LECCIÓN 38
Gusisácanu guendanabani
Nabé sicarú nga guendanabani. Neca cadídinu lu xiixa guendanagana nuu stale cosa sicarú ni zanda gusiecheʼ laanu. ¿Ximodo zanda gusihuínninu rusisácanu regalu ni bidii Jehová laanu yaʼ? ¿Gunáʼ nga razón ni jma risaca para gusisácanu ni yaʼ?
1. ¿Xiñee naquiiñeʼ gusisácanu guendanabani?
Ti regalu ni bidii bixhózenu Jehová laanu nga guendanabani. Nga runi, caquiiñeʼ gusisácanu ni. Ra nuube nga «cadá guendanabani» purtiʼ laabe nga bizaʼbe guiráʼ ni nabani (Salmo 36:9). «Pur laabe nápanu guendanabani ne ricaanu bi ne pur laabe nápanu guiráʼ cosa» (Hechos 17:25, 28). Zacá ni, rudii Jehová ni caquiiñenu para ganda guibáninu. Ne laaca rudiibe laanu stale cosa galán para chuʼnu nayecheʼ (biindaʼ Hechos 14:17).
2. ¿Ximodo zanda gusisácanu guendanabani ni bidii Jehová laanu?
Dede dxi nacaxiiñiʼ jñaaluʼ lii mápeca biiyaʼ Jehová lii. Sicaríʼ guníʼ David, ti xpínnibe, lu ti oración: «Biiyaluʼ naa dxi nácaruaʼ ti embrión» (Salmo 139:16). Guizáʼ risaca xquendanabániluʼ para Jehová (biindaʼ Mateo 10:29-31). Riuubaʼ ladxidoʼbe ora guuti ti binni stobi o guuti laca laa (Éxodo 20:13). a Laaca riuube triste ora riguʼnu xquendanabáninu ra naxoo ne ora qué rúninu xiixa para gápanu xquendanabani binni. Pa gápanu guendanabani stinu ne stiʼ binni la? zusihuínninu rusisácanu regalu ni maʼ bidii Jehová laanu.
GUIZÍʼDIRUNU JMA
Guidúʼyanu xcaadxi modo zanda gusihuínninu rusisácanu guendanabani, regalu ni maʼ bidii Dios laanu.
3. Biʼniʼ stipa chuʼluʼ nazaaca
Guiráʼ xpinni Cristu ni maʼ bidii xpida Jehová para guni ni nabe, rúnicaʼ stipa guibánicaʼ modo racaláʼdxibe. Casi ñaca nudiicabe cuerpu stícabe casi ti sacrificiu, nga runi caquiiñeʼ gápacabe ni. Laguundaʼ Romanos 12:1, 2 ne laiquiiñeʼ ca pregunta riʼ para güitu diidxaʼ:
-
¿Xiñee naquiiñeʼ gápaluʼ lii para chuʼluʼ nazaaca?
-
¿Ximodo zanda gúniluʼ ni yaʼ?
4. Guyuu cuidadu lii para cadi gacanaluʼ o guninaluʼ xcaadxi
Biblia rusiidiʼ laanu chuʼnu cuidadu ca cosa ni rúninu para cadi gacananu o guninanu binni. Laguuyaʼ VIDEU riʼ para gánnatu xi guiráʼ zanda gúninu para gápanu guendanabani stinu ne stiʼ binni.
Laguundaʼ Proverbios 22:3 ne laguiníʼ ximodo zanda gápatu laatu...
-
... ra yoo.
-
... ra dxiiñaʼ.
-
... ora quítetu xiixa deporte.
-
... ora zigusatu o zetu de pasajeru.
5. Bisisaca guendanabani stiʼ ti baʼduhuiiniʼ neca caʼruʼ gale
Lu ti poema ni bicaa David, bisihuinni pabiáʼ rusisaca Jehová guendanabani stiʼ ti baʼduhuiiniʼ neca nuuruʼ ndaaniʼ jñaa. Laguundaʼ Salmo 139:13-17 ne laiquiiñeʼ pregunta riʼ para güitu diidxaʼ:
-
Para Jehová, ¿pora ruzulú guendanabani stiʼ binni: ora gale la? o dede ora nuu ndaaniʼ jñaa?
Ca ley ni bidii Jehová guidxi Israel dxiqué, gúpani ca gunaa ni nacaxiiñiʼ ne baʼduhuiiniʼ ni nuu ndaanicaʼ. Laguundaʼ Éxodo 21:22, 23 ne laiquiiñeʼ ca pregunta riʼ para güitu diidxaʼ:
-
¿Ximodo ruuyaʼ Jehová guuticabe ti baʼduhuiiniʼ ni caʼruʼ gale neca gaca ni pur ti accidente?
-
Yanna, ¿ximodo rábiluʼ runi sentir Jehová ora ti binni peʼ guuti ti baʼduhuiiniʼ ni caʼruʼ gale? b
-
¿Ñee rábiluʼ jneza nga modo riníʼ ique Dios la?
Dede ti gunaa ni rusisaca guendanabani zanda guiníʼ ique jma galán pa gutiidiʼ xiiñiʼ. Laguundaʼ Isaías 41:10 ne laiquiiñeʼ ca pregunta riʼ para güitu diidxaʼ:
-
Pa gucaacabe ti gunaa gutiidiʼ xiiñiʼ, ¿tu laa naquiiñeʼ guyubi gacané laa? ¿Xiñee riníʼ íqueluʼ zacá yaʼ?
NUU TU NÁ: «Guiráʼ gunaa nga napa derechu guiníʼ pa zutiidiʼ xiiñiʼ o pa coʼ. Laabe nga nacaxiiñibe».
-
¿Xi rucaa lii guni creluʼ biaʼca rusisaca Jehová ti gunaa ni nacaxiiñiʼ zaqueca rusisácabe baʼduhuiiniʼ ni nuu ndaaniʼ?
XI BIZÍʼDINU
Ti regalu ni bidii Jehová laanu nga guendanabani. Ne Biblia rusiidiʼ laanu gusisácanu guendanabani stinu ne stiʼ binni, gápanu ne gannaxhiinu ni.
Xi biziidiluʼ
-
¿Xiñee nánnanu rusisaca Jehová guendanabani stiʼ binni?
-
¿Ximodo runi sentir Jehová ora guuti tuuxa laca laa o guuti sti binni?
-
¿Xiñee rusisácaluʼ regalu ni bidii Jehová laanu?
BIIYAʼ XIRUʼ ZANDA GUIZIIDILUʼ
¿Ximodo zanda gudiʼnu xquixe peʼ Jehová pur guendanabani ni bidii laanu?
Biiyaʼ pa zanda guni perdonar Dios ti gunaa ni bitiidiʼ xiiñiʼ.
«¿Ñee rusiidiʼ Biblia jneza nga gutiidiʼ binni baʼduʼ la?» (Tema ni zeeda lu jw.org)
Biiyaʼ ximodo zanda gusihuínninu rusisácanu guendanabani ora cuinu xi deporte quítenu.
Biiyaʼ xi conseju rudii Biblia para ca binni ni riníʼ ique guuti laca laa.
«¿Ñee zanda gacané Biblia naa pa maʼ guníʼ iqueʼ guuteʼ laca naa la?» (Tema ni zeeda lu jw.org)
a Rizaalaʼdxiʼ Jehová guiráʼ ca ni maʼ gucadé ladxidóʼ (Salmo 34:18). Riénebe ne racaláʼdxibe gacanebe ca binni ni maʼ biree gana xquendanabani ne nuu guuti laca laa. Biiyaʼ ximodo zanda gacané ca conseju stibe tuuxa ni runi sentir zacá. Biindaʼ tema ni láʼ «¿Ñee zanda gacané Biblia naa pa maʼ guníʼ iqueʼ guuteʼ laca naa la?» ni zeeda lu ndaa «Biiyaʼ xiruʼ zanda guiziidiluʼ».
b Pa nuu tuuxa ni laa peʼ bitiidiʼ xiiñiʼ, ante gunibiáʼ Jehová, cadi naquiiñeʼ guni sentir napa donda purtiʼ nuu Jehová dispuestu guni perdonar laabe. Para gánnaluʼ jma de tema riʼ, biindaʼ tema ni láʼ «¿Ñee rusiidiʼ Biblia jneza nga gutiidiʼ binni baʼduʼ la?» ni zeeda lu ndaa «Biiyaʼ xiruʼ zanda guiziidiluʼ».
Laaca zándaca ziuuláʼdxiluʼ ca ndiʼ
CANI NABÉ RINABADIIDXAʼ BINNI
¿Ximodo runi estudiarné ca testigu stiʼ Jehová binni Biblia?
Zanda gacané ca testigu sti’ Jehová lii guiénelu’ Biblia jma nagueenda ne zanda iquiiñelu’ Biblia ni jma riuulá’dxilu’. Laaca zanda guni invitarlu’ familia stilu’ o tuuxa xhamígulu’.
