QUÉ ñacalaʼdxiʼ Dios nibáninu casi nabáninu yanna riʼ. Ni gucaláʼdxibe nga nidxá Guidxilayú riʼ de binni ni nuzuubaʼ stiidxabe, nibeenducaʼ ni galán ora ninándacaʼ ca conseju stibe ne nusihuínnicaʼ ca guenda sicarú stibe. Gucaláʼdxibe ñapa binni guendariuudxi, nibani nayecheʼ, ñuni stale cosa ne ñuni Guidxilayú riʼ ti paraísu.

• «Runduuxebe guendaridinde lu guidubi guidxilayú» (Salmo 46:9).

• Maʼ «bedandá tiempu [...] para gunitiluluʼ ca ni cunitilú guidxilayú» (Apocalipsis 11:18, TNM).

• «Guirutiʼ tu cueza racá zaníʼ: “Huaraʼyaʼ”» (Isaías 33:24).

• «Ziecheʼ ca binni ni maʼ gulieeʼ ora guireendú guiráʼ dxiiñaʼ gúnicaʼ» (Isaías 65:22).

¿Ximodo chigaca ni ná ca profecía riʼ yaʼ? Maʼ gulí Dios Jesús, Xiiñiʼ, para gaca Rey stiʼ ti reinu ni runi ni jneza ne chiguni mandar lu Guidxilayú riʼ dede guibáʼ. Biblia ruzeeteʼ laani nga Reinu stiʼ Dios (Daniel 2:44). Biblia ná: «Ne zucuí Dios laabe de rey [...], ne qué ziuu dxi guiasa be», rey riʼ nga Jesucristu (Lucas 1:32, 33).

Dxi guyuu Jesús lu Guidxilayú riʼ biʼniʼ stale milagru para gusihuinni ximodo zabani binni ora maʼ guni mandar lu Guidxilayú.

• Bisiándabe guiráʼ clase guendahuará, zacá bisihuínnibe zanda cueebe guiráʼ xixé cani (Mateo 9:35).

• Bicueezabe ti bi yooxhoʼ, zacá bisihuínnibe zanda gucueezabe cani rizaaca lu Guidxilayú (Marcos 4:36-39).

• Biyaanabe stale mil de binni, zacá bisihuínnibe zanda gudiibe guiráʼ ni caquiiñenu (Marcos 6:41-44).

• Lu ti guendaxheelaʼ bíʼnibe nisa que vinu, zacá bisihuínnibe zudiibe laanu ni caquiiñenu para guibáninu nayecheʼ (Juan 2:7-11).

¿Xi caquiiñeʼ gúniluʼ para guicaaluʼ guendanabani ni chigudii Dios ca binni ni nadxii laa yaʼ? Nuu ti «neza» ra naquiiñeʼ saluʼ. Biblia ná laani nga «neza enda nabani», ne huaxiéʼ si tu ridxela ni (Mateo 7:14).

¿Xii nga zeeda gaca neza ni ziné lu guendanabani ni qué zaluxe? Neza riʼ zeeda gaca ni guiráʼ ni canabaʼ Dios laanu gúninu, laapebe cayábibe laanu: «Naa, Jiobá, naa nga Dios stiluʼ, ni cusiidiʼ lii para cueenduluʼ ni galán. Ni cayabi lii gunáʼ nga neza ra naquiiñeʼ saluʼ» (Isaías 48:17). Pa sanu lu neza riʼ zabáninu jma galán.

Jesús guníʼ: «Naa nga neza ca, ne rusiide ni  dxandíʼ ne rudiee enda nabani ni qué zaluxe» (Juan 14:6). Pa guni crenu cani bisiidiʼ Jesús ne chinándanu ejemplu stiʼ, zadxíñanu jma gaxha de Dios ne zabáninu jma galán.

¿Ximodo zanda guidxélaluʼ neza riʼ? Dxandíʼ, nuu stale religión o neza, peru Jesús guníʼ: «Cadi irá ni gabi naa, Señor, Señor, ziuu ra runi mandar Dios, sínuque cani guni si ni na be» (Mateo 7:21). Laaca guniʼbe: «Zahuinni lu xhiiña cabe tu laacabe» (Mateo 7:16). Zanda gacané Biblia lii gánnaluʼ gunáʼ nga religión ni rusiidiʼ ni dxandíʼ (Juan 17:17).

¿Xi caquiiñeʼ gúniluʼ para saluʼ lu neza riʼ? Caquiiñeʼ gunibiaʼluʼ ni bidii laanu guendanabani. Caquiiñeʼ gánnaluʼ tu laabe, tu labe, ximodo laabe, xi cayúnibe pur laanu ne xi racaláʼdxibe gúninu. *

Cadi bizáʼ Dios laanu para si gúninu dxiiñaʼ, guidoʼno, chuʼnu nayecheʼ ne gápanu ti familia, ni racaláʼdxibe nga gunibiaʼnu laabe ne gácanu xhamígube. Ora ruzúʼbanu stiidxabe rusihuínninu nadxiinu laabe. Jesús guníʼ: «Ne zacaa cabe enda nabani ca ra gunibiáʼ cabe lii [...]. Lii nga tobi lucha Dios ni dxandíʼ» (Juan 17:3).

Para ganda gusiécheluʼ tobi lucha Dios ni dxandíʼ, zándaca nuu ra caquiiñeʼ guchaaluʼ. Zándaca gaca ni nagana, peru pa gúniluʼ ni zabániluʼ jma galán. Pa racaláʼdxiluʼ gánnaluʼ jma de Dios la? gunabaʼ guʼndanécabe lii Biblia lu sitiu ni nápadu lu Internet www.jw.org. Né stale guendanayecheʼ ziganna ca testigu stiʼ Jiobá lii lugar ne hora chuuláʼdxiluʼ.