¡Maʼ qué zaca nanaláʼdxisaa binni!
Neca peʼ laanu maʼ qué gaca nanaláʼdxinu stobi, peru qué zanda guchaʼnu ni runi ne ni riníʼ ique xcaadxi binni. Yanna, cumu nuuruʼ stale binni inocente cayacaná purtiʼ nuu tu nanalaʼdxiʼ laacaʼ la? ¿xi caquiiñeʼ gaca para guiluxe guendanagana riʼ yaʼ?
Jehová Dios si nga zanda guni xiixa para maʼ cadi gaca nanaláʼdxisaa binni, ne Biblia rabi laanu ximodo chigúnibe ni (Proverbios 20:22).
ZABEE DIOS NI RUCAA BINNI GACA NANALAʼDXIʼ
-
1. BINIDXABAʼ. Binidxabaʼ nga ti ángel ni bicaalú Dios ne pur laabe nga nuu stale binni ni nanaláʼdxisaa ca dxi riʼ. Zunitilú Dios Binidxabaʼ ne ca ni qué naʼ gusaana de gaca nanalaʼdxiʼ (Salmo 37:38; Romanos 16:20).
-
2. GUIDXILAYÚ NI CAYUNI MANDAR BINIDXABAʼ. Zabee Dios guiráʼ tu rucaa gaca nanaláʼdxisaa binni, casi guiráʼ políticu ni ribaʼnaʼ nuu yanna riʼ ne ca líder stiʼ ca religión. Laaca zabee Dios sistema comercial nuu lu Guidxilayú riʼ purtiʼ nabé ribáʼnani stiʼ binni (2 Pedro 3:13).
-
3. GUENDARUCHEE. Biblia rusiene guiranu nácanu binni ruchee, pur nga riníʼ íquenu, runi sentirnu ne rúninu cosa malu (Romanos 5:12). Ne laaca pur nga nga raca nanalaʼdxiʼ binni. Peru, pa gacané Dios laanu la? zanda gusaana de guidaʼnu xiana ne cadi gaca nanaláʼdxinu binni (Isaías 54:13).
RABI BIBLIA LAANU ZABÁNINU NDAANIʼ TI GUIDXILAYÚ RA MAʼ GUIRUTIʼ ZACA NANALAʼDXIʼ
-
1. MAʼ QUÉ ZACA INJUSTICIA. Zuni mandar Reinu stiʼ Dios lu guidubi naca Guidxilayú. Guibáʼ nga chichuu gobiernu riʼ, puru si ni jneza zuni ni ne qué zusaana de guni mandar ni (Daniel 2:44). Maʼ qué zúnicabe menu binni ora maʼ cayuni mandar ni, ne Dios nga chiguuya gaca justicia pur ca binni ni cayuni sufrir tiempu riʼ (Lucas 18:7).
-
2. MAʼ GUIRUTIʼ ZADINDE. Maʼ guirutiʼ zuni sufrir pur guerra ne pur ca binni ridinde (Salmo 46:9). Zaca Guidxilayú riʼ ti lugar ra qué ziuu xiixa ni guchibi binni ne zabani puru si binni nadóʼ luni (Salmo 72:7).
-
3. ZABÁNINU GALÁN. Guiráʼ binni zannaxhiisaa (Mateo 22:39). Maʼ gastiʼ qué zuniná laanu, maʼ qué ziuu guendahuará ni runiná xquendabiaaniʼ binni, maʼ qué zaníʼ ique binni ni cadi jneza ne maʼ qué zietenalaʼdxiʼ ca cosa malu bizaaca (Isaías 65:17). Ora maʼ qué chuʼ binni ni raca nanalaʼdxiʼ la? maʼ guiráʼ binni «zabánicaʼ nayecheʼ purtiʼ ziuu stale paz» (Salmo 37:11).
¿Ñuuláʼdxiluʼ nibániluʼ ndaaniʼ Guidxilayú riʼ ora maʼ gaca ni zacá la? Dede ca yanna, millón de binni ni naca testigu stiʼ Jehová maʼ cadi nanaláʼdxicaʼ binni. ¿Ximodo cayúnicabe ni yaʼ? Cayúnicabe ni ra zinándacabe ca conseju rudii Biblia (Salmo 37:8). Neca de gadxé gadxé guidxi laacabe ne gadxé gadxé costumbre nápacabe, peru nuucabe tobi si purtiʼ nadxiisaacabe (Isaías 2:2-4).
Pur ni maʼ biziidiʼ ca testigu stiʼ Jehová, né stale guendanayecheʼ zanda gusiidicabe lii xi zanda gúniluʼ pa cazaacaluʼ ti injusticia ne pa nuu tu runi menu lii. Chaahuiʼ chaahuiʼ zacané ni guiziidiluʼ lii para gannaxhiiluʼ binni ne cadi gaca nanaláʼdxiluʼ. Zaziidiluʼ ximodo guni tratarluʼ binni galán, dede né ca ni qué runi tratar lii galán o ca ni nanalaʼdxiʼ lii. Pa guʼnuʼ nga la? zabániluʼ nayecheʼ ne galán modo zaca llevarluʼ binni. Ne ni jma risaca: zaziidiluʼ ni naquiiñeʼ gúniluʼ para guibániluʼ nayecheʼ ora maʼ guni mandar Reinu stiʼ Dios ne ora maʼ cueeni tobi si tiru ca binni ni raca nanalaʼdxiʼ (Salmo 37:29).
Laaca zándaca ziuuláʼdxiluʼ ca ndiʼ
TORRE STIʼ NI RAPA
¿Xi chiguni Reinu stiʼ Dios?
Nanna Jesús Reinu si stiʼ Dios nga zanda guni chaahuiʼ ca guendanagana nuu lu Guidxilayú. ¿Xi huayuni Reinu stiʼ Dios para guni crenu zuni chaahuiʼ ni ca guendanagana ni nuu?
¡GUTANÁ!
Prejuiciu: Ndiʼ nga remediu stini
¿Xi tapa cosa chiguni Reinu stiʼ Dios para gunduuxeʼ prejuiciu?
