1, 2. 1) Xi cazaaca pur bicheené Jonás Dios. 2) Xi zazíʼdinu lu relatu stiʼ Jonás.

GUIZÁʼ cayacaná ladxidóʼ Jonás pur ni cazaaca. Ti dxi zebe ndaaniʼ ti barcu, málasi biete ti bi yooxhoʼ dede ruundaʼ bi que ora ridiʼdiʼ lade ca doo stiʼ barcu que, ne guizáʼ reciu cadxelasaa ca ola que cueʼ barcu que dede caxidxi yaabiʼ ni, peru ni jma cayuniná ladxidoʼbe nga ridxi stiʼ ca marineru ni canaguxooñeʼ ne cuyúbicaʼ xi gúnicaʼ para cadi guiaaziʼ barcu que. Nanna dxichi Jonás záticabe ne nánnabe laabe nápabe donda.

² Cazaaca profeta riʼ guiráʼ ndiʼ, purtiʼ bicheené Dios stiʼ. Peru xi bíʼnibe yaʼ. Ñee zanda gaca chaahuiʼ ni bíʼnibe la? Ora guidúʼndanu relatu stiʼ Jonás, zacábinu ca guendarinabadiidxaʼ riʼ ne zadúʼyanu xi zanda guizíʼdinu de historia stibe. Ne laaca zazíʼdinu riuu ora ruchee ca xpinni Dios, peru zanda guni chaahuicaʼ guendanagana sticaʼ.

3-5. 1) Xi riníʼ ique binni ora rieeteʼ de Jonás. 2) Xi rabi Biblia laanu de Jonás. (Laaca zanda gúʼyaluʼ ni cá ñee yaza.) 3) Xiñee nánnanu nagana para gaca tuuxa profeta ca dxi que.

³ Stale biaje ora rieeteʼ de Jonás, ni rietenalaʼdxiʼ si binni nga ra qué ñúnibe jneza, riníʼ íquecabe laabe casi ti hombre ni qué nuzuubaʼ stiidxaʼ Dios ne dede guyuu biaje biyubi nireené xtema. Peru lu Biblia laaca rieeteʼ bíʼnibe ni jneza. Cadi guiaandaʼ laanu gulí Jiobá laabe para gácabe profeta stiʼ, ne pa qué ñúnibe ni jneza ne qué ñácabe ti hombre nachaʼhuiʼ la? qué nibí diʼ Jiobá laabe.

⁴ Biblia rabi laanu chupa chonna cosa de Jonás ni zacané laanu gunibiáʼ chaahuinu laabe (biindaʼ 2 Reyes 14:25). Nánnanu de Gat-héfer laabe, ti guidxi ni riaana tapa si kilómetru de Nazaret, ne ndaaniʼ guidxi Nazaret riʼ nga chiguiniisi Jesús xhono gayuaa iza  despué. * Biʼniʼ Jonás dxiiñaʼ de profeta ca dxi cayuni mandar Jeroboán II, rey malu que, chii tribu stiʼ Israel. Maʼ xadxí de guti Elías, ne Eliseo, ni biaana lugar stiʼ Elías, guti ca dxi cayuni mandar bixhoze Jeroboán II. Biquiiñeʼ Jiobá guiropaʼ profeta riʼ para gusaana ca binni de Israel de guni adorarcaʼ Baal, peru yanna maʼ cayúnicaʼ ni cadi jneza sti biaje. Ne yanna, ndaaniʼ guidxi riʼ cayuni mandar ti rey ni cadi cusaana de guni «ni cadi jneza nezalú Jiobá» (2 Rey. 14:24). Ngue runi, guizáʼ nagana nga gaca tuuxa profeta ca dxi que. Peru neca zacá, qué nusaana Jonás de ñuni dxiiñaʼ ni bidii Jiobá laa.

⁵ Peru málasi ti dxi, bizaaca xiixa ni bichaa xquendanabánibe: bidii Dios laabe ti dxiiñaʼ ne guizáʼ nagana biiyabe ni. Xi laani yaʼ.

6. Xi dxiiñaʼ bidii Jiobá Jonás, ne xiñee nabé nagana ni.

⁶ Gudxi Dios laabe: «Guyé Nínive, gudxi roʼ, ne gudxi ca binni guidxi ca maʼ yendá guendaquéiquiiñeʼ sticaʼ nezaluáʼ» (Jon. 1:2). Xiñee nagana dxiiñaʼ riʼ yaʼ. Guidxi Nínive —capital stiʼ Asiria— riaana ni 800 kilómetru neza ra rindani Gubidxa, ne zándaca zazabe ti beeu para chindabe. Peru nuu sti cosa jma nagana. Xi laani yaʼ. Ora chindabe ndaaniʼ guidxi que naquiiñeʼ guiniʼbe zusabanáʼ Jiobá ca binni de Asiria. Guca ni nagana para laabe, purtiʼ nabé binibiáʼcabe guidxi riʼ pur guiráʼ guendaquéiquiiñeʼ ni raca ndaaniʼ ne purtiʼ nabé ridinde ca binni ni nabeza raqué. Pa huaxiéʼ bilábicabe Jonás ndaaniʼ xquidxi Dios, ñee zulábicabe laabe Nínive, ti guidxi ra qué runi adorárcabe Dios la? Ñee zanda gúnibe dxiiñaʼ ni bidii Dios laabe ndaaniʼ guidxi roʼ ni binibiáʼcabe despué casi «guidxi ni ruxhii rini» la? (Nah. 3:1, 7.)

7, 8. 1) Xi biʼniʼ Jonás para cadi guni dxiiñaʼ bidii Dios laa. 2) Xiñee cadi naquiiñeʼ guiníʼ íquenu guca Jonás namuxeʼ.

⁷ Qué gánnanu pa bidxibi Jonás ora guníʼ ique cani bizéʼtenu riʼ. Ni nánnanu nga xi bíʼnibe. Gudxi Jiobá laabe chebe ladu rindani Gubidxa, peru laabe bixooñelube zitu ne gadxé ladu guyebe. Yendabe ruaa nisadóʼ, lu puertu stiʼ Jope, ne raqué gucuaabe ti barcu ne zebe Tarsis. Stale binni ni ruundaʼ de Biblia nacaʼ ra nuu España yanna nga guyuu Tarsis, ne riaana ni 3,500 kilómetru de Nínive. Pa zacá ni, zandaabe ti iza para tidilaagabe nisadóʼ Roʼbaʼ. Raríʼ  rihuinni dxichi qué liica náʼ Jonás guni dxiiñaʼ bidii Dios laa (biindaʼ Jonás 1:3).

⁸ Ñee namúxebe la? Cadi nagueendaca guininu zacá laabe, purtiʼ despué bisihuínnibe nácabe ti binni nadxibalú. Laabe laaca ti binni ruchee nga laabe cásica laanu ne laaca guyuu ni bicueeza laabe de gúnibe ni na Dios (Sal. 51:5). Ñee cadi dxandíʼ guiranu nga riuu ora ridxíbinu la?

9. Ximodo runi sentirnu nuu tiru, ne xi cadi naquiiñeʼ guiaandaʼ laanu.

⁹ Zándaca chuʼ ora guiníʼ íquenu guizáʼ nagana ni canabaʼ Dios laanu, o dede qué zanda gúninu ni. Zándaca guidxíbinu gucheechenu ca diidxaʼ nacubi ne galán stiʼ Reinu stiʼ Dios (Mat. 24:14). Ora guni sentirnu zacá, rusihuínninu riaandaʼ laanu ca diidxaʼ ni guníʼ Jesús riʼ: «Gasti ni nagana para Dios». Nga rusihuinni zanda gacané Dios laanu ne zanda gudiibe laanu stipa (Mar. 10:27). Pa huayuu dxi guiaandaʼ laanu ca diidxaʼ ni guníʼ Jesús riʼ la? jma zanda guiénenu ni biʼniʼ sentir Jonás. Yanna, xi bizaacabe pur ni bíʼnibe que yaʼ.

10, 11. 1) Xi zándaca guníʼ ique Jonás ora biʼyaʼ maʼ zitu zeʼ barcu que. 2) Xi bizaaca barcu ra zeʼ Jonás que.

¹⁰ Guxuíʼlunu ni cazaaca Jonás. Maʼ dxíʼbabe ndaaniʼ barcu que —zándaca ti barcu de Fenicia ni riné carga sti guidxi—, ruuyadxibe guiráʼ ni cayuni capitán stiʼ barcu que ne ca marineru que para guiree barcu que de ruaa nisa. Zándaca dede gutadxí ladxidóʼ Jonás ora biʼyaʼ maʼ zitu zeʼ barcu que de ra bireecabe, purtiʼ guníʼ ique gastiʼ zazaaca. Peru málasi bichaa modo caníʼ ique.

¹¹ Málasi biete ti bi yooxhoʼ lu nisadóʼ que ne nabé naroʼbaʼ ca ola ni cayasa luni, dede ca barcu ni ruzáʼcabe yanna nuluíʼcani ti barcu huiiniʼ ni riguite xcuidi lu nisadóʼ que. Qué nindaa de ngue, guizáʼ reciu cadxelasaa ca ola que barcu ra zécabe, ne ruluíʼ ni ti yaga ndahui xuʼbaʼ laahua lu nisadóʼ ni zeʼ cheríʼ chericaʼ. Ñee nanna Jonás Jiobá peʼ ngue bisaba «ti bi reciu lu nisadóʼ» que la? Qué gánnanu pa nánnabe ni, peru ni nánnabe nga pur gana si cucaa ca marineru que ridxi dios sticaʼ (Lev. 19:4). Laaca laabe guniʼbe: «Biaʼ qué gacadé si barcu que» (Jon. 1:4). Jiobá si nga tobi lucha Dios ni zanda gulá laacabe. Peru ximodo guinábabe gacané Jiobá laabe pa cuxooñelube de laa yaʼ.

12. 1) Xiñee cadi naquiiñeʼ guininu cadi jneza biʼniʼ Jonás ora yegasi neca nuu bi yooxhoʼ que. (Laaca zanda gúʼyaluʼ ni cá ñee yaza.) 2) Ximodo bisihuinni Jiobá tuu ngue napa donda pur biete bi yooxhoʼ que lu nisadóʼ.

¹² Biiyaʼ si Jonás qué zanda guni gastiʼ para gacané ca marineru que, biétebe ra nuu bodega stiʼ barcu que, gúʼtabe ti rincón huiiniʼ  ne gúsibe. * Ora biʼyaʼ capitán que laabe, bicuaaniʼ laabe ne rabi laabe guinábabe dios stibe gacané laacaʼ, casi cayuni xcaadxi hombre que. Ca marineru que bidiicaʼ cuenta biete bi yooxhoʼ que purtiʼ cadxiichi tuuxa dios, ngue runi, guleecaʼ suerte para guihuinni tu tobi de laacaʼ bichiichi ca dios que. Zándaca jma bidxibi Jonás ora biʼyaʼ nin tobi de ca marineru que cadi cayaba suerte luguiáʼ. Óraque bidiibe cuenta Jiobá ngue bisaba bi yooxhoʼ que ne casi ñaca culuíʼ náʼ laabe nápabe donda pur qué nuzuubabe stiidxaʼ (biindaʼ Jonás 1:5-7).

13. 1) Xi gudxi Jonás ca marineru que. 2) Xi gunabaʼ Jonás ca hombre que gúnicaʼ, ne xiñee.

¹³ Oraqueca gudxi Jonás ca marineru que laa napa donda pur ni cazaaca que. Bisiénebe laacaʼ nácabe xpinni Jiobá, Dios ni jma napa poder, ne gudxíbabe ndaaniʼ barcu que para guxooñelube ti qué gúnibe dxiiñaʼ bidii Dios laabe. Peru cumu qué nuzuubabe diidxaʼ la? nuu xquendanabani guiráʼ cani zeʼ ndaaniʼ barcu que ra naxoo. Guizáʼ cadxibi ca hombre que ne gunabadiidxacaʼ laabe xi naquiiñeʼ gúnicaʼ para cadi guiaaziʼ barcu que ne cadi gáticaʼ. Xi biʼniʼ Jonás óraque yaʼ. Laabe nánnabe lu nabe nuu xquendanabani ca binni que. Ngue runi, neca cadxíbibe gátibe ndaaniʼ nisadóʼ ni cadiñentaa que, gúdxibe laacaʼ: «Laguindisaʼ naa ne lacuubí naa ndaaniʼ nisadóʼ ca ne zatadxí ni; purtiʼ nannaʼ pur naa nga cayaba nisaguié ne bi riʼ» (Jon. 1:12).

14, 15. 1) Ximodo zanda gápanu fe cásica gupa Jonás. 2) Xi biʼniʼ ca marineru que ora gudxi Jonás laacaʼ gulaacaʼ laabe lu nisadóʼ que.

¹⁴ Qué ñuni Jonás nga pa ñaca namuxe njaʼ. Nanna dxíchinu biecheʼ ladxidóʼ Jiobá ora biʼyaʼ nácabe nadxibalú ne qué nulábibe ñátibe. Né ni bíʼnibe riʼ bisihuínnibe nabé naguidxi fe stibe. Laanu laaca zanda chinándanu ejemplu stibe ra guizaaláʼdxinu xcaadxi binni ne cadi guiníʼ íquenu puru para laasinu (Juan 13:34, 35). Ora ridúʼyanu caquiiñeʼ tuuxa gacanécabe laa ora huará, ora nuu triste ne ora caquiiñeʼ chuʼ gaxha de Jiobá, ñee rúninu stipa pur gacanenu laacabe la? Pa gúninu zacá zuziéchenu ladxidóʼ Jiobá.

¹⁵ Zándaca nabé bidxagayaa ca marineru que ora bíʼyacaʼ bíʼnibe jma pur laacaʼ que pur laabe, purtiʼ qué niná gacaʼ nulaacaʼ laabe lu nisadóʼ que. Birá si bíʼnicaʼ para gudxiilucaʼ bi yooxhoʼ que, peru gastiʼ ñanda ñúnicaʼ. Laga zeʼ ora jma nadipaʼ ziyaca bi que,  nga runi, ni biʼniʼ tícabe nga guluu náʼcabe Jonás ne bilaacabe laa ndaaniʼ nisa que, ne gunábacabe Jiobá, Dios stiʼ Jonás, guilaselaʼdxiʼ laacabe (Jon. 1:13-15).

16, 17. Bisiene xi bizaaca Jonás ora biaba ndaaniʼ nisadóʼ que. (Laaca zanda gúʼyaluʼ ca dibuju ca.)

¹⁶ Biaba Jonás lu nisadóʼ ni cadiñentaa que. Zándaca cayúnibe stipa para cadi guiaazibe ndaaniʼ nisa que laga cayuuyabe modo zixeleʼ barcu que de laabe. Peru cumu nadipaʼ nuu corriente que, bichaaziʼ ni laabe dede xagueteʼ nisa, ne guníʼ íquebe maʼ guirutiʼ zanda gulá laabe.

¹⁷ Nánnanu ximodo biʼniʼ sentir Jonás ora nuu ndaaniʼ nisadóʼ que, pur cani bicaabe despué. Bicaabe caadxi cosa ni gudiʼdiʼ ndaaniʼ íquebe. Nabé triste guyuube ora guníʼ íquebe maʼ qué ziuu dxi gúʼyabe yuʼduʼ sicarú stiʼ Jiobá ni nuu Jerusalén. Ne ra ziyaazibe zireenda ca guixi nisadóʼ que íquebe ne biʼniʼ sentirbe casi ñaca nindabe dede ra gundani ca dani ca ndaaniʼ nisadóʼ. Ne profeta riʼ nanna dxichi raqué nga chigaca xpaʼ (biindaʼ Jonás 2:2-6).

18, 19. Bizeeteʼ xi bizaaca Jonás ora biaaziʼ ndaaniʼ nisa que ne bisiene tu maniʼ nga gubi laabe ne tu biseendaʼ maniʼ que. (Laaca zanda gúʼyaluʼ ni cá ñee yaza.)

 ¹⁸ Málasi biiyaʼ Jonás caniibi ti bandáʼ ngola ne zedadxiña ni laa. Xi laani yaʼ. Ruluiʼni ti benda ngola. De raqué biiyabe jma zidxiña bandáʼ que laabe, málasi biaaxha luguiabe, bixheleʼ ruaa ne gubi laabe.

¹⁹ Zándaca guníʼ ique Jonás: «Raríʼ birá biluxe ni. Yanna huaxa zateʼ». Peru bidxagayaabe ora bidiibe cuenta nabánirube ne gastiʼ qué ñácabe. Dede randa ricaabe bi ndaaniʼ maniʼ que, laandabe guníʼ íquebe raqué nga chigaca xpaʼbe. Ra zidiʼdiʼ hora jma cadxagayaabe guiráʼ ni cazaaca que. Rihuinni dxíchicaʼ nabánibe purtiʼ «biseendaʼ Jiobá ti benda ngola gabi laabe» (Jon. 1:17). *

20. Xi xcaadxi cosa nánnanu de Jonás pur oración ni biʼniʼ dxi nuu ndaaniʼ benda ngola que.

²⁰ Ra zidiʼdiʼ hora, lu gueelacahui que, napa Jonás tiempu para guiníʼ ique ne guni orar Jiobá. Oración ni bíʼnibe que cá ni lu capítulo 2 stiʼ libru stiʼ Jonás, ne lu oración riʼ rihuinni xcaadxi cosa de profeta riʼ. Luni nabé ruzeetebe ni cá lu Salmo, ne nga rusihuinni nabé nánnabe de Stiidxaʼ Dios. Ne ca diidxaʼ biluxenebe oración que rusihuínnicani bidiibe xquíxepeʼ Dios. Lu oración que gúdxibe Jiobá: «Peru naa la? zusisacaʼ lii ne zudiee ofrenda lii. Ni maʼ bidieeʼ stiidxaʼ guneʼ, zuneʼ ni. Jiobá nga ni rulá» (Jon. 2:9).

21. Xi ti cosa nabé risaca biziidiʼ Jonás, ne xi cadi naquiiñeʼ guiaandaʼ laanu.

²¹ Dxi nuu Jonás «ndaaniʼ xa benda ngola que» biziidibe ti cosa nabé risaca: zanda gulá Jiobá ca xpinni ratiica nuucaʼ ne ora tiica si. Gastiʼ qué nucueeza laabe ora bilabe Jonás, neca guyuu ndaaniʼ ti benda ngola (Jon. 1:17). Racá ridúʼyanu Jiobá si nga zanda gulá ne gapa ti hombre chonna dxi ne chonna gueelaʼ ndaaniʼ ti benda ngola. Cadi guiaandaʼ laanu «lu náʼ Dios nuu xquendanabáni[nu]» (Dan. 5:23). Nga runi, pur laabe nga nabáninu. Yanna, ñee qué rucaa nga laanu gudiʼnu xquíxepeʼ laabe la? Ne ora ruzúʼbanu diidxaʼ nga jma rusihuínninu cudiʼnu xquíxepeʼ laabe.

22, 23. 1) Ximodo bisihuinni Jonás bidii xquíxepeʼ Dios pur bilá laa. 2) Ximodo zanda chinándanu ejemplu stiʼ Jonás ora gucheʼnu.

 ²² De raqué, xi biʼniʼ Jonás yaʼ. Bidiibe xquíxepeʼ Jiobá ne bizuubabe stiidxaʼ. Relatu riʼ na gudiʼdiʼ si chonna dxi ne chonna gueelaʼ bidxiña benda ngola que ruaa nisadóʼ ne «bidxíʼbame Jonás ra nabidxi» (Jon. 2:10). Ñee cadi guendaridxagayaa nga la? ¡Qué liica nixuubaʼ Jonás para niree ra nabidxi! Peru bidxiʼbaʼ si benda que laabe, maʼ laabe biyúbibe modo guireebe de raqué. Qué zandaa diʼ zahuinni pa zudiibe xquíxepeʼ Dios pur bilá laabe. Jonás 3:1, 2 na: «De raqué guniʼné Jiobá Jonás guiropa biaje, ne gudxi laabe: “Biasa, guyé Nínive, guidxi roʼ que, ne gudxi ca binni guidxi ca ni chitidxeʼ lii”». Xi guni profeta riʼ yaʼ.

²³ Qué liica ñe ñeeda Jonás ora gunna xi naquiiñeʼ guni, oraqueca «biasa [...] ne guyé Nínive casi modo gudxi Jiobá laa» (Jon. 3:3). Rihuinni dxíchica biziidibe guzuubabe diidxaʼ, ne nagueendaca bíʼnibe ni na Dios. Guidúʼyanu sti cosa ni zanda guizíʼdinu de Jonás. Cadi guiaandaʼ laanu guiranu nga nácanu binni ruchee (Rom. 3:23). Peru xi rúninu ora maʼ bicheʼnu yaʼ. Ñee rusaananu de gúninu ni na Dios la? o zazíʼdinu guzúʼbanu diidxaʼ.

24, 25. 1) Xi guleendú Jonás pur bizuubaʼ diidxaʼ. 2) Xi ndaayaʼ zapa Jonás despué.

²⁴ Yanna, xi guleendú Jonás pur bizuubaʼ diidxaʼ yaʼ. Zándaca despué gúnnabe bilá ca marineru ni zeʼ ndaaniʼ barcu que. Ne cumu gutadxí nisadóʼ que ora bilaacabe laabe lu nisa que la? «guizáʼ bidxíbicabe Jiobá» ne dede bíʼnicabe ti ofrenda para laa, purtiʼ cayéchecabe bilá laacabe, ne qué nudiicabe nin ti ofrenda ca dios stícabe (Jon. 1:15, 16).

²⁵ Peru jma galán ni bieeteʼ de laabe despué. Xi laani yaʼ. Biquiiñeʼ Jesús ejemplu stibe para guníʼ cásica biaanabe chonna dxi ndaaniʼ benda ngola que, laa laaca ziuu ndaaniʼ Seol, o zati chonna gubidxa (biindaʼ Mateo 12:38-40). Yanna, guiníʼ íquenu xi zuni sentir Jonás ora guiasa lade gueʼtuʼ ne guibani ndaaniʼ Guidxilayú riʼ. ¡Nanna pabiáʼ guiecheʼ Jonás ora ganna Jesús peʼ bizeeteʼ de laa yaʼ! (Juan 5:28, 29.) Jiobá laaca racalaʼdxiʼ gudii laanu ndaayaʼ. Peru para ganda guicaanu cani la? naquiiñeʼ guizíʼdinu guzúʼbanu diidxaʼ ne gúninu jma pur sti binni que pur laanu, cásica biʼniʼ Jonás.