1. ¿Xi pur zándaca chuʼnu xizaa, ne xi zándaca gucaani laanu guiníʼ íquenu?

¿ÑEE huayuu dxi guni sentirnu nabé nuunu xizaa la? * Zándaca runi sentirnu zacá pur ni gudxi o ni biʼniʼ ti binni laanu. O nuunu xizaa pur xiixa ni guninu o ni bíninu. Zándaca biʼniʼ cometernu ti pecadu ne guiníʼ íquenu qué ziuu dxi guni perdonar Jehová laanu. O guiníʼ íquenu cayuni sentirnu zacá purtiʼ qué gápanu fe ne purtiʼ malu laanu. Peru ¿ñee dxandíʼ nga la?

2. ¿Xi ejemplu zeeda lu Biblia rusihuinni cadi pur qué gápanu fe nga riuʼnu xizaa?

² Guidúʼyanu caadxi ejemplu zeeda lu Biblia. Gupa Ana, jñaa profeta Samuel, stale fe. Neca zaqué, guizáʼ guyuube xizaa purtiʼ bininá ca diidxaʼ ni gudxi tobi de ca familia stibe laabe (1 Sam. 1:7). Neca guizáʼ naguidxi guca fe stiʼ apóstol Pablo la? guyuube «xizaa pur ca congregación» ni guyuu dxiqué (2 Cor. 11:28). Gupa rey David stale fe ne gunnaxhii Jehová laabe (Hech. 13:22). Neca zaqué, bichiiñaʼ xquendabiaanibe laabe purtiʼ bicheenebe Jehová (Sal. 38:4). Gudixhedxí Jehová ladxidóʼ cada tobi de laacabe. Guidúʼyanu xi zanda guizíʼdinu de ejemplu stícabe.

3. ¿Xiñee zanda chuʼnu xizaa pur ni guiníʼ xcaadxi binni de laanu?

³ Zanda chuʼnu xizaa pur ca diidxaʼ ni gabi tuuxa laanu o pur modo guni tratárcabe laanu, jmaruʼ si pa ti xhamígunu o ti familia stinu nga gúnini. Ne zándaca chuʼnu xizaa purtiʼ maʼ qué zaca xhamígunu laabe. Nuu biaje runiná tuuxa laanu purtiʼ riníʼ xiixa sin guiníʼ ique, ne runi sentirnu casi ora nutaabicabe ti espada laanu (Prov. 12:18). Peru nuu biaje rabi ti binni laanu xiixa para si guniná laanu. Sicaríʼ bizaaca ti hermana joven. Laa guníʼ: «Raca caadxi iza, bizulú guníʼ ti binni ni rabeʼ guizáʼ xhamigaʼ cosa ni cadi dxandíʼ de naa lu ca red social. Gucaná ladxiduáʼ ne guyuaaʼ xizaa. Qué ñeneʼ xiñee guniʼbe mal de naa neza decheʼ». Pa bininá ti familia o ti xhamígunu laanu la? zanda gacané ejemplu stiʼ Ana laanu.

4. ¿Xi guendanagana nabé nadipaʼ biʼniʼ huantar Ana?

⁴ Biʼniʼ huantar Ana stale guendanagana. Gudiʼdiʼ stale iza ne qué ñanda ñapagabe xiiñibe (1 Sam. 1:2). Dxiqué, guníʼ ique ca israelita que pa qué ganda gapa ti gunaa xiiñiʼ la? purtiʼ cadi caguu Dios ndaayaʼ laa. Ngue runi nabé bituí lube (Gén. 30:1, 2). Ne jma nagana gúcani para Ana purtiʼ gupa xheelabe sti gunaa ni lá Peniná, ne gupa gunaa riʼ chupa xiiñibe. Biiyaʼ Peniná Ana casi tobi ni cucaalú laabe, ngue runi siempre biʼniʼ búrlabe Ana para guninabe laa (1 Sam. 1:6). Nga runi, guizáʼ guyuu Ana xizaa, biinaʼ, bidxii ladxidóʼ ne maʼ qué ñó (1 Sam. 1:7, 10). ¿Xi biʼniʼ Ana para gutadxí ladxidóʼ yaʼ?

5. ¿Xi guleendú Ana purtiʼ biʼniʼ orar?

⁵ Bixhele Ana ladxidóʼ nezalú Jehová. Despué de biʼniʼ orarbe gúdxibe sumo sacerdote Elí ni cazaacabe. Ngue runi gudxi Elí Ana: «Guyé dxi, ne Dios stiʼ Israel gudii lii ni gunabuʼ laa». ¿Xi bizaaca yaʼ? «Óraque bireebe zebe ne bizulú gudobe ne maʼ qué lica nihuinni lube pa nuube xizaa» (1 Sam. 1:17, 18). Gutadxí ladxidoʼbe purtiʼ biʼniʼ orarbe.

6. ¿Xi rusiidiʼ ejemplu stiʼ Ana laanu de oración, ne xi rusiidiʼ ca diidxaʼ ni zeeda lu Filipenses 4:6, 7 laanu?

⁶ Zanda gatadxí ladxidoʼno pa qué gusaana de guni orarnu. Xadxí biʼniʼ orar  Ana Bixhoze ni nuu guibáʼ (1 Sam. 1:12). Laanu laaca zanda guni orarnu xadxí ne gábinu Dios ni naguu xizaa laanu, ni ruchibi ne ca debilidad nápanu. Cadi iquiiñenu diidxaʼ nagana ora guni orarnu Jehová. Zándaca dede zadúʼnanu ora gábinu Jehová ni naguu xizaa laanu. Peru qué zaree Jehová gana gucaadiaga laanu. Nga runi, cadi gábisinu laabe ca cosa ni naguu xizaa laanu, laaca caquiiñeʼ guietenaláʼdxinu ca conseju ni zeeda lu Filipenses 4:6, 7 (biindaʼ ni). Racá cayabi Pablo laanu gudiʼnu xquixe peʼ Dios ora guni orarnu. Nápanu stale razón para gúninu ni, caadxi de laacani nga bidiibe laanu guendanabani, bizaʼbe laanu, nadxiibe laanu ne maʼ bidiibe laanu ti esperanza. ¿Xiruʼ zanda guizíʼdinu de ejemplu stiʼ Ana yaʼ?

7. ¿Xi qué nusaana Ana ne xheelaʼ de ñuni?

⁷ Neca napa Ana guendanagana la? qué nusaana de niné xheelaʼ Siló, lugar ra runi adorárcabe Jehová (1 Sam. 1:1-5). Ne raqué, ra tabernáculo que nga guluu sumo sacerdote Elí gana laabe ne gudxi laabe ribeza gucaadiaga Jehová oración stibe (1 Sam. 1:9, 17).

8. Bisiene ximodo zanda gacané ca reunión laanu.

⁸ Zanda gatadxí ladxidoʼno pa qué gusaana de chuunu reunión. Ora ruzulú reunión, raca ti oración ne rinábanu Jehová gudii espíritu santu stiʼ laanu. Ne paz nga tobi de ca cualidad stiʼ espíritu santu (Gál. 5:22). Ora riuunu reunión neca nuunu xizaa la? rudiʼnu lugar uguu Jehová ne ca hermanu gana laanu ne quixhedxicaʼ ladxidoʼno. Riquiiñeʼ Jehová oración ne ca reunión para quixhedxí ladxidoʼno (Heb. 10:24, 25). Guidúʼyanu xi sti cosa zanda guizíʼdinu de ejemplu stiʼ Ana.

9. ¿Xi qué nuchaa lu xquendanabani Ana, ne xi gucané laabe?

⁹ Qué niree ca guendanagana gupa Ana nagueendaca. Despué de bibiguétabe de yeguni adorarbe Jehová ra tabernáculo que, gulézarube ra yoo ra nabeza Peniná. Ne cadi cá lu Biblia pa bichaa gunaa riʼ modo laa. Nga runi, zándaca biʼniʼ huantar Ana ca diidxaʼ feu gudxi Peniná laa. Peru biʼniʼ sentirbe paz stiʼ Dios sti biaje. Ne cadi guiaandaʼ laanu maʼ qué ñuube xizaa dxi bisaanabe guendanagana stibe lu náʼ Jehová. Bidiibe lugar quixhedxí Jehová ladxidoʼbe. Ne gudiʼdiʼ si ti tiempu, bicabi Jehová oración stibe ne gúpabe xiiñibe (1 Sam. 1:19, 20; 2:21).

10. ¿Xi rusiidiʼ ejemplu stiʼ Ana laanu?

¹⁰ Zanda gatadxí ladxidoʼno neca náparunu guendanagana. Cadi guiaandaʼ laanu, neca guni orarnu né stale gana ne neca cadi gusaana de chuunu reunión záparunu guendanagana. Ni bizaaca Ana riʼ rusiidiʼ ni laanu gastiʼ qué zanda gucueeza Jehová para quixhedxí ladxidoʼno. Qué zusaanabe laanu, ne maʼ qué zandaa zaguube ndaayaʼ laanu purtiʼ fiel laanu (Heb. 11:6).

11. ¿Xi guiráʼ cosa guluu xizaa Pablo?

¹¹ Guyuu stale cosa ni guluu xizaa Pablo. Guzéʼtenu caadxi de laacani, cumu nadxiibe ca hermanu stibe la? guyuube xizaa pur ca guendanagana ni gúpacaʼ (2 Cor. 2:4; 11:28). Tiempu biʼniʼ predicarbe, gudiñe ne biseguyoo caadxi binni ni rucaalú ca xpinni Cristu laabe. Sti cosa ni guluu xizaa laabe nga «huaxiéʼ cosa» gúpabe para guibaninebe (Filip. 4:12). Ne laaca bilaahuabe lu nisadóʼ chonna  biaje, zanda guxuíʼlunu pabiáʼ bidxíbibe cada biaje chebe lu barcu (2 Cor. 11:23-27). Peru ¿xi gucané laabe yaʼ?

12. ¿Xiñee gutadxí ladxidóʼ Pablo?

¹² Qué nusaana Pablo de niníʼ ique ca guendanagana gupa ca hermanu stiʼ, peru biénebe qué zanda guni chaahuibe guirácani. Ngue runi gunábabe xcaadxi hermanu gacanecaʼ laabe para gápacaʼ ca hermanu de congregación. Bidiibe autoridad caadxi hombre nápabe confianza casi Timoteo ne Tito. Nanna dxíchinu, cumu gucané ca hermanu riʼ Pablo la? gutadxí ladxidóʼ (Filip. 2:19, 20; Tito 1:1, 4, 5).

13. ¿Ximodo zanda chinanda ca ancianu ejemplu stiʼ Pablo?

¹³ Guyúbinu tu gacané laanu. Tiempu riʼ, stale ancianu rizaaca ni bizaaca Pablo. Cumu nabé nadxiicabe ca hermanu stícabe la? racanácabe ora nápacaʼ guendanagana. Peru qué zanda guni chaahuiʼ ti ancianu si guiráʼ ca guendanagana stiʼ ca hermanu. Pa humilde laabe zanábabe xcaadxi hermanu gacané laabe ne zusiidibe ca hermanu joven para gápacaʼ ca dendxuʼ stiʼ Dios (2 Tim. 2:2).

14. ¿Xi qué niguu xizaa Pablo, ne xi zanda gusiidiʼ ejemplu stibe laanu?

¹⁴ Cadi guiaandaʼ laanu caquiiñenu tu quixhedxí ladxidoʼno. Guca Pablo humilde, nga runi biyubi gacané ca xhamigu laa. Qué nituí lube guʼyaʼ xcaadxi binni gucané ca hermanu stibe laabe. Lu carta bicaabe ra nuu Filemón, gúdxibe laa: «Guizáʼ biecheʼ ne gutadxí ladxiduáʼ ora gunnaʼ pabiáʼ nadxiiluʼ ca hermanu stinu» (Filem. 7). Ne sti biaje bizeetebe lá caadxi hermanu ni guluu gana laabe tiempu guyuube xizaa (Col. 4:7-11). Pa humilde laanu ne gudiʼnu cuenta caquiiñenu tu gacané laanu la? zacané ca hermanu laanu de guidubi ladxidoʼcaʼ.

15. ¿Xi gucané Pablo ora gudiʼdiʼ ra nagana?

¹⁵ Gápanu confianza Stiidxaʼ Dios. Gunna Pablo zanda quixhedxí Stiidxaʼ Dios ladxidóʼ (Rom. 15:4). Laaca zanda gudii Stiidxaʼ Dios laabe guendabiaaniʼ para gudxiilube intiica guendanagana (2 Tim. 3:15, 16). Guiropa biaje biseguyoocabe laabe Roma, gúnnabe mayaca gátibe. ¿Xi bíʼnibe ora gudíʼdibe ca tiempu nagana que yaʼ? Gunábabe Timoteo chiguuya laabe ne chiné «ca rollo que» ra  nuube (2 Tim. 4:6, 7, 9, 13). ¿Xiñee yaʼ? Purtiʼ zándaca zeeda caadxi de ca Escrituras Hebreas lu «ca rollo que», ne zanda iquiiñebe ni lu estudiu personal stibe. Pa chinándanu ejemplu stiʼ Pablo, ne guni estudiarnu Biblia, zanda iquiiñeʼ Jehová Stiidxaʼ para quixhedxí ladxidoʼno, intiica si guendanagana cadxaagalunu.

16. ¿Ximodo biʼniʼ sentir David dxi biʼniʼ cometer ti pecadu nabé malu?

¹⁶ Biʼniʼ David ti cosa nabé malu, ngue runi bichiiñaʼ conciencia stiʼ laa. Biʼniʼ cometerbe adulterio né Bat-Seba, biʼniʼ mandarbe gati xheelaʼ ne pur ti tiempu gucaláʼdxibe nucaachibe ni bíʼnibe (2 Sam. 12:9). Gucaláʼdxibe cadi nuchiiñaʼ conciencia stibe laabe, ne pur nga maʼ qué ñaca xhamígube Jehová, guizáʼ guyuube xizaa ne dede guca huarabe (Sal. 32:3, 4). ¿Xi gucané David gudxiilú ca guendanagana stiʼ pur bichee yaʼ? ¿Ne xi zanda gacané laanu pa guni cometernu ti pecadu nabé malu?

17. ¿Ximodo rusihuinni ca diidxaʼ ni zeeda lu Salmo 51:1-4 guca arrepentir David de guidubi ladxidóʼ?

¹⁷ Guinábanu Jehová guni perdonar laanu. Últimu la? biʼniʼ orar David Jehová ne, cumu guca arrepentirbe de guidubi ladxidoʼbe la? gúdxibe Jehová ni bíʼnibe (biindaʼ Salmo 51:1-4). Ngue gucané laabe guni sentirbe galán (Sal. 32:1, 2, 4, 5). Pa guni cometernu ti pecadu nabé malu, cadi gucáʼchinu ni. Guinínenu Jehová ne gábinu laa ni maʼ bíninu. Oracaruʼ zatadxí ladxidoʼno ne maʼ qué zuchiña conciencia stinu laanu. Peru pa racaláʼdxinu gaca xhamígunu Jehová sti biaje la? caquiiñeʼ gúninu sti cosa.

18. ¿Xi biʼniʼ David ora guluu jneza Jehová laa?

¹⁸ Gudiʼnu lugar uguu jnézacabe laanu. Ora biseendaʼ Jehová profeta Natán ra nuu David para gabi laa maʼ bichee la? qué niníʼ David qué gapa donda ne cadi malu peʼ ni biʼniʼ. Guniʼbe dxandíʼ bicheenebe xheelaʼ Bat-Seba ne laaca bicheenebe Dios. Bidiibe lugar uguu jneza Jehová laabe, ngue runi biʼniʼ perdonar laabe (2 Sam. 12:10-14). Pa maʼ biʼniʼ cometernu ti pecadu nabé malu la? caquiiñeʼ guinínenu ca hermanu ni maʼ bisaana  Jehová para gacané laanu (Sant. 5:14, 15). Ne cadi guininu qué gápanu donda. Nagueendaca guni aceptarnu maʼ bicheʼnu ne gúninu stipa guchaʼnu modo laanu, pa gúninu ni la? zatadxí ladxidoʼno ne zabáninu nayecheʼ.

19. ¿Xi naquiiñeʼ quixhe íquenu gúninu?

¹⁹ Quixhe íquenu cadi guni cometernu pecadu ni maca bíninu. Gunna David caquiiñeʼ gacané Jehová laa para maʼ cadi guiaba lu pecadu ca sti biaje (Sal. 51:7, 10, 12). Dxi biʼniʼ perdonar Jehová laabe la? gudixhe íquebe cadi guiníʼ íquebe cosa dxabaʼ. Ne ra bíʼnibe ni, gutadxí ladxidoʼbe.

20. ¿Ximodo rudiʼnu xquixe peʼ Jehová pur maʼ biʼniʼ perdonar laanu?

²⁰ Zusihuínninu cudiʼnu xquixe peʼ Jehová pur maʼ biʼniʼ perdonarbe laanu ora guinábanu ni laa lu oración, gudiʼnu lugar uguu jnézabe laanu ne gúninu stipa para cadi gucheʼnu sti biaje. Ora rúninu ca ni bizéʼtenu riʼ, ratadxí ladxidoʼno. Nga nga ni bizaaca James, ti hermanu ni biʼniʼ cometer ti pecadu nabé malu. Sicaríʼ guniʼbe: «Despué de gudxeʼ ca ancianu pecadu ni bineʼ cometer, bineʼ sentir casi ora guleecabe ti carga luguiaʼyaʼ. Ne gutadxí ladxiduáʼ». Guizáʼ riuʼnu gana ora gánnanu nuu Jehová «gaxha de ca ni maʼ gucadé ladxidóʼ; ne rulabe ca ni maʼ biree gana» (Sal. 34:18).

21. ¿Xi caquiiñeʼ gúninu para gudiʼnu lugar quixhedxí Jehová ladxidoʼno?

²¹ Ra jma mayaca guiluxe ca últimu dxi, ziuu jma cosa ni uguu laanu xizaa. Ora guni sentirnu nabé nuunu xizaa la? nagueendaca guyúbinu gacané Jehová laanu. Cadi gusaana de guni estudiarnu Biblia. Guizíʼdinu de ejemplu stiʼ Ana, Pablo ne David. Guinábanu Jehová gacané laanu para gánnanu xi riguu laanu xizaa (Sal. 139:23). Gudiʼnu lugar gacané Jehová laanu né ca guendanagana stinu, jmaruʼ si ca guendanagana ni qué zanda guni chaahuinu. Pa gúninu ni, zuni sentirnu casi biʼniʼ sentir salmista ni biʼndaʼ: «Ora bidale ca ni guluu xizaa naa, lii gudixhedxiluʼ ladxiduáʼ ne bisiécheluʼ naa» (Sal. 94:19).