Nga nga tobi de ca razón gupa ca xhenemigu Jesús para guniʼcaʼ mal de laabe ne de ca discípulo stibe. Lu Ley ni gucuaa Moisés que maca nexheʼ xi guiráʼ naquiiñeʼ gúnicabe para gusiácabe laacabe. Caadxi de cani zeeda luni nga de menstruación ne ora guiree semen stiʼ hombre, ne casi xi naquiiñeʼ gaca né guendahuará lepra o xi naquiiñeʼ gúnicabe ora cánacabe ti gueʼtuʼ o ti maniʼ ni maʼ guti. Laaca rusiene ni ximodo zanda cueecabe xiixa ni guni biidiʼ laacabe ne ni guni biidiʼ xcaadxi cosa: rúnicabe sacrificiu, riguiibicabe ni guca biidiʼ o ruruubacabe nisa luni (capítulo 11 dede 15 stiʼ Levítico ne capítulo 19 stiʼ Números).

Ca rabinu o ca maestru judíu que nabé rusiénecabe cada cosa ni zeeda lu ca ley que. Libru Historia del pueblo judío en tiempos de Jesús na: «Ruundaʼ chaahuicabe cada tobi de laacani para gúʼyacabe xi guiráʼ modo zanda guni biidiʼ cani, ne ximodo zanda guicá cani xcaadxi ne pabiáʼ zanda icá cani laacabe, gunáʼ nga ca cosa ni zanda gaca biidiʼ, ne últimu ruuyacabe xi iquiiñecabe ne xi ritu gúnicabe para guiá binni ne ca cosa ca».

Ca xhenemigu Jesús gunabadiidxacaʼ laabe: «Xiñee cadi zinanda ca discípulo stiuʼ costumbre sti ca binigola, purti riduʼya du ro ca sin quiʼbi ná ca casi naquiiñe ñuni caʼ» (Marcos 7:5). Cadi gunabadiidxacaʼ ni laabe purtiʼ racaláʼdxicaʼ chúʼcabe nayá. Ca rabinu que rinábacaʼ guchá binni nisa lu náʼ ante gó gueta casi ti ritu. Libru bizéʼtenu que na: «Laaca riniʼcaʼ xi traste iquiiñeʼ binni para guchané nisa, xi nisa iquiiñecabe, tu naquiiñeʼ guchá nisa lu nácabe ne dede pa guidubi nga gadxe nácabe».

Qué iganna modo bicabi Jesús ca hombre que ora gúdxicaʼ laabe de ca ley ni nápacaʼ. Laabe gúdxibe cani rusiidiʼ ndaaniʼ religión stiʼ ca judíu lu primé siglu que sicaríʼ: «Jneza ni uníʼ Dios de ruaa profeta Isaías chiqué ra bizeete pabiáʼ rusiguii tu, na: “Ca binni ri nanaxhi ruaa ca ne naa, peru ladxidóʼ ca nuu zitu de naa [Jiobá]. Pur gana si rusisaca ca naa, purti de laasi ca riale ni rusiidi caʼ. Ne dxandí ni purti zacá pe runi tu. Rusaana tu mandamientu sti Dios para chi nanda tu costumbre sti binni”, casi enda riaʼri jarra ne vasu, ne xcaadxi costumbre casi ca nga» (Marcos 7:6-8).