1, 2. Xi guiráʼ bizaaca dxi riʼ ni qué ziuu dxi gusiaandaʼ Elías.

QUÉ huayuu dxí guni sentir Elías casi cayuni sentir dxi riʼ. Ziguxooñebe lu nisaguié laga jma zicahui guibáʼ. Zíturuʼ cayaadxaʼ para chindabe Jezreel. Ne neca maʼ nagólabe, cayuni sentirbe nápabe stale stipa ne cadi cadxágabe, purtiʼ cayacané Jiobá laabe. ¡Dede gudíʼdibe lú ca maniʼ ni zixubiyú carru stiʼ rey Acab! (Biindaʼ 1 Reyes 18:46.)

² Stubi profeta riʼ zeʼ ne xiroobaruʼ riaadxaʼ para chindá. Dede zidxelasaa nisaguié que lube ora ziguxhooñebe. Nanna dxíchinu ziníʼ íquebe stale cosa, purtiʼ maʼ biʼniʼ Jiobá stale milagru dxi riʼ. Maʼ biiyabe ra bisihuinni Jiobá laa si nga naquiiñeʼ gaca adorar ne laa si nga Dios ni dxandíʼ. Cumu nacahui nuu guibáʼ ne maʼ zitu zebe la? maʼ qué rihuinni dani Carmelo. Ne lu dani riʼ nga biʼniʼ Jiobá ti milagru ne bisihuinni cadi jneza guni adorar binni Baal. Ne laaca lugar riʼ nga gutiʼ tapa gayuaa cincuenta profeta stiʼ Baal ora bihuinni pabiáʼ riguítecaʼ binni. Despué gunabaʼ Elías Dios gusaba nisaguié, purtiʼ maʼ chonna iza arondaʼ de qué huayaba ni. Ne Jiobá bicabi oración stiʼ Elías sti biaje ne biaba dxacha nisaguié (1 Rey. 18:18-45).

3, 4. 1) Xiñee zándaca guníʼ ique Elías zaca chaahuiʼ ca guendanagana stiʼ. 2) Xii nga ca guendarinabadiidxaʼ zacábinu.

³ Laga ziguxooñeʼ Elías lu nisaguié que 30 kilómetru para chindá Jezreel, guizáʼ nayecheʼ zeʼ purtiʼ ziníʼ ique zuchaa Acab. Pur guiráʼ ni bizaaca lu dani Carmelo, ni naquiiñeʼ guni Acab nga gusaana de guni adorar Baal, gucueeza Jezabel, xheelaʼ, ne maʼ cadi sananda ca xpinni Jiobá.

⁴ Stale biaje riéchenu ora ridúʼyanu maʼ cayaca chaahuiʼ xiixa guendanagana nápanu. Zándaca riníʼ íquenu zaluxe ca guendanagana ni jma cayuniná laanu ora ridúʼyanu maʼ ziyaca chaahuiʼ cani. Ne qué ridxagayaanu gánnanu biʼniʼ sentir Elías zacá, purtiʼ gúcabe «binni guidxilayú casi laanu» (Sant. 5:17). Peru caʼruʼ guiluxe ca guendanagana nápabe. Chupa chonna hora despué guizáʼ zadxíbibe ne ziuube triste dede zanábabe gátibe. Peru xi bizaaca yaʼ. Ne xi biʼniʼ  Jiobá para guca fe stibe naguidxi cásica gúcani dxiqué ne gácabe nadxibalú sti biaje yaʼ.

5. Xi rusihuinni caʼruʼ guiziidiʼ rey Acab guni respetar Jiobá despué de biiyaʼ guiráʼ ni bizaaca lu dani Carmelo.

⁵ Ñee bisihuinni Acab maʼ bichaa modo riníʼ ique ora yendá ndaaniʼ palaciu stiʼ ni nuu Jezreel la? Relatu riʼ na: «Gudxi Acab Jezabel guiráʼ ni biʼniʼ Elías ne ximodo biitibe guiráʼ ca profeta né espada» (1 Rey. 19:1). Raríʼ ridúʼyanu qué liica nuzeeteʼ rey riʼ lá Jiobá ora guníʼ guiráʼ ni bizaaca dxi que. Cumu qué riníʼ ique Acab casi riníʼ ique Dios la? guca nagana para laabe guni crebe Jiobá ngue biʼniʼ ca milagru que, ngue runi guniʼbe Elías ngue biʼniʼ cani. Rihuinni dxíchica caʼruʼ diʼ guiziidiʼ Acab guni respetar Jiobá. Yanna, xi biʼniʼ sentir Jezabel, gunaa ni nuu guquixe ni biʼniʼ Elías que yaʼ.

6. Xi biseendatidxi Jezabel Elías, ne xi riníʼ ca diidxaʼ ca.

⁶ Biaʼ qué ñati xiana si reina que ne biseendatidxi Elías: «¡Zacá guni ca dios ca, ne zacaca cuʼcaʼ xcaadxi luni, pa guixíʼ oraríʼ qué guneʼ xhiálmaluʼ cásica bíʼniluʼ xhialma cada tobi de laacabe!» (1 Rey. 19:2). Maʼ gudixhe ique Jezabel guuti laabe para guquixe laabe ni bíʼnibe ca profeta stiʼ Baal. Dede biʼniʼ jurar pa qué guuti laabe dxi gudixhe que, laa gatiʼ. Guníʼ ique xi biʼniʼ sentir xhuncu Elías ora gunna xi cá ique Jezabel guni. Bixuiʼlú cayaba dxacha nisaguié, nisiaasiʼ Elías ndaaniʼ ti yoo huiiniʼ ni nuu Jezreel, ne dede biasandí ora bicuaaniʼ ti hombre laa. Hombre riʼ nga ni biseendaʼ reina que ra nuube para gabi laabe canayubi gunaa riʼ laabe para guuti laabe. Xi biʼniʼ sentirbe ora binadiágabe ni yaʼ.

7. Xi biʼniʼ sentir Elías ora gunna nuu reina que guuti laa, ne xi bíʼnibe.

⁷ Pa guníʼ ique Elías mayaca gusaana binni de guni adorar Baal la? óraque bidiibe cuenta cadi zaqué ni. Jezabel nanaláʼdxiruʼ ca xpinni Dios. Maʼ biitibe stale profeta stiʼ Jiobá, ne yanna maʼ Elías nga cá íquebe guutibe. Xi biʼniʼ sentirbe ora gúnnabe nuu reina que guuti laabe yaʼ. Biblia na: «Bidxíbibe». Zándaca caníʼ íquebe xi zazaacabe ne pabiáʼ naná modo cá ique Jezabel guuti laabe. Pa zacá guníʼ íquebe, qué ridxagayaanu gánnanu xiñee bidxíbibe. Modo tiica biʼniʼ sentirbe, ni nánnanu nga «zebe pur xhiálmabe», o bixooñelube para gulabe xquendanabánibe (1 Rey. 18:4; 19:3).

8. 1) Xiñee zanda guininu biʼniʼ sentir Pedru cásica biʼniʼ sentir Elías. 2) Xi rizíʼdinu de ejemplu stiʼ Elías ne Pedru.

⁸ Peru laaca guyuu xcaadxi xpinni Jiobá ni bidxibi cásica bidxibi profeta Elías. Tobi de laacabe nga apóstol Pedru, apóstol riʼ bibani  gayuaa iza despué de Elías. Ti dxi, gudxi Jesús laabe sabe lu nisa, «[biiyasibe] pabiáʼ reciu nuu bi», bidxíbibe ne biaazibe (biindaʼ Mateo 14:30). Ejemplu stiʼ Elías ne stiʼ Pedru rusiidiʼ cani laanu ti cosa nabé risaca: para gácanu binni nadxibalú, cadi naquiiñeʼ guiníʼ íquenu xi guiráʼ cosa malu zándaca guizaacanu. Naquiiñeʼ guni crenu zacané Jiobá laanu, purtiʼ laabe nga rudiibe stipa laanu.

9. Bizeeteʼ ximodo neza zeʼ Elías ne ximodo cayuni sentir.

⁹ Cumu guizáʼ cadxibi Elías la? guzabe 150 kilómetru ladu gueteʼ, dede yendabe Beer-seba, ti guidxi ni dxaaga Judá, ladu gueteʼ. Raqué bisaanabe hombre ni racané laabe que ne zebe lu desiertu que stubi lúchabe. Relatu riʼ na: «Guzabe biaʼ rizácabe ti dxi». Zanda guxuíʼlunu siadoʼroʼ bireebe ne cadi zinebe gastiʼ para gobe neza. Nabé triste nuube, purtiʼ cadxíbibe ne zebe lu Gubidxa ndaʼ que dede biaʼ que guieegusibe, ne cayúnibe stipa para ganda sabe neza ra dxaʼ guié ne ra qué rigaa guixi. Biaʼ ra maʼ ziyaaziʼ Gubidxa ne maʼ naxiñáʼ rihuinni guibáʼ, maʼ zirá stipa stiʼ Elías. Maʼ bidxágabe, guribe xaʼnaʼ ti yaga huiiniʼ ni láʼ retama, ne yaga huiiniʼ riʼ si nga gunda bidxélabe para guiziiláʼdxibe xaʼnaʼ (1 Rey. 19:4).

10, 11. 1) Xi gunabaʼ Elías Jiobá ora biʼniʼ orar. 2) Biquiiñeʼ ca textu stiʼ Biblia ni cá lu párrafo ca para guzeeteluʼ xi biʼniʼ sentir xcaadxi xpinni Jiobá.

¹⁰ Cumu maʼ qué guidxela profeta riʼ xi guni la? ngue runi gunábabe Jiobá guuti laabe ne gúdxibe laa: «Qué risacadiaʼ jma que ca bixhozegolaʼ». Laabe nánnabe maʼ guti ca binni riʼ ne maʼ yu ne dxita laacaʼ ne maʼ qué zanda gacanecaʼ binni. (Ecl. 9:10). Ne Elías laaca cayuni sentir maʼ qué iquiiñeʼ casi ca gueʼtuʼ que. Maʼ bireebe gana modo nuube que, ngue runi guníʼ íquebe xi para nabánibe ne dede gúdxibe Dios «¡Maʼ biáʼcatiʼ!».

¹¹ Ñee naquiiñeʼ guidxagayaanu purtiʼ guizáʼ triste guyuu Elías la? Coʼ. Purtiʼ Biblia ruzeeteʼ de stale hombre ne gunaa ni biʼniʼ ni na Jiobá, laaca guyuucaʼ triste dede gunábacaʼ gáticaʼ, chupa chonna de laacabe nga Rebeca, Jacob, Moisés ne Job (Gén. 25:22; 37:35; Núm. 11:13-15; Job 14:13).

12. Ximodo zanda chinándanu ejemplu stiʼ Elías ora nuunu triste.

¹² Yanna nga nabáninu ca dxi «jma nagana» ni ruzeeteʼ Biblia, nga runi stale binni riuu triste dede né ca binni ni qué rusaana de guni ni na Dios (2 Tim. 3:1). Pa chuʼ ora guni sentirluʼ zacá, biʼniʼ cásica biʼniʼ Elías: bixheleʼ ladxidoʼloʼ nezalú Jiobá. Ne laaca bietenalaʼdxiʼ  laabe nga «riguixhe dxí be ladxidóʼ no» (biindaʼ 2 Corintios 1:3, 4). Yanna, guidúʼyanu ximodo gudixhedxí Jiobá ladxidóʼ Elías.

13, 14. 1) Ximodo biquiiñeʼ Jiobá ti ángel para bisihuinni rizaalaʼdxiʼ profeta stiʼ. 2) Xiñee ratadxí ladxidoʼno gánnanu jma runibiáʼ Jiobá laanu, cani racaláʼdxinu gúninu ne cani qué zanda gúninu.

¹³ Ximodo rábiluʼ biʼniʼ sentir Jiobá ora biʼyaʼ profeta ni nadxii que zuba xaʼnaʼ yaga huiiniʼ nuu lu desiertu que ne canabaʼ gatiʼ yaʼ. Nanna dxíchinu xi biʼniʼ sentirbe. Purtiʼ gucuá si bacaandaʼ Elías, biseendabe ti ángel ranuu ne chaahuidugá gudaʼnaʼ ángel que Elías para guibani, ne na ángel que rabi laabe: «Biasa, gudó» ne biʼniʼ Elías ni gúdxibe laa, purtiʼ bisihuinni ángel riʼ nachaʼhuiʼ ra bidii laabe pan ni guca gasi para gobe ne nisa para guebe. Ni ruzeeteʼ relatu riʼ nga gudobe, güeʼbe ne gúsibe sti biaje. Qué liica rieeteʼ pa bidiibe xquíxepeʼ ángel que. Ñee qué nudiibe xquíxepeʼ ángel que purtiʼ guizáʼ nuube triste, dede qué ñanda niniʼbe la? Zándaca, peru ángel que bicuaaniʼ laabe sti biaje, zándaca biaʼ ra zirá gueelaʼ, ne gudxi laabe: «Biasa, gudó». Despué gudxi laabe xcaadxi diidxaʼ ni biniibi ladxidoʼbe, na rabi laabe: «Purtiʼ zitu zazaluʼ» (1 Rey. 19:5-7).

¹⁴ Ángel que nanna paraa cheʼ profeta riʼ, purtiʼ Jiobá bisiene chaahuiʼ ni laa. Ne laacaʼ bidii ángel que cuenta né stipa si stiʼ Elías qué zanda guni huantar sáʼ zitu. Cadi dxandíʼ ratadxí ladxidoʼno gánnanu jma runibiáʼ Jiobá laanu, cani racaláʼdxinu gúninu ne laaca nánnabe xi qué zanda gúninu la? (Biindaʼ Salmo 103:13, 14.) Yanna, pabiáʼ gucané guendaró que Elías yaʼ.

15, 16. 1) Ximodo gucané guendaró ni bidii Jiobá Elías. 2) Xiñee naquiiñeʼ gusisácanu ni zeeda gaca casi guendaró ni rudii Jiobá laanu yanna.

¹⁵ Relatu riʼ na: «Biásabe ne gudobe ne güeʼbe, pur ni gudobe que gúpabe stipa para guzabe cuarenta dxi ne cuarenta gueelaʼ dede yendabe Horeb, dani stiʼ Dios ni dxandíʼ» (1 Rey. 19:8). Raríʼ rihuinni biaana Elías sin gó cuarenta dxi ne cuarenta gueelaʼ cásica biʼniʼ Moisés biaʼ xhoopaʼ gayuaa iza ante, ne zacaca biʼniʼ Jesús biaʼ ti mil iza despué (Éx. 34:28; Luc. 4:1, 2). Neca qué nirá ca guendanagana stiʼ Elías purtiʼ si gudó, peru bidiini stipa laabe. Bixuiʼlú profeta gola riʼ dede apena zizá lu desiertu que, raqué zizabe gudiʼdiʼ ti dxi, gudiʼdiʼ semana, ne dede bisaabe ti beeu arondaʼ.

¹⁶ Ca dxi stinu riʼ, laaca rapa Jiobá ca xpinni. Neca qué rúnibe ti milagru para gudiibe ni guidoʼno, peru rudiibe laanu ti cosa jma risaca. Xi laani yaʼ. Laani nga guiráʼ guiʼchiʼ ni rudii xquidxi Dios laanu (Mat. 4:4). Purtiʼ ora ridúʼndanu Stiidxaʼ Dios ne ca libru ne revista ni rusiene de Biblia racanécani laanu chuʼnu gaxha de Jiobá. Guiráʼ cani bizéʼtenu riʼ zeeda gácacani casi guendaró stinu yanna.  Neca qué zará ca guendanagana nápanu, peru zacanécani laanu guni huantarnu, purtiʼ sin laacani qué zanda gudxíʼlunu ca guendanagana stinu. Ne laaca zacanécani laanu ugaandanu guendanabani ni qué zaluxe (Juan 17:3).

17. Paraa yendá Elías, ne xiñee risaca lugar riʼ para laabe.

¹⁷ Gusá Elías 320 kilómetru dede yendá lu dani Horeb (o dani Sinaí). Nabé risaca lugar riʼ para laabe, purtiʼ maʼ xadxí biquiiñeʼ Jiobá ti ángel para bihuinni nezalú Moisés lu ti yaga huiiniʼ naze bele, ne laaca lugar riʼ nga ra biʼniné Jiobá guidxi Israel pactu stiʼ Ley. Yanna, lu dani riʼ nga nuu Elías, nucaachilú ndaaniʼ ti cueva.

18, 19. 1) Xi gunabadiidxaʼ ángel que Elías, ne ximodo bicábibe. 2) Xi chonna cosa bininá ladxidóʼ Elías.

¹⁸ Lu dani Horeb, yendá «stiidxaʼ» Jiobá ranuu Elías —nánnanu ti ángel nga yené diidxaʼ riʼ— ne ni gunabadiidxaʼ si laabe nga xi cayúnibe raqué. Nánnanu né diidxaʼ nadóʼ nga gunabadiidxaʼ ángel riʼ Elías, ngue runi, qué nidxíbibe ora bixhélebe ladxidoʼbe nezalú ángel que ne gúdxibe laa xi guiráʼ cayuni sentirbe, guniʼbe: «Huayuneʼ xhiiñaʼ Jiobá, Dios stiʼ stale binni nanda guiibaʼ, né stale gana; purtiʼ ca xiiñiʼ Israel maʼ bisaanacaʼ pactu stiluʼ, maʼ binidecaʼ ca altar stiluʼ, maʼ biiticaʼ ca profeta stiluʼ né espada, ne maʼ naasiaʼ biaanaʼ; ne maʼ canayúbicabe xhialmaʼ para gáxhacabe ni naa» (1 Rey. 19:9, 10). Ca diidxaʼ guníʼ Elías riʼ rusihuínnicani nuu chonna cosa ni cayuniná ladxidoʼbe.

¹⁹ Primé, guníʼ íquebe qué risaca dxiiñaʼ ni huayúnibe. Neca maʼ zinebe stale iza de cayúnibe xhiiñaʼ Jiobá «né stale gana» ne bisisácabe lá Dios ne bisihuínnibe jma jneza gaca adorar Jiobá que xcaadxi dios la? yanna ruuyabe qué risaca guiráʼ ni bíʼnibe. Biiyabe qué liica nuchaa ca binni de Israel, qué ruzuubacaʼ diidxaʼ ne qué gápacaʼ fe, ne nagueenda zidale cani runi adorar Baal, cásica nagueenda rizá xiixa guendaguidxa. Ne guiropa cosa ni cayuniná ladxidoʼbe nga cayuni sentirbe stubi lúchabe. Laabe guniʼbe: «Maʼ naasiaʼ biaanaʼ». Guniʼbe zacá, purtiʼ guníʼ íquebe maʼ laasibe cayúnibe ni na Dios ndaaniʼ guidxi Israel. Ne guionna la? cadxíbibe, purtiʼ maʼ biiticabe stale profeta, ne nanna dxíchibe maʼ cadi candaa zuuticabe laabe. Zándaca guca nagana para laabe gusihuínnibe cadxíbibe, peru qué nuchabe bi yánnibe ne qué nituílube ora bisihuínnibe ni. Ne ora bixhélebe ladxidoʼbe nezalú Dios, bisaanabe ti ejemplu galán para laanu (Sal. 62:8).

20, 21. 1) Xi guiráʼ biʼyaʼ Elías bizaaca ora bidxiña ruaa cueva que. 2) Xi biziidiʼ Elías ra bisihuinni Jiobá poder stiʼ.

²⁰ Xi biʼniʼ Jiobá para gudixhedxí ladxidóʼ Elías yaʼ. Relatu riʼ na gunabaʼ ángel que laabe guidxíñabe ruaa cueva que. Biʼniʼ Elías ni  gudxi ángel que laa, neca qué ganna xi chigaca. Málasi, biete ti bi yooxhoʼ. Nabé reciu bi que dede bisicuaataʼ ni diágabe, ne cumu nadipaʼ bi que la? dede gúxhani guié cueʼ dani. Bixuiʼlú cayuuyaluʼ Elías cucaachilú para cadi guinaazeʼ bi que laa, cuchii lú ne naaze lari nanaa ne nachonga ni nacu que. Ne cadi ngasi, sínuque cayúnibe stipa para cadi guiábabe, purtiʼ bizulú biniibi layú. ¡Cayaca ti xu roʼ! De raqué, deruʼpeʼ bizuhuaa chaahuibe ora zeeda ti bele ngola. Óraque gupa xidé guyuube ndaaniʼ cueva que para cadi gudxuíʼ ni laabe (1 Rey. 19:11, 12).

²¹ Casi rieeteʼ lu relatu riʼ, qué ñuu diʼ Jiobá lu bi que, lu xu que, ne ninca lu guí que. Elías nanna cadi naca diʼ Jiobá ti dios ni riníʼ ique binni nuu lu ca cosa stiʼ Guidxilayú riʼ casi Baal, purtiʼ ca binni ni runi adorar Baal nacaʼ laabe nga dios ni rusaba nisaguié. Peru Jiobá la? ra nuube nga ridá stipa ni rihuinni lu ca cosa ni bizaʼbe, ne jma nandxoʼbe que laacani. Dede nin guibáʼ ni bizaʼbe neca naroʼbaʼ, qué rudiini para laabe (1 Rey. 8:27). Yanna, ximodo zanda gacané cani profeta riʼ yaʼ. Cadi guiaandaʼ laanu guizáʼ cadxíbibe. Yanna, maʼ bidiibe cuenta nuu Jiobá, Dios ni jma nandxóʼ, gaxha de laabe. ¡Qué gápabe nin ti razón para guidxíbibe Acab ne Jezabel! (Biindaʼ Salmo 118:6.)

22. 1) Ximodo bisihuinni «ridxi nadóʼ ne chaahuidugá» que risaca Elías para Jiobá. 2) Tu laa zándaca guníʼ «ridxi nadóʼ ne chaahuidugá» ni binadiaga Elías que. (Biiyaʼ ni cá ñee yaza.)

²² Gudiʼdiʼ si bele que, dxidóʼ biaana raqué. Málasi binadiaga Elías «ti ridxi nadóʼ ne chaahuidugá» ne gudxi laabe cueebe guiráʼ ni nuu ndaaniʼ ladxidoʼbe, óraque guniʼbe guiráʼ ni cuchiiñaʼ laabe sti biaje. * Neca maʼ gutadxí ladxidóʼ profeta riʼ, peru ni gudxi «ridxi nadóʼ ne chaahuidugá» que laabe jmaruʼ si gudixhedxí ni ladxidoʼbe, gudxi laabe guizáʼ rusisaca Jiobá laabe. Ximodo bisihuinni Jiobá rusisaca laabe yaʼ. Gudxi laabe xi cá ique guni né guiráʼ binni ni runi adorar Baal ndaaniʼ guidxi Israel. Ne cumu guirutiʼ zanda gucueeza Jiobá guni ni maʼ gudixhe ique la? rihuinni dxíchicaʼ risaca dxiiñaʼ ni biʼniʼ Elías. Ne biiyaʼ Jiobá zándaruʼ gúnibe xhiiñaʼ, ngue  runi, bidii laabe sti dxiiñaʼ ne gudxi laabe xipeʼ naquiiñeʼ gúnibe (1 Rey. 19:12-17).

23. Xi chupa cosa biʼniʼ Jiobá para guluu gana profeta stiʼ.

²³ Yanna, xi biʼniʼ Jiobá para cadi guni sentir Elías nuu stubi yaʼ. Bíʼnibe chupa cosa. Primé, gúdxibe laa cuí Eliseo para gaca profeta ti guiaana xlugar. Ne hombre ni jma nahuiiniʼ riʼ nga chigaca xcompañérube ne chigacané laabe chupa chonna iza. ¡Aque galán nga maʼ chigápabe ti compañeru! Guiropa, gudxi Jiobá laabe ca diidxaʼ sicarú riʼ: «Ma bidieeʼ lugar guiaana gadxe mil binni ndaaniʼ guidxi Israel, guiráʼ cani caʼruʼ guzuxibi xañee Baal, ne guiráʼ cani qué huadii bixiduʼ laabe» (1 Rey. 19:18). Rihuinni dxíchica cadi stubi diʼ Elías nuu. ¡Nanna pabiáʼ biéchebe ora gúnnabe nuu gadxe mil binni ni cayuni ni na Jiobá ne qué nacaʼ guni adorarcaʼ Baal yaʼ! Ca binni riʼ caquiiñecaʼ gúnirube xhiiñabe, ne gudiibe ti ejemplu galán laacaʼ ra qué gusaanabe Jiobá ca dxi nagana que. Ca diidxaʼ ni gudxi ángel ni biseendaʼ Jiobá que laabe o «ridxi nadóʼ ne chaahuidugá» que, nanna dxíchinu yendácani ndaaniʼ ladxidoʼbe, ¡casi ñaca Dios peʼ ngue caniʼné laabe!

24, 25. 1) Ximodo zanda gunadiáganu «ridxi nadóʼ ne chaahuidugá» stiʼ Jiobá ca dxi stinu riʼ. 2) Ximodo nánnanu bidii Elías lugar quixhedxí Jiobá ladxidóʼ.

²⁴ Cásica Elías, stale biaje laaca ridxagayaanu ora ridúʼyanu pabiáʼ nadipaʼ stipa nuu lu ca cosa ni bizáʼ Jiobá. Nánnanu zacá ni, purtiʼ guiráʼ ni bizaʼbe rusihuínnicani nápabe stale poder (Rom. 1:20). Ne riquiiñeruʼ Jiobá poder stiʼ para guquidxi fe stiʼ ca xpinni ni qué rusaana laa (2 Crón. 16:9). Ne ca dxi stinu riʼ, ora guidúʼndanu Stiidxabe nga casi ñaca niníʼnebe laanu (biindaʼ Isaías 30:21). Nga runi, pa gúninu ni na Biblia la? zeeda gácani «ridxi nadóʼ ne chaahuidugá» ni guiniʼné laanu. Purtiʼ laani nga riquiiñeʼ Jiobá para uguu jneza laanu, para cuʼ gana laanu, ne para gusihuinni Dios pabiáʼ nadxii laanu.

²⁵ Ñee bidii Elías lugar quixhedxí Jiobá ladxidóʼ lu dani Horeb que la? Bidiibe lugar. Profeta ni biʼyaʼ gaca adorar Dios jneza riʼ, guca nadxibalú ra bíʼniruʼ xhiiñaʼ Jiobá. Pa de guidubi ladxidoʼno chinándanu cani zeeda lu Stiidxaʼ Dios la? zadúʼyanu jneza ni na ca diidxaʼ riʼ: «Xquiʼchi Dios ucuá para [...] gata dxí ladxidóʼ no». Ne pa gúninu zacá, zanda gaca fe stinu naguidxi cásica guca fe stiʼ Elías (Rom. 15:4).