1. Pur modo xpiaʼ binni guidxilayú, ¿xiñee zándaca gaca nagana para laanu gácanu humilde?

RACA nagana para laanu gúninu ni rizíʼdinu lu Stiidxaʼ Dios. ¿Xiñee yaʼ? Ti razón nga purtiʼ nabáninu lu ca últimu dxi, nga runi raca nagana para laanu gácanu humilde. Nabáninu lade binni ni nadxii laca laa, ni nadxii bueltu, binni presumidu, ni ruchá bi yanni ne ni qué rucueeza laca laa (2 Tim. 3:1-3). Nabé rihuinni binni zacá lu guidxilayú riʼ, ne stale tu laa riuulaʼdxiʼ ni rúnicabe. Zándaca nuu caadxi de ca xpinni Dios qué zúnicaʼ ni runi clase binni ni bizéʼtenu riʼ, peru zándaca gápacaʼ envidia ni ribeendúcabe pur ni rúnicabe (Sal. 37:1; 73:3). Dede zándaca guinabadiidxacabe laca laacabe pa caquiiñepeʼ guizaaláʼdxicabe binni ne pa zuniti binni respetu laacabe pa gácacabe casi tobi «ni jma huaxiéʼ risaca» (Luc. 9:48). Pa gudiʼnu lugar guicá xpiaʼ binni guidxilayú laanu ne guyúbinu puru para laasinu la? zándaca guxheleʼ ni laanu de ca hermanu ne maʼ qué zuuyaʼ binni laanu casi ti xpinni Cristu. Nga runi galán guni estudiarnu ne chinándanu ca ejemplu galán zeeda lu Biblia.

2. ¿Xi zanda guizíʼdinu de ejemplu stiʼ ca xpinni Dios de dxiqué?

² Para ganda chinándanu ejemplu stiʼ ca xpinni Dios de  dxiqué la? naquiiñeʼ guni investigarnu jma de ca cosa ni bíʼnicabe. Casi, ¿ximodo guca xhamígucabe Jiobá? ¿Xi bíʼnicabe para guyuulaʼdxiʼ Dios ni bíʼnicabe? Ne ¿tu bidii stipa laacabe para bíʼnicabe ni ná Dios? Ora guni estudiarnu ne guni meditarnu lu ni ridúʼndanu la? zacané ni laanu para gácanu ti binni jma espiritual.

3, 4. a) ¿Xi riquiiñeʼ Jiobá para gusiidiʼ laanu? b) Aparte de guni estudiarnu, ¿xiruʼ caquiiñeʼ gúninu para guidoʼno en sentidu espiritual?

³ Laanu, ca xpinni Cristu, ricaanu stale conseju ne rizíʼdinu stale lu Biblia, lu ca publicación ca, lu sitiu jw.org, lu canal JW Broadcasting, lu ca reunión ni rápanu ne lu ca asamblea ca. Yanna, para guidoʼno en sentidu espiritual la? cadi caquiiñeʼ si guni estudiarnu, purtiʼ Jesús guníʼ: «Endaró stinne nga gune ni na ni biseenda naa, ne gunduuxe dxiiña stiʼ» (Juan 4:34).

⁴ Casi bisiene Jesús ca, ora ruzúʼbanu stiidxaʼ Dios la? cadoʼno guendaró espiritual. ¿Ximodo yaʼ? Ora guidoʼno ti guendaró nanixe la? ridxátipa ladxidoʼno ne runi sentirnu nayecheʼ. Zacaca nga ora rúninu ni ná Jiobá, raca fe stinu jma naguidxi ne ridxátipa ladxidoʼno en sentidu espiritual. Guzéʼtenu ti ejemplu, ¿cadi dxandíʼ nuu biaje nuunu desanimadu ora ziguni predicarnu peru ora ribiguétanu maʼ nuunu nayecheʼ ne jmaruʼ si nápanu stipa la?

5. ¿Xi zabeendunu pa gácanu ti binni nuu xpiaaniʼ?

⁵ Ora rúninu ni rusiidiʼ Jiobá laanu la? racané ni laanu gácanu ti binni nuu xpiaaniʼ (Sant. 3:13). Ne stale ni zabeendunu pa gúninu ni. Biblia ná gastiʼ qué zanda guchaaganu guendanuuxpiaaniʼ purtiʼ laani «zeeda gaca ni casi ti yaga ni rudii guendanabani cani napa ni, ne ca binni ni qué rundaa ni ribánicaʼ nayecheʼ» (Prov. 3:13-18). Ti biaje gudxi Jesús ca discípulo stiʼ: «Pa nánnatu ca cosa riʼ ne gúnitu cani la? ziuutu nayecheʼ» (Juan 13:17, TNM). Para guibani ca apóstol que nayecheʼ la? caquiiñeʼ guzuubacaʼ stiidxaʼ Jesús. Ne zaqué bíʼnicabe ni. Yenándacabe ejemplu stiʼ Jesús ne bíʼnicabe stipa pur gúnicabe guiráʼ ni biʼniʼ mandar laacabe lu xquendanabánicabe.

6. ¿Xiñee cadi naquiiñeʼ gusaana de gúninu cani rizíʼdinu lu Biblia?

⁶ Tiempu riʼ, laaca nabé risaca nga cadi gusaana de gúninu ni rizíʼdinu lu Biblia. Guzéʼtenu ti ejemplu. Ti binni ni biziidiʼ de mecánica la? nanna ximodo raca dxiiñaʼ ca ne zándaca nápabe ca herramienta ne ca material ni riquiiñeʼ para gúnibe xhiiñabe. Peru pa qué iquiiñebe cani la? de pur gana si nápabe cani. Ne zándaca maʼ huayúnibe chupa chonna dxiiñaʼ de laani ne pur nga maʼ nápabe experiencia. Peru pa qué racaláʼdxibe gusaana de gúnibe xhiiñabe jneza la? cadi naquiiñeʼ gusaana de gúnibe ni maʼ biziidibe. Zacaca nga dxi bizulunu biʼniʼ estudiarnu Biblia, bíninu cani bizíʼdinu ne pur ngue guleendunu ni galán. Nga runi, para cadi gusaana de chuʼnu nayecheʼ la? naquiiñeʼ gácanu humilde ne gúninu cani rusiidiʼ Jiobá laanu guiráʼ dxi.

7. Para gácanu ti binni nuu xpiaaniʼ, ¿xi naquiiñeʼ gúninu ora guidúʼndanu ca ejemplu ni zeeda lu Biblia?

⁷ Lu tema riʼ zadídinu caadxi cosa ni zusihuinni ziuu ora zaca nagana para laanu gácanu humilde. Nga runi guidúʼyanu xi biʼniʼ ca xpinni Cristu de dxiqué ora gudíʼdicaʼ lu ca guendanagana cásica ni cadídinu yanna. Pa racaláʼdxinu chuʼnu naguidxi en sentidu espiritual la? cadi caquiiñeʼ si guni estudiarnu información riʼ. Naquiiñeʼ  guiníʼ íquenu ximodo gúninu cani guizíʼdinu ne gúninu ni nagueendaca.

8, 9. Pur ni riete lu Hechos 14:8-15, ¿xi ejemplu de humildad bisaana Pablo para laanu? (Biiyaʼ dibuju ni zeeda ra ruzulú tema riʼ).

⁸ Racalaʼdxiʼ Jiobá «gulá guiráʼ xixé binni ne guiziidiʼ chaahuicaʼ ni dxandíʼ» (1 Tim. 2:4, TNM). ¿Ximodo ridúʼyanu ca binni ni qué runibiáʼ Jiobá yaʼ? Nánnanu guyé apóstol Pablo ndaaniʼ ca sinagoga que yeyubi ca binni ni maca nanna xiixa de Dios. Peru cadi biʼniʼ predicársibe ca judíu, sínuque né ca binni ni runi adorar xcaadxi Dios. Modo bicabi ca binni riʼ bisihuínnini ni pabiáʼ humilde laabe.

⁹ Guzéʼtenu ti ejemplu, primé viaje guyé Pablo de misioneru, guníʼ ique ca binni ni nuu lu región stiʼ Licaonia laabe ne Bernabé nga dios Zeus ne Hermes. ¿Ñee guyuulaʼdxiʼ Pablo ne Bernabé gusisácacabe laacaʼ zaqué la? ¿Ñee guníʼ íquecabe ngue nga oportunidad ni nápacabe para guiziiláʼdxicabe purtiʼ ndaaniʼ guiropa guidxi ni guyécabe ante guzananda binni laacabe la? ¿Ñee guníʼ íquecabe pa gusisaca binni laacabe zacané ni para guni predicárcabe jma la? Coʼ, purtiʼ oraqueca guchézacabe xhábacabe ne gúdxicabe ca binni que: «¿Xiñee cayúnitu ca cosa riʼ pue? Laca binni casi laatu nga laadu ne laca runi sufrirdu cásica laatu» (Hech. 14:8-15, TNM).

10. ¿Xiñee guníʼ ique Pablo ne Bernabé cásica laacaʼ nga ca binni de Licaonia?

¹⁰ Nanna Pablo ne Bernabé laaca binni imperfectu laacaʼ casi ca binni de Licaonia. Peru né ca diidxaʼ riʼ cadi caníʼdicabe tóbisi modo runi adorárcabe Dios né modo runi adorar ca binni que. Pablo ne Bernabé nácacaʼ misioneru purtiʼ gucuaacaʼ ti dxiiñaʼ especial (Hech. 13:2). Ne laaca bibícabe pur espíritu santu ne gucuaacabe esperanza de guibánicabe guibáʼ. Peru laaca nanna Pablo ne Bernabé zanda gapa ca binni que esperanza de checaʼ guibáʼ pa gucaadiágacaʼ Stiidxaʼ Dios.

11. ¿Ximodo zanda gácanu humilde cásica guca Pablo ora guni predicarnu?

¹¹ ¿Ximodo zanda gácanu humilde cásica guca Pablo yaʼ? Ti modo nga cadi guiníʼ íquenu naquiiñeʼ gusisácabe laanu purtiʼ si cayacané Jiobá laanu cueendunu lu ca dxiiñaʼ ni rúninu. Nga runi naquiiñeʼ guinabadiidxanu laca laanu: «¿Ximodo ruuyaʼ ca binni ni runeʼ predicar yaʼ? ¿Ñee runeʼ menu binni ni nabeza ladu nabezaʼ la?». Rihuinni dxíchica cadi cusaana ca testigu stiʼ Jiobá de guyúbicaʼ binni ni riuulaʼdxiʼ guiziidiʼ de Jiobá. Dede nuu biaje riziidiʼ ca xpinni Cristu idioma ne costumbre stiʼ ca binni ni nabé runi binni menu laacaʼ, purtiʼ ca hermanu riʼ qué riníʼ íquecaʼ jma risácacaʼ que laacabe; sínuque rúnicaʼ stipa pur guiénecaʼ cada binni para ganda gacanecaʼ laacabe chuuláʼdxicabe guiziidicabe stiidxaʼ Reinu.

12. ¿Ximodo bisihuinni Epafras dxandíʼ nadxii ne rizaalaʼdxiʼ ca hermanu?

¹²  Sti modo zanda gusihuínninu nácanu humilde ne ruzúʼbanu stiidxaʼ Jiobá nga ora guni orarnu pur ca hermanu stinu (2 Ped. 1:1). Ngapeʼ nga ni biʼniʼ Epafras. Chonna si biaje riete de laabe lu Biblia ne zeeda cani lu ca carta ni bicaa Pablo. Laga deguyoo Pablo Roma ndaaniʼ lidxi, bicaabe ra nuu ca xpinni Cristu de Colosas ne gúdxibe laacaʼ qué rusaana Epafras de guni orar pur laacaʼ (Col. 4:12). Binibiáʼ chaahuiʼ Epafras ca hermanu riʼ ne nabé guyuu  xizaa pur laacabe. Neca deguyoonebe Pablo la? guyuu ora dede qué ñásibe purtiʼ qué nusaana de niníʼ íquebe ni caquiiñeʼ ca hermanu que en sentidu espiritual (Filem. 23). Ni bíʼnibe nga gucanebe laacaʼ ne zaqué bisihuínnibe rizaaláʼdxibe laacaʼ. Ca oración ni rúninu pur ca hermanu stinu guizáʼ racané ni laacabe, ne jmaruʼ si ora ruzéʼtenu lácabe lu oración ni rúninu (2 Cor. 1:11; Sant. 5:16).

13. ¿Ximodo zanda gúninu cásica biʼniʼ Epafras ora guni orarnu?

¹³ Guníʼ ique tuu nga ca hermanu ni zanda guzeeteluʼ lu oración stiluʼ ne tu lácabe. Tiempu riʼ, stale hermanu runi cásica biʼniʼ Epafras, purtiʼ runi orarcaʼ pur ca hermanu de congregación sticaʼ, pur familia sticaʼ ni napa xiixa responsabilidad nadipaʼ o pur cani cudxiilú xiixa guendanagana. Xcaadxi hermanu la? ruzeetecaʼ lá ca hermanu ni zeeda lu tema ni láʼ «Testigos de Jehová presos por sus creencias», ni nuu lu sitiu jw.org (sección PRENSA > ASUNTOS LEGALES). Ne cadi guiaandaʼ laanu guzéʼtenu lá ca hermanu ni gutiʼ tuuxa binnilidxi, cani cayacaná pur xiixa desastre o guerra, ne cani cadiʼdiʼ lu xiixa guendanagana purtiʼ huaxiéʼ bueltu nápacaʼ. Rihuinni dxíchica nuu stale hermanu ni caquiiñeʼ guni orarnu pur laacaʼ. Ora runi orarnu pur laacabe rusihuínninu cadi rizaaláʼdxinu ni caquiiñesinu sínuque laaca rizaaláʼdxinu ni caquiiñeʼ xcaadxi (Filip. 2:4). Cadi guiaandaʼ laanu rucaadiaga Jiobá ca oración ni rúninu pur ca hermanu.

14. ¿Xiñee jma galán chinándanu ejemplu stiʼ Jiobá ora gucaʼdiáganu xcaadxi?

¹⁴ Sti modo zanda gusihuínninu nácanu humilde nga chuʼnu dispuestu gucaʼdiáganu ni gabi xcaadxi binni laanu. Lu Santiago 1:19 ná naquiiñeʼ chuʼ ti xpinni Cristu listu para gucaadiaga. Ejemplu jma galán zanda chinándanu nga stiʼ Jiobá (Gén. 18:32; Jos. 10:14). Guidúʼyanu xi zanda guizíʼdinu de Éxodo 32:11-14 (biindaʼ ni). Cadi caquiiñeʼ gabi Moisés Jiobá xi naquiiñeʼ guni, peru bidiibe lugar guiníʼ Moisés xi cayuni sentir. ¿Ñee nucaadiágaluʼ né paciencia tuuxa ni maʼ bichee ne ñúniluʼ ni ñábibe lii la? Cadi guiaandaʼ lii rucaadiaga Jiobá né stale paciencia ca binni imperfectu ni runi orar laabe ne cani napa fe.

15. ¿Ximodo zanda chinándanu ejemplu stiʼ Jiobá?

¹⁵ Galán guinabadiidxanu laca laanu: «Pa rucaadiaga Jiobá binni imperfectu casi bíʼnibe né Abrahán, Raquel, Moisés, Josué, Manóah, Elías ne Ezequías, ¿cadi laaca caquiiñeʼ gucaʼdiáganu xcaadxi la? ¿Ñee zanda gusihuinneʼ jma napaʼ respetu ca hermanu, gucaadiaʼgaʼ ca sugerencia stícabe ne chinandaʼ cani la? ¿Ñee nuu tuuxa ndaaniʼ congregación o ndaaniʼ familia stinneʼ ni caquiiñeʼ gucaadiaʼgaʼ laa la? ¿Ñee zanda guneʼ xiixa para gacaniáʼ laabe?» (Gén. 30:6; Juec. 13:9; 1 Rey. 17:22; 2 Crón. 30:20).

16. ¿Xi biʼniʼ David dxi bicaalú Simeí laa?

¹⁶ Ora humilde ti binni la? randa rucueeza laca laa ora gucaalúcabe laa (Efes. 4:2). Zeeda ti ejemplu de laani lu 2 Samuel 16:5-7, 13 (biindaʼ ni). Bicueeza rey David laa ne ca binni ni runi xhiiñaʼ dxi bicaalú ti familia stiʼ rey Saúl laacaʼ, ni láʼ Simeí. Ñanda ñuni David xiixa para nucueeza laabe, peru biʼniʼ huantar. ¿Tu bidii stipa laabe para gunda bicueezabe laabe yaʼ? Zadxélanu respuesta ca ra guidúʼndanu Salmo capítulo 3.

17. a) ¿Xiñee gunda bicueeza David laa? b) ¿Ximodo zanda chinándanu ejemplu stiʼ David?

¹⁷ Bicaa David Salmo capítulo 3 «dxi canazananda  xiiñibe Absalón laabe» casi ná lu encabezamientu stini. Ne biaʼsi ni riete lu versículo 1 ne 2 stiʼ Salmo riʼ né ni ná capítulo 16 stiʼ 2 Samuel. Salmo 3:4 rusihuinni pabiáʼ confianza gupa David Jiobá, nga runi guniʼbe ca diidxaʼ riʼ: «Zucaaʼ ridxeʼ Jiobá ne laa zacabi naa dede lu dani nayá stiʼ». Laanu laaca naquiiñeʼ guni orarnu ora gucaalúcabe laanu. Ne óraque zudii Jiobá espíritu santu stiʼ laanu para ganda guni huantarnu. ¿Ñee zanda gucueezanu laanu o guni perdonarnu tuuxa ni runi tratar laanu mal neca qué gapa nin ti razón para guni ni la? ¿Ñee nápanu confianza ruuyaʼ Jiobá modo cayacananu ne zacanebe laanu la?

18. ¿Xi zabeendunu pa qué gusaana de gúninu ni cayuni mandar Jiobá laanu?

¹⁸ Pa gúninu ni nánnanu jneza la? zacaanu stale ndaayaʼ. Nga runi Proverbios 4:7 ná: «Guendanuuxpiaaniʼ nga ti cosa jma risaca. Biyubi gácaluʼ ti binni nuu xpiaaniʼ ne ora maʼ bidxélaluʼ ni biyubi gácaluʼ ti binni ni riene». Para ganda gácanu ti binni nuu xpiaaniʼ la? cadi caquiiñeʼ si gápanu conocimientu, purtiʼ ni rusihuinni pa nácanu ti binni nuu xpiaaninu nga ca decisión ni ricaanu ne cadi biaʼ nánnanu. Biblia ná dede ca birí ca rusihuínnicaʼ nuu xpiaanicaʼ, purtiʼ lu verano rutopacaʼ ni gocaʼ (Prov. 30:24, 25). Cristu «rusihuinni pabiáʼ nuu xpiaaniʼ Dios» ne siempre rúnibe ni riuulaʼdxiʼ Bixhózebe (1 Cor. 1:24; Juan 8:29). Nanna Dios gadxé nga ganna tuuxa xi naquiiñeʼ guni ne gadxé nga guni ni. Riguube ndaayaʼ ca binni humilde, cani runi huantar ne cani runi ni jneza (biindaʼ Mateo 7:21-23). Nga runi, gúninu stipa pur gacanenu para chuʼ binni humilde ndaaniʼ congregación ne guni servirnu Jiobá juntu. Nánnanu riquiiñeʼ tiempu ne paciencia para ganda gúninu ca cosa ni nánnanu jneza. Peru pa gúninu ni la? zusihuínninu humilde laanu ne cadi yanna si ziuʼnu nayecheʼ sínuque para siempre.