Para ganda gusiéchenu Jehová la? caquiiñeʼ gápanu fe. Peru Biblia ruzeeteʼ «cadi guiráʼ diʼ binni napa fe» (2 Tes. 3:2). Ora bicaa apóstol Pablo ca diidxaʼ riʼ caniʼbe de ca ni canazananda laabe, laacabe nga «ca hombre malu» ne «ca ni runiná stobi». Peru ni guníʼ Pablo riʼ laaca rugaanda ni xcaadxi binni. Casi ca binni ni qué runi cré pa dxandíʼ nuu Dios ni bizáʼ guiráʼ ni nuu (Rom. 1:20). Ne nuu xcaadxi riníʼ ique zándaca nuu tuuxa ni napa poder o ni jma risaca que binni. Peru ca ni riníʼ ique zacá la? cadi cusihuínnicaʼ nápacaʼ fe ni ribeza Jehová gápanu.

Para gusiéchenu Dios la? caquiiñeʼ chuʼnu seguru dxandíʼ nuube ne riguube ndaayaʼ ca ni napa ti fe nadipaʼ (Heb. 11:6). Ne fe ca nga tobi de ca cualidad stiʼ espíritu santu, ne caquiiñeʼ guni orarnu Jehová para guinábanu ni laa (Luc. 11:​9, 10, 13). Laaca nabé risaca guidúʼndanu Biblia, Stiidxabe ni bicaabe né espíritu santu, ne guiníʼ íquenu ni cadúʼndanu ne chinándanu ni. Pa gúninu ni la? zacané espíritu santu stiʼ Dios laanu gápanu fe ne gusiéchenu Jehová.