PA MAʼ guti ti binni ni nadxiiluʼ, zándaca runi sentirluʼ triste, riníʼ íqueluʼ biaanaluʼ stúbiluʼ o maʼ qué zanda gúniluʼ gastiʼ, ne zándaca nuu ora ridxiichiluʼ, riníʼ íqueluʼ nápaluʼ donda ne ridxíbiluʼ. Ne zándaca rinabadiidxaluʼ, ¿ñee risácaruʼ xquendanabaneʼ la?

Ora ruunaluʼ pur guti ti binni ni nadxiiluʼ la? qué rusihuinni diʼ ni débil lii. Coʼ, sínuque rusihuinni ni pabiáʼ gunnaxhiiluʼ binni ca. Peru, ¿ñee nuu xiixa ni zanda quixhedxí ladxidoʼloʼ la?

Neca guiníʼ íqueluʼ guirutiʼ zanda quixhedxí ladxidoʼloʼ la? zanda gacané ca conseju riʼ lii:

BIINAʼ PA CAQUIIÑEʼ GÚNILUʼ NI

Gadxé gadxé modo rusihuinni cada binni nuu triste ne gadxé gadxé tiempu ridiʼdiʼ para maʼ cadi guni sentírcabe zacá. Peru ora ruunaʼ binni, zanda gacané ni laa. Vanessa, ni maca bizéʼtenu guníʼ: «Guiráʼ ora nisi maʼ cayuunaʼ. Bineʼ sentir caquiiñeʼ cueeʼ ni cayuneʼ sentir». Sofia, ni málasi guti bizaʼnaʼ guníʼ: «Guizáʼ naná guca para naa gudxieeluáʼ ni riníʼ iqueʼ ne ni runeʼ sentir. Zeeda gaca ni casi ora nuxhélecabe ti herida para gusiácabe ni. Neca guizáʼ naná yuubaʼ ca, peru caquiiñeʼ gaca ni para guianda herida ca».

GUNÍʼ NI CANÍʼ ÍQUELUʼ NE NI CAYUNI SENTIRLU

Normal nga gacaláʼdxiluʼ chuʼluʼ stúbiluʼ, peru qué zanda gudxiiluluʼ yuubaʼ ca stúbiluʼ. Jared, ti  joven de 17 iza ni gutiʼ bixhoze guníʼ: «Guyuu biaje nin qué ganna xi caniéʼ, peru ni gucané naa nga güeniáʼ xcaadxi binni ni cayuneʼ sentir». Janice, ni bizéʼtenu lu primé artículo que guníʼ: «Ora gudxeʼ sti binni ni cayuneʼ sentir gutadxí ladxiduáʼ. Bineʼ sentir nuu tu riene naa ne maʼ qué ñuneʼ sentir stubeʼ».

BIDII LUGAR GACANÉCABE LII

Sicaríʼ guníʼ ti doctora: «Ca binni ni rudii lugar gacané familia ne ca xhamigu laa ora nacubi guti tuuxa ni nadxii qué zaca nagana para laa gudxiilú ni guni sentir despué». Gudxi ca xhamíguluʼ xi zanda gúnicaʼ para gacanecaʼ lii. Zándaca racaláʼdxicaʼ gacanecaʼ lii, peru qué gánnacaʼ ximodo guni cani (Proverbios 17:17).

BIDXIÑA JMA GAXHA DE DIOS

Tina guníʼ: «Ni málasi guti xheelaʼ de cáncer, biniteʼ binni ni jma napaʼ confianza ne dede dxi que bizuluáʼ gudxeʼ Dios guiráʼ ni cayuneʼ sentir. Casi guibaneʼ, rinabaʼ laabe gudiibe stipa naa para ganda guneʼ huantar sti dxi. Gucané Dios naa de stale modo...». Napa Tarsha 22 iza dxi guti jñaa, laabe guniʼbe: «Ora ruundaʼ Biblia guiráʼ dxi ratadxí ladxiduáʼ. Siempre ridxelaʼ xiixa cosa galán ni guiníʼ iqueʼ».

BIXUIʼLÚ DXI GUIASA GUIRÁʼ CA NI MAʼ GUTI

Tina guníʼ: «Nacubigá la? neca nannaʼ ziasa ca binni ni maʼ guti sti biaje, qué ñacané ni naa ñatadxí ladxiduáʼ. Caquiiñeʼ xheelaʼ óraque ne ca xiiñeʼ caquiiñecaʼ bixhózecaʼ. Peru neca maʼ gudiʼdiʼ tapa iza de guti xheelaʼ, napaʼ confianza zaca cumplir promesa ca. Nga nga ni racané naa para cadi guireeʼ gana. Guizáʼ riecheʼ ne ratadxí ladxiduáʼ ora ruxuiʼluaʼ guuyaʼ laabe sti biaje».

Zándaca ruluíʼ qué zatadxí ladxidoʼloʼ ora nacubi guti tuuxa ni nadxiiluʼ, peru ca diidxaʼ guníʼ Vanessa zanda quixhedxí ca ni ladxidoʼloʼ. Laabe guniʼbe: «Riníʼ íqueluʼ qué zanda gudxiiluluʼ yuubaʼ ca, peru nuu dxi zuni sentirluʼ galán».

Cadi guiaandaʼ lii, neca ruluíʼ qué ziuu dxi guiree yuubaʼ nuu ndaaniʼ ladxidoʼloʼ la? risácaruʼ xquendanabániluʼ. Zacané Dios lii, ne zándaruʼ guibániluʼ para chuʼluʼ nayecheʼ né ca xhamíguluʼ ne gapa xquendanabániluʼ sentidu. Maʼ cadi candaa zusibani Dios ca ni maʼ guti. Racaláʼdxibe quiidxiluʼ ca binni ni nadxiiluʼ ne maʼ qué chuʼ dxi gacanaluʼ.