1. ¿Xi maʼ biʼniʼ Jehová pur cada tobi de laanu?

GUINÍʼ íquenu ximodo beeda gácanu testigu stiʼ Jehová. Primé, nuu tu guniʼné laanu de «ca noticia galán» stiʼ Reinu, zándaca bixhózenu o jñaanu, ti compañeru de dxiiñaʼ o de scuela o ti Testigu ni canayuni predicar de yoo pur yoo (Mar. 13:10). Despué, guyuu tu laa gulee tiempu ne biʼniʼ stipa para gudii laanu estudiu. Ne pur nga la? gunnaxhiinu Jehová ne bizíʼdinu laaca nadxiibe laanu. Jehová nga bichiña laanu ra nuu, ne yanna ra maʼ nácanu discípulo stiʼ Jesucristu, nápanu esperanza de guibáninu sin qué chuʼ dxi gátinu (Juan 6:44). Guizáʼ rudiʼnu xquixe peʼ Jehová purtiʼ biquiiñeʼ tuuxa para gusiidiʼ laanu ni dxandíʼ zeeda lu Biblia ne zacá gúninu ni ná.

2. ¿Xi zadúʼyanu lu artículo riʼ?

² Yanna ra maʼ runibiaʼnu ni dxandíʼ rusiidiʼ Biblia, nápanu privilegiu gacanenu xcaadxi laaca sacaʼ lu neza ni ziné lu guendanabani. Nuu hermanu qué raca nagana para laa guni predicar de yoo pur yoo, peru raca nagana para laacaʼ gápacaʼ estudiu. ¿Ñee ngaca rizaacanu la? Pa zacá ni, zanda gacané ca sugerencia ni zeeda lu artículo riʼ laanu. Zadúʼyanu xi rucaa laanu gacanenu binni gaca discípulo. Laaca zadúʼyanu xi zanda gúninu para gudxíʼlunu ca guendanagana ni zándaca gucueeza laanu para cadi gudiʼnu binni estudiu. Peru primeru guidúʼyanu xiñee cadi caquiiñeʼ si guni predicarnu ca noticia galán, sínuque laaca naquiiñeʼ gusíʼdinu.

3. ¿Xiñee runi predicarnu?

³ Dxi guyuu Jesús lu Guidxilayú riʼ, biʼniʼ mandarbe ca discípulo stibe gúnicaʼ chupa cosa. Primé, gúdxibe laacaʼ guni predicarcaʼ ca noticia galán stiʼ Reinu ne biluiʼbe laacaʼ ximodo gúnicaʼ ni (Mat. 10:7; Luc. 8:1). Laaca bisiene Jesús xi naquiiñeʼ gúnicabe ora gucaadiaga binni mensaje ni zinécabe ne xi naquiiñeʼ gúnicabe ora qué gucaadiaga binni laacabe (Luc. 9:2-5). Laaca guníʼ Jesús dede pa guidubi zaca predicar, ora guníʼ zuni predicar ca xpinni «para gunadiaga guiráʼ xixé guidxi ni» (Mat. 24:14; Hech. 1:8). Pa gucaadiaga binni ca xpinni Jesús o coʼ, laacabe nápacabe xidé guiníʼcabe de Reinu stiʼ Dios ne xi chiguni ni.

4. Casi ná Mateo 28:18-20, ¿xi sti cosa biʼniʼ mandar Jesús ca discípulo stiʼ gúnicaʼ?

⁴ ¿Gunáʼ nga guiropa cosa biʼniʼ mandar Jesús ca discípulo stiʼ? Gúdxibe laacaʼ gusiidicaʼ binni guni ni biʼniʼ mandarbe. Yanna, ¿ñee caníʼ Jesús ca xpinni si ni bibani lu primé siglu nga naquiiñeʼ guni predicar ne gusiidiʼ casi nuu tu ná la? Coʼ, purtiʼ Jesús guníʼ zaca dxiiñaʼ riʼ dede ca dxi stinu, laaca laani nga «dede ora guiluxe guidxilayú riʼ» (biindaʼ Mateo 28:18-20). Zándaca bidii Jesús mandatu riʼ ca xpinni dxi bihuinni nezalú jma de 500 discípulo stiʼ (1 Cor. 15:6). Ne lu revelación ni gucuaa Juan bisihuinni Jesús racalaʼdxiʼ gacané ca discípulo stiʼ xcaadxi binni para guiziidicaʼ de Jehová (Apoc. 22:17).

5. Casi ná 1 Corintios 3:6-9, ¿xi bichaaga Pablo dxiiñaʼ ni rúninu ora racanenu binni gaca discípulo?

⁵ Dxiiñaʼ ni rúninu ora racanenu binni gaca discípulo bichaaga apóstol Pablo ni né dxiiñaʼ ni runi ti binni ni rusaba ti semiá para gapa ti yagahuiiniʼ. Sicaríʼ bisietenaláʼdxibe ca xpinni Cristu de Corinto: «Naa bidxiibaʼ, Apolos bizee [...]. Laatu nga layú ra cayuni Dios dxiiñaʼ» (biindaʼ 1 Corintios 3:6-9). Laanu, ca ni rúninu dxiiñaʼ lu «layú ra cayuni Dios dxiiñaʼ», cadi rusábasinu ti semiá, sínuque laaca ruzeʼnu ni ne ridúʼyanu guiniisi ni (Juan 4:35). Peru nánnanu Dios nga rusiniisi ti semiáhuiiniʼ ni gudxíʼbanu.

6. ¿Xi guiráʼ runi ti maestru ni rusiidiʼ de Stiidxaʼ Dios?

⁶ Ruyúbinu ca binni «ni nachaʼhuiʼ ladxidóʼ ni maʼ nuu para guicaa guendanabani ni qué zaluxe» (Hech. 13:48). Para ganda gácacabe discípulo stiʼ Jesús, naquiiñeʼ gacanenu laacabe, 1) guiénecabe, 2) guni crécabe ne 3) gúnicabe ca cosa ni caziidicabe de lu Biblia (Juan 17:3; Col. 2:6, 7; 1 Tes. 2:13). Guiráʼ ca hermanu de congregación zanda gacanecaʼ estudiante ra gusihuínnicaʼ nadxiicaʼ laacabe ne ora guidxaagalucaʼ laacabe ora chécabe reunión (Juan 13:35). Zándaca naquiiñeʼ cuee ti maestru tiempu ne guni stipa para gacané estudiante stiʼ gusaana creencia o práctica «ni zuhuaa dxiichiʼ casi ti torre» ndaaniʼ ladxidóʼ (2 Cor. 10:4, 5). Para gacanenu tuuxa guchaa ne ugaanda chúʼnisa, zándaca zadiʼdiʼ stale beeu, peru nabé risaca stipa ni gúninu.

7. ¿Xiñee runi predicarnu ne racanenu binni gaca discípulo yaʼ?

⁷ ¿Xiñee runi predicarnu ne racanenu binni gaca discípulo yaʼ? Primé, purtiʼ nadxiinu Jehová. Rusihuínninu nadxiinu Dios ora rúninu stipa pur chinándanu mandatu de guni predicarnu ne gacanenu binni gaca discípulo (1 Juan 5:3). Guiníʼ  íquenu ndiʼ, cumu nadxiinu Jehová la? riguni predicarnu de yoo pur yoo. Zándaca guyuʼnu nervioso primé biaje yeguni predicarnu, peru bíninu ni purtiʼ nánnanu nga nga ni racalaʼdxiʼ Jesús. Zándaca yanna maʼ qué raca nagana para laanu guni predicarnu, peru ¿ñee ridxíbinu gudiʼnu estudiu binni la? Pa guinábanu Jehová lu oración gacané laanu gácanu nadxibalú ne cadi guidxíbinu para guni ofrecernu binni gudiʼnu estudiu laa, nanna dxíchinu zacanebe laanu chuuláʼdxinu gúninu discípulo.

8. Casi ná Marcos 6:34, ¿xi sti cosa rucaa laanu gusíʼdinu binni de lu Biblia?

⁸ Guiropa, rusíʼdinu de lu Biblia purtiʼ nadxiinu binni. Ti biaje, guizáʼ maʼ bidxaga Jesús ne ca discípulo stiʼ despué de biʼniʼ predicarcaʼ, ngue runi biyúbicaʼ ti lugar ra guiziiláʼdxicaʼ. Peru maʼ cabeza stale binni laacabe raqué. Guizáʼ biá Jesús ca binni que ngue runi, «bizulú bisiidibe laacaʼ stale cosa» (biindaʼ Marcos 6:34). ¿Xiñee biʼniʼ Jesús stipa pur gusiidiʼ ca binni que yaʼ? Purtiʼ biénebe ximodo cayuni sentir ca binni que, ngue runi gucanebe laacaʼ. Nánnabe guizáʼ cayuni sufrir ca binni que ne caquiiñecaʼ ti esperanza. Tiempu riʼ, laaca caquiiñeʼ binni ti esperanza, neca ruluíʼ nabánicaʼ nayecheʼ. Zeeda gácacaʼ casi dendxuʼ ni cananiti ne qué gapa pastor. Apóstol Pablo guníʼ qué runibiáʼcabe Dios ne qué gápacabe esperanza (Efes. 2:12). Ne zécabe lu «neza ni zeʼ lu guendaguti» (Mat. 7:13). Ora riníʼ íquenu pabiáʼ caquiiñeʼ ganna ca binni ni nuu lu territorio stinu de Dios, rucaa guendarannaxhii ne guendariáʼ ca laanu gacanenu laacabe. Ne ni jma galán ni zanda gúninu nga guinabadiidxanu laacabe pa zudiʼnu estudiu laacabe.

9. Casi ná Filipenses 2:13, ¿ximodo racané Jehová laanu?

⁹ Zándaca guidxíbinu guinabadiidxanu binni pa zudiʼnu estudiu laa, purtiʼ caquiiñeʼ cueenu tiempu para gaca prepararnu ne gudiʼnu estudiu laa. Pa zacá ni, gábinu Jehová ximodo runi sentirnu ne guinábanu laa gacané laanu chuuláʼdxinu guidxélanu tuuxa ni gusíʼdinu de lu Biblia (biindaʼ Filipenses 2:13). Apóstol Juan bicaa zacabi Jehová ca oración ni gúninu pa guinábanu ca cosa ni riuulaʼdxiʼ (1 Juan 5:14, 15). Nga runi nanna dxíchinu zacané Jehová laanu chuuláʼdxinu gacanenu binni gaca discípulo.

10, 11. ¿Xiñee zándaca guidxíbinu gudiʼnu estudiu?

¹⁰ Nánnanu nabé risaca nga gacanenu binni gaca discípulo, peru nuu caadxi guendanagana ni zándaca gucueeza laanu para cadi gúninu ni. Guidúʼyanu caadxi de laacani ne ximodo zanda gudxíʼlunu ca ni.

¹¹ Guiníʼ íquenu qué zanda gúninu jma lu xhiiñaʼ Dios pur modo nuunu. Nuu publicador maʼ huaniisi ne nuu tu laa huará. Pa zacá cazaacaluʼ, guníʼ ique si xi guiráʼ huayanda gúninu tiempu pandemia stiʼ COVID-19: riquiiñenu teléfono o Internet para gudiʼnu estudiu binni. Nga runi zanda guzulunu gudiʼnu estudiu binni de ra lídxinu, ne cadi ngasi nuu binni racalaʼdxiʼ guiziidiʼ jma de Biblia peru qué zanda gúnicaʼ ni ora runi predicar ca hermanu. ¿Ñee nuunu dispuestu gudiʼnu estudiu laacabe ora nácabe la? zándaca siadóʼ, huadxí o huaxhinni la? Cadi guiaandaʼ laanu huaxhinni bisiidiʼ Jesús Nicodemo purtiʼ óraca gucalaʼdxiʼ Nicodemo (Juan 3:1, 2).

12. Pa riníʼ íquenu cadi nuunu listu para gusíʼdinu binni, ¿xi chonna cosa zacané laanu?

 ¹² Guiníʼ íquenu cadi nuunu listu para gudiʼnu estudiu. Zándaca guiníʼ íquenu huaxiéʼ nánnanu o caquiiñeruʼ guizíʼdinu para ganda gusíʼdinu sti binni. Pa zacá rizaacanu, guiníʼ íquenu chonna cosa ni zacané laanu. Primé, nanna Jehová zanda gusíʼdinu xcaadxi (2 Cor. 3:5). Guiropa, Jesús, ni «ma gucuaaʼ guiráʼ xixé autoridad guibáʼ ne lu guidxilayú» cayuni mandar laanu gusíʼdinu (Mat. 28:18). Ne guionna, cadi nuunu stúbinu. Cásica Jesús, zanda guni crenu zacané Jehová laanu para gánnanu xi guininu (Juan 8:28; 12:49). Laaca zanda guinínenu superintendente de grupu de predicación stinu, ti precursor o ti publicador ni napa experiencia para gacané laanu guidxélanu binni gudiʼnu estudiu. Pa chinenu laacabe ora chigudiicabe estudiu, laaca zazíʼdinu gusíʼdinu binni.

13. ¿Xiñee naquiiñeʼ chuʼnu dispuestu guchaʼnu modo rusíʼdinu?

¹³ Guiníʼ íquenu nagana para iquiiñenu ca método nacubi ne ca herramienta nacubi ni cudii xquidxi Dios. Maʼ bidxaa modo rudiʼnu estudiu binni. Yanna publicación ni riquiiñenu para gudiʼnu estudiu nga ¡Zanda guibániluʼ nayecheʼ!, ne rinábani gaca prepararnu ante gudiʼnu estudiu purtiʼ maʼ gadxé ni qué modo bidiʼnu estudiu dxiqué. Jma huaxiéʼ párrafo ridúʼndanu ne jma ruínenu estudiante ca diidxaʼ. Riquiiñenu jma videu ne herramienta casi JW Library^®. Pa raca nagana para laanu iquiiñenu ca herramienta riʼ, guinábanu tuuxa gusiidiʼ laanu iquiiñenu ca ni. Nuu biaje zándaca gácani nagana para laanu purtiʼ maʼ biaʼnu modo bisíʼdinu dxiqué. Peru pa gacané Jehová ne ca hermanu stinu laanu, qué zaca nagana para laanu guiaʼnu ne chuuláʼdxinu gusíʼdinu binni de Biblia. Casi guníʼ ti precursor, método nacubi riʼ «jma galán ni para estudiante ne para maestru ca».

14. a) ¿Xi cadi naquiiñeʼ guiaandaʼ laanu pa qué náʼ binni ni nuu lu territorio stinu gucaadiaga laanu? b) ¿Ximodo riguu 1 Corintios 3:6, 7 gana laanu?

¹⁴ Guiníʼ íquenu nagana guidxélanu estudiu lu territorio stinu. Zándaca nuu binni qué riuulaʼdxiʼ mensaje stinu o rucaalú ca dxiiñaʼ ni rúninu. ¿Xi zacané laanu para cadi guireʼnu gana yaʼ? Cadi guiaandaʼ laanu ruchaa xquendanabani binni, ne zándaca ca ni qué niná nucaadiaga laanu dxiqué guchaacaʼ ne guyúbicaʼ gunibiaʼcaʼ Dios (Mat. 5:3). Nuu binni qué niná nicaa ca publicación stinu, peru ra gudiʼdiʼ tiempu maʼ gunacaʼ gudiʼnu laacaʼ estudiu. Cadi guiaandaʼ laanu Jehová nga dueñu stiʼ cosecha riʼ (Mat. 9:38). Racaláʼdxibe cadi gusaananu de gudxíʼbanu ne de guzeʼnu, peru laabe nga rusiniisibe ni (1 Cor. 3:6, 7). Riéchenu gánnanu neca qué gápanu estudiu, riguu Jehová ndaayaʼ laanu ora guyúbinu binni guiziidiʼ de lu Biblia. *

15. ¿Ximodo runi sentir Jehová ora guʼyaʼ ti binni guiziidiʼ de lu Biblia ne guni ni caziidiʼ?

¹⁵ Guizáʼ riecheʼ Jehová ora riziidiʼ ti binni de lu Biblia ne rabi xcaadxi ni caziidiʼ (Prov. 23:15, 16). Nanna dxíchinu guizáʼ riecheʼ Jehová purtiʼ runi predicarnu ne rusíʼdinu binni né stale gana. Guzéʼtenu ti ejemplu, neca guyuu pandemia lu  iza 2020, bidiʼnu estudiu 7,705,765 binni ne gucanenu 241,994 binni gaca dedicar Jehová ne chúʼnisa. Nánnanu laaca zusiidiʼ ca discípulo cubi riʼ de lu Biblia ne zacanecaʼ binni gaca discípulo (Luc. 6:40). Ne cadi guiaandaʼ laanu ra gacanenu binni gaca discípulo rusiéchenu ladxidóʼ Jehová.

16. ¿Xi meta zanda quixhe íquenu ugaandanu?

¹⁶ Riquiiñeʼ stale stipa para gusíʼdinu binni gannaxhii Bixhózenu ni nuu guibáʼ, peru racané Jehová laanu lu dxiiñaʼ de gacanenu binni gaca discípulo. ¿Ñee zanda quíxhenu meta gápanu neca ti estudiu la? Zanda guinabadiidxanu ca binni ni runibiaʼnu pa ñuuláʼdxicaʼ nudiʼnu estudiu laacaʼ. Pa gúninu ni la? zándaca dede zadxagayaanu. Nanna dxíchinu zaguu Jehová ndaayaʼ stipa ni gúninu.

17. ¿Ximodo zuni sentirnu pa guidxélanu ti binni gudiʼnu estudiu?

¹⁷ Ti privilegiu naroʼbaʼ nga guni predicarnu ne gusíʼdinu binni de lu Biblia. Laani nga dxiiñaʼ ni riguu laanu nayecheʼ. Apóstol Pablo, ni gucané stale binni de Tesalónica gácacaʼ discípulo, guníʼ ximodo biʼniʼ sentir: «¿Tuu nga gaca esperanza stidu, guendanayecheʼ stidu ne premiu ni gusiecheʼ laadu nezalube yaʼ? ¿Ñee cadi laatu la? Laatu nga ruchá típatu ladxidoʼdo ne rusiéchetu laadu» (1 Tes. 2:19, 20; Hech. 17:1-4). Tiempu riʼ laaca stale xpinni Cristu runi sentir zacá. Ti hermana láʼ Stéphanie ne xheelaʼ huayacanecaʼ stale estudiante chúʼnisa, hermana riʼ guníʼ: «Gástiruʼ sti cosa jma rusiecheʼ laanu que gacanenu binni gudii xquendanabani Jehová».