¿Xiñee maʼ qué gapa binni respetu guendanabani?
XIÑEE NABÉ RISACA GUNI RESPETARNU GUENDANABANI
Ora rúninu xiixa ni zándaca guni huará o guniná laanu, rusihuínninu qué runi respetarnu guendanabani stinu ninca stiʼ xcaadxi.
-
Ora riguʼbaʼ binni gueza cadi rapa si cáncer, sínuque laaca raca nagana para cuerpu stiʼ gudxiilú ni. Biaʼ 90% de ca binni ni guti de cáncer de pulmón, gúticaʼ pur gudúʼbacaʼ gueza o purtiʼ guyuucaʼ gaxha de tuuxa ni riguʼbaʼ ni.
-
Guiráʼ iza nabé raca traumar binni purtiʼ nabé rindeecabe tiru ndaaniʼ ca scuela ca. Ti informe ni biʼniʼ Universidad de Stanford (Estados Unidos) guníʼ: «Ca ni qué ñacaná [ora biree tiru ndaaniʼ ca scuela que], gucaná guendabiaaniʼ sticaʼ ne nga zanda guchiiñaʼ laacaʼ pur stale iza».
-
Ora rusá tuuxa carru neca naxudxi o maʼ guduʼbaʼ droga la? nácani ti peligru para ca ni zeʼ lu carretera ne zaqueca para ca binni ni zidiʼdiʼ gaxha. Stale tu racaná pur donda stiʼ ca binni ni rihuinni dxíchica qué runi respetarcaʼ guendanabani.
XI ZANDA GÚNILUʼ
Gupa lii ti cadi gaca huaraluʼ. Zándaruʼ gusaanaluʼ ca cosa ni cayuniná cuerpu stiluʼ, casi cúbaluʼ gueza, gueza electrónico, xhúdxiluʼ o cúbaluʼ droga. Zanda guni huará ca viciu riʼ lii, ne rusihuínnini huaxiéʼ runi respetarluʼ xquendanabani xcaadxi, dede né xquendanabani familia stiluʼ.
Cadi gúniluʼ cosa ni zanda guniná lii. Biiyaʼ qué chuʼ xiixa ra lídxiluʼ ni zanda guniná familia stiluʼ. Gupa cuidadu ora gusaluʼ ne biiyaʼ chuʼ carru stiluʼ galán. Cadi gudiiluʼ lugar gucaa xcaadxi lii gúniluʼ xiixa ra zanda gacanaluʼ o gunítiluʼ xquendanabániluʼ.
Guca nachaʼhuiʼ né xcaadxi. Rihuinni runi respetarnu guendanabani pur modo runi tratarnu guiráʼ binni, gastiʼ naca xi raza, xi guidxi, pa pobre o pa ricu laa, pa guzá scuela o pa coʼ. Nabé nuu guendaquéiquiiñeʼ ne guerra lu guidxilayú riʼ purtiʼ nabé runi binni menu xcaadxi ne nanaláʼdxisaacaʼ.
NI RUNI CA TESTIGU STIʼ JEHOVÁ
Ruyúbidu chuʼ binni nazaaca ne guibánicaʼ galán. Pur ca ni rusíʼdidu binni de lu Biblia la? stale de laacaʼ maʼ bichaacaʼ ne maʼ bisaanacaʼ ca viciu ni zanda guni huará laacaʼ.
Ora rucuidu xiixa yoo para guni adorardu Dios, rinándadu ca norma de seguridad ni racané laadu para cadi gacanadu. Ca ni racané para cuí yoo ra raca ca reunión stidu ne xcaadxi yoo ni riquíʼñedu, ricaacaʼ capacitación para cadi gacanacaʼ o guizaacacaʼ xiixa accidente. Gatigá ruuyacabe pa galán nuu ca yoo riʼ casi ná ley sti gobiernu.
Racanedu binni. Cadi xadxí, lu ti iza si, gucané organización stidu ca binni ni gucaná ra bizaaca 200 desastre naroʼbaʼ lu guidubi guidxilayú. Biquíʼñedu biaʼ 12 millón de dólar ni guca donar para gucanedu ca binni ni gucaná riʼ.
Dxi bininá ti virus láʼ Ébola África Occidental (2014) ne República Democrática del Congo (2018), laadu, ca testigu stiʼ Jehová, bisíʼdidu stale binni xi gúnicaʼ para cadi guicá guendahuará riʼ laacaʼ. Biséʼndadu tu chigudii ti capacitación nezalú stale binni, biree lani «Rilá binni ora ruzuubaʼ diidxaʼ». Guluʼdu ra quiʼbiʼ náʼ binni para guiuucaʼ ca lugar ra runi adorardu Dios. Ne bisíʼdidu laacaʼ pabiáʼ risaca nga quíʼbicaʼ nacaʼ ne gúnicaʼ xcaadxi cosa para cadi guicá guendahuará que laacaʼ.
Ndaaniʼ guidxi Sierra Leona, bixhidxi ti estación de radiu ti anunciu ra cayuni felicitar ca testigu stiʼ Jehová pur gucanecaʼ ca binni de religión sticaʼ ne xcaadxi binni para cadi guireeche virus stiʼ Ébola.
Ndaaniʼ guidxi Liberia, tiempu guyuu virus stiʼ Ébola lu iza 2014, fuera de ti Yoo stiʼ Reinu guyuu ti lugar ra zanda quíʼbicabe nácabe.
a Rusihuinni mandatu ni guyuu Oriente Medio de dxiqué nabé risaca guizaalaʼdxiʼ tuuxa chuʼ familia stiʼ nazaaca ne zaqueca xcaadxi binni.
