LECCIÓN 59
Zanda guni huantarluʼ neca sanándacabe lii
Guiráʼ ca xpinni Cristu zedandá ora zucaalú o zazananda binni laacaʼ. ¿Ñee naquiiñeʼ guidxíbinu la?
1. ¿Xiñee qué ridxagayaanu sanándacabe laanu?
Biblia ná: «Guiráʼ ca ni racalaʼdxiʼ chuʼ tobi si né Cristu Jesús ne ca ni racalaʼdxiʼ guni adorar Dios, laaca zazanándacabe laacaʼ» (2 Timoteo 3:12). Guzanándacabe Jesús purtiʼ qué ñaca parte de guidxilayú stiʼ Binidxabaʼ riʼ. Cumu laanu laaca cadi nácanu parte de guidxilayú riʼ la? qué ridxagayaanu xiñee rizananda ca gobiernu ne ca religión ni qué rusiidiʼ ni dxandíʼ laanu (Juan 15:18, 19).
2. ¿Ximodo zanda chuʼnu listu para guni huantarnu ora sanándacabe laanu?
Dede ca yanna nga naquiiñeʼ gusiróʼbanu confianza ni nápanu Jehová. ¿Ximodo zanda gúninu ni yaʼ? Ra cueenu tiempu guiráʼ dxi para guni orarnu ne guidúʼndanu Stiidxabe. Ne laaca cadi naquiiñeʼ guiáʼdxanu reunión. Ndiʼ zacané laanu guni huantarnu sin guidxíbinu ora gucaalúcabe laanu, neca familia peʼ stinu guni ni. Apóstol Pablo, ti hombre ni nabé guzanándacabe laa, bicaa ca diidxaʼ riʼ: «Jehová nga racané naa. Qué zadxibeʼ diaʼ» (Hebreos 13:6).
Sti cosa ni zacané laanu gácanu nadxibalú nga cadi gusaana de guni predicarnu. Purtiʼ zacané ni laanu gápanu jma confianza Jehová ne cadi guidxíbinu binni (Proverbios 29:25). Pa dede yanna guiziidiluʼ gácaluʼ nadxibalú, qué zusaana de guni predicarluʼ neca gacalaʼdxiʼ gobiernu gucueeza dxiiñaʼ ni rúninu (1 Tesalonicenses 2:2).
3. Pa guni huantarnu ora sanándacabe laanu, ¿ximodo zacané ni laanu?
Dxandíʼ, qué riuuláʼdxinu sanándacabe laanu. Peru ora guni huantarnu, racaneni laanu gaca fe stinu jma nadipaʼ. Ne runi sentirnu jma gaxha de Jehová purtiʼ ridúʼyanu modo rudiibe stipa laanu ora ruluíʼ maʼ qué zanda guni huantarnu (biindaʼ Santiago 1:2-4). Racaná ladxidóʼ Jehová ora guʼyaʼ cayuninácabe laanu, peru riéchebe ora gúʼyabe cadi careʼnu gana. Biblia ná: «Pa guni huantartu ora guninácabe laatu pur cayúnitu ni jneza la? nga nga ni riuulaʼdxiʼ Dios» (1 Pedro 2:20). Guiráʼ ca ni guni huantar ne cadi guixeleʼ de Jehová, zudiibe laacaʼ guendanabani ni qué zaluxe ndaaniʼ Guidxilayú riʼ ne maʼ guirutiʼ zucaalú laacaʼ purtiʼ cayúnicaʼ ni ná Jehová (Mateo 24:13).
GUIZÍʼDIRUNU JMA
Guidúʼyanu xi zacané laanu cadi guixélenu de Jehová neca sanándacabe laanu. Laaca zadúʼyanu xi ndaayaʼ zacaanu pa guni huantarnu.
4. Zanda guni huantarluʼ neca gucaalú familia stiluʼ lii
Nanna Jesús nuu hermanu zucaalú familia stiʼ laa purtiʼ cayuni ni ná Jehová. Laguundaʼ Mateo 10:34-36 ne laiquiiñeʼ pregunta riʼ para güitu diidxaʼ:
-
Ora quixhe ique tuuxa guni ni ná Jehová, ¿xi zándaca gabi familia stiʼ laa?
Para gunibiaʼtu chupa binni ni bizaaca ndiʼ, laguuyaʼ VIDEU riʼ. Despué laiquiiñeʼ pregunta riʼ para güitu diidxaʼ:
-
¿Xi ñúniluʼ pa ñacalaʼdxiʼ ti familia stiluʼ o ti xhamíguluʼ nusaanaluʼ de ñúniluʼ ni ná Jehová?
Laguundaʼ Salmo 27:10 ne Marcos 10:29, 30. Despué de gúʼndatu cada textu, laiquiiñeʼ pregunta riʼ para güitu diidxaʼ:
-
¿Ximodo zacané promesa riʼ lii guni huantarluʼ ora gucaalú familia stiluʼ o ca xhamíguluʼ lii?
5. Cadi gusaana de guni adorarluʼ Jehová neca sanándacabe lii
Caquiiñeʼ gácanu nadxibalú para cadi gusaana de gúninu ni ná Jehová neca gacaláʼdxicabe gucueezacabe laanu. Laguuyaʼ VIDEU riʼ ne laiquiiñeʼ pregunta riʼ para güitu diidxaʼ:
-
¿Xi bíʼyaluʼ lu videu riʼ ni zanda gacané lii gácaluʼ nadxibalú?
Laguundaʼ Hechos 5:27-29 ne Hebreos 10:24, 25. Despué de gúʼndatu cada textu laiquiiñeʼ pregunta riʼ para güitu diidxaʼ:
-
¿Xiñee nabé risaca cadi gusaana de gúninu ni ná Jehová neca gucueeza gobiernu laanu de guni predicarnu ne chuunu reunión?
6. Zacané Jehová lii guni huantarluʼ
Stale testigu stiʼ Jehová, cásica nahuiiniʼ zaqueca ni maʼ huaniisi, qué huasaanacaʼ Jehová neca canazananda binni laacaʼ. Para gánnatu xi huayacané laacabe, laguuyaʼ VIDEU riʼ. Despué laiquiiñeʼ pregunta riʼ para güitu diidxaʼ:
-
¿Xi gucané ca Testigu riʼ guni huantarcaʼ neca canazananda binni laacaʼ?
Laguundaʼ Romanos 8:35 ne 37-39, ne Filipenses 4:13. Despué de gúʼndatu cada textu, laiquiiñeʼ pregunta riʼ para güitu diidxaʼ:
-
¿Ximodo racané textu riʼ lii chuʼluʼ seguru zanda guni huantarluʼ intiica prueba?
Laguundaʼ Mateo 5:10-12 ne laiquiiñeʼ pregunta riʼ para güitu diidxaʼ:
-
¿Xiñee zanda chuʼluʼ nayecheʼ neca sanándacabe lii?
Millón de xpinni Jehová ni huazanándacabe laacaʼ huayuni huantarcaʼ. ¡Lii laaca zanda guni huantarluʼ!
NUU TU NÁ: «Qué zanda guneʼ huantar pa sanándacabe naa».
-
¿Xi textu zeeda lu Biblia zanda gacané ca ni riníʼ ique sicaríʼ para gácacaʼ nadxibalú?
XI BIZÍʼDINU
Nabé rusisaca Jehová stipa ni rúninu para cadi gusaana de gúninu ni ná, neca sanándacabe laanu. ¡Zanda guni huantarnu purtiʼ racanebe laanu!
Xi biziidiluʼ
-
¿Xiñee qué ridxagayaanu ora sanándacabe ca xpinni Cristu?
-
¿Xi zanda gúniluʼ dede ca yanna para chuʼluʼ listu ora sanándacabe lii?
-
¿Xi racané lii chuʼluʼ seguru qué zusaana de gúniluʼ ni ná Jehová neca guidxaagaluluʼ intiica guendanagana?
BIIYAʼ XIRUʼ ZANDA GUIZIIDILUʼ
Biiyaʼ ximodo gucané Jehová ti hermanuhuiiniʼ dxi biseguyoocabe laa.
Biiyaʼ xi gucané ti guendaxheelaʼ cadi gusaana de gúnicaʼ ni ná Jehová neca xadxí guzanándacabe laacaʼ.
Biziidiʼ gácaluʼ nadxibalú para ora sanándacabe lii.
«Chuʼnu listu para ora sanándacabe laanu» (Torre stiʼ ni rapa, julio de 2019)
¿Xi naquiiñeʼ gánnanu ora gucaalú familia stinu laanu? ¿Xi zanda gúninu para chuʼnu galán né familia stinu ne cadi gusaana de gúninu ni ná Jehová?
«Qué redané ni dxandíʼ guendariuudxi sínuque “ti espada”» (Torre stiʼ ni rapa, octubre de 2017)
Laaca zándaca ziuuláʼdxiluʼ ca ndiʼ
CANI NABÉ RINABADIIDXAʼ BINNI
¿Ximodo runi estudiarné ca testigu stiʼ Jehová binni Biblia?
Zanda gacané ca testigu sti’ Jehová lii guiénelu’ Biblia jma nagueenda ne zanda iquiiñelu’ Biblia ni jma riuulá’dxilu’. Laaca zanda guni invitarlu’ familia stilu’ o tuuxa xhamígulu’.
