu Dios ndaaniʼ ladxidóʼ ca gobiernu «gúnicaʼ ni cá íquebe». ¿Xi zucaa Dios laacabe gúnicabe yaʼ? Gunduuxecabe guiráʼ religión falsu,  tobi de laacani nga cristiandad. * Zaguu Dios ndaaniʼ ladxidóʼ «chii cachu» ni napa «bestia salvaje color naxiñáʼ rini» gunduuxeʼ laacabe. Chii cachu ca nga runi representar guiráʼ ca gobiernu políticu ni runi apoyar «bestia salvaje», o Naciones Unidas (Apoc. 17:3, 11-13; 18:8). Ora gucaalú ca gobiernu riʼ ca religión falsu zuzulú gran tribulación. Ne zadxibi binni purtiʼ zazaacani lu guidubi Guidxilayú riʼ.

4. a) ¿Xi zándaca zaníʼ ca gobiernu para gunduuxecaʼ guiráʼ ca religión falsu? b) ¿Xi zándaca zuni ca binni ni guyuu lade ca religión falsu?

⁴ Qué gánnanu xiñee zucaalú ca gobiernu Babilonia guidxi roʼ. Zándaca zaníʼcabe napa ca religión donda pur gastiʼ paz ndaaniʼ guidxilayú ne riuucaʼ lu política. O zándaca zaníʼcabe napa ca religión falsu stale bueltu ne stale cosa risaca (Apoc. 18:3, 7). Zunitilú ca xaíque guidxi ca religión falsu, peru qué zuuticabe guiráʼ ca xpínnicaʼ. Guinitilú si ca religión, zudii binni cuenta qué ñanda ñuni ca xaíque yuʼduʼ gastiʼ para gacanecaʼ binni ne zándaca gacaláʼdxicaʼ guixélecaʼ de ca religión falsu.

5. ¿Xi maʼ guníʼ Jiobá zuni lu gran tribulación, ne xiñee?

⁵ Cadi cá lu Biblia pabiáʼ tiempu zandaa dxi guinitilú Babilonia guidxi roʼ, ni nánnanu nga zándaca qué zandaa peʼ ni (Apoc. 18:10, 21). Maca guníʼ Jiobá zucueeza lu tiempu stiʼ gran tribulación para guilá ca ungidu ne religión ni dxandíʼ (Mar. 13:19, 20). Yanna, ¿xi ribeza Jiobá gúninu ora guzulú gran tribulación dede ora guzulú Armagedón yaʼ?

6. ¿Xi ribeza Jiobá guni ca xpinni?

⁶ Casi bizíʼdinu lu artículo ni gudiʼdiʼ ca, racalaʼdxiʼ Jiobá guixeleʼ ca xpinni de ca cosa ni cadi jneza runi Babilonia guidxi roʼ. Peru nuuruʼ ni caquiiñeʼ gúninu.  Caquiiñeʼ chuʼnu dispuestu gúninu ni ná Dios. Guidúʼyanu chupa modo zanda gúninu ni.

7. a) ¿Ximodo rusihuínninu nabáninu modo peʼ riuulaʼdxiʼ Jiobá? b) Casi ná Hebreos 10:24, 25, ¿xiñee risaca guidagulisaanu tiempu riʼ?

⁷ Primé, caquiiñeʼ guibáninu modo peʼ riuulaʼdxiʼ Dios. Cadi naquiiñeʼ guidúʼyanu jneza guiráʼ ca cosa yuudxuʼ ni runi binni guidxilayú. Cadi jneza ridúʼyanu guni practicar binni pecadu sexual, casi guichaganáʼ chupa gunaa o chupa hombre ne xcaadxi cosa dxabaʼ ni zeeda de ca muxeʼ (Mat. 19:4, 5; Rom. 1:26, 27). Guiropa, caquiiñeʼ guidagulisaanenu ca hermanu stinu para guni adorarnu Dios. Ne rúninu ni ra ganda, ndaaniʼ Yoo stiʼ Reinu, ne pa caquiiñeʼ la? zúninu ni ra lidxi tuuxa hermanu o ti lugar nagaʼchiʼ. Peru intiica guizaaca, qué zusaana de guidagulisaanu para gúninu ni ná Dios. Naquiiñeʼ gúninu ni «jmaruʼ si yanna ra cadúʼyanu jma maʼ gaxha nuu dxi stiʼ Dios» (biindaʼ Hebreos 10:24, 25, TNM).

8. ¿Xi zándaca guchaa lu mensaje ni rinenu ra nuu binni?

⁸ Zándaca ora guzulú gran tribulación guchaa mensaje ni rinenu ra nuu binni. Tiempu riʼ runi predicarnu ca noticia galán stiʼ Reinu ne rúninu stipa para gacanenu binni gaca discípulo. Ne zándaca tiempu ca gudiʼnu laacabe ti mensaje ni zuniná laacabe, Biblia ruchaaga mensaje riʼ casi ti «guié naroʼbaʼ de granizu» ni ziaba luguiácabe (Apoc. 16:21). Zándaca zábinu binni mayaca guinitilú guidxilayú stiʼ Binidxabaʼ. Despué zánnanu xi mensaje zudiʼnu ne ximodo peʼ chigúninu ni. ¿Ñee zuni predicarnu ne zusíʼdinu binni modo ca huayúninu ni raca jma de ti gayuaa iza la? o zuchaʼnu ni? Qué gánnanu, caquiiñeʼ cuézanu para gánnanu ni. Modo tiica si gúninu ni, caquiiñeʼ gácanu nadxibalú purtiʼ zándaca iquiiñeʼ Jiobá laanu para chitídxinu binni zusabanabe laacaʼ (Ezeq. 2:3-5).

9. ¿Xi zándaca zuni ca xaíque guidxi ora gunadiágacaʼ mensaje stinu, peru xi nanna dxíchinu?

⁹ Pur mensaje ni guni predicarnu, zándaca stale gobiernu zacalaʼdxiʼ gucueeza dxiiñaʼ stinu. Cásica nápanu confianza cayacané Jiobá laanu yanna para guni predicarnu, laaca caquiiñeʼ gápanu confianza zacanebe laanu tiempu ca. Nanna dxíchinu zudii Dios laanu stipa para gúninu ni ná (Miq. 3:8).

10. Casi ná Lucas 21:25-28, ¿xi zuni stale binni ora gúʼyacaʼ ni guizaaca lu gran tribulación?

¹⁰ (Biindaʼ Lucas 21:25-28, TNM). Guizáʼ zadxibi binni ora guzulú gran tribulación purtiʼ zuuyacaʼ modo guinitilú guiráʼ ca gobiernu, sistema comercial ne guiráʼ ca cosa nuu ndaaniʼ Guidxilayú. Ziuu «binni xizaa» ne zadxíbicaʼ gáticaʼ lu ca dxi jma nagana tidiʼ binni guidxilayú (Sof. 1:14, 15). Ne para tiempu riʼ, zándaca nabé nagana zaca xquendanabani binni, dede né ca xpinni Dios. Ne zadxaagalunu stale guendanagana purtiʼ cadi parte de guidxilayú riʼ laanu. Zándaca guiaadxaʼ laanu ca cosa ni jma riquiiñenu para guibaninenu.

11. a) ¿Xiñee zuyadxí binni guidxilayú laanu? b) ¿Xiñee cadi caquiiñeʼ guidxíbinu gran tribulación?

¹¹ Nabé zadxiichi ca binni ni binitilú  religión stiʼ ora gúʼyacaʼ cayúniruʼ ca testigu stiʼ Jiobá ni ná Dios. Pur guiráʼ ndiʼ zaníʼcabe mal de laanu guiráʼ ladu, dede lu ca red social ca. Zaca nanalaʼdxiʼ binni, ca gobiernu ne Binidxabaʼ laanu purtiʼ religión si stinu nga ni guiaana lu Guidxilayú riʼ. Ne qué zunduuxecabe guiráʼ ca religión ni nuu ndaaniʼ Guidxilayú. Nga runi, zuuyadxícabe laanu. Ne óraca nga zaca ca guidxi ca Gog stiʼ Magog. * Zadagulisaacaʼ para gucaalucaʼ ne zacaláʼdxicaʼ gunduuxecaʼ xquidxi Jiobá (Ezeq. 38:2, 14-16). Cumu qué gánnanu xi guiráʼ chiguizaaca la? zándaca chuʼnu xizaa. Peru nanna dxíchinu ti cosa: cadi caquiiñeʼ guidxíbinu gran tribulación, purtiʼ zabi Jiobá laanu xi gúninu para guilanu (Sal. 34:19). Zuzuhuaʼnu derechu ne zandisa íquenu, purtiʼ maʼ zedadxiña dxi gácanu libre. *

12. ¿Xi guiráʼ cudii «mozo ni nuu xpiaaniʼ ne ni runi jneza» laanu para gudxíʼlunu ca cosa ni chiguizaaca despué?

¹² Cudii «mozo ni nuu xpiaaniʼ ne ni runi jneza» guiráʼ ni caquiiñenu para cadi gusaananu Jiobá ora maʼ nuunu lu gran tribulación (Mat. 24:45). Huayuni «mozo» riʼ ni de gadxé gadxé modo, tobi de laani nga ca asamblea regional ni guca lu iza 2016 hasta 2018. Racané ca asamblea riʼ laanu para cadi gusaana de gápanu ca cualidad ni caquiiñenu ante guzulú dxi stiʼ Jiobá. Guietenaláʼdxinu gunáʼ nga ca asamblea riʼ.

13. ¿Xi caquiiñeʼ gúninu para cadi gusaananu Jiobá, ne xiñee caquiiñeʼ gúninu ni yanna?

¹³ Cadi gusaananu Jiobá. Asamblea ni guca lu iza 2016 biree lani «Cadi gusaananu Jiobá». Lu asamblea que bizíʼdinu pa nadipaʼ amistad nápanu né Jiobá qué zusaananu laabe. Laaca bizíʼdinu ridxíñanu Jiobá ora runi orarnu ne ora runi estudiarnu Stiidxabe. Ne guiráʼ ndiʼ zacané laanu para gudxíʼlunu ca guendanagana jma nadipaʼ. Ra mayaca guinitilú guidxilayú stiʼ Binidxabaʼ, zadxaagalunu caadxi prueba ni zusihuinni pa zácanu leal Jiobá ne Reinu stiʼ. Ne laaca zándaca zuni burla binni laanu (2 Ped. 3:3, 4). Ti razón nga purtiʼ qué riuʼnu lu política. Caquiiñeʼ gúninu stipa para cadi gusaananu Jiobá yanna ne ora maʼ nuunu lu gran tribulación.

14. a) ¿Xi cambiu ziuu né ca hermanu ni zániru ndaaniʼ xquidxi Dios lu Guidxilayú? b) ¿Xiñee caquiiñeʼ gácanu leal ca dxi ca?

¹⁴ Ora maʼ nuunu lu gran tribulación, ziuu ti cambiu né ca hermanu ni zániru ndaaniʼ xquidxi Dios lu Guidxilayú. Purtiʼ málasi zié ca ungidu ni nuuruʼ lu Guidxilayú riʼ guibáʼ para tíndecaʼ lu Armagedón (Mat. 24:31; Apoc. 2:26, 27). Ndiʼ rusihuinni maʼ qué ziuu Grupu ni Zániru ndaaniʼ Guidxilayú. Neca zacá, ziuu gran muchedumbre tobi si, purtiʼ ziuu hermanu de lade ca xcaadxi dendxuʼ ni zazaniru lu dxiiñaʼ stiʼ Dios. Caquiiñeʼ gusihuínninu nácanu leal Jiobá ra gacanenu ca hermanu riʼ ne ra chinándanu guiráʼ ni gábicabe laanu. Pa gúninu ni zalanu.

15. ¿Xi caquiiñeʼ gúninu para guni huantarnu, ne xiñee caquiiñeʼ gúninu ni yanna?

 ¹⁵ Guni huantarnu. Asamblea ni guca lu iza 2017 biree lani «¡Cadi guireeluʼ gana!». Gucané asamblea riʼ laanu para guni huantarnu ora guidxaagalunu guendanagana. Bizíʼdinu pa nápanu confianza Jiobá nga zanda guni huantarnu ne cadi pa nuunu galán (Rom. 12:12). Cadi guiaandaʼ laanu promesa biʼniʼ Jesús laanu riʼ: «Tu guni huantar dede ora gueeda fin la? zalá» (Mat. 24:13). Racané promesa riʼ laanu para cadi gusaananu Jiobá ora guidxaagalunu xiixa guendanagana. Pa guni huantarnu tiempu riʼ zacané ni laanu guni huantarnu ora maʼ nuunu lu gran tribulación.

16. Tiempu riʼ, ¿xi zacané laanu gácanu nadxibalú ne xi caquiiñeʼ gúninu?

¹⁶ Gácanu nadxibalú. Asamblea ni gúpanu lu iza 2018 biree lani «¡Guca nadxibalú!». Bizíʼdinu zanda gácanu nadxibalú pa nápanu confianza Jiobá ne cadi pur ca habilidad ni nápanu, ngaca nga ni zusihuinni pa zuni huantarnu. ¿Xi caquiiñeʼ gúninu para gápanu jma confianza Jiobá yaʼ? Guidúʼndanu Biblia guiráʼ dxi ne guiníʼ íquenu ximodo bilá Dios ca xpinni dxiqué (Sal. 68:20; 2 Ped. 2:9). Ora gucaalú ca gobiernu laanu lu gran tribulación zácanu nadxibalú ne jma zápanu confianza Jiobá (Sal. 112:7, 8; Heb. 13:6). Nga runi, caquiiñeʼ gácanu nadxibalú dede ca yanna ti chuʼnu listu ora gucaalú Gog laanu. *

17. ¿Xiñee cadi caquiiñeʼ guidxíbinu ora guzulú Armagedón? (Biiyaʼ dibuju ni zeeda lu portada).

¹⁷ Casi biete lu artículo gudiʼdiʼ que, stale de laanu maʼ huadúʼyanu guiráʼ cosa ni cazaaca lu ca «últimu dxi» stiʼ guidxilayú riʼ. Peru laaca cabézanu guilanu ora guzulú gran tribulación. Zunduuxe guerra stiʼ Armagedón guiráʼ ca cosa malu ni nuu ndaaniʼ Guidxilayú. Ne cadi caquiiñeʼ guidxíbinu purtiʼ stiʼ Dios  guerra riʼ (Prov. 1:33; Ezeq. 38:18-20; Zac. 14:3). Ora gudii Jiobá señal ca, zazaniru Jesucristu lu guerra riʼ. Ziuu ca ungidu ni maʼ biasa de lade gueʼtuʼ né laabe ne guiráʼ mil de ángel stibe. Guirácabe zadindenécabe Binidxabaʼ, ca demonio stiʼ ne ca ejércitu ni nuu ndaaniʼ Guidxilayú riʼ (Dan. 12:1; Apoc. 6:2; 17:14).

18. a) ¿Xi cayabi Jiobá laanu? b) ¿Ximodo racané Apocalipsis 7:9, 13-17 laanu para gápanu confianza zalanu?

¹⁸ Cayabi Jiobá laanu ca diidxaʼ riʼ: «Intiica guiibaʼ gúnicabe para gucaalúcabe lii, qué zabeendunedícabe ni gastiʼ» (Is. 54:17). Ti gran muchedumbre de ca xpinni Dios ni qué gusaana laabe zalá ora guiluxe gran tribulación ne qué zusaanacaʼ de gúnicaʼ ni ná Dios (biindaʼ Apocalipsis 7:9, 13-17, TNM). ¿Cadi dxandíʼ rudii Biblia laanu stale razón para gápanu confianza zalanu la? Nanna dxíchinu cayapa Jiobá ca xpinni ni qué rusaana laa (Sal. 31:23). Guiráʼ ca ni nadxiinu ne rusisácanu Jiobá zabáninu nayecheʼ ora guni vindicar Jiobá lá (Ezeq. 38:23).

19. ¿Xi esperanza guizáʼ galán mayaca gaca cumplir?

¹⁹ Guiníʼ íquenu pa nuzeeteʼ 2 Timoteo 3:2-5 ximodo zaca binni lu Guidxilayú cubi ora maʼ qué guinni Binidxabaʼ ndaaniʼ ni (biiyaʼ recuadru ni láʼ « Ximodo zaca binni despué»). Hermanu George Gangas, * ni guyuu lade Grupu ni Zániru guníʼ: «¡Guizáʼ sicarú zaca Guidxilayú riʼ ora guibani puru hermanu ndaaniʼ ni! Maʼ cadi candaa zabáninu ndaaniʼ ti lugar sicarú. Zabáninu stale ne qué zátinu». ¿Cadi dxandíʼ guizáʼ galán esperanza riʼ la?