Lu Biblia, diidxaʼ griegu ni biquiiñeʼ para guni binni ni jneza, nuu biaje biquiiñeʼ ni para guiníʼcabe de xiixa ni biaʼsi nuu. Laaca biquiiñeʼ ni para guiníʼcabe de xiixa nabé sicarú ne risaca.

Ca xpinni Cristu de dxiqué yenándacaʼ ca diidxaʼ guníʼ apóstol Pablu riʼ: «Ni racalaʼdxi du nga irá ni guni du, guni du jneza». Xi riníʼ ca diidxaʼ riʼ yaʼ.

Casi guiráʼ binni ruuyaʼ laa lu espeju ante guiree ra lidxi. Xiñee pue. Purtiʼ racaláʼdxicabe guihuínnicabe galán. Peru nuu ti cosa ni jma risaca que guzuchaahuinu. Pur modo laanu zanda guni chaahuinu o guni yuudxunu modo ruuyaʼ binni laanu.

Biblia ruzeeteʼ ni jma nagueenda runi binni nga ni cadi jneza. Génesis 8:21 na: «Purtiʼ ladxidóʼ hombre puru cosa malu rinabaʼ guni dede ora nahuiiniʼ». Pa racaláʼdxinu gúninu ni jneza la? naquiiñeʼ gudxiilunu cani rucaa laanu gúninu ni. Sicaríʼ guníʼ apóstol Pablu ximodo riuu ora gacalaʼdxiʼ guni ni neza: «Purti lu xquenda biaane rieche nia ley sti Dios, peru ruuya ma adxé ley nuu luguiaʼyaʼ ne nuu dinde né ni ley ni maca cá lu xquenda biaaneʼ, ne laani nga rucaa ni naa yaga lu ná pecadu ni runi mandar naa» (Romanos 7:22, 23).

Ora guidxaagalunu ti guendanagana ra guihuinni pa zúninu ni jneza, cadi gudiʼnu lugar guiábanu luni, casi ora qué zanda gucueezanu laca laanu. Cadi gudiʼnu lugar gucaa cani laanu gúninu ni cadi jneza; lu nanu nga nuu pa zúninu ni o pa coʼ. Ora cueenu xiixa cosa malu riníʼ íquenu rácanu tobi de cani runi ni jneza lu guidxilayú riʼ.

Para ganda gúninu ni jneza la? naquiiñeʼ chuʼ xiixa ni gucaa laanu gúninu ni. Triste guininu ni, peru stale binni ni jma risaca para laacaʼ nga modo guʼyaʼ binni laacaʼ que gúnicaʼ ni jneza. Ruyúbicaʼ pretextu para guiniʼcaʼ jneza bíʼnicaʼ xiixa neca cadi jneza ni. Libru ni láʼ The (Honest) Truth About Dishonesty (La [honesta] verdad sobre la deshonestidad) bizeeteʼ: «Biaʼ tiempu guininu nácanu ti binni ni runi ni jneza, rusiguiinu». Peru xi zanda gacané laanu gánnanu pa jneza nga guyúbinu pretextu para gúninu ni cadi jneza yaʼ.

Millón de binni ni nabeza lu Guidxilayú maʼ bidii cuenta zanda gacané Biblia laa. Stiidxaʼ si Dios nga rusiene ximodo zanda guibani binni jma galán (Salmo 19:7). Rusiidiʼ ni ximodo guibanineluʼ familia, ximodo guʼnuʼ dxiiñaʼ, ximodo guʼnuʼ ni jneza ne ximodo chuʼluʼ gaxha de Dios. Dede yanna cayacané ca conseju stini binni. Racané  ca ley ne ca principiu stini guiráʼ binni de intiica guidxi, raza ne tribu. Pa guidúʼndanu Biblia, guiníʼ íquenu ni guidúʼndanu ne chinándanu ni nani la? zúninu ni jneza de guidubi ladxidoʼno.

Yanna, cumu nabáninu ndaaniʼ ti guidxilayú ra rucaa binni laanu gúninu ca cosa malu rúnicaʼ la? cadi naquiiñeʼ si gánnanu xi ná Biblia para gúninu ni jneza. Para ganda guni ganarnu ra cudxíʼlunu ni cadi jneza runi binni la? naquiiñeʼ guni orarnu Dios para guinábanu gacané laanu (Filipenses 4:6, 7). Zacatiʼ nga zanda gácanu nadxibalú para gúninu ni jneza lu intiica si cosa.

Hitoshi, hombre bizéʼtenu lu primé tema que, guleendube ni galán pur rúnibe ni jneza. Bidxélabe dxiiñaʼ ra nuu ti binni ni rusisaca guni binni dxiiñaʼ jneza. Sicaríʼ guniʼbe: «Nayecheʼ nuaaʼ purtiʼ gunda bidxelaʼ ti dxiiñaʼ ni racané naa gapaʼ xquendabiaaneʼ nayá».

Nuuruʼ binni ni huazaaca casi bizaaca Hitoshi. Guidúʼyanu ejemplu stiʼ chupa chonna ni huabeendú ni galán pur yenanda conseju zeeda lu Biblia ra na: «Ni racalaʼdxi du nga irá ni guni du, guni du jneza».

• Ratadxí xquendabiaaninu

  «Dxi napaʼ 13 iza, bisaanaʼ de ñaaʼ scuela ne bineniáʼ caadxi gubaanaʼ dxiiñaʼ. Casi guiráʼ bueltu ni rapaʼ reeda ni de dxiiñaʼ ni cadi jneza runeʼ. Gudiʼdiʼ si ti tiempu bichaganaʼyaʼ, ne despué bizulú biindané ca testigu stiʼ Jiobá laadu Biblia. Bizíʼdidu nanalaʼdxiʼ Jiobá * ora qué runi binni ni jneza, ngue runi gudixhe íquedu guchaʼdu modo nabánidu [Proverbios 6:16-19]. Lu iza 1990 guyuunísadu ne gúcadu testigu stiʼ Jiobá.

  »Dxiqué la? maʼ dxaʼ cosa ni ribánadu ra lidxeʼ, peru yanna maʼ coʼ. Yanna ra maʼ runeʼ ni jneza, maʼ nuudxí xquendabiaaneʼ. Ora guietenaladxeʼ ca iza guzayaʼ gulanaʼ que, rudieeʼ xquíxepeʼ Jiobá pur biaʼ naa. Nabé galán runeʼ sentir guiráʼ gueelaʼ ora maʼ zigaseʼ purtiʼ nannaʼ rusiecheʼ Jiobá» (Cheryl, Irlanda).

  «Ora gunna jefe stinneʼ qué ninaʼyaʼ nugadxe ti cliente lu nayaʼ, gudxi naa: “Maʼ biʼniʼ Dios stiuʼ lii ti binni ni zanda gápadu confianza. Riéchedu gúniluʼ dxiiñaʼ lu compañía riʼ”. Pur runeʼ ni jneza, nayá nuu xquendabiaaneʼ nezalú Jiobá. Ne laaca randa racaniáʼ familia stinneʼ ne xcaadxi binni guni zacaca» (Bobby, Hong Kong).

• Zatadxí ladxidoʼno

  «Nacaʼ asistente ejecutivo ndaaniʼ ti bancu internacional. Lu tipu dxiiñaʼ riʼ huaxiéʼ si tu runi ni jneza, jma nga ruyúbicabe modo guiaananécabe jma bueltu. Guiráʼ tu riníʼ ique sicaríʼ: “Gastiʼ naca guʼnuʼ ni cadi jneza pa pur laani guni ganarluʼ bueltu ne guibanuʼ jma galán”. Peru naa ratadxí ladxiduáʼ purtiʼ runeʼ ni jneza. Qué ziuu dxi gusaanaʼ de guneʼ ni jneza intiica gacaʼ. Nanna ca jefe stinneʼ qué ziuu dxi gusiguieeʼ pur laacaʼ, ne ninca gusiguieeʼ laacaʼ» (Tom, Estados Unidos).

• Respetu

  «Ni ruuyaʼ gaca dxiiñaʼ ra riaaʼ que gudxi naa gusiguieeʼ de ti material ni biniti raqué, peru qué ninaʼyaʼ ñuneʼ ni. Ora bihuinni tu gulaʼnaʼ ni la? bidii dueñu stiʼ empresa que xquíxepeʼ naa pur bineʼ ni jneza. Naquiiñeʼ gácanu nadxibalú para gúninu ni jneza lu Guidxilayú riʼ. Ora gúninu ni, rápacabe confianza laanu ne runi respetárcabe laanu» (Kaori, Japón).

Ni ribeendunu ora rúninu ni jneza nga ratadxí xquendabiaaninu, ratadxí ladxidoʼno ne runi respetárcabe laanu. Cadi dxandíʼ risaca ni la?