«Naa ne Sofía * maʼ zinedu jma de 39 iza de bichaganadu dxi gútibe. Gucané ca xhamiguaʼ naa para cadi tan guiníʼ iqueʼ ni bizaacaʼ que. Neca zaqué, guidubi ti iza, guizáʼ biuubaʼ ladxiduáʼ. Nuu dxi nuaaʼ galán ne nuu dxi nuaaʼ triste. Neca maʼ gudiʼdiʼ casi chonna iza de guti xheelaʼ, málasi redandá sentimientu naa ne riuu ti yuubaʼ naroʼbaʼ ladxiduáʼ ne qué randa rucueezaʼ ni» (Kostas).

Pa huayati tuuxa binni ni nabé nadxiiluʼ la? zándaca huayuni sentirluʼ ni biʼniʼ sentir Kostas. Gástiruʼ sti cosa ni nabé rusaana yuubaʼ ladxidóʼ binni que ora gatiʼ tuuxa familia stiʼ, xheelaʼ o ti xhamigu. Ne stale especialista maʼ guniʼcaʼ dxandíʼ ni bizéʼtenu riʼ. Ti artículo ni biree lu revista The American Journal of Psychiatry bizeeteʼ: «Guizáʼ naná yuubaʼ ni rusaana guendaguti ne qué ridiʼdigá ni». Ora cayuubaʼ ladxidóʼ ti binni purtiʼ guti tuuxa ni nadxii, zándaca guiníʼ ique: «¿Pabiáʼ zandaa yuubaʼ riʼ pue? ¿Ñee ziuu dxi chuaaʼ nayecheʼ sti biaje la? ¿Xi zanda quixhedxí ladxiduáʼ?».

Revista ¡Gutaná! riʼ zacabi ca pregunta ca. Lu sti tema ca zeeda caadxi guendanagana ni zándaca cadxaagaluluʼ pa nacubi guti tuuxa binni ni nadxiiluʼ. Ne lu xcaadxi tema ca zeeda caadxi cosa ni zanda gacané lii para guni huantarluʼ yuubaʼ ni rusaana guendaguti.

Guca revista riʼ para gacaneni ne cuʼni gana guiráʼ ca ni cayuubaʼ ladxidóʼ purtiʼ guti tuuxa binni ni nadxii.