1. ¿Xi guendanagana cadxaagalú stale xpinni Jehová?

LU GUIDUBI Guidxilayú, ridxaagalú stale xpinni Jehová guendanagana nadipaʼ ne ni runiná laacaʼ. Ne zándaca guidúʼyanu nuu hermanu ni cayacaná ndaaniʼ congregación stinu. Caadxi de laacabe nápacabe xiixa guendahuará malu ne nuu de laacabe guti ti familia stiʼ. Laaca nuu xcaadxi naná nuu ladxidóʼ purtiʼ bixeleʼ ti familia o ti xhamigu de Jehová. Ne zándaca nuu tu laa cayacaná pur ti desastre natural. Nga runi, guirácabe caquiiñeʼ chuʼ tu gacané laacabe pur guiráʼ yuubaʼ nápacabe. Peru ¿ximodo zanda gacanenu laacabe yaʼ?

2. ¿Xiñee guyuu ora biquiiñeʼ Pablo tu uguu gana laa?

² Guyuu xquendanabani apóstol Pablo ra naxoo stale biaje (2 Cor. 11:23-28). Biʼniʼ huantarbe «ti guichi lu beela» ládibe, zándaca laani nga ti guendahuará ni gúpabe (2 Cor. 12:7). Laaca biuubaʼ ladxidoʼbe dxi bisaana Demas laabe, ti hombre ni biʼniʼ apoyar Reinu stiʼ Dios dxiqué, purtiʼ jma gucuá ique «ca cosa ni nuu ndaaniʼ guidxilayú riʼ» (2 Tim. 4:10). Neca guca Pablo ti xpinni Cristu ungidu nadxibalú ne gucané xcaadxi binni la? laaca guyuu ora guyuube triste (Rom. 9:1, 2).

3. ¿Ximodo guluu Jehová gana Pablo?

³ Guyuu tu gucané Pablo dxi biquiiñeʼ ni. ¿Ximodo yaʼ? Nanna dxíchinu biquiiñeʼ Jehová espíritu santu stiʼ para cuʼ gana laabe (2 Cor. 4:7; Filip. 4:13). Peru laaca biquiiñeʼ Jehová ca hermanu para gucané laabe. Nga runi guníʼ Pablo gudixhedxí caadxi de ca hermanu que ladxidóʼ  (Col. 4:11). Caadxi de ca hermanu riʼ nga Aristarco, Tíquico ne Marcos, gudixhedxí ca hermanu riʼ ladxidoʼbe ne gucanecaʼ laabe guni huantarbe. ¿Xi cualidad gucané guionnaʼ hermanu riʼ para gunda gudixhedxicaʼ ladxidóʼ Pablo yaʼ? ¿Ximodo zanda chinándanu ejemplu galán stícabe ora quixhedxinu ladxidóʼ xcaadxi?

4. ¿Ximodo bisihuinni Aristarco qué nusaana xhamigu?

⁴ Guizáʼ guca xhamigu Aristarco Pablo. Gúlebe Tesalónica, ti guidxi ni nuu Macedonia. Primé biaje ruzeeteʼ Biblia de laabe nga dxi nuube ra nuu Pablo ndaaniʼ guidxi Éfeso, dxi cayuni Pablo guionna viaje misional stiʼ. Dxi nuu Aristarco raqué, gunaazeʼ ti grupu de binni laabe ne zinecaʼ laabe (Hech. 19:29). Ne ora bindaa ca binni que laabe la? qué niníʼ íquebe nibiguétabe xquídxibe, sínuque biaanabe ra nuu Pablo. Caadxi beeu despué, dxi maʼ nuucabe Grecia, gucalaʼdxiʼ caadxi binni ni nanalaʼdxiʼ Pablo ñuuti laabe, peru neca zaqué qué nusaana Aristarco laabe (Hech. 20:2-4). Dxi mayaca guzulú iza 58, zinécabe Pablo Roma para guseguyoocabe laa, né Aristarco zeʼ ra zebe ne bilaahua barcu ra zécabe que (Hech. 27:1, 2, 41). Ne dxi yendácabe Roma la? ruluíʼ guluucabe Aristarco cárcel né Pablo ti tiempu (Col. 4:10). Nga runi, nanna dxíchinu guizáʼ biecheʼ Pablo purtiʼ gupa ti xhamigu ni qué nusaana laa.

5. Casi ná Proverbios 17:17, ¿ximodo zusihuínninu pa dxandíʼ xhamígunu tuuxa?

⁵ Zusihuínninu dxandíʼ xhamígunu tuuxa casi guca Aristarco pa qué rixélenu de ca hermanu stinu ora nuucaʼ galán ne ora nápacaʼ «xiixa guendananá» (biindaʼ Proverbios 17:17). Ne zándaca caquiiñeʼ ca hermanu stinu gacanenu laacaʼ despué de maʼ gudíʼdicaʼ ra nagana. Guzéʼtenu ni bizaaca Francisca *, guti bixhózebe ne jñaabe de cáncer lu chonna si beeu. Sicaríʼ guniʼbe: «Rindaa para tidiʼ yuubaʼ rapa binni ora rati ti familia stiʼ. Peru rudieeʼ  xquixe peʼ purtiʼ rietenalaʼdxiʼ ca xhamiguaʼ nanaruʼ nuu ladxiduáʼ neca maʼ xadxí de guti bixhozeʼ ne jñaaʼ».

6. ¿Xi zúninu pa dxandíʼ xhamígunu tuuxa?

⁶ Cani dxandíʼ xhamígunu ribeecaʼ tiempu ne rúnicaʼ stipa para gacanecaʼ laanu. Guzéʼtenu ti ejemplu. Gunna ti hermanu láʼ Pedro napa ti guendahuará guizáʼ malu ne zuutini laa. Sicaríʼ guníʼ Katerin, xheelabe: «Yené ti guendaxheelaʼ laadu ra nuu doctor ne raqué gúnnadu xi guendahuará napa Pedro. Ne dede dxi que, gudixhe ique ca hermanu riʼ qué zusaanacaʼ laadu stúbidu lu yuubaʼ cadídidu que, ne huayuucabe gaxha de laadu ora caquiiñedu laacabe». ¿Cadi dxandíʼ guizáʼ riéchenu gápanu xhamígunu ni gacané laanu ora cadídinu lu xiixa guendanagana la?

7, 8. Casi ná Colosenses 4:7-9, ¿ximodo bisihuinni Tíquico dxandíʼ guca ti amigu de confianza para Pablo?

⁷ Tíquico, ti xpinni Cristu de ti guidxi ni riaana lu provincia stiʼ Roma ni nuu Asia, gúcabe ti binni de confianza para apóstol Pablo (Hech. 20:4). Dxi mayaca guzulú iza 55 gudixhe apóstol Pablo guidopa bueltu para gacané ca xpinni Cristu nabeza Judea, ne zándaca gúdxibe Tíquico gacané laabe lu dxiiñaʼ risaca riʼ (2 Cor. 8:18-20). Gudiʼdiʼ si tiempu, dxi biseguyoocabe Pablo primé biaje ndaaniʼ guidxi Roma la? gucané Tíquico laabe para chiné carta stibe ra nuu ca hermanu ni nuu Asia ne mensaje ni uguu gana laacaʼ (Col. 4:7-9).

⁸ Tíquico nga sti binni ni nabé guca xhamigu Pablo (Tito 3:12). Cadi guiráʼ ca xpinni Cristu de dxiqué gúcacaʼ casi laabe. Guzéʼtenu ti ejemplu, guiropa biaje biseguyoocabe Pablo ndaaniʼ guidxi Roma, ante de iza 65, bicaabe qué nidxaaga stale xpinni Cristu de Asia laabe, zándaca purtiʼ ridxíbicaʼ ca binni ni rizananda ca xpinni Cristu (2 Tim. 1:15). Peru gupa Pablo confianza Tíquico ne bisaanané laabe sti dxiiñaʼ gúnibe (2 Tim. 4:12). Nanna dxíchinu bisisaca Pablo gapa ti xhamigu casi Tíquico.

9. ¿Xi zanda gúninu para chinándanu ejemplu stiʼ Tíquico?

 ⁹ ¿Ximodo zanda gácanu ti amigu de confianza cásica guca Tíquico? Cadi guinísinu zacanenu tuuxa, sínuque gúninu ni (Mat. 5:37; Luc. 16:10). Ti binni ni caquiiñeʼ tu gacané laa la? riecheʼ ora ganna zanda gapa confianza laanu. Ti hermana guníʼ xiñee zacá ni, sicaríʼ guniʼbe: «Qué riuuluʼ xizaa purtiʼ nánnaluʼ zuni binni ca ni maʼ biʼniʼ prometer lii ora caquiiñeluʼ ni».

10. Casi ná Proverbios 18:24, ¿tu zanda quixhedxí ladxidóʼ binni ni cadiʼdiʼ xiixa prueba o ni qué nizaaca xiixa cosa ni cabeza?

¹⁰ Ca binni ni ridiʼdiʼ lu ti prueba o qué rizaaca xiixa cosa ni cabézacaʼ la? ratadxí ladxidoʼcaʼ ora rábicaʼ ti xhamígucaʼ ni cayuni sentircaʼ (biindaʼ Proverbios 18:24). Zacá biʼniʼ sentir ti hermanu láʼ Benjamín dxi guca expulsar xiiñiʼ, sicaríʼ guniʼbe: «Bidieeʼ cuenta caquiiñeʼ gabeʼ tuuxa ni napaʼ confianza xi cayuneʼ sentir». Sti hermanu láʼ Carlos biniti privilegiu stiʼ ndaaniʼ congregación purtiʼ bichee, sicaríʼ guniʼbe: «Bineʼ sentir caquiiñeʼ guinieniaʼ tuuxa sin guidxibeʼ guni juzgar naa». Gucané ca ancianu hermanu riʼ gudxiilú guendanagana riʼ. Ne gutadxí ladxidoʼbe purtiʼ qué ñabi ca ancianu sti binni ni bizaacabe.

11. ¿Ximodo zanda gácanu ti amigu de confianza?

¹¹ Caquiiñeʼ gápanu paciencia para gácanu ti amigu de confianza. Guzéʼtenu ni bizaaca Sandra, ti gunaa ni bisaana xheelaʼ laa. ¿Xi gucané laabe ora cadíʼdibe lu guendanagana riʼ yaʼ? Ni gucané laabe nga gábibe ca ni jma xhamígube ni cayuni sentirbe. Sicaríʼ guniʼbe: «Neca rinieeʼ ngueca ca ngueca la? né stale paciencia bicaadiágacabe naa». Laanu laaca zácanu ti amigu de confianza pa nánnanu gucaʼdiáganu sti binni.

12. ¿Tu guca Marcos, ne ximodo bisihuínnibe guyuube dispuestu gacanebe xcaadxi?

¹² Marcos nga ti xpinni Cristu de Jerusalén, ne xprímube nga Bernabé, ti misioneru ni nabé runibiáʼ binni laa (Col. 4:10). Ruluíʼ gupa familia stiʼ Marcos bueltu, peru qué nusisácabe ca cosa ni gúpabe. Biaʼ dxi bibánibe, guyuube dispuestu gacanebe binni ne bíʼnibe ni né stale guendanayecheʼ. Tiempu biʼniʼ Pablo ne Pedro xhiiñaʼ Dios yenebe laacaʼ, ne laabe risibe guendaró, ruyúbibe paraa guiaanacaʼ ne rúnibe xcaadxi cosa (Hech. 13:2-5; 1 Ped. 5:13). Guníʼ Pablo Marcos nga tobi de ca ni «runi apoyar Reinu stiʼ Dios» ne ni gudixhedxí ladxidoʼbe (Col. 4:10, 11).

13. ¿Ximodo rusihuinni 2 Timoteo 4:11 bisisaca Pablo dxiiñaʼ ni biʼniʼ Marcos?

¹³ Guizáʼ guca xhamigu Marcos ne Pablo. ¿Ximodo nánnanu ni yaʼ? Últimu biaje biseguyoocabe Pablo Roma, ante de iza 65, bicaabe guiropa carta ra nuu Timoteo. Lu carta que gúdxibe Timoteo cheʼ Roma ne chiné Marcos (2 Tim. 4:11). Rihuinni dxichi bisisaca Pablo dxiiñaʼ ni biʼniʼ Marcos, ne pur nga gunabaʼ Pablo laabe chuʼbe gaxha de laa ca dxi risaca que. Gucané Marcos laabe de gadxé gadxé modo, zándaca bidii laabe ni gobe o bidii laabe ni caquiiñebe para gucaabe. Cumu gucané Marcos Pablo ne guluu gana laabe la? biʼniʼ huantar Pablo ca ni gudiʼdiʼ ante gatiʼ.

14, 15. ¿Ximodo racané Mateo 7:12 laanu para gánnanu xi gúninu ti gacanenu xcaadxi?

¹⁴ (Biindaʼ Mateo 7:12). Ora ridxaagalunu guendanagana la? de guidubi  ladxidoʼno rudiʼnu xquixe peʼ tuuxa ni gacané laanu. Sicaríʼ guníʼ Bryan, ti hermanu ni guti bixhoze lu ti accidente: «Raca nagana para laanu gúninu ca cosa ni rúninu guiráʼ dxi ora naná nuu ladxidoʼno. Neca ti cosahuiiniʼ si guni xcaadxi pur lii, guizáʼ risaca ni».

¹⁵ Pa guidúʼyanu xi caquiiñeʼ xcaadxi la? zadxélanu modo gacanenu laacaʼ. Guietenaláʼdxinu ni bizaaca Pedro ne Katerin, guendaxheelaʼ ni bizéʼtenu lu párrafo 6. Gudixhe ique ti hermana chiné laacabe ora gápacabe cita ra nuu doctor. Cumu nin tobi de laacabe maʼ qué zanda gusá carru la? biʼniʼ hermana riʼ ti programa ne bicaabe lá ca hermanu de congregación ni guníʼ zanda chiné guendaxheelaʼ riʼ ra nuu doctor. ¿Xi bizaaca despué yaʼ? Sicaríʼ guníʼ Katerin: «Guizáʼ gucanécabe laadu». Cadi guiaandaʼ laanu zanda quixhedxinu ladxidóʼ xcaadxi ora gúninu neca ti cosahuiiniʼ si pur laacaʼ.

16. ¿Xi rusiidiʼ ejemplu stiʼ Marcos laanu?

¹⁶ Guzéʼtenu ejemplu stiʼ Marcos sti biaje, xhamigu apóstol Pablo. Guizáʼ bíʼnibe dxiiñaʼ. Bidii Jehová laabe caadxi asignación risaca, bicaabe ti Evangeliu. Ne laaca guluube gana Pablo, ne gupa Pablo confianza laabe, nga runi gunabaʼ laabe gacanebe laa. Guzéʼtenu ni bizaaca Ángela, ti hermana ni guti ti familia stiʼ, bidiibe xquixe peʼ ca hermanu ni gucané laabe cásica modo gucané Marcos Pablo dxiqué. Sicaríʼ guníʼ hermana riʼ: «Ora dxandíʼ racalaʼdxiʼ ca hermanu gacanecaʼ lii la? qué raca nagana para lii guidxíñaluʼ laacabe. Rusihuínnicabe racaláʼdxicabe gacanécabe lii ne qué ridxíbicabe gúnicabe ni». Nga runi guníʼ ique pregunta riʼ: «¿Ñee ruuyaʼ xcaadxi naa casi ti binni ni nuu dispuestu quixhedxí ladxidóʼ ca hermanu stiʼ la?».

17. ¿Xi zanda gucaa 2 Corintios 1:3, 4 laanu gúninu?

¹⁷ Cadi nagana para guidxélanu hermanu ni caquiiñeʼ chuʼ tu quixhedxí ladxidóʼ.  Zanda uguʼnu gana laacabe cásica guluucabe gana laanu. Sicaríʼ guníʼ ti hermana láʼ Catalina ni gutiʼ jñaabiidaʼ: «Zanda iquiiñeʼ Jehová laanu para quixhedxinu ladxidóʼ xcaadxi binni pa gudiʼnu lugar» (biindaʼ 2 Corintios 1:3, 4). Ne Francisca, xa hermana ni bizéʼtenu lu párrafo 5 que guníʼ: «Guizáʼ biaʼsi ca diidxaʼ ni zeeda lu 2 Corintios 1:4, purtiʼ zanda quixhedxinu ladxidóʼ xcaadxi cásica riguixhedxícabe ladxidoʼno».

18. a) ¿Xiñee raca nagana para laanu quixhedxinu ladxidóʼ xcaadxi? b) ¿Ximodo zanda quixhedxinu ladxidóʼ xcaadxi? Bizeeteʼ ti ejemplu.

¹⁸ Caquiiñeʼ gacanenu ne quixhedxinu ladxidóʼ binni ni cayacaná neca guiníʼ íquenu qué zanda gúninu ni. Guzéʼtenu ti ejemplu, zándaca ridxíbinu purtiʼ qué gánnanu xi guininu o xi gúninu pur tuuxa ni cayacaná. Ti ancianu láʼ Pablo guníʼ xi biʼniʼ ca hermanu dxi gutiʼ bixhoze. Sicaríʼ guniʼbe: «Bidieeʼ cuenta raca nagana para laacabe guiniʼnécabe naa. Qué ridxélacabe xi gábicabe naa. Peru rudieeʼ xquixe peʼ laacabe purtiʼ racaláʼdxicabe gacanécabe naa». Ne ti hermanu láʼ Gustavo ni gudiʼdiʼ ti xu naroʼbaʼ guníʼ: «Qué lica rietenalaʼdxeʼ xi ná cada mensaje ni biseendacabe ra nuaaʼ despué de guca xu que. Ni rietenalaʼdxeʼ nga nabé bizaalaʼdxiʼ ca hermanu que modo nuaaʼ». Rihuinni dxichi guizáʼ racanenu sti binni ora rizaaláʼdxinu laa.

19. ¿Xiñee risaca quixhedxinu ladxidóʼ xcaadxi?

¹⁹ Laga jma mayaca guinitilú guidxilayú riʼ, jma stale cosa malu ziuu ndaaniʼ ni ne zaca nagana para binni guibani luni (2 Tim. 3:13). Ne cumu imperfectu laanu la? ziuu ora zúninu ni cadi jneza. Nga runi zaquiiñenu tu quixhedxí ladxidoʼno. Gunda biʼniʼ huantar apóstol Pablo dede ra biluxe xquendanabani purtiʼ gucané ca hermanu laa. Nga runi, gácanu leal casi guca Aristarco, gácanu ti amigu de confianza cásica guca Tíquico ne gacanenu xcaadxi cásica biʼniʼ Marcos. Pa gúninu ni la? zacanenu ca hermanu stinu gácacaʼ fiel Jehová (1 Tes. 3:2, 3).