LECCIÓN 06
¿Ximodo bizulú guendanabani?
Dios nga «bizáʼ guidxilayú ne guiráʼ ni nuu ndaaniʼ ni» (Hechos 17:24). ¿Ñee runi creluʼ nga la? Stale binni runi cré málasi guyuu guiráʼ cosa ne guirutiʼ tu bizáʼ guiráʼ ni. Yanna, pa dxandíʼ zacá ni, ¿xi para guyáʼ guiráʼ ni yaʼ? Peru pa Jehová nga bizáʼ guiráʼ ni nuu, ¿cadi rábiluʼ nuu xi pur bizaʼbe guiráʼ ni la? a Guidúʼyanu ximodo rusiene Biblia guyuu tu bizáʼ guiráʼ ni nuu ne xiñee zanda guni crenu ni.
1. ¿Ximodo beeda chuu universu?
Biblia ná: «Dede principiu que bizáʼ Dios guibáʼ ne guidxilayú» (Génesis 1:1). Stale científicu runi cré guyuu ra bizulú universu. Peru ¿ximodo bizáʼ Dios universu yaʼ? Biquiiñebe stipa stibe o espíritu santu para guzaʼbe guiráʼ ni nuu lu universu casi galaxia, estrella ne planeta (Génesis 1:2).
2. ¿Xi para bizáʼ Dios Guidxilayú?
Cadi bizáʼ si Jehová Guidxilayú «sínuque bizaʼbe ni para cueza binni luni» (Isaías 45:18). Guizáʼ sicarú modo bizaʼbe Guidxilayú para ganda guibani binni luni sin qué chuʼ dxi gatiʼ (biindaʼ Isaías 40:28; 42:5). Ca científicu nacaʼ nabé especial Guidxilayú ra nabáninu riʼ purtiʼ gástiruʼ sti planeta ra zanda guibani binni.
3. ¿Xiñee maʼ gadxé binni de ca maniʼ?
Bizáʼ si Jehová Guidxilayú bizaʼbe guiráʼ ni nuu luni. Primeru bizaʼbe yagahuiiniʼ ne maniʼ. Ne despué «bizáʼ Dios binni casi laa» (biindaʼ Génesis 1:27). ¿Xiñee maʼ gadxé laanu de ca maniʼ ca yaʼ? Purtiʼ bizáʼ Dios laanu casi laa. Nga runi cásica laabe la? zanda gannaxhiinu ne gúninu ni jneza. Ne pur modo bizaʼbe laanu zanda guizíʼdinu sti idioma, chuuláʼdxinu guiráʼ ca cosa sicarú ni ridúʼyanu ne chuuláʼdxinu gucaʼdiáganu música. Ne laaca zanda guni adorarnu Dios ni bizáʼ laanu, ti cosa ni qué zanda guni ca maniʼ.
GUIZÍʼDIRUNU JMA
Guidúʼyanu xi razón nuu para guni crenu Dios nga bizáʼ guiráʼ ni nuu casi rusiidiʼ Biblia. Laaca zadúʼyanu xi zanda guizíʼdinu de Dios pur ca cosa galán ni rusihuinni binni.
4. Guyuu tu bizáʼ guiráʼ xixé ni nabani
Nabé rusisácacabe binni ni ruzáʼ stale cosa, neca para bizáʼcabe ni gupa xidé biʼniʼ copiárcabe xiixa ni bizáʼ Dios. Peru ¿tu laa rábiluʼ caquiiñeʼ gusisácanu yaʼ? Laguuyaʼ VIDEU riʼ ne laiquiiñeʼ pregunta riʼ para güitu diidxaʼ:
-
¿Gunáʼ nga ca cosa ni bizáʼ Dios ni huayuni copiar binni para guzáʼ xiixa?
Guiráʼ yoo nuu tu bicuí laa. Peru ¿tu bizáʼ guiráʼ xixé cosa ni nuu yaʼ? Laguundaʼ Hebreos 3:4 ne laiquiiñeʼ ca pregunta riʼ para güitu diidxaʼ:
-
¿Xi jma ridxagayaaluʼ lade guiráʼ cosa ni guyáʼ?
-
¿Ñee zanda guni crenu guyuu tu bizáʼ universu ne guiráʼ ni nuu luni la? ¿Xiñee rábiluʼ zacá ni yaʼ?
¿Ñee nannuʼ ndiʼ la?
Zanda guidxélaluʼ jma información ne videu ni cuzeeteʼ de tema riʼ lu ca serie ni zeeda lu jw.org ni láʼ «¿Ñee nuu tu bizáʼ ni la?» ne «Padé zeeda guendanabani: Ni huaníʼ caadxi binni».
«Guiráʼ yoo nuu tu bicuí laa, peru ni bizáʼ guiráʼ xixé cosa nga Dios»
5. Nuu razón para guni crenu dxandíʼ guyuu tu bizáʼ guiráʼ ni nuu casi rusiidiʼ Biblia
Lu capítulo 1 stiʼ Génesis, cusiene Biblia ximodo guyáʼ Guidxilayú ne guiráʼ ni nuu luni. ¿Ñee dxandíʼ zacá bizaaca ni la? o ti cuentu si ni ruzeeteʼ Biblia ni? Laguuyaʼ VIDEU riʼ ne laiquiiñeʼ ca pregunta riʼ para güitu diidxaʼ:
-
¿Ñee rusiidiʼ Biblia guyáʼ Guidxilayú ne guiráʼ ni nuu luni lu xhoopaʼ si dxi de 24 hora la?
-
¿Ñee rábiluʼ biaʼsi nga modo rusiene Biblia guyáʼ guiráʼ ca cosa ca la? ¿Xiñee rábiluʼ zacá ni yaʼ?
Laguundaʼ Génesis 1:1 ne laiquiiñeʼ pregunta riʼ para güitu diidxaʼ:
-
Stale científicu nanna guyuu ra bizulú universu. ¿Ñee biaʼsi ndiʼ né ni rusiidiʼ Biblia la?
Nuu tu riníʼ ique pa bizáʼ Dios xiixa ni nabani ne despué bidiibe lugar gaca evolucionar ni. Laguundaʼ Génesis 1:21, 25, 27 ne laiquiiñeʼ ca pregunta riʼ para güitu diidxaʼ:
-
¿Ñee rusiidiʼ Biblia bizáʼ Dios xiixa ni nabani ne despué bidiibe lugar gaca evolucionar ni dede gácani ti benda, ti clase maniʼ o ti maniʼ ni rugadxi xiiñiʼ dede beeda gácame binni la? ¿O laapebe bizaʼbe guiráʼ «tipu» maniʼ ne binni? b
6. Maʼ gadxé laanu de guiráʼ cosa ni bizáʼ Dios
Maʼ gadxé bizáʼ Dios laanu ne maʼ gadxé modo bizaʼbe ca maniʼ ca. Laguundaʼ Génesis 1:26 ne laiquiiñeʼ pregunta riʼ para güitu diidxaʼ:
-
Zanda gannaxhiinu ne guianu binni purtiʼ bizáʼ Dios laanu casi laa. ¿Ximodo racané ndiʼ lii gánnaluʼ modo naca Jehová?
NUU TU NÁ: «Ti cuentu si nga modo rusiidiʼ Biblia guyáʼ guiráʼ ni nuu».
-
Peru ¿lii xi riníʼ íqueluʼ? ¿Xiñee riníʼ íqueluʼ zacá ni yaʼ?
XI BIZÍʼDINU
Jehová nga bizáʼ universu ne guiráʼ ni nuu luni.
Xi biziidiluʼ
-
¿Ximodo rusiidiʼ Biblia guyáʼ universu?
-
¿Ñee bizáʼ Dios xiixa ni nabani ne despué bidiibe lugar gaca evolucionar ni dede gueeda gácani sti cosa la? ¿O laapebe bizaʼbe guiráʼ tipu maniʼ ne binni?
-
¿Xiñee maʼ gadxé modo bizáʼ Dios laanu?
BIIYAʼ XIRUʼ ZANDA GUIZIIDILUʼ
Biiyaʼ ejemplu stiʼ caadxi maniʼ ni rusihuinni guyuu tu bizáʼ laacame.
«¿Xi zanda guizíʼdinu de modo guyáʼ ca maniʼ ca?» (¡Gutaná! septiembre 2006)
Biiyaʼ ximodo cusiene ti padre xiiñihuiiniʼ ni rusiidiʼ Biblia de modo guyáʼ ca cosa ni nuu.
Biiyaʼ pa biaʼsi ni rusiidicabe de evolución né ni zeeda lu Biblia.
«¿Ñee biquiiñeʼ Dios evolución para bizáʼ guiráʼ ni nuu la?» (Tema ni zeeda lu jw.org)
Biiyaʼ pa rusihuinni ca dxita ladi stiʼ ca maniʼ ni huadxélacabe ne ca experimentu ni huayuni ca científicu: pa guyuu tu bizáʼ guiráʼ ni nuu o pa málasi guyuucani.
Modo bizulú guendanabani. Gaayuʼ cosa ni naquiiñeʼ guiene chaahuiluʼ (folletu)
a Lección 25 zusiene xi para bizáʼ Dios binni.
b Riquiiñeʼ Biblia diidxaʼ tipu o género para guiníʼ de stale clase maniʼ, peru ca científicu maʼ gadxé modo riquiiñecaʼ diidxaʼ ca.
Laaca zándaca ziuuláʼdxiluʼ ca ndiʼ
CANI NABÉ RINABADIIDXAʼ BINNI
¿Ximodo runi estudiarné ca testigu stiʼ Jehová binni Biblia?
Zanda gacané ca testigu sti’ Jehová lii guiénelu’ Biblia jma nagueenda ne zanda iquiiñelu’ Biblia ni jma riuulá’dxilu’. Laaca zanda guni invitarlu’ familia stilu’ o tuuxa xhamígulu’.
