1, 2. Casi ná Mateo 5:11, ¿xi naquiiñeʼ gúninu ora guidxaagalunu guendanagana?

GUDXI Jesús ca discípulo stiʼ zabánicaʼ nayecheʼ. Peru laaca gúdxibe laacaʼ zadxaagalucaʼ guendanagana (Mat. 10:22, 23; Luc. 6:20-23). Riéchenu purtiʼ nácanu discípulo stiʼ Cristu. Peru neca zacá zándaca guidxíbinu gucaalú familia stinu laanu, sánanda gobiernu laanu o gucaa ca compañeru de scuela o de dxiiñaʼ stinu laanu gúninu xiixa ni qué riuulaʼdxiʼ Jehová.

² Guirutiʼ nga riuulaʼdxiʼ sanándacabe laa. Peru Biblia cayabi laanu chuʼnu nayecheʼ ora sanándacabe laanu. Guzéʼtenu ti ejemplu, bicaa Santiago cadi naquiiñeʼ guireʼnu gana ora gápanu guendanagana, sínuque chuʼnu nayecheʼ (Sant. 1:2, 12). Ne ngaca guníʼ Jesús (biindaʼ Mateo 5:11). Yanna, ¿ximodo zanda chuʼnu nayecheʼ neca nápanu guendanagana yaʼ? Zanda guizíʼdinu stale de laani ora guidúʼndanu carta ni bicaa Santiago para ca xpinni Cristu ni bibani lu primé siglu. Peru primeru guidúʼyanu xi guendanagana bidxaagalú ca hermanu riʼ.

3. ¿Xi bizaaca guca si Santiago discípulo stiʼ Jesús?

³ Guca si Santiago, mediu hermanu stiʼ Jesús, discípulo la? bizulú guzanándacabe ca xpinni Cristu de Jerusalén (Hech. 1:14; 5:17, 18). Ne dxi biiticabe discípulo Esteban  la? stale xpinni Cristu bireeche ndase «lu ca región stiʼ Judea ne Samaria». Nuu de laacaʼ guyecaʼ Chipre ne Antioquía (Hech. 7:58–8:1; 11:19). Nanna dxíchinu guizáʼ bidxaagalú ca discípulo riʼ guendanagana. Neca zacá qué nusaana de ñuni predicárcabe ca noticia galán né gana ne guca formar congregación guidubi ra runi mandar Roma (1 Ped. 1:1). Peru bidxagaluruʼ ca xpinni Cristu que xcaadxi guendanagana.

4. ¿Xi xcaadxi guendanagana bidxaagalú ca primé xpinni Cristu?

⁴ Biʼniʼ huantar ca primé xpinni Cristu xcaadxi guendanagana. Biaʼ lu iza 50 biʼniʼ mandar emperador romano Claudio guiree guiráʼ judíu de Roma. Pur ngue la? bisaana ca judíu ni guca xpinni Cristu lídxicaʼ ne yendézacaʼ sti lugar (Hech. 18:1-3). Biaʼ lu iza 61 bicaa apóstol Pablo biʼniʼ insultar binni ca xpinni Cristu que, biseguyoocabe laacaʼ ne gúxhacabe laacaʼ ca cosa sticaʼ (Heb. 10:32-34). Ne stale de ca hermanu que pobre laacaʼ ne huaracaʼ (Rom. 15:26; Filip. 2:25-27).

5. ¿Xi pregunta chiguicábinu?

⁵ Dxi bicaa Santiago carta stiʼ ante de iza 62, nánnabe xi guendanagana cadxaagalú ca hermanu stibe. Gucané Jehová laabe para gucaabe caadxi conseju ni zacané ca primé xpinni Cristu que guibánicaʼ nayecheʼ neca nápacaʼ guendanagana. Zadúʼyanu xi zanda guizíʼdinu de carta bicaa Santiago ne zacábinu ca pregunta riʼ: ¿xiñee guníʼ Santiago chuʼnu nayecheʼ?, ¿xi guendanagana zándaca gucueeza ti xpinni Cristu para cadi chuʼ nayecheʼ? ne ra gácanu ti binni nuu xpiaaniʼ, ni napa fe ne ni nadxibalú, ¿ximodo zacaneni chuʼnu nayecheʼ neca gápanu guendanagana?

6. Casi ná Lucas 6:22, 23, ¿xiñee zanda chuʼ ti xpinni Cristu nayecheʼ neca guidxaagalú guendanagana?

⁶ Stale binni riníʼ ique zabani nayecheʼ ora chuʼ nazaaca, gapa stale bueltu ne guibaniné familia stiʼ nayecheʼ. Peru cadi caníʼ diʼ Santiago de ca cosa ni riguu laanu nayecheʼ, sínuque caniʼbe de ca cualidad ni rudii espíritu stiʼ Dios laanu (Gál. 5:22). Laanu ca xpinni Cristu riuʼnu nayecheʼ purtiʼ nánnanu riuulaʼdxiʼ Jehová ni rúninu ne zinándanu ejemplu stiʼ Jesús (biindaʼ Lucas 6:22, 23; Col. 1:10, 11). Cásica qué rizuíʼ ti belehuiiniʼ ni nuu ndaaniʼ ti linterna neca cayaba nisaguié ne cundubi bi la? laanu laaca qué zusaana de chuʼnu nayecheʼ neca qué gápanu bueltu, huaranu, guni búrlacabe laanu o gucaalú familia stinu laanu. Ne qué zareʼnu gana neca gacalaʼdxiʼ ca enemigu stinu gucaalucaʼ laanu. Ca guendanagana ni tídinu zusihuínnicani dxandíʼ xpinni Cristu laanu (Mat. 10:22; 24:9; Juan 15:20). Ngue runi Santiago guníʼ: «Ora maʼ cadíʼditu lu intiica prueba, laguuyaʼ ni casi xiixa ni zanda gusiecheʼ laatu» (Sant. 1:2).

7, 8. ¿Xi rizaaca fe stinu ora ridídinu prueba?

⁷ Bizeeteʼ Santiago sti razón xiñee qué ridxibi ca xpinni Cristu tídicaʼ lu prueba. Sicaríʼ guniʼbe: «Ora maʼ gudiʼdiʼ calidad de fe stitu lu prueba, zaziiditu guni huantartu» (Sant. 1:3). Ca prueba ni ridídinu zeeda gácacani casi guí ni riquiiñeʼ tuuxa para gudii forma ti espada. Ora rianda espada riʼ, rácani jma naguidxi. Zacaca nga laanu, ora ridídinu lu prueba jma riguidxi fe stinu. Nga runi, guníʼ Santiago ca diidxaʼ riʼ: «Pa qué gusaana de guni huantartu la? qué zápatu ra quiñeyúcabe laatu, ne zúnitu guiráʼ cosa jneza» (Sant. 1:4). Ora tídinu prueba riguidxi fe stinu, nga racané laanu guni huantarnu ni ne chuʼnu nayecheʼ.

⁸ Lu carta ni bicaa Santiago bizeeteʼ caadxi de ca guendanagana ni zanda gucaa laanu maʼ cadi chuʼnu nayecheʼ. ¿Xii nga ca guendanagana ca, ne ximodo zanda gudxíʼlunu cani?

9. ¿Xiñee caquiiñeʼ gácanu ti binni nuu xpiaaniʼ?

⁹ Primé guendanagana: ora qué gánnanu xi gúninu. Ora tídinu lu xiixa guendanagana la? gúninu stipa guicaanu decisión ni chuulaʼdxiʼ Jehová, ni gacané ca hermanu ne ni gacané laanu cadi guchéʼnenu Jehová (Jer. 10:23). Caquiiñeʼ gácanu ti binni nuu xpiaaniʼ para guicaanu decisión jneza ne gánnanu xi guicábinu ca enemigu stinu.  Ora qué gánnanu xi gúninu la? zándaca guiníʼ íquenu maʼ qué zanda gúninu gastiʼ ne pur laani maʼ cadi chuʼnu nayecheʼ.

10. Casi ná Santiago 1:5, ¿xi caquiiñeʼ gúninu pa caquiiñenu sabiduría?

¹⁰ Ni zanda gúninu: guinábanu Jehová sabiduría. Para guni huantarnu ca prueba ni tídinu ne cadi gusaana de chuʼnu nayecheʼ la? naquiiñeʼ guni orarnu Jehová ne guinábanu laa guendabiaaniʼ para guicaanu decisión jneza (biindaʼ Santiago 1:5). Peru ¿xi naquiiñeʼ gúninu pa qué guicabi Jehová ca oración stinu ora rábinu yaʼ? Santiago ná cadi gusaana de guinábanu ni Dios. Qué zadxichiné diʼ Jehová laanu pa siempre guinábanu laa sabiduría para guni huantarnu ca prueba tídinu, sínuque né stale guendanachaʼhuiʼ zudiibe ni laanu (Sal. 25:12, 13). Nanna Jehová xi prueba cadídinu, riabe ne racaláʼdxibe gacanebe laanu. ¿Cadi dxandíʼ rusiecheʼ nga laanu la? Peru ¿ximodo rudii Jehová laanu sabiduría yaʼ?

11. ¿Xiruʼ caquiiñeʼ gúninu para gácanu ti binni nuu xpiaaniʼ?

¹¹ Riquiiñeʼ Jehová Stiidxaʼ para gácanu binni nuu xpiaaniʼ (Prov. 2:6). Nga runi naquiiñeʼ guni estudiarnu Biblia ne ca publicación. Peru cadi naquiiñeʼ si gánnanu stale de lu Biblia. Laaca naquiiñeʼ gúninu ni ná ca conseju stiʼ Jehová lu xquendanabáninu. Santiago guníʼ: «Laguni ni ná Stiidxaʼ Dios ne cadi gucaadiágasitu ni ná ni» (Sant. 1:22). Ora rúninu ni ná ca conseju stiʼ Dios lu xquendanabáninu, rácanu binni nachaʼhui, ni riuu razón ne ni riáʼ (Sant. 3:17). Racané ca cualidad riʼ laanu para cadi gusaana de chuʼnu nayecheʼ ora ridxaagalunu xiixa prueba.

12. ¿Xiñee risaca nga guiziidiʼ chaahuinu ni zeeda lu Biblia?

¹² Naca Stiidxaʼ Dios casi ti espeju ni  racané laanu gánnanu paraa caquiiñeʼ guchaʼnu ne ximodo naquiiñeʼ gúninu ni (Sant. 1:23-25). Ora guidúʼndanu Stiidxaʼ Dios, zándaca gudiʼnu cuenta caquiiñeruʼ gucueezanu laanu para cadi guidxiichinu. Zanda gacané Jehová laanu gácanu binni nadóʼ ora guni tratarnu ti binni o guidxaagalunu xiixa guendanagana ni zándaca guchiichi laanu. Ne ora nácanu ti binni nadóʼ zacaneni laanu para ganda gudxíʼlunu intiica guendanagana guidxaagalunu lu xquendanabáninu. Zanda guiníʼ ique chaahuinu ne guicaanu decisión jneza (Sant. 3:13). Nga runi, nabé risaca guiziidiʼ chaahuinu ni zeeda lu Biblia.

13. ¿Xiñee naquiiñeʼ guni estudiarnu ejemplu stiʼ ca xpinni Jehová ni bibani dxiqué?

¹³ Nuu biaje napa peʼ xidé gacananu para guizíʼdinu gúninu ni jneza. Peru lugar de gacananu la? jma galán guizíʼdinu de ni bizaacaʼ xcaadxi binni. Nga runi caguu Santiago gana laanu guidúʼndanu ejemplu stiʼ ca xpinni Jehová casi Abrahán, Rahab, Job ne Elías (Sant. 2:21-26; 5:10, 11, 17, 18). Biʼniʼ huantar ca xpinni Jehová riʼ stale prueba ne qué nusaanaʼ de ñuucaʼ nayecheʼ. Ejemplu stícabe rusihuínnini zanda gacané Jehová laanu para guni huantarnu.

14, 15. ¿Xiñee naquiiñeʼ guyúbinu respuesta stiʼ ca duda stinu?

¹⁴ Guiropa guendanagana: ora gápanu duda. Zándaca nuu biaje zaca nagana para laanu guiénenu xiixa ni zeeda lu Stiidxaʼ Dios o guiníʼ íquenu cadi cacabi Jehová ca oración stinu modo rábinu, ne pur nga gápanu duda. Peru pa qué guyúbinu respuesta stícani la? zándaca guirá fe stinu ne guixélenu de Jehová (Sant. 1:7, 8). Ne dede zándaca gunítinu esperanza ni nápanu.

¹⁵ Guníʼ apóstol Pablo zeeda gaca esperanza stinu casi ti ancla (Heb. 6:19). Racaneni ti barcu ora nuu tormenta ne para cadi gudxelasaani guié. Peru pa guicá tini cadena ni naaze ancla ca la? zaruuguni. Zacaca nga laanu, pa gápanu duda ne qué guyúbinu respuesta stícani, zará fe stinu. Pa gucaalúcabe ti binni ni napa duda, zándaca maʼ qué zapa fe lu ca promesa stiʼ Jehová, nga runi Santiago guníʼ: «Ni napa duda la? zeeda gaca casi ola stiʼ nisadóʼ ni riné bi cheríʼ chericaʼ» (Sant. 1:6). Qué zanda chuʼnu nayecheʼ pa nápanu duda.

16. ¿Xi naquiiñeʼ gúninu pa nápanu duda?

¹⁶ Ni zanda gúninu: guyúbinu respuesta stiʼ ca duda ni nápanu ne guquídxinu fe stinu. Cadi gácanu casi ca binni ni qué ganna gaca decidir. Zaca peʼ nga bizaaca xquidxi Jehová ni bibani tiempu stiʼ Elías. Ngue runi gudxi Elías laacabe: «¿Dede padxí nga qué guidxélatu tu peʼ nga gúnitu ni ná pue? ¡Pa Jehová nga Dios ni dxandíʼ, lachinanda laa! ¡Peru pa Baal nga nácani la? lachinanda laa!» (1 Rey. 18:21). Ne ngaca nga ni zanda guizaacanu tiempu riʼ. Nga runi napa xidé guni investigarnu para guni crenu Jehová nga Dios ni dxandíʼ, laabe nga guniʼbe xi guicá lu Biblia ne ca testigu stiʼ Jehová nga xquídxibe (1 Tes. 5:21). Pa gúninu ni, maʼ qué zápanu duda ne zaguidxi fe stinu. Peru pa caquiiñeruʼ gacanécabe laanu la? zanda guinábanu ca ancianu gacanecaʼ laanu. Pa gúninu ca ni bizéʼtenu riʼ, qué zusaana de gúninu ni ná Jehová ne ziuʼnu nayecheʼ.

17. ¿Xi zazaaca pa qué gácanu nadxibalú?

¹⁷ Guionna guendanagana: ora guireʼnu gana. Biblia ná: «Pa guireeluʼ gana ora cadíʼdiluʼ ra nagana, zará stipa stiluʼ» (Prov. 24:10). Diidxaʼ «guireeluʼ gana» laaca riniʼni maʼ cadi gácanu nadxibalú, ne pa qué gácanu nadxibalú la? maʼ qué ziuʼnu nayecheʼ.

18. ¿Xi zabeendunu pa guni huantarnu?

 ¹⁸ Ni zanda gúninu: gápanu confianza zudii Jehová laanu valor para guni huantarnu intiica prueba. Caquiiñenu valor para guni huantarnu ca prueba ni guidxaagalunu (Sant. 5:11). Ora guníʼ Santiago naquiiñeʼ guni huantarnu caniʼbe de tuuxa ni zuhuaa dxiichiʼ. Zeeda gácani casi ti soldadu ni cudxiilú ca enemigu stiʼ sin cuisá.

19. ¿Xi zanda guizíʼdinu de ejemplu stiʼ apóstol Pablo?

¹⁹ Bisaana apóstol Pablo ti ejemplu galán para laanu, purtiʼ gupa valor ne biʼniʼ huantar. Neca guyuu biaje biʼniʼ sentirbe qué gápabe stipa la? gunda biʼniʼ huantarbe purtiʼ gúpabe confianza zudii Jehová stipa laabe (2 Cor. 12:8-10; Filip. 4:13). Laanu laaca zanda gápanu stipa ne valor pa gácanu humilde ne guinábanu Jehová gacané laanu (Sant. 4:10).

20, 21. ¿Xi nanna dxíchinu?

²⁰ Nánnanu cadi Jehová diʼ nga runi castigar laanu. Santiago ná: «Ora cadiʼdiʼ tuuxa lu ti prueba, cadi guiníʼ: “Cutiidiʼ Dios naa lu prueba”. Purtiʼ qué zanda gutiidiʼ binni Dios lu prueba né cosa malu, ne qué rutiidiʼ Dios binni lu prueba» (Sant. 1:13). Pa qué guiaandaʼ ndiʼ laanu, zadxíñanu jma gaxha de Bixhózenu ni nuu guibáʼ (Sant. 4:8).

²¹ «Qué ruchaa» Jehová (Sant. 1:17). Cásica gucanebe ca xpínnibe ni bibani lu primé siglu para guni huantar, zacaca zacanebe cada tobi de laanu tiempu riʼ. Nga runi, guinábanu Jehová gacané laanu gácanu ti binni nuu xpiaaniʼ, gápanu fe ne valor. Ne gápanu confianza zacábibe ca oración stinu. Nanna dxíchinu zacané Jehová laanu chuʼnu nayecheʼ neca cadídinu prueba.