1, 2. Ximodo bisihuinni Pablu bidii xquíxepeʼ Dios pur guendanachaʼhuiʼ stiʼ, neca qué ñuni merecer ni.

NABÉ guzananda apóstol Pablu ca xpinni Cristu. Ngue runi nanna dxíchibe cadi caquiiñeʼ diʼ guiá Jiobá laabe. Ne de guidubi ladxidoʼbe guniʼbe «cadi pur gana si» guca Dios nachaʼhuiʼ né laabe (biindaʼ 1 Corintios 15:9, 10).

² Dxi mayaca gatiʼ Pablu, bicaa ca diidxaʼ riʼ ra nuu Timoteu: «Cayacané Jesucristu Señor stinu naa cayune dxiiña riʼ. Ne rudiee diuxquixe laa saca bisisaca naa biaʼ para gune xhiiñaʼ» (1 Timoteo 1:12-14). Xii dxiiñaʼ riʼ yaʼ. Sicaríʼ gudxi Pablu ca ancianu nuu ndaaniʼ congregación de Éfeso: «Peru nin tobi de ca nga qué rizaaladxeʼ, neca pe guuti cabe naa. Xi si rica ique la? unduuxe dxiiña ni bidii Señor Jesús naa guneʼ. Ne ndi nga dxiiña bidii be naa: güe nia binni ma zanda ilá ca pur enda nachaʼhui sti Dios» (Hechos 20:24).

3. Xi dxiiñaʼ risaca gucuaa Pablu. (Biiyaʼ dibuju ni zeeda ra ruzulú tema riʼ).

 ³ Gunáʼ nga ca diidxaʼ nacubi ne galán biʼniʼ predicar Pablu. Ne xiñee beeda gaca ni ti prueba de guendanachaʼhuiʼ stiʼ Dios, neca qué runi merecernu ni. Guidúʼyanu xi gudxi Pablu ca xpinni Cristu de Éfeso: «Ma nanna tu modo guca Dios nachaʼhui ne naa, gudixhe naa güe nia laatu stiidxa Cristu» (Efesios 3:1, 2). Bidii Jesús ti dxiiñaʼ Pablu: chiné stiidxaʼ Reinu ra nuu ca binni ni cadi naca judíu. Dxiiñaʼ riʼ nga gábibe ca binni que maʼ zanda chuʼcaʼ lu gobiernu stiʼ Mesías (biindaʼ Efesios 3:5-8). Biʼniʼ predicar Pablu né stale gana ne bisaana ti ejemplu galán para ca xpinni Cristu ni nabani tiempu riʼ. Zacá bisihuinni Pablu «cadi pur gana si» guca Jiobá nachaʼhuiʼ né laa, neca qué runi merecer ni.

4, 5. Xiñee rininu laca cayuni predicarnu ca diidxaʼ nacubi ne galán stiʼ Reinu nga ora rusíʼdinu binni «ma zanda ilá ca pur enda nachaʼhui sti Dios».

⁴ Lu ca últimu dxi riʼ, maʼ bidii Jiobá laanu dxiiñaʼ de guni predicarnu stiidxaʼ Reinu. Ne naquiiñeʼ gúninu ni lu «idubi naca guidxilayú para ganna irá xixé guidxi» (Mateo 24:14). Ca diidxaʼ nacubi ne galán stiʼ Reinu riʼ la? laca laani nga ni bizeeteʼ Pablu ora guníʼ chigusiidiʼ binni «ma zanda ilá ca pur enda nachaʼhui sti Dios». Xiñee zanda guininu ndiʼ yaʼ. Purtiʼ zanda guicaanu guiráʼ ndaayaʼ ni guedané Reinu stiʼ Dios pur guendanachaʼhuiʼ stiʼ Jiobá (Efesios 1:3). Ra bicheeche Pablu diidxaʼ né stale gana que la? bisihuinni cudii xquixe Dios pur guendanachaʼhuiʼ stiʼ, neca qué runi merecer ni. Ñee zinándanu ejemplu stibe la? (biindaʼ Romanos 1:14-16).

⁵ Lu tema gudiʼdiʼ ca, bidúʼyanu zanda cueendunu ni galán pur guendanachaʼhuiʼ stiʼ Dios, neca binni imperfectu laanu. Ne laaca bizíʼdinu redané guendanachaʼhuiʼ stiʼ Dios riʼ stale ndaayaʼ. Nga runi, naquiiñeʼ guinínenu xcaadxi binni de guendarannaxhii stiʼ Dios ne xi naquiiñeʼ gúnicabe para gannaxhii Jiobá laacabe. Ximodo zanda gacanenu xcaadxi binni ti gudiicaʼ xquíxepeʼ Jiobá pur guendanachaʼhuiʼ stiʼ, neca qué runi merecercaʼ ni yaʼ.

6, 7. Xiñee rininu cusíʼdinu binni de guendanachaʼhuiʼ stiʼ Dios nga ora maʼ cusiénenu de sacrificiu biʼniʼ Jesús.

⁶ Tiempu riʼ, stale binni qué ruchiiñaʼ xquendabiaaniʼ laa ora ruchee. Nga runi, qué riénecabe pa caquiiñecabe sacrificiu stiʼ Jesús. Peru stale binni laaca maʼ rudii cuenta cadi nuu nayecheʼ pur modo nabani. Ora rusiene ca testigu stiʼ Jiobá laacabe xii nga pecadu la? oracaruʼ nga riénecabe xi laani, ximodo runiná ni laacabe ne xi naquiiñeʼ gúnicabe para gusaana de gácacabe esclavu stiʼ pecadu. Pa nayá ladxidóʼcabe la? riéchecabe ora riziidicabe biseendaʼ Dios Xiiñiʼ lu Guidxilayú riʼ para cuee laanu de lu náʼ pecadu ne guendaguti. Ne laaca riziidicabe biʼniʼ Jiobá ni purtiʼ nadxii laanu ne pur nachaʼhuiʼ né laanu, neca qué runi merecernu ni (1 Juan 4:9, 10).

⁷ Guidúʼyanu xi guníʼ Pablu de Xiiñiʼ Jiobá ni nadxii: «Nabé nadxii be laanu, nga runi guti Xiiñi be para bilá laanu, ne bisiá laanu de irá ni huachéʼ nu». Pablu laaca guníʼ guca ni pur guendanachaʼhuiʼ stiʼ Dios, neca qué runi merecernu ni (Efesios 1:7). Bisihuinni Dios nadxii laanu ora bidii Xiiñiʼ, Cristu, gatiʼ pur laanu,  zacá bisihuinni Dios pabiáʼ nachaʼhuiʼ né laanu, neca qué runi merecernu ni. Ratadxí ladxidoʼno ora gánnanu zanda guni perdonar Dios ca pecadu stinu ne zanda chuʼ conciencia stinu nayá, pa gápanu fe lu sacrificiu stiʼ Jesús (Hebreos 9:14). ¡Guizáʼ galán ca ndaayaʼ riʼ, njaʼ! Cadi dxandíʼ racaláʼdxinu gusíʼdinu ni guiráʼ binni la?

8. Xiñee caquiiñeʼ gaca xhamigu binni Dios.

⁸ Ca binni ni qué gapa fe lu sacrificiu stiʼ Jesús la? ruuyaʼ Dios laacaʼ casi enemigu stiʼ. Nga runi, napa xidé gábinu laacabe zanda gaca xhamígucabe Dios. Apóstol Juan bicaa: «Tu runi cre Xiiñi be la? napa enda nabani ni qué zaluxe, peru tu qué uzuuba stiidxa Xiiñi be, qué zapa di enda nabani, sínuque xiana stibe nuu luguiáʼ» (Juan 3:36). Riéchenu stale gánnanu zanda chuʼnu tobi si né Dios pur sacrificiu stiʼ Cristu. Pablu bisiene ni sicaríʼ: «Chiqué qué ñuu né tu Dios tobi si, sínuque bicaa lú tu laa ra biʼni tu ni cadi jneza, peru yanna ma biʼni pur chuʼ né tu laa tobi si, ra guti Cristu» pur laanu (Colosenses 1:21, 22).

9, 10. a) Xi dxiiñaʼ bidii Jesús ca biʼchiʼ ne ca bizaʼnaʼ ni bibí né espíritu santu. b) Ximodo racané ca «xcaadxi dendxu» cani bibí né espíritu santu.

⁹ Ca xpinni Cristu ni bibí né espíritu santu ni nuu lu Guidxilayú riʼ, maʼ bidii Jesús laacaʼ ti dxiiñaʼ: gusiidicaʼ binni ti «ganda chuʼ né ca laabe tobi si». Pablu gudxi laacabe: «De Dios zeeda irá nga. Laa bichiña laanu ra nuu para chuʼ né nu laa tobi si pur ni biʼni Cristu, ne laca laabe ulí be laadu güi né du binni stiidxa be para ganda chuʼ né ca laabe tobi si. Ndi nga laani: pur ni biʼni Cristu, biyubi be chuʼ né be binni tobi si, ne ma qué zaguu be cuenta ni huachee né ca laabe. Nga na stiidxa be ni bisaana né be laadu güi né du binni. Biseenda Cristu laadu gueda tidxi du laatu uyubi tu chuʼ né tu Dios tobi si, casi ñaca Dios canaba laatu guni tu ni» (2 Corintios 5:18-20).

¹⁰ Ti ndaayaʼ naroʼbaʼ nga napa «xcaadxi dendxu» ni cayané ca xpinni Cristu ni bibí riʼ lu dxiiñaʼ ni cayaca riʼ (Juan 10:16). Ca «xcaadxi dendxu» riʼ racanecaʼ cani bibí riʼ purtiʼ riecaʼ casi mensajeru ni biseendaʼ Cristu. Laacabe nga cani jma runi predicar ne rusiidicabe binni de Biblia. Ne laaca racanécabe binni gaca xhamigu Dios. Ndiʼ nga tobi de ca dxiiñaʼ ni jma risaca ni rúninu ora rusíʼdinu maʼ zanda «ilá ca pur enda nachaʼhui sti Dios», neca qué runi merecernu ni.

11, 12. Xiñee ti noticia galán para binni ganna zanda guni orar Jiobá.

¹¹ Stale binni runi orar purtiʼ zacá ratadxí ladxidoʼcaʼ. Peru qué runi crécabe pa rucaadiaga Dios laacabe. Caquiiñeʼ gánnacabe rucaadiaga Dios ca oración stícabe. Sicaríʼ guníʼ David de Jiobá lu ti canción: «Lii, ni rucaadiaga oración, ra nuuluʼ zadxiña guiráʼ clase binni. Ca guendaruchee stinneʼ jma nadipaʼ cani que naa. Ne zuni perdonarluʼ guiráʼ donda stinneʼ» (Salmo 65:2, 3).

¹² Sicaríʼ gudxi Jesús ca apóstol stiʼ: «Pa guinábatu Bixhozeʼ xiixa, laabe zudiibe ni laatu ora guinábatu ni lu laʼyaʼ» (Juan 16:23). Né ca diidxaʼ riʼ, guníʼ Jesús zanda guinábanu intiica cosa Jiobá, peru guinábanu ni riuuláʼdxibe. Ora guníʼ Juan ximodo nga Jiobá la? bicaa sicaríʼ: «Nanna dxichi nu pa inaba nu ni riulaʼdxi Dios gaca la? zucaa diaga laanu» (1 Juan 5:14).  Riéchenu ora rusíʼdinu binni cadi para si gatadxí ladxidóʼ nga ca oración ni runi. Racané ca oración riʼ laanu para «idxiña nu ra nuu Dios stinu ni nadxii laanu sin idxibi nu» (Hebreos 4:16). Naquiiñeʼ gacanenu binni ganna ximodo guni orar, tu naquiiñeʼ guni orar ne xi zanda guinábacabe lu oración stícabe. Zacá zanda gacanenu laacabe gaca xhamígucabe Jiobá ne zánnacabe xi gúnicabe para gatadxí ladxidóʼcabe ora maʼ cadíʼdicabe lu xiixa yuubaʼ (Salmo 4:1; 145:18).

13, 14. a) Xi ndaayaʼ sicarú zacaa ca ungidu. b) Xi chiguni ca ungidu pur binni guidxilayú.

¹³ Lu guidxilayú cubi ca, jmaruʼ si zusihuinni Jiobá guendanachaʼhuiʼ. Ximodo chigúnibe ni yaʼ. Ca 144,000 ni chiguni mandarné Jesús guibáʼ zacaacaʼ ti ndaayaʼ naroʼbaʼ. Xi ndaayaʼ riʼ yaʼ. Pablu bisiene ni sicaríʼ: «Nabé bilaselaʼdxi Dios laanu purti nadxii laanu. Nga runi ra bisibani Cristu, casi ñaca ne laanu bisibani, purti chiqué gupa laanu casi gueʼtu pur irá ni bichéʼ nu. Peru ma bilá nu purti nachaʼhui be ne laanu. Ne laca ra bisibani be Cristu Jesús la? casi ñaca bisibani be ne laanu para cui né nu laa ibáʼ. Ne biʼni be ni zacá para usihuinni be stobi dxi pabiáʼ nadxii be laanu ne pabiáʼ nachaʼhui be ne laanu ra ma naca né nu Cristu Jesús tobi si» (Efesios 2:4-7).

¹⁴ Nagana para guxuíʼlunu pabiáʼ sicarú ca cosa galán ni napa Jiobá para ca ungidu ora maʼ guni mandarnecaʼ Cristu guibáʼ (Lucas 22:28-30; Filipenses 3:20, 21; 1 Juan 3:2). Zuluíʼ Jiobá laacabe sti modo risaca guendanachaʼhuiʼ stiʼ, neca qué runi merecércabe ni. Zeeda gácacabe «Jerusalén cubi» ne xnovia Cristu (Apocalipsis 3:12; 17:14; 21:2, 9, 10). Ne zuninécabe Cristu dxiiñaʼ «para usianda[cabe] binni». Xii ndiʼ cusiene ca diidxaʼ riʼ yaʼ. Cusiene cani laanu zacané ca ungidu binni para guiree de lu náʼ pecadu ne guendaguti, ne zacanécabe laacaʼ gácacaʼ perfectu (biindaʼ Apocalipsis 22:1, 2, 17).

15, 16. Lu guidxilayú cubi ca, ximodo zusihuinni Jiobá guendanachaʼhuiʼ stiʼ luguiáʼ cani zeeda gaca casi «xcaadxi dendxu».

¹⁵ Efesios 2:7 na zusihuinni Dios guendanachaʼhuiʼ stiʼ, neca qué runi merecernu ni, lu ca dxi ni zeeda ca. Tiempu ca, guiráʼ tu guibani lu Guidxilayú, zudiicaʼ cuenta de ti cosa: guendanachaʼhuiʼ stiʼ Dios nga ni jma risaca ne zusiecheʼ ni laacaʼ (Lucas 18:29, 30). Tobi de ca modo gusihuinni Jiobá guendanachaʼhuiʼ stiʼ nga ora gusibani ca gueʼtuʼ ca (Job 14: 13-15; Juan 5:28, 29). Tu guiráʼ ndiʼ zabani sti biaje yaʼ. Caadxi de laacabe nga cani bizuubaʼ stiidxaʼ Dios ni bibani ante gatiʼ Cristu. Laaca zabani ca binni ni zeeda gaca casi «xcaadxi dendxuʼ» ni gatiʼ lu ca últimu dxi riʼ. Guirácabe zabánicabe sti biaje ne zunirúcabe ni na Jiobá.

¹⁶ Peru laaca zusibani Jiobá millón de binni ni gutiʼ ni qué ñunibiáʼ laa. Juan bicaa: «Biiya zuhuaa cani ma guti nezalú Dios, cani risaca ne cani qué risaca. Ne bixele caadxi libru, ne laca bixele libru de enda nabani. Ne guridxi be cuenta cani ma guti, casi cá lu libru que ni biʼni caʼ. Biree ca gueʼtu ni nuu ndaani nisadóʼ ne biree irá gueʼtu ni nuu ra riaana cani cabeza cuidxi Dios cuenta laa. Ne bidxiiba Dios donda ique irá cabe, cada tobi ne ni biʼniʼ» (Apocalipsis 20:12, 13). Ca binni guibani sti biaje riʼ la? zanda gunibiaʼcaʼ Jiobá ne gúʼyacaʼ laabe casi xaíque sticaʼ. Zaziidicabe guibánicabe modo na ca principiu stiʼ Biblia ne zúnicabe ni na  ca instrucción cubi ni guicaanu lu «caadxi libru». Ndiʼ nga sti modo ra gusihuinni Jiobá guendanachaʼhuiʼ stiʼ, neca qué runi merecernu ni.

17. Xi naquiiñeʼ guietenaláʼdxinu ora maʼ cayuni predicarnu.

¹⁷ Yanna nga jma caquiiñeʼ guni predicarnu ca diidxaʼ nacubi ne galán stiʼ Reinu, purtiʼ mayaca gueeda fin (Marcos 13:10). Cadi guiaandaʼ ndiʼ laanu: ora runi predicarnu la? rúninu ni para gusisácanu Jiobá. Ximodo rusisácanu laabe yaʼ. Ora rusíʼdinu binni zanda guicaanu stale cosa sicarú ndaaniʼ Paraísu pur guendanachaʼhuiʼ stiʼ Jiobá.

18, 19. Ximodo zanda gusisácanu guendanachaʼhuiʼ stiʼ Dios, neca qué runi merecernu ni.

¹⁸ Ora runi predicarnu la? rusiénenu binni xi chiguni Cristu ora maʼ guni mandar lu Guidxilayú. Tiempu ca, zacaa binni guiráʼ xixé ndaayaʼ ni rudii sacrificiu stiʼ Cristu ne chaahuiʼ chaahuiʼ zácacabe binni perfectu. Biblia na zalá guiráʼ ni bizáʼ Dios de «lu ná enda nayuudxuʼ, ti ibigueta aca ni galán, ne ma iquiiñe pe ni para laabe» (Romanos 8:21). Zaca guiráʼ ndiʼ pur guendanachaʼhuiʼ stiʼ Dios, neca qué runi merecernu ni.

¹⁹ Ti ndaayaʼ naroʼbaʼ nga gusíʼdinu binni ca cosa sicarú ni maʼ bidii stiidxaʼ Dios guni, casi rieeteʼ ni lu Apocalipsis 21:4, 5. Raríʼ cayeeteʼ xi chiguni Dios pur binni guidxilayú maʼ cadi candaa: «Zuchaa be nisa riete lú caʼ, ne ma qué ziuu ru enda guti nin enda ruuna nin enda racaná ladxidóʼ nin yuubaʼ, purti ma udiʼdi irá ni uyuu chiqué». Sicaríʼ caníʼ Jiobá dede lu trono stiʼ: «Biiyaʼ, cayune irá xixé cosa nacubi». Ne laaca na: «Dxandí irá diidxa riʼ, zanda guni cre lu ni». Guni predicarnu ca noticia sicarú riʼ né stale gana, zacá zusisácanu guendanachaʼhuiʼ stiʼ Dios, neca qué runi merecernu ni.