ARTÍCULO DE ESTUDIU 21
Rudii Jehová stipa laanu
«Ora qué gapaʼ stipa, óraque nga jma napaʼ poder» (2 COR. 12:10).
CANCIÓN 73 Bidii laadu stipa ne valor
NI ZAZÍʼDINU *
1, 2. ¿Xi guendanagana ridxaagalú stale Testigu?
GULUU apóstol Pablo gana Timoteo ne guiráʼ xpinni Cristu para cadi gusaana de gúnicaʼ xhiiñaʼ Dios (2 Tim. 4:5). Guiranu naquiiñeʼ chinándanu conseju riʼ, peru nuu biaje rácani nagana. Stale de ca hermanu stinu, caquiiñecaʼ valor para guni predicarcaʼ (2 Tim. 4:2). Guzéʼtenu ti ejemplu, ca hermanu ni nabeza ndaaniʼ ca guidxi ra rucueeza gobiernu dxiiñaʼ stinu runi predicarcaʼ neca nánnacaʼ zanda guseguyoocabe laacaʼ.
2 Gadxé gadxé guendanagana ridxaagalú ca xpinni Jehová ni ribee gana laacaʼ. Nuu hermanu runi dxiiñaʼ para ganda gudii ni caquiiñeʼ familia stiʼ ne ñuulaʼdxiʼ ñuni predicar jma, peru ora guiluxe semana maʼ bidxaga. Ne nuu hermanu ne hermana huaxiéʼ runi predicar purtiʼ huará o maʼ huaniisi. Xcaadxi qué lica randa rireecaʼ de ra lídxicaʼ. Ne nuu tu laa cayuni stipa para cadi guiníʼ ique qué risaca. Ti hermana ni nabeza Oriente Medio ni láʼ Mary *, guníʼ: «Runeʼ stipa para cadi guiníʼ iqueʼ cosa ni cuee gana naa dede riguuni naa triste. Despué rudieeʼ cuenta cadi jneza modo riníʼ iqueʼ purtiʼ runiteʼ tiempu ne maʼ qué gapaʼ stipa para guneʼ predicar».
3. ¿Xi zazíʼdinu lu artículo riʼ?
3 Intiica guendanagana nápanu, zudii Jehová stipa laanu para gudxíʼlunu cani ne cadi gusaana de gúninu ni nabe dede biaʼ gándatiʼ. Lu artículo riʼ zazíʼdinu ximodo racané Jehová laanu. Peru ante, guidúʼyanu ximodo gucané Jehová Pablo ne Timoteo para gúnicaʼ xhiiñabe neca bidxaagalucaʼ guendanagana.
RUDII JEHOVÁ STIPA LAANU PARA GUNI PREDICARNU
4. ¿Xi guendanagana bidxaagalú Pablo?
4 Bidxaagalú apóstol Pablo stale guendanagana. Gudiñe binni Pablo, bichácabe guié ne biseguyoocabe laa, ngue runi biquiiñeʼ tu gudii stipa laa (2 Cor. 11:23-25). Ne guniʼbe stale biaje bíʼnibe stipa para cadi guiníʼ íquebe cosa ni cuee gana laabe (Rom. 7:18, 19, 24). Ne laaca gunábabe Dios cuee ti guichi ni daabi lu beela ládibe purtiʼ cayuninani laabe (2 Cor. 12:7, 8).
¿Xi gucané Pablo para biʼniʼ xhiiñaʼ Dios? (Biiyaʼ párrafo 5 ne 6). *
5. ¿Xi biʼniʼ Pablo neca gupa guendanagana?
5 Bidii Jehová stipa Pablo para guni xhiiñabe neca bidxagalú guendanagana. Guiníʼ íquenu xi guiráʼ biʼniʼ apóstol Pablo. Dxi deguyoobe Roma ndaaniʼ ti yoo, biʼniʼ defenderbe ca noticia galán stiʼ Reinu nezalú ca líder stiʼ ca judíu ne zándaca nezalú binni ni runi dxiiñaʼ para gobiernu (Hech. 28:17; Filip. 4:21, 22). Laaca biʼniʼ predicarbe ca guardia stiʼ emperador ne guiráʼ binni ni riganna laabe (Hech. 28:30, 31; Filip. 1:13). Tiempu que laaca biquiiñeʼ Dios Pablo para gucaa caadxi carta ni gucané ca xpinni Cristu ni bibani dxiqué ne laaca racanécani laanu dede yanna. Beeda gácabe ti ejemplu galán para ca hermanu de congregación ni nuu Roma, purtiʼ biguidxi fe sticaʼ ne «jmaruʼ si gúpacaʼ valor para guiniʼcaʼ de stiidxaʼ Dios sin guidxíbicaʼ» (Filip. 1:14). Neca guyuu biaje qué ñanda ñuni Pablo biaʼ racalaʼdxiʼ lu xhiiñaʼ Dios la? bíʼnibe guiráʼ ni nuu lu nabe ne guniʼbe cayacané modo nuube que para gaca predicar ca noticia galán (Filip. 1:12).
6. Casi ná 2 Corintios 12:9, 10, ¿xi gucané Pablo para gunda biʼniʼ xhiiñaʼ Jehová?
6 Bidii Jehová stipa Pablo para gunda biʼniʼ xhiiñabe. Ngue runi, bicaa Pablo rihuinni pabiáʼ nadipaʼ poder stiʼ Dios ora huaxiéʼ stipa nápabe (biindaʼ 2 Corintios 12:9, 10). Biquiiñeʼ Jehová espíritu santu stiʼ para gudii stipa Pablo ti ganda guni xhiiñabe de guidubi ladxidóʼ neca guzananda binni laa, biseguyoocabe laa ne gupa xcaadxi guendanagana.
¿Xi gucané Timoteo para biʼniʼ xhiiñaʼ Dios? (Biiyaʼ párrafo 7). *
7. ¿Xi guendanagana bidxiilú Timoteo para gunda biʼniʼ xhiiñaʼ Dios?
7 Laaca bidii Dios stipa Timoteo para gunda biʼniʼ xhiiñabe. Yené Timoteo Pablo lu ca viaje ni biʼniʼ dxi yeganna ca congregación ne biʼniʼ predicar. Despué biseendaʼ Pablo laabe para chigánnabe ne cuʼbe gana caadxi congregación (1 Cor. 4:17). Zándaca biʼniʼ sentir Timoteo qué zanda guni dxiiñaʼ que. Ne zándaca pur nga gudxi apóstol Pablo laabe ca diidxaʼ riʼ: «Cadi gudiiluʼ lugar gúnicabe menu lii purtiʼ si nahuiiniluʼ» (1 Tim. 4:12). Ne para tiempu que gupa Timoteo ti guichi lu beela ladi purtiʼ Biblia ná gatigá raca huarabe (1 Tim. 5:23). Peru nanna Timoteo zudii Jehová espíritu santu laa para ganda guni predicar ca noticia galán ne gacané ca hermanu (2 Tim. 1:7).
RUDII JEHOVÁ STIPA LAANU TI GÁCANU FIEL NECA NÁPANU GUENDANAGANA
8. ¿Xi riquiiñeʼ Jehová para gudii stipa laanu tiempu riʼ?
8 Tiempu riʼ, riquiiñeʼ Jehová poder stiʼ para gudii stipa laanu ti ganda gúninu xhiiñaʼ ne cadi guixélenu de laa (2 Cor. 4:7). Guidúʼyanu tapa cosa ni riquiiñeʼ Jehová para gudii stipa laanu ti cadi guixélenu de laa. Laacani nga: oración, Biblia, ca hermanu stinu ne predicación.
Riquiiñeʼ Jehová oración para gudii stipa laanu. (Biiyaʼ párrafo 9).
9. ¿Ximodo racané oración laanu?
9 Oración. Lu Efesios 6:18, sicaríʼ guníʼ apóstol Pablo: «Laguni orar ora tiica si». Pa gúninu ni, zudii Dios stipa laanu. Jonnie, ti hermanu de Bolivia biiyaʼ ximodo gucané Jehová laa dxi gudiʼdiʼ lu caadxi guendanagana. Juntu guca huará bixhózebe, jñaabe ne xheelabe. Ne guca nagana para laabe gúʼyabe laacaʼ. Guti jñaabe ne bindaa para bianda bixhózebe ne xheelabe. Sicaríʼ guníʼ Jonnie: «Ora maʼ qué ganda guneʼ huantar, ni gucané naa nga guneʼ orar Jehová ne gabeʼ laa ximodo peʼ cayuneʼ sentir». Bidii Jehová stipa ni caquiiñebe para biʼniʼ huantarbe. Laaca ndaaniʼ guidxi ca, gunna ti ancianu láʼ Ronald napa jñaa cáncer ne guti jñaabe ti beeu despué. ¿Xi gucané laabe yaʼ? Sicaríʼ guniʼbe: «Runeʼ orar Jehová ne rabeʼ laa xi guiráʼ nuu ndaaniʼ ladxiduáʼ. Nannaʼ riene Jehová naa jma que biaʼ rieneʼ laaca naa». Zándaca nuu biaje zuni sentirnu maʼ qué zanda guni huantarnu ca guendanagana stinu o maʼ qué guidxélanu xi guininu lu ca oración stinu. Peru cayuni invitar Jehová laanu guni orarnu laa neca raca nagana para laanu gábinu laabe ximodo cayuni sentirnu (Rom. 8:26, 27).
Riquiiñeʼ Jehová Biblia para gudii stipa laanu. (Biiyaʼ párrafo 10).
10. Casi ná Hebreos 4:12, ¿xiñee nabé risaca guidúʼndanu Biblia ne guiníʼ íquenu ni nani?
10 Biblia. Cásica biʼniʼ Pablo, laanu laaca zanda guidúʼndanu Biblia para gápanu stipa ne gatadxí ladxidoʼno (Rom. 15:4). Ora ridúʼndanu ti relatu ne riníʼ íquenu ni nani, zanda iquiiñeʼ Jehová espíritu santu stiʼ para gacané laanu guiénenu ximodo gúninu ni nani (biindaʼ Hebreos 4:12). Ronald, hermanu ni bizéʼtenu lu párrafo gudiʼdiʼ que guníʼ: «Galán nga napaʼ costumbre guundaʼ Biblia guiráʼ gueelaʼ. Ne guiníʼ iqueʼ ca cualidad napa Jehová ne pabiáʼ nadxiibe ca xpínnibe. Ndiʼ racané naa cadi guireeʼ gana».
11. ¿Ximodo gucané Biblia ti hermana ni cayacaná?
11 Ora guiníʼ íquenu ni ná Stiidxaʼ Dios, racaneni laanu cadi guiníʼ íquenu maʼ qué zaca chaahuiʼ guendanagana stinu. Guidúʼyanu ni bizaaca ti hermana ni gutiʼ xheelaʼ. Gudxi ti ancianu laabe gúʼndabe libru stiʼ Job ne gudxi laabe zacaneni laabe. Ora bíʼndabe ni, primeca ni guniʼbe nga cadi jneza modo guníʼ ique Job. Sicaríʼ guniʼbe: «¡Biaa nga raca Job, puru si guendanagana stiʼ cá ique!». Óraque bidiibe cuenta laaca ni biʼniʼ Job cayúnibe. Despué bichaabe modo riníʼ íquebe ne ngue gucané laabe para gápabe stipa ti gudxiilube yuubaʼ nápabe pur guti xheelabe.
Riquiiñeʼ Jehová ca hermanu stinu para gudii stipa laanu. (Biiyaʼ párrafo 12).
12. ¿Ximodo riquiiñeʼ Jehová ca hermanu ne ca hermana para gudii stipa laanu?
12 Ca hermanu stinu. Laaca riquiiñeʼ Jehová ca hermanu ne ca hermana stinu para gudii stipa laanu. Guníʼ Pablo guizáʼ maʼ racalaʼdxiʼ guʼyaʼ ca hermanu stiʼ para cuʼ gana laacabe ne cúʼcabe gana laa (Rom. 1:11, 12). Mary, hermana ni bizéʼtenu lu párrafo 2 que, guizáʼ riuulaʼdxiʼ guidxaaga ca hermanu ne ca hermana, sicaríʼ guniʼbe: «Riquiiñeʼ Jehová ca hermanu ne ca hermana para gacané naa neca qué gánnacaʼ xi cazaacaʼ. Rábicabe naa diidxaʼ ni cuʼ gana naa o rudiicabe naa ti tarjeta ra cá caadxi diidxaʼ ni peʼ caquiiñeʼ. Sti cosa ni huayacané naa nga guinieniáʼ ca hermana ni huadiʼdiʼ lu ca guendanagana ra cadideʼ ne guiziideʼ de experiencia sticaʼ. Laaca racané ca ancianu naa guiníʼ iqueʼ risacaʼ ndaaniʼ congregación».
13. ¿Ximodo zanda cúʼsaanu gana ora riuunu reunión?
13 Ora riuunu reunión zanda cuʼnu gana ca hermanu ne ca hermana ne cuʼcaʼ gana laanu. Ante ne despué de reunión zanda gábinu laacaʼ nadxiinu ne rudiʼnu xquixe peʼ laacaʼ pur ni rúnicaʼ. Guzéʼtenu ti ejemplu, ante guzulú ti reunión, sicaríʼ gudxi ti ancianu láʼ Peter ti hermana ni cadi Testigu xheelaʼ: «Guizáʼ riuʼdu gana ora guidúʼyadu lii raríʼ. Purtiʼ neca xhoopaʼ xiiñiluʼ la? siempre nuucabe listu ne maʼ nápacabe ti comentariu para gudiicabe». Dede bidá nisa lu hermana riʼ bicabi laabe: «Ndiʼ peʼ nga ni nuaaʼ gábicabe naa yannadxí».
Riquiiñeʼ Jehová predicación para gudii stipa laanu. (Biiyaʼ párrafo 14).
14. Ora runi predicarnu, ¿ximodo racaneni laanu?
14 Predicación. Riuʼnu gana ora runi predicarnu, neca qué gucaadiaga binni laanu (Prov. 11:25). Ti hermana láʼ Stacy bidii cuenta dxandíʼ ni bizéʼtenu riʼ. Dxi guca expulsar ti familia stibe nabé guyuube triste ne qué nusaana de niníʼ íquebe xiñee qué ñúnirube xiixa para ñacanebe laa. ¿Xi gucané laabe yaʼ? Ra qué nusaana de ñuni predicarbe gucaneni laabe gacanebe binni ni caquiiñeʼ guiziidiʼ. Sicaríʼ guníʼ Stacy: «Tiempu que, bidii Jehová naa ti estudiante ni biʼniʼ progresar nagueenda, guizáʼ guluu ngue gana naa. Ni jma racané naa nga guneʼ predicar».
15. ¿Xi rizíʼdinu de ni guníʼ Mary?
15 Zándaca pur modo nabáninu guiníʼ íquenu qué zanda guni predicarnu jma. Peru cadi guiaandaʼ laanu, pa gúninu guiráʼ ni nuu lu nanu, ziechené Jehová laanu. Dxi bidxaa Mary, hermana ni bizéʼtenu lu guiropa párrafo que, ti congregación ra riníʼcabe sti idioma, guníʼ íquebe huaxiéʼ cayacanebe. Sicaríʼ guniʼbe: «Guyuu ti tiempu, ni randa si runeʼ nga rudieeʼ ti comentariu nachucu, ruundaʼ ti versículo de lu Biblia o rusaananiáʼ binni ti tratadu lu predicación». Biʼniʼ sentir hermana riʼ qué runi biaʼ runi ca hermanu ni riníʼ idioma que. Peru bichaabe modo riníʼ íquebe purtiʼ bidiibe cuenta zanda iquiiñeʼ Jehová laabe neca huaxiéʼ nánnabe idioma que. Sicaríʼ guniʼbe: «Cadi nagana ni rusiidiʼ Biblia ne zanda guchaani modo nabani binni».
16. ¿Xi zacané laanu para gápanu stipa neca qué ganda guireʼnu de ra lídxinu?
16 Nanna Jehová racaláʼdxinu guni predicarnu neca qué ganda guireʼnu de ra lídxinu. Zanda gacanebe laanu para guni predicarnu ca doctor ne ca enfermera. Ne zándaca guireʼnu gana pa guchaaganu modo runi predicarnu yanna ne biaʼ bíninu dxiqué. Peru pa guiníʼ íquenu ximodo cayacané Jehová laanu yanna la? zápanu stipa para guni huantarnu intiica guendanagana gápanu ne qué zusaana de chuʼnu nayecheʼ.
17. Casi ná Eclesiastés 11:6, ¿xiñee cadi naquiiñeʼ gusaana de guni predicarnu neca ruluíʼ cadi cabeendunu xiixa?
17 Qué gánnanu gunáʼ de ca biidxihuiiniʼ ni zeeda gaca stiidxaʼ Dios guicaa xcu ne guiniisi ndaaniʼ ladxidóʼ binni (biindaʼ Eclesiastés 11:6). Guzéʼtenu ti ejemplu, ti hermana ni napa jma de 80 iza ni láʼ Barbara, gatigá runi predicar pur teléfono ne pur carta. Ndaaniʼ tobi de ca sobre ra riguube carta, guluube ti revista Torre stiʼ ni rapa 1 de marzo de 2014, ra zeeda título ni láʼ «Xi maʼ biʼniʼ Dios pur lii». Qué ñánnabe yendá carta riʼ ra nuu ti guendaxheelaʼ ni maʼ bisaana de gaca testigu stiʼ Jehová. Biindaʼ ca binni riʼ revista que stale biaje. Biʼniʼ sentir hombre que casi ora caniʼné Jehová laa. Guirópacabe bizulú guyécabe reunión ne ra gudiʼdiʼ dxi la? gúcacabe testigu stiʼ Jehová sti biaje, despué de jma de 27 iza. ¿Ñee riníʼ íquenu pabiáʼ biecheʼ ne guyuu Barbara gana ora biʼyaʼ gucané ti carta ni biʼniʼ caadxi binni la?
Riquiiñeʼ Jehová ca cosa riʼ para gudii stipa laanu 1) oración, 2) Biblia, 3) ca hermanu stinu ne 4) predicación. (Biiyaʼ párrafo 9, 10, 12 ne 14).
18. ¿Xi caquiiñeʼ gúninu para gudii Jehová stipa laanu?
18 Casi maʼ bidúʼyanu, riquiiñeʼ Jehová oración, Biblia, ca hermanu stinu ne predicación para gudii stipa laanu. Pa iquiiñenu ca cosa riʼ, zusihuínninu nápanu confianza laasibe zanda gacanebe laanu. Ne racalaʼdxiʼ Jehová gacané laanu. Nga runi, siempre guyúbinu gacané Bixhózenu ni nuu guibáʼ laanu purtiʼ racaláʼdxibe «iquiiñebe stipa stibe para gacanebe ca ni runi ni nabe» (2 Crón. 16:9).
CANCIÓN 61 ¡Laatu ca Testigu, laguzuhuaa dxiichiʼ!
^ párrafo 5 Nabé nagana tiempu nabáninu riʼ, peru racané Jehová laanu para ganda guni huantarnu. Lu artículo riʼ zadúʼyanu ximodo gucané Jehová apóstol Pablo ne Timoteo para cadi gusaana de gúnicaʼ ni nabe neca gúpacaʼ guendanagana. Laaca zadúʼyanu tapa modo racané Jehová laanu para guni huantarnu.
^ párrafo 2 Maʼ bidxaa lá caadxi binni.
^ párrafo 53 NI RIHUINNI LU IMAGEN RIʼ: Laga deguyoo Pablo ndaaniʼ guidxi Roma, cucaa carta para caadxi congregación ne cayuni predicar ca noticia galán ca binni ni ziganna laa.
^ párrafo 55 NI RIHUINNI LU IMAGEN RIʼ: Ne caguu Timoteo gana caadxi hermanu.
