1, 2. ¿Xi bizaaca laga zeʼ chupa discípulo stiʼ Jesús Emaús?

 NUU ca discípulo stiʼ Jesús 16 stiʼ nisán iza 33, nabé naná nuu ladxidoʼcaʼ ne guizáʼ cadxíbicaʼ. Biree chupa de ca discípulo que Jerusalén ne zecaʼ Emaús, ti guidxi ni riaana biaʼ 11 kilómetru de raqué. Nabé triste nuucabe purtiʼ maʼ guti Jesús, hombre ni canazanécabe que. Para laacabe ra guti Jesús que la? maʼ qué gápacabe esperanza de guizaaca ca cosa galán ni chiguni Mesías que. Peru qué gánnacabe chiguizaaca xiixa ni zuchaa modo cayuni sentírcabe.

² Bidxiña ti hombre ra nuucabe ne zizané laacabe, gúdxicabe hombre que pabiáʼ triste nuucabe pur guiráʼ ni bizaaca Jesús ne qué guidxélacabe xi gúnicabe. Despué gudxi hombre que laacabe caadxi cosa ni qué ziuu dxi guiaandaʼ laacabe. Bisiene laacabe xiñee gupa xidé gucaná ne guti Mesías que, ne bizulú «dede Moisés ne guiráʼ ca profeta». Ora yendá guionnacabe Emaús, bidii ca discípulo que cuenta Jesús nga xa hombre que ne maʼ biasa de lade gueʼtuʼ. ¡Nanna pabiáʼ biéchecabe ora gúnnacabe maʼ nabani Mesías sti biaje! (Luc. 24:​13-35).

3, 4. a) ¿Xi bizaaca ca discípulo stiʼ Jesús? (Hechos 1:3). b) ¿Xi zadúʼyanu lu artículo riʼ?

³ Stale biaje bihuinni Jesús nezalú ca discípulo stiʼ lu ca últimu 40 dxi guyuu lu Guidxilayú (biindaʼ Hechos 1:3). Cumu guluu Jesús gana laacabe la? maʼ qué ñuucabe triste, qué nidxíbicabe, guyuucabe nayecheʼ, gúpacabe confianza ne valor  para guni predicárcabe ne gusiidicabe de Reinu. a

⁴ Zanda cueendunu ni galán ora guidúʼndanu guiráʼ ni biʼniʼ Jesús lu últimu 40 dxi guyuu lu Guidxilayú. Lu artículo riʼ, zadúʼyanu chonna modo biquiiñebe tiempu riʼ. Primé, para cuʼbe gana ca discípulo stibe, guiropa, para gacanebe laacaʼ guiénecaʼ Stiidxaʼ Dios ne guionna, para gusiidibe laacaʼ gúnicaʼ jma dxiiñaʼ. Lu cada tobi de laacani zadúʼyanu ximodo zanda chinándanu ejemplu stiʼ Jesús.

XIMODO ZANDA CUʼNU GANA XCAADXI BINNI

5. ¿Xiñee caquiiñeʼ ca discípulo stiʼ Jesús que tu cuʼ gana laacaʼ?

⁵ Caquiiñeʼ ca discípulo que tu cuʼ gana laacaʼ. ¿Xiñee yaʼ? Purtiʼ nuu de laacabe bisaana lidxi, familia stiʼ ne negocio ni gupa para chinanda Jesús (Mat. 19:27). Xcaadxi de laacabe feu modo biʼniʼ tratar binni laacabe purtiʼ gúcacabe discípulo stiʼ Jesús (Juan 9:22). Peru ca discípulo stiʼ Jesús que gudixhe íquecaʼ guchaacaʼ modo nabánicaʼ neca guidxaagalucaʼ guendanagana purtiʼ nánnacabe Jesús nga Mesías ni nexheʼ gueeda que (Mat. 16:16). Ora guti Jesús maʼ qué ñápacabe esperanza zazaaca ca cosa galán ni nexheʼ guni que ne pur ngue nabé triste guyuucabe.

6. ¿Xi biʼniʼ Jesús biasa si de lade gueʼtuʼ?

⁶ Biene Jesús ni cayuni sentir ca discípulo stiʼ, nuucaʼ triste purtiʼ maʼ gútibe. Nánnabe cadi purtiʼ qué gápacaʼ fe nga nuucaʼ triste, ngue runi primeca dxi biásabe de lade gueʼtuʼ guyebe yenduube gana ca xhamígube. Bihuínnibe nezalú María Magdalena laga cayuunaʼ cueʼ baʼ stibe (Juan 20:​11, 16). Laaca bihuínnibe nezalú chupa discípulo stibe, ca ni bizéʼtenu ra bizulú artículo riʼ. Ne laaca bihuínnibe nezalú apóstol Pedro (Luc. 24:34). ¿Xi zanda guizíʼdinu de ejemplu stiʼ Jesús yaʼ? Guidúʼyanu xi bizaaca ora bihuínnibe nezalú María Magdalena.

7. ¿Xi biʼyaʼ Jesús cayuni María, ne xi bíʼnibe pur laa? (Juan 20:​11-16; biiyaʼ imagen ca).

⁷ (Biindaʼ Juan 20:​11-16). Siadóʼ guieʼruʼ 16 stiʼ nisán, guyé caadxi gunaa ni runi ni ná  Dios ra baʼ stiʼ Jesús (Luc. 24:​1, 10). Tobi de laacabe láʼ María Magdalena. Ora yendabe ra baʼ que, biiyabe maʼ qué guinni Jesús ne biree guxooñebe zitídxibe Pedro ne Juan ni bizaaca que. Guirópacaʼ bireecaʼ ziguxooñecaʼ ra baʼ que ne zinanda María laacabe. Ora yendá Pedro ne Juan ra baʼ que biiyacabe maʼ qué guinni Jesús ngue runi bibiguétacabe ra lídxicabe. Peru María qué nibiguetaʼ, biaana raqué cayuunaʼ. Ni qué gánnabe nga cayuuyaʼ Jesús laabe. Ora biʼyaʼ Jesús cayuunaʼ gunaa ni qué rixeleʼ de Dios riʼ, nabé biabe laa. Despué bihuínnibe nezalú ne bíʼnibe xiixa para quixhedxibe ladxidóʼ. Guníʼnebe laa ne bidiibe laa ti dxiiñaʼ nabé risaca: chitidxi ca bíʼchibe maʼ biásabe de lade gueʼtuʼ (Juan 20:​17, 18).

8. ¿Ximodo zanda chinándanu ejemplu stiʼ Jesús?

⁸ ¿Ximodo zanda chinándanu ejemplu stiʼ Jesús yaʼ? Zinándanu ni ra cuʼnu gana ca hermanu cadi gusaana de gúnicaʼ ni ná Jehová. Para ganda gúninu ni maʼ bizéʼtenu riʼ la? caquiiñeʼ guidúʼyanu xi guendanagana cadxaagalúcabe, guni sentirnu ni cayuni sentírcabe ne guinínenu laacabe né stale cariñu. Guidúʼyanu ni bizaaca ti hermana láʼ Jocelyn, guti béndabe lu ti accidente. Laabe guniʼbe: «Xadxí guyuaaʼ triste». Biʼniʼ invitar ti guendaxheelaʼ laabe ra lidxi, bicaadiágacaʼ laabe né stale cariñu ne bisietenaláʼdxicaʼ laabe guizáʼ risácabe para Jehová. Laabe guniʼbe: «Tiempu que qué guidxelaʼ xi guneʼ, bineʼ sentir casi ñaca cayateʼ guiiguʼ galaa nisadóʼ lu ti tormenta, peru biquiiñeʼ Jehová ca hermanu que para gulacaʼ naa, casi ñaca nudxiibacabe naa lu ti lancha ne gucanécabe naa guibiguetaʼ chúʼladxeʼ guneʼ ni ná Jehová». Pa racaláʼdxinu gacanenu xcaadxi binni naquiiñeʼ gudiʼnu lugar guiniʼcaʼ xi cazaacacaʼ, gucaadiaga chaahuinu laacaʼ ti ganda quixhedxinu ladxidoʼcaʼ ne gacanenu laacaʼ cadi gusaana de gúnicaʼ ni ná Jehová (Rom. 12:15).

XIMODO ZANDA GACANENU XCAADXI BINNI GUIENE CHAAHUICAʼ NI NÁ STIIDXAʼ DIOS

9. ¿Xi biʼyaʼ Jesús cayaadxaʼ ca discípulo que, ne ximodo gucanebe laacaʼ?

⁹ Biʼniʼ cré ca discípulo stiʼ Jesús ni ná Stiidxaʼ Dios ne bíʼnicaʼ stipa gúnicaʼ ni nani (Juan 17:6). Peru cadi cayénecaʼ xiñee gupa xidé guti Jesús casi ti binni malu. Nánnabe nachaʼhuiʼ ladxidóʼ ca discípulo que peru bidiibe cuenta cayaadxaʼ guiene chaahuicaʼ ni ná Stiidxaʼ Dios (Luc. 9:​44, 45; Juan 20:9). Ngue runi gucanebe laacaʼ guiénecaʼ ni cayuundacaʼ. Guidúʼyanu xi bíʼnibe ora bihuínnibe nezalú chupa discípulo stibe ni zeʼ Emaús.

10. ¿Ximodo gucané Jesús ca discípulo stiʼ guni crecaʼ laabe nga Mesías? (Lucas 24:​18-27).

¹⁰ (Biindaʼ Lucas 24:​18-27). Cadi casi zeʼ diʼ Jesús gudxi guiropaʼ hombre que tu laa, sínuque primeru gunabadiidxabe laacaʼ xiixa. ¿Xiñee yaʼ? Purtiʼ racaláʼdxibe guiniʼcaʼ xi caníʼ íquecaʼ ne xi cayuni sentircaʼ ne ngue peʼ nga ni biʼniʼ ca hombre riʼ. Gúdxicaʼ laabe cabézacaʼ cuee Jesús guidxi Israel de lu náʼ ca romanu. Despué de gúdxicabe Jesús xii ngue naguu xizaa laacabe, biquiiñebe Stiidxaʼ Dios para gacanebe laacaʼ guiénecaʼ maʼ guca cumplir stale profecía. b Jma maʼ huaxhinni bidxaaga Jesús xcaadxi discípulo stiʼ ne laaca bisiénebe laacaʼ xi riníʼ ca profecía que (Luc. 24:​33-48). ¿Xi rusiidiʼ ndiʼ laanu yaʼ?

11, 12. a) ¿Xi zanda guizíʼdinu pur modo biquiiñeʼ Jesús Stiidxaʼ Dios? (Biiyaʼ ca imagen ca). b) ¿Ximodo gucané hermanu que Nortey?

¹¹ ¿Ximodo zanda chinándanu ejemplu stiʼ Jesús? Ora maʼ cudiʼnu estudiu binni, gúninu laacabe pregunta ni gacané guiníʼcabe ni caníʼ íquecabe ne ni cayuni sentírcabe (Prov. 20:5). Ne ora maʼ nánnanu ni cayuni sentírcabe  guluinu laacabe ximodo zanda guidxélacabe textu ni zeeda lu Biblia ni gacané laacabe gudxiilúcabe xiixa guendanagana ni nápacabe. Cadi naquiiñeʼ gábinu laacabe xi peʼ gúnicabe jma galán guinabadiidxanu laabe xidé caníʼ ca textu ca ti gacanenu laacabe guiníʼ íquecabe ximodo zanda gúnicabe ni nácani lu xquendanabánicabe. Guidúʼyanu ni bizaaca ti hermanu láʼ Nortey de guidxi Ghana.

¹² Bizulú Nortey biʼniʼ estudiar Biblia dxi napa 16 iza, peru qué nindaa bicaalú familia stibe laabe. ¿Xi gucané laabe cadi guireebe gana yaʼ? Hermanu ni rudii laabe estudiu que biluíʼ laabe capítulo chii stiʼ Mateo para gusiene laabe zazanándacabe ca ni dxandíʼ xpinni Cristu. Nortey guníʼ: «Ora bizulú familia stinneʼ bicaalú naa bidieeʼ cuenta maʼ bidxelaʼ religión ni rusiidiʼ ni dxandíʼ». Hermanu ni rudii laabe estudiu que laaca biluíʼ laabe ni ná lu Mateo 10:​16, ra ná naquiiñeʼ gatananu ne gucané laabe guiníʼ íquebe ximodo zanda gusihuínnibe cualidad riʼ ora gusiénebe familia stibe ni runi crebe. Despué de guyuunisa Nortey gudixhe ique gaca precursor, peru bixhózebe racalaʼdxiʼ chebe universidad. Hermanu ni rudii laabe estudiu que qué ñabi laabe xi peʼ naquiiñeʼ gúnibe, sínuque biʼniʼ laabe pregunta ni gucané laabe guiníʼ íquebe ca principiu ni zeeda lu Biblia. ¿Xi bizaacaʼ Nortey yaʼ? Gúcabe precursor regular ne pur ngue guladxi bixhózebe laabe de ra lídxibe. Ndiʼ nga ni guníʼ Nortey de ni bizaacaʼ que: «Nannaʼ dxiicheʼ decisión ni gucuaaʼ que nga ni jma jneza». Ora racanenu binni guiene chaahuicaʼ ni ná Stiidxaʼ Dios zanda gacanenu laacabe gácacabe ti xpinni Cristu ni maʼ biniisi lu Stiidxaʼ Dios (Efes. 3:​16-19).

XIMODO ZANDA GUSÍʼDINU CA HERMANU PARA GUEEDA GÁCACAʼ TI REGALU

13. ¿Xi biʼniʼ Jesús para cadi guiaanadxí de gaca predicar ora guibiguétabe guibáʼ? (Efesios 4:8).

¹³ Dxi guyuu Jesús lu Guidxilayú riʼ, bíʼnibe dxiiñaʼ ni bidii Bixhózebe laabe gúnibe (Juan 17:4). Peru qué ñuudxí niníʼ ique Jesús: «Pa racalaʼdxeʼ gaca xiixa la? naa nga caquiiñeʼ guneʼ ni». Chonna iza arondaʼ biʼniʼ predicar Jesús lu Guidxilayú riʼ gucanebe ne bisiidibe xcaadxi gúnicaʼ dxiiñaʼ ni biaananebe que. Ngue runi bidiibe laacaʼ dxiiñaʼ de guni predicarcaʼ ne gusiidicaʼ de ca noticia galán ne gápacaʼ de ca dendxuhuiiniʼ ni nabé risaca para Jehová. Ne zándaca nuu de ca discípulo que caʼruʼ gusaacaʼ 30 iza (biindaʼ Efesios 4:8). Tobi si biʼniné  ca hombre riʼ Jesús dxiiñaʼ ne qué nixélecaʼ de laabe. Peru neca zaqué bisiidirube laacaʼ ante chebe guibáʼ ti gueeda gácacaʼ casi ti regalu. Guidúʼyanu ximodo bíʼnibe ni.

14. ¿Ximodo gucané Jesús ca discípulo stiʼ lu ca últimu 40 dxi guyuu lu Guidxilayú? (Biiyaʼ imagen ca).

¹⁴ Bidii Jesús conseju nadipaʼ ca discípulo stiʼ, peru bíʼnibe ni né guendarannaxhii. Guzéʼtenu ti ejemplu, biiyaʼ Jesús nuu de ca discípulo que raca nagana para laacaʼ guni crecaʼ dxandíʼ maʼ biásabe de lade gueʼtuʼ. Ngue runi gúdxibe laacaʼ cadi guni dudarcaʼ ne naquiiñeʼ guni crecaʼ (Luc. 24:​25-27; Juan 20:27). Laaca gúdxibe laacaʼ naquiiñeʼ guicá íquecaʼ gacanecaʼ ca xpinni Dios lugar de guicá íquecaʼ gápacaʼ jma bueltu (Juan 21:15). Laaca bisietenaláʼdxibe laacaʼ cadi naquiiñeʼ guuyadxicaʼ ca privilegiu ni guicaa xcaadxi ndaaniʼ xquidxi Jehová (Juan 21:​20-22). Ne cumu biiyabe nuu caadxi cosa de Reinu stiʼ Dios maʼ gadxé modo riénecaʼ ni la? guluu jnézabe laacaʼ ne gucanebe laacaʼ guicá íquecaʼ jma risaca nga guni predicarcaʼ (Hech. 1:​6-8). Yanna, ¿xi zanda guiziidiʼ ca ancianu de ejemplu stiʼ Jesús yaʼ?

15, 16. a) ¿Ximodo zanda chinanda ca ancianu ca ejemplu stiʼ Jesús? b) ¿Xi guleendú Patrick pur ca conseju ni gucuaa?

¹⁵ ¿Ximodo zanda chinanda ca ancianu ca ejemplu stiʼ Jesús yaʼ? Ra gusiidicabe ne gacanécabe ca hermanu dede né ca joven para ganda gúnicaʼ jma dxiiñaʼ ndaaniʼ xquidxi Jehová. c Qué ribeza ca ancianu ca guni ca hermanu ca guiráʼ ca cosa ca jneza. Ni rúnicabe nga rudiicabe conseju ca joven ca né stale cariñu ti gápacaʼ experiencia ne guiziidicaʼ gácacaʼ humilde, gapa ca hermanu confianza laacaʼ ne chuʼcaʼ listu para gacanecaʼ xcaadxi (1 Tim. 3:1; 2 Tim. 2:2; 1 Ped. 5:5).

¹⁶ Guidúʼyanu ni bizaaca ti hermanu láʼ Patrick. Dxi nácabe joven huaxiéʼ amable laabe ne nabé naduxhuʼ riníʼnebe ca hermanu dede né ca hermana. Peru biiyaʼ ti ancianu modo nácabe que ne bidii laabe conseju nadipaʼ peru bíʼnini né stale cariñu. Patrick guníʼ: «Rudieeʼ xquixe peʼ hermanu que pur ni biʼniʼ, dxiqué guizáʼ riuaaʼ triste ora ruuyaʼ cudiicabe  tuuxa hermanu privilegiu ni racalaʼdxeʼ guicaaʼ. Peru conseju ni bidii ancianu que naa gucaneni naa quixheʼ iqueʼ gacaʼ humilde ne gacaniáʼ ca hermanu lugar de guyubeʼ guicaaʼ xiixa privilegiu ndaaniʼ congregación». ¿Xi bizaaca Patrick yaʼ? Gúcabe ancianu dxi nápabe 23 iza (Prov. 27:9).

17. ¿Ximodo bisihuinni Jesús napa confianza ca discípulo stiʼ?

¹⁷ Bidii Jesús dxiiñaʼ ca discípulo stiʼ de guni predicarcaʼ ne gusiidicaʼ (biiyaʼ nota de estudiu diidxastía «Enséñenles», ni zeeda lu Mateo 28:20). Zándaca guníʼ ique ca discípulo que, qué zanda gúnicaʼ dxiiñaʼ que, peru gupa Jesús confianza zanda gúnicabe ni ne racalaʼdxiʼ gánnacabe ni. Ngue runi gudxi laacabe: «Cásica maʼ biseendaʼ Bixhozeʼ naa, zacaca cuseendaʼ laatu» (Juan 20:21).

18. ¿Ximodo zanda chinanda ca ancianu ejemplu stiʼ Jesús?

¹⁸ ¿Ximodo zanda chinanda ca ancianu ejemplu stiʼ Jesús? Ca ancianu ni maʼ napa experiencia caquiiñeʼ gudiicaʼ ne gusiidicaʼ xcaadxi hermanu ti ganda guicaacaʼ jma privilegiu ndaaniʼ xquidxi Jehová (Filip. 2:​19-22). Guzéʼtenu ti ejemplu, zanda guinabaʼ ca ancianu ca joven gacanecaʼ guiá ne gudiicaʼ mantenimientu Yoo stiʼ Reinu. Napa ca ancianu confianza jneza modo zuni ti hermanu dxiiñaʼ ni maʼ bidiicabe laa purtiʼ maʼ bisiidicabe laa ximodo gúnini. Ti hermanu ni nacubi guca ancianu láʼ Matthew rudii xquixe peʼ ca ancianu ni napa experiencia purtiʼ bisiidicaʼ laabe gúnibe gadxé gadxé dxiiñaʼ ndaaniʼ congregación ne nápacaʼ confianza jneza zúnibe cani. Laabe guniʼbe: «Ora rucheeʼ racanécabe naa guuyaʼ xi zanda guiziideʼ de ca cosa ni cadi jneza bineʼ ne rusiidicabe naa ximodo guneʼ ni jma jneza sti biaje». d

19. ¿Xi maʼ gudixhe íquenu gúninu?

¹⁹ Lu ca últimu 40 dxi guyuu Jesús lu Guidxilayú riʼ, guluube gana, bisiidibe ne biʼniʼ capacitarbe xcaadxi. Quixhe íquenu gúninu ni biʼniʼ Jesús (1 Ped. 2:21). Zacanebe laanu gúninu ni purtiʼ maʼ biʼniʼ prometerbe laanu «qué ziuu dxi guixeleʼ de laatu dede ora guiluxe guidxilayú riʼ» (Mat. 28:20).