XIMODO ruxuíʼluluʼ zaca dxi cuidxi Dios cuenta binni yaʼ. Stale tu na zadxiña binni tobi pur tobi ra nuu trono stiʼ Dios ti gaca juzgar. Ne laaca riníʼ íquecabe ziuu tu zacaa ti guendanabani sicarú guibáʼ ne nuu tu zacaná dxi ne gueelaʼ. Peru cadi zacá diʼ nga na Biblia chigaca dxi cuídxibe cuenta binni: qué zaca ni ti dxi para guidxibi binni, sínuque ti dxi guiecheʼ binni ne dxi gaca chaahuiʼ guiráʼ cosa.

Lu Apocalipsis 20:11, 12, caníʼ apóstol Juan ximodo chigaca dxi cuídxibe cuenta binni: «De raqué biiya ti trono roʼ naquichi bé, ne biiya zuba Dios lú ni. Bixele guidxilayú ne ibáʼ de ra nuu be, ne ma gasti lugar ra ñaana caʼ. Biiya zuhuaa cani ma guti nezalú Dios, cani risaca ne cani qué risaca. Ne bixele caadxi libru, ne laca bixele libru de enda nabani. Ne guridxi be cuenta cani ma guti, casi cá lu libru que ni biʼni caʼ».

Jiobá nga Juez ni nuu lu guidubi naca Guidxilayú. Peru dxiiñaʼ de gaca juzgar ca maʼ bidiibe ni sti binni. Apóstol Pablu guníʼ xi chiguni Dios lu Hechos 17:31: «Ma gudixhe be ti dxi cuidxi be cuenta laacaʼ. Ma ulí be tobi hombre guni ni, ne zuni ni jneza». Ne Juez ca nga Jesucristu ni maʼ biasa lade gueʼtuʼ (Juan 5:22). Peru, padxí guzulú cuídxibe cuenta binni ne pabiáʼ zandaa ni yaʼ.

Lu libru stiʼ Apocalipsis caníʼ zabídxibe cuenta binni tiidiʼ si Armagedón ni chigunitilú ca xpinni Binidxabaʼ (Apocalipsis  16:14, 16; 19:19–20:3). * Tiidiʼ si Armagedón la? zadeguyoo Binidxabaʼ ne ca demonio stiʼ ti mil iza ndaaniʼ ti lugar casi ti bizé ni qué gapa ra guiluxe. Laga deguyoobe, 144,000 binni ni chiguni mandarné Jesús zuni juzgárcabe binni ne zuni «mandar né cabe Cristu ti mil iza» (Apocalipsis 14:1-3; 20:1-4; Romanos 8:17). Casi maʼ bidúʼyanu ca, dxi cuidxi Jesús cuenta binni qué zaca ni biaʼ rindaa ti dxi ne ti gueelaʼ si, sínuque zandaa ni ti mil iza.

Lu ti mil iza ca, zabidxi Jesucristu «cuenta irá binni, cani nabani ru» ne «cani ma guti» (Hechos 10:42). «Cani nabani ru» ca nga guiráʼ ni guilá lu guendaridinde stiʼ Armagedón (Apocalipsis 7:9-17). Apóstol Juan laaca biiyaʼ «zuhuaa cani ma guti nezalú» trono stiʼ Dios para gaca juzgarcaʼ. Casi guníʼ Jesús chigaca que, «zadxiña dxi guna diaga irá cani nuu ndaani baʼ stidxi Xiiñi be [Cristu], ne zaree ca» (Juan 5:28, 29; Hechos 24:15). Yanna, xii nga chiguuyabe para guni juzgarbe binni yaʼ.

Lu visión gupa apóstol Juan que biiyabe «bixele caadxi libru» ne «guridxi be cuenta cani ma guti, casi cá lu libru que ni biʼni caʼ» (Apocalipsis 20:12). Peru, ñee cá ndaaniʼ libru riʼ guiráʼ ni bíʼnicabe dxiqué la? Coʼ. Qué zabidxi Jesús cuenta laacabe pur ni bíʼnicabe ante gáticabe. Ximodo nánnanu nga yaʼ. Purtiʼ Biblia na «ni ma guti la? ma bilá de lu ná [guendaruchee]» (Romanos 6:7). Cani chiguiasa ca maʼ qué zápacaʼ donda purtiʼ ora gúticaʼ bixiá guiráʼ xixé stóndacaʼ. Nga runi, lu ca libru ca nga zeeda guiráʼ cani nacubi chiguinabaʼ Dios guni binni. Para guibánicabe sin qué chuʼ dxi gáticabe, casi cani guiasa lade gueʼtuʼ zaqueca cani guilá lu Armagedón, nápacabe xidé gúnicabe ni na ca mandamientu stiʼ Dios. Lade ca mandamientu riʼ ziuu guiráʼ ley chigudii Jiobá lu ti mil iza ca. Nga runi, zaca juzgar cada binni pur ni guni dxi cuidxi Jesús cuenta laacaʼ.

Dxi cuídxibe cuenta ca, ziuu stale millón binni ni deruʼ chiguiziidicaʼ  xi racalaʼdxiʼ Dios ne óraca gúnicaʼ ni nabe. Para ganda guiziidiʼ guiráʼ binni ca de Dios la? naquiiñeʼ gaca dxiiñaʼ ca jma que biaʼ huayaca. Óraca «zaziidiʼ binni guidxilayú xii nga ni jneza» (Isaías 26:9). Peru cadi guiráʼ binni ziuulaʼdxiʼ guni ni na Dios. Isaías 26:10 na: «Neca guiabe binni malu, qué zaziidiʼ guni ni jneza. Zuni ni qué iquiiñeʼ neca cueza lu guidxilayú ra raca ni jneza ne qué zuuyaʼ guendanandxóʼ stiʼ Jiobá». Ca binni qué iquiiñeʼ riʼ zanitilucaʼ dxi cuidxi Jesús cuenta binni (Isaías 65:20).

Guiluxe cuidxi si Jesús cuenta binni la? ca binni ni nabániruʼ dxi ca nga dxandipeʼ zabánicaʼ purtiʼ maʼ binni ni qué gapa donda laacaʼ (Apocalipsis 20:5). Nga runi, dxi guni juzgar Jesús binni guidxilayú, guirácabe zeeda gácacabe binni sin donda (1 Corintios 15:24-28). De racá zeeda últimu prueba. Para gaca ni la? zalaa Binidxabaʼ ne zacaabe lugar quítebe binni guidxilayú, peru de racá maʼ qué ziuuruʼ dxi gúnibe ni (Apocalipsis 20:3, 7-10). Ca binni ni qué gudii lugar quite Binidxabaʼ laacaʼ la? zuuyacaʼ ximodo chigaca ca diidxaʼ ni maca guníʼ Biblia: «Cani runi jneza zudii Dios laacaʼ guidxilayú, ne qué ziuu dxi gusaana de guibánicaʼ lu ni» (Salmo 37:29). Yanna maʼ nanna dxíchinu ti ndaayaʼ nga zeeda gaca dxi cuidxi Jesús cuenta binni para guiráʼ cani guzuubaʼ diidxaʼ.