1, 2. 1) Ximodo chiguchaa xquendanabani José ne binnilidxi. 2) Xi guendanagana gudxi José María zadxaagalucaʼ.

CHINÉ José binnilidxi Egipto. Maʼ huaxhinni, ne óraque nga chiguireecabe de Belén, guidxi huiiniʼ ra nabézacabe. Gudixhe José últimu bultu deche burru huiiniʼ stiʼ ne gudapa huiiniʼ décheme, de raqué cayuuyadxí guiráʼ ladu ndaaniʼ calle. Zándaca caníʼ ique guizáʼ zitu ngue zazacaʼ para chindacaʼ Egipto. Qué runibiáʼcabe ca binni ni nabeza ndaaniʼ guidxi que, ne qué riníʼcabe diidxaʼ riniʼcaʼ ne nin ca qué runibiáʼcabe ca costumbre sticaʼ. Yanna, ñee ziaa binnilídxibe raqué la?

² Nanna dxíchinu guca nagana para José gabi María, xheelaʼ, biseendaʼ Dios ti ángel para gabi laa lu ti bacaandaʼ xi guendanagana zadxaagalucaʼ. Peru gúcabe nadxibalú ne gúdxibe laa nuu rey Herodes guuti xiiñihuiinicabe. Ngue runi, caquiiñeʼ guireecabe de Belén nagueendaca (biindaʼ Mateo 2:13, 14). Guizáʼ nuu María xizaa. Nin laabe nin José qué ganda guiénecabe xiñee nuu ca binni que guuticaʼ xiiñicabe pa qué gapa donda. Ne gastiʼ zanda guni para gulá laca laa. Peru nánnacabe zanda gacané Jiobá laacabe, ngue runi bireecabe de guidxi que.

3. Ximodo biree José ne binnilidxi ndaaniʼ guidxi Belén. (Laaca zanda gúʼyaluʼ dibuju ca.)

³ Guiráʼ ca binni ni nabeza ndaaniʼ guidxi Belén que nisiaasicaʼ, qué liica gánnacaʼ xi chiguizaaca. Nagaʼchiʼ biree José, María ne Jesús de guidxi que laga nacahuiruʼ. Ne ora zeedayaba xpiaaniʼ dxi, mápeca zécabe ladu gueteʼ de guidxi Belén. Ne zándaca caníʼ ique José: «Xi guneʼ para ganda gapaʼ binnilidxeʼ de ca enemigu ni zanda guuti laadu, pa naa ti carpinteru si nga nacaʼ yaʼ. Ñee qué ziuu dxi gusiaadxaʼ ni iquiiñeʼ ca binnilidxeʼ la? Ñee zanda gusiniiseʼ baʼduhuiiniʼ ni nabé risaca bidii Jiobá naa para gapaʼ riʼ, neca guidxagaluáʼ guendanagana la?». Nabé naroʼbaʼ ca guendanagana bidxagalú José. Peru lu historia riʼ zadúʼyanu ximodo bidxiilube cani ne xiñee caquiiñeʼ gápanu fe cásica gúpabe. Ne jma zacané ejemplu stibe cani napa xiiñiʼ.

4, 5. 1) Ximodo bichaa xquendanabani José. 2) Ximodo guluu ángel que gana José para guicaa dxiiñaʼ nabé risaca ni bidii Dios laa.

⁴ Raca jma de ti iza, laga nuuruʼ José ndaaniʼ gudxi Nazaret, bichaa  xquendanabani. Ne raqué nga bidii stiidxabe María, xiiñiʼ Elí, guichaganabe laa. Para José la? naca María ti gunaa ni qué huayuni cosa dxabaʼ ne nabé napa fe Dios. Peru málasi gúnnabe nacaxiiñiʼ María. Yanna, para cadi guiníʼ binni María la? gudixhe íquebe gaca divorciarbe de laa nagaʼchiʼ. * Dxiquepeʼ gudxi ti ángel laabe lu ti bacaandaʼ biquiiñeʼ Jiobá espíritu santu stiʼ para gucaxiiñiʼ María. Ne ndiʼ nga gudxi ángel que laabe chiguni baʼduhuiiniʼ que: «Zulá ca xpinni de irá ni huachee caʼ». Ne laaca gudxi laabe: «Gucuaa María xheela luʼ ne ma cadi ucaa ique lu usaana lu laabe» (Mat. 1:18-21).

⁵ Cumu nabé nachaʼhuiʼ José ne nácabe ti hombre nabé ruzuubaʼ diidxaʼ la? bíʼnibe guiráʼ ni gudxi ángel que laabe. Gucuaabe dxiiñaʼ nabé risaca ni qué huayuu dxi guni tuuxa binni lu Guidxilayú: gusiniisibe ne gápabe Xiiñiʼ Jiobá Dios, ne cadi liica xiiñibe. Despué, dxi mayaca gapa María baʼduʼ, yené José laabe ndaaniʼ guidxi Belén para guicá lácabe, purtiʼ zinándabe ni na ley gudixhe emperador romanu que. Ne raqué nga gule baʼduhuiiniʼ que.

6-8. 1) Xiñee bichaa xquendanabani José ne María sti biaje. 2) Ximodo nánnanu Binidxabaʼ nga biseendaʼ beleguí que. (Laaca zanda gúʼyaluʼ ni cá ñee yaza.)

⁶ Lugar de nibiguetaʼ José Nazaret la? biaananebe binnilídxibe Belén, ti guidxi huiiniʼ ni nuu chupa chonna kilómetru de Jerusalén, para cuézacabe raqué. Neca binni pobre laacabe, peru biʼniʼ José stipa para cadi ñaadxaʼ gastiʼ María ne baʼduhuiiniʼ que. Qué nindaa de gule Jesús yendézacabe ndaaniʼ ti yoo huiiniʼ ni qué gápapeʼ stale cosa. Ne dxi maʼ huaniisi huiiniʼ Jesús, zándaca maʼ napa jma de ti iza, málasi bichaa xquendanabánicabe sti biaje.

⁷ Yendá caadxi hombre ni ruundaʼ beleguí ralidxi José ne María, ne bisisácacaʼ baʼduhuiiniʼ que. Ca hombre riʼ zeedacaʼ neza ra rindani Gubidxa stiʼ guidxi Belén, zándaca de Babilonia. Yenándacaʼ ti beleguí dede yendacaʼ ranuu baʼduhuiiniʼ ni chigaca rey stiʼ ca judíu que.

⁸ Qué gánnanu pa nanna ca hombre ni ruundaʼ beleguí que guluucaʼ xquendanabani Jesús ra naxoo. Qué niné diʼ beleguí que laacabe Belén, sínuque primeru yeneni laacabe Jerusalén, ne raqué nga gúdxicabe rey Herodes cuyúbicabe baʼduhuiiniʼ ni chigaca rey stiʼ ca judíu. * Ni bíʼnicabe que jmaruʼ si bichiichini rey que purtiʼ nápabe envidia baʼduhuiiniʼ que.

9-11. 1) Xiñee nánnanu gucané sti binni jma nadipaʼ que Herodes ne Binidxabaʼ laacabe. 2) Ximodo rusiene caadxi cuentu ne historia guiráʼ cani bizaacacabe neza zécabe Egipto, peru ximódopeʼ bizaaca ni.

⁹ Galán si nga gucané sti binni jma nadipaʼ que Herodes ne Binidxabaʼ laacabe. Ximodo yaʼ. Ora yendá ca hombre que ralidxi Jesús ne biiyacaʼ laabe nuube né jñaabe la? óraque bisigáʼdecaʼ laabe stale cosa  risaca, casi «oro, olíbano ne mirra», ne qué nibézacaʼ nudiicabe laacaʼ xiixa. ¡Nanna pabiáʼ bidxagayaacabe ora bíʼyacabe guiráʼ ngue yaʼ! Ne cumu cá ique ca binni ni ruundaʼ beleguí que guibiguétacaʼ Jerusalén para gábicaʼ rey Herodes paraa nuu baʼduhuiiniʼ que la? ngue runi maʼ Jiobá peʼ biʼniʼ chaahuiʼ guendanagana que. Xi bíʼnibe yaʼ. Lu ti bacaandaʼ gúdxibe ca binni ni ruundaʼ beleguí que guicaacaʼ sti neza para guibiguétacaʼ xquídxicaʼ (biindaʼ Mateo 2:1-12).

¹⁰ Qué nindaa de zeʼ ca binni ni bedaganna José ne María que biseendaʼ Jiobá ti ángel para quixhená José, ne gudxi laabe: «Biasa gucuaa badu huiini ca ne jñaa, laché Egipto ne laguiaana raqué, ne naa gabe laatu padxí ma zanda iree tu de raqué, purti zuyubi Herodes badu huiini ca para guuti» (Mat. 2:13). Casi maca bidúʼyanu ra bizulú capítulo riʼ, nagueendaca bizuubaʼ José diidxaʼ. Cumu ni jma risaca para laabe nga chuʼ baʼduhuiiniʼ que nazaaca la? ngue runi gucuaabe binnilídxibe yenebe Egipto. Ne ca cosa risaca ni yené ca binni ni ruundaʼ beleguí que nga gucané para gúpacabe ni biquiiñecabe biaʼ tiempu guyuucabe xquidxi binni.

¹¹ Caadxi cuentu ne historia ni gudixhe si binni ruzeetecani nabé sicarú guiráʼ ni bizaaca José ne María neza zecaʼ Egipto. Lúcani rieeteʼ biʼniʼ Jesús milagru para cadi sácabe zitu, ne para cadi ñuniná caadxi hombre malu laacabe, ne neza zécabe laaca bíʼnibe sti milagru para gandagaa yaga ziña ni cá dátil lu ti ganda uchuugu María cani. * Peru dxandipeʼ la? zitu guzácabe para yendácabe raqué ne nagana guca viaje que purtiʼ qué runibiáʼcabe nezaqué.

12. Xi zanda guiziidiʼ ca binni ni napa xiiñiʼ de ejemplu stiʼ José.

¹² Cani napa xiiñiʼ zanda guiziidicaʼ stale cosa de ejemplu stiʼ José, purtiʼ jma gucuá íquebe gápabe binnilídxibe, ne pur nga nagueendaca bisaanabe xhiiñabe ne qué nicá íquebe ñápabe stale cosa risaca para nibánibe galán. Rihuinni dxíchica nabé risaca para laabe gúnibe dxiiñaʼ ni bidii Jiobá laabe. Yanna riʼ, nabé nagana para gusiniisi binni xiiñiʼ ndaaniʼ guidxilayú malu riʼ, purtiʼ nuuca tu gucaa laacabe gúnicabe cosa dxabaʼ o dede gunitilú xquendanabánicabe. Nga runi, nabé rusisácanu dxiiñaʼ ni runi ca hombre ne ca gunaa purtiʼ rápacaʼ xiiñicaʼ, cásica biʼniʼ José.

13, 14. Xi bicaa José ne María guiaanacaʼ Nazaret.

¹³ Ruluíʼ si qué ñaanané José binnilidxi xadxí ndaaniʼ guidxi Egipto, purtiʼ qué nindaa de nuucabe raqué gudxi ti ángel José maʼ guti  Herodes. Maʼ xadxí maca guníʼ Jiobá zusendacaa Xiiñiʼ de Egipto (Mat. 2:15). Ne gucané José para gaca ni maca guníʼ Dios ora bireebe de guidxi que ne bibiguetanebe María ne Jesús xquídxicabe. Peru paraapeʼ zécabe yaʼ.

¹⁴ José naca ti hombre ni riníʼ ique dede ante xi zándaca guizaaca binnilidxi. Laabe bidxíbibe Arquelao, ni guyuu lugar stiʼ Herodes, purtiʼ naca ti hombre nabé malu ne ruuti binni. Dios gudxi José chiné binnilidxi neza guiáʼ, zitu de guidxi Jerusalén ne zitu de ca binni ni nuu guniná laacabe. Pur ngue bibiguetaʼ José ne María Nazaret ti guidxi huiiniʼ stiʼ Galilea, ne raqué biaanacabe ne bisiniisicabe ca xiiñicabe (biindaʼ Mateo 2:19-23).

15, 16. Ximodo dxiiñaʼ biʼniʼ José, ne xi herramienta zándaca biquiiñebe.

¹⁵ Neca qué ñápacabe stale cosa risaca, nagana modo bibánicabe. Lu Biblia rieeteʼ guca José ti carpinteru, ne stale cosa nga biʼniʼ ti binni ni runi dxiiñaʼ ca dxiqué. Gupa xidé bisábacabe yaga, guyuáʼcabe cani ne gudíxhecabe cani para guibidxi cani. Ne ca yaga que nga riquiiñecabe para gucuícabe yoo, gúnicabe barcu, gúnicabe xiixa puente huiiniʼ o gúnicabe carreta, rueda, ayubu, ne guiráʼ ni riquiiñecabe para gúnicabe dxiiñaʼ lu layú (Mat. 13:55). Stale stipa nga biʼniʼ ca carpinteru ni bibani dxiqué para gúnicaʼ xhiiñacaʼ. Jma nga bíʼnicabe dxiiñaʼ entrada ralídxicabe o ndaaniʼ ti yoo huiiniʼ ni nuu cueʼ lídxicabe.

¹⁶ Gupa José stale clase herramienta, ne zándaca chupa chonna de laacani guca cani stiʼ bixhoze. Zándaca gúpabe escuadra, plomo tiralinea, jacha, serruchu, zuela, martíu, masu, ne guiráʼ clase formón ne pegamentu. Ne zándaca biquiiñebe ti taladru de arcu, ni rucaabiéquecabe para quiide. Laaca zándaca gúpabe chupa chonna clavu, neca caru bisaca cani dxiqué.

17, 18. 1) Xi biziidiʼ Jesús de José. 2) Xiñee zándaca jmaruʼ si biʼniʼ José dxiiñaʼ.

¹⁷ Bixuiʼlú nahuiiniʼ Jesús ne cayuuyadxí ximodo runi bixhoze dxiiñaʼ. Dede rusiaande lú ora maʼ cayuuyadxí de primé ne últimu bieque stiʼ José. Ora guyadxibe náʼ bixhózebe, batanáʼ, pabiáʼ xilaga deche, rudiibe cuenta pabiáʼ nadipaʼ ne nanna guni xhiiñaʼ ne rihuinni nabé nuu xpiaaniʼ pur modo ruuyadxí. Zándaca bizulú José bisiidiʼ laabe xiixa dxiiñaʼ huiiniʼ, casi iquiiñebe guidiladi benda ni maʼ bibidxi para guni lisunebe ladi yaga, ne bisiidiʼ laabe ximodo gunibiaʼbe yaga sicómoro, roble, olivo ne xcaadxi yaga.

 ¹⁸ Cásica riquiiñeʼ José náʼ para gusaba yaga, uchuuguʼ muríu ne uquiidiʼ xiixa ni cayuni, zacaca biiyaʼ Jesús biquiiñebe nabe para bisihuínnibe pabiáʼ nadxiibe laa, jñaa ne ca biʼchiʼ ne bizaʼnaʼ. Ne rihuinni biroobaʼ familia que, purtiʼ relatu riʼ na gupa José ne María biaʼ xhi xhoopaʼ xiiñicaʼ (Mat. 13:55, 56). Cumu stálecabe la? jmaruʼ si nadipaʼ biʼniʼ José dxiiñaʼ.

19. Ximodo bisiidiʼ José binnilidxi de Dios.

¹⁹ Peru ni jma risaca para José nga gusiidiʼ binnilidxi de Dios. Ngue runi, guleebe tiempu para bisiidibe ca xiiñibe de Jiobá ne ca ley stiʼ. José ne María nabé yenecaʼ laacabe ndaaniʼ sinagoga ni nuu ndaaniʼ guidxi huiiniʼ ra nabézacaʼ, lugar que rigucaadiaga guiráʼ binni ora riuundaʼ Ley stiʼ Dios ne rusiénecabe de laani. Zándaca ora ribiguétacabe nabé rinabadiidxaʼ Jesús bixhoze ne jñaa stale cosa ni binadiaga. Ñee ruxuíʼlunu José cayuni stipa pur gusiidiʼ Jesús guiráʼ ni racalaʼdxiʼ ganna de Dios la? José laaca yené binnilidxi ca saa ni raca guiráʼ iza para guni adorárcabe Dios ndaaniʼ guidxi Jerusalén. Para chindácabe lugar ra raca Pascua que naquiiñeʼ sácabe jma de 120 kilómetru ne biáʼqueca zazácabe ora guibiguétacabe. Zándaca biaʼ chupa semana nga rindaa biaje que maca né saa que.

20. Ximodo zanda chinanda ca hombre ni naca xaíque ndaaniʼ lidxi ejemplu stiʼ José.

²⁰ Zacagá nga runi ca xpinni Cristu ni naca xaíque stiʼ ti familia yanna riʼ. Ni jma risaca para laacaʼ nga gusiidicaʼ xiiñicaʼ de Dios, nga runi, rusaanacabe de gúnicabe ni racaláʼdxicabe, dede rusaanacabe de guyúbicabe gápacabe stale cosa risaca para guibánicabe galán. Rúnicabe stipa para chinécabe ca xiiñicabe ca guendaridagulisaa ni raca guiráʼ semana ne ca guendaridagulisaa roʼ, ne laaca rúnicabe stipa pur guni adorárcabe Dios ne binnilídxicabe. Cani napa xiiñiʼ rúnicaʼ casi biʼniʼ José, purtiʼ nánnacaʼ herencia jma risaca ni zanda gusaananecaʼ laacabe nga gusiidicaʼ laacabe de Dios.

21. Xi runi José ne binnilidxi dxi raca Pascua, ne pora bidii José ne María cuenta cadi zeeda Jesús lade guiráʼ ca binni que.

²¹ Biblia ruzeeteʼ xi bizaaca dxi napa Jesús 12 iza. José gupa costumbre chiné binnilidxi Jerusalén dxi raca Pascua. Stale familia nga maʼ zecaʼ juntu, ne cumu maʼ primavera ngue la? sicarú rihuinni guiráʼ guixi gaʼ nuu neza zécabe. Ora maʼ zidíʼdicabe ca lugar ra naloma ne nabé feu para chindácabe Jerusalén, stale de laacaʼ maʼ ziyuundaʼ caadxi salmo ora maʼ ziguíʼbacaʼ (Sal. 120-134). Zándaca gayuaa mil  binni rié ndaaniʼ guidxi que. Guiluxe si saa que maʼ ribiguetaʼ guiráʼ familia que ralídxicaʼ sti biaje. Cumu stale cosa nga caníʼ ique José ne María la? zacaxácabe zeeda Jesús lade guiráʼ binni que, zándaca ra zeeda xcaadxi binnilídxicabe. Peru guzasícabe guidubi ti dxi, guizáʼ bidxíbicabe purtiʼ qué guidxélacabe Jesús (Luc. 2:41-44).

22, 23. Xi biʼniʼ José ne María ora bidiicaʼ cuenta qué guinni Jesús lade ca binni que, ne xi guníʼ María ora bidxélacabe laabe.

²² Oraqueca bibiguétacabe Jerusalén dede capapa ladxidóʼcabe. Guzácabe ndaaniʼ ca calle que, peru maʼ nin ti binni qué ñuuyacabe, canayúbicabe xiiñicabe ne cucaacabe ridxi: «¡Jesús, Jesús!». Paraa nuube pue. Zándaca lu chonna gubidxa de biniti Jesús que guníʼ ique José pa cadi maʼ bicheené Jiobá. Últimu yeyúbicabe laabe ndaaniʼ yuʼduʼ  que ne guyuucabe ra dagulisaa ca maestru ni nanna de Ley. Raqué bidxélacabe Jesús zubané ca hombre que. ¡Dede gutadxí ladxidóʼ José ne María ora bíʼyacaʼ laabe! (Luc. 2:45, 46.)

²³ Raqué cucaadiaga Jesús ca maestru que ne canabadiidxaʼ laacabe, ne laacaʼ dede cadxagayaacaʼ pabiáʼ nánnabe pur modo cacábibe. José ne María laaca cadxagayaacaʼ. Biblia qué ruzeeteʼ diʼ pa guníʼ José xiixa óraque. Peru María bisihuinni xi cayuni sentírcabe ora guníʼ: «Xiiñeʼ, xiñee ndi canayuʼnu laadu sicaríʼ. Naa ne bixhoʼzo lugu canazá du canayubi du lii» (Luc. 2:47, 48).

24. Ximodo rusihuinni Stiidxaʼ Dios xi guiráʼ guendanagana ridxaagalú binni ni napa xiiñiʼ.

²⁴ Ni bizaaca lu historia ni zeeda lu Biblia riʼ, rusihuínnini xi  guiráʼ guendanagana rapa binni ni napa xiiñiʼ. Ne xiiñiʼ José ne María que naca ti binni ni qué ñalené donda. Pur ca cosa malu ni cazaaca lu guidxilayú riʼ nabé riguu xaíque binni ca xiiñiʼ, peru ratadxí ladxidoʼcaʼ gánnacaʼ ruzeeteʼ Biblia ca guendanagana ni ridxaagalucaʼ.

25, 26. Xi bicabi Jesús bixhoze ne jñaa, ne xi zándaca biʼniʼ sentir José óraque.

²⁵ Peru galanpeʼ bidxélacabe Jesús zuba ndaaniʼ yuʼduʼ que, ne raqué nga runi sentirbe nuube jma gaxha de Bixhózebe ni nuu guibáʼ. Guizáʼ cayuulaʼdxiʼ Jesús guiráʼ ni cusiidiʼ ca binni que laa. Ngue runi, né diidxaʼ nadóʼ gúdxibe bixhózebe ne jñaabe: «Xiñee ndi canayubi tu naa. Ñee qué ganna tu pa naquiiñe gune xhiiña Bixhoze la?» (Luc. 2:49).

²⁶ Nanna dxíchinu nabé bicaa ca diidxaʼ que José guiníʼ ique. Zándaca dede bidxá tipa ladxidoʼbe purtiʼ nánnabe bisiidibe Jesús gannaxhii Jiobá ne guʼyaʼ laabe casi Bixhoze. Ne neca ti hombrehuiiniruʼ Jesús, peru nayecheʼ runi sentir José ora gunadiaga guiníʼ Jesús Jiobá nga Bixhoze. Ne laabe nga gucanebe Jesús para gunnaxhii Jiobá.

27. Xi dxiiñaʼ nabé galán napa ca binni ni napa xiiñiʼ, ne ximodo zanda chinándacabe ejemplu stiʼ José.

²⁷ Pa nápaluʼ xiiñiluʼ, ñee rudiiluʼ cuenta pabiáʼ galán nga dxiiñaʼ nápaluʼ para gusiidiluʼ laacabe gánnacabe ximodo nga rannaxhii binni xiiñiʼ ne rapa laacabe la? Ne pa maca napa xheelaluʼ xiiñiʼ ante guichaganaluʼ laa o gucuaaluʼ tuuxa baʼduhuiiniʼ casi xiiñiluʼ la? bietenalaʼdxiʼ xi biʼniʼ José ne bisisaca cada tobi de laacabe casi ñaca gastiʼ stobi casi laacabe. Gucané laacabe chúʼcabe gaxha de Jiobá, Bixhózecabe ni nuu guibáʼ (biindaʼ Efesios 6:4).

28, 29. 1) Xi rizíʼdinu de José pur ca diidxaʼ ni cuzeeteʼ Lucas 2:51, 52. 2) Ximodo gucané José Jesús para guca ti binni nuu xpiaaniʼ.

²⁸ Biblia rusihuinni xcaadxi cosa ni biʼniʼ José. Ne risaca gánnanu de laacani. Luni rieeteʼ bizuubaʼ Jesús stiidxaʼ bixhoze ne jñaa ne  «ze dxi jma ziyuu xpiaani be ne ziniisi be ne cayeche né Dios laabe ne zaqueca cayeche né binni laabe» (biindaʼ Lucas 2:51, 52). Xi rusiidiʼ ca diidxaʼ riʼ laanu yaʼ. Rusiidicani laanu gupa José binnilidxi ne bidii ni iquiiñecabe. Bihuinni zacá ni purtiʼ xiiñibe ni qué ñalené donda que nabé biʼniʼ respetar laabe ne bizuubaʼ stiidxabe.

²⁹ Lu relatu ca laaca rieeteʼ «ze dxi jma ziyuu xpiaani» Jesús. Nga runi, zanda guiníʼ íquenu gucané José laabe para gúcabe ti binni nuu xpiaaniʼ. Dxi bibánicabe, guyuu ti proverbio yooxhoʼ ni nabé binibiáʼ ca judíu, ne laani nani ti binni si ni napa stale tiempu nga zanda gaca tuuxa ni nuu xpiaaniʼ. Nácabe ca binni ni runi dxiiñaʼ de carpinteru, cani runi dxiiñaʼ lu layú, ca herreru, qué gánnacaʼ xii nga ni jneza ne ni cadi jneza ne qué zanda guni juzgarcaʼ tuuxa; ne qué gánnacabe iquiiñecabe ejemplu para gusiénecabe xiixa. Biniisi si Jesús bisihuinni cadi jneza modo riníʼ ique ca binni que. Purtiʼ stale biaje binadiágabe ti carpinteru, hombre ni gúpabe de bixhózebe, nabé jneza modo bisiidiʼ laabe xii nga ni jneza ne ni cadi jneza para Jiobá ne modo runi juzgar.

30. Xi ejemplu galán bisaana José para cani naca xaíque ndaaniʼ lidxi.

³⁰ Ne cumu bedagaca Jesús ti hombre nadipaʼ la? nga rusihuinni bizaalaʼdxiʼ José chuʼbe nazaaca. Laaca bisiidiʼ José laabe gúnibe dxiiñaʼ nadipaʼ. Ne cadi binibiaʼsícabe Jesús casi xiiñiʼ ti carpinteru, sínuque gudxipécabe laabe «carpinteru» (Mar. 6:3). Rihuinni dxíchica biʼniʼ José xhiiñaʼ jneza. Nga runi, galán guizaalaʼdxiʼ cani naca xaíque ndaaniʼ ti familia chuʼ ca xiiñicaʼ nazaaca ne gacanecaʼ laacabe gápacabe ti dxiiñaʼ ni ganda gacané laacabe guibánicabe, cásica biʼniʼ José.

31. 1) Casi rihuinni lu relatu riʼ, padxí guti José. (Biiyaʼ  cuadru ca.) 2) Xi ejemplu bisaana José para laanu.

³¹ Relatu riʼ laaca ruzeeteʼ dede ra guyuunisa Jesús dxi maʼ napa 30 iza, peru maʼ qué ruzeeteruʼ ni de José. Stale cosa rusihuinni maʼ viuda María dxi bizulú bicheeche Jesús diidxaʼ (biiyaʼ cuadru ni láʼ « Padxí guti José»). Neca maʼ huaxiéʼ rieeteʼ de laabe, peru galán ejemplu bisaanabe para cani napa xiiñiʼ, purtiʼ gúpabe binnilídxibe ne bidiibe ni iquiiñecaʼ ne gúcabe ti binni ni gupa fe dede dxi gutiʼ. Guiráʼ binni ni napa xiiñiʼ, cani naca xaíque ndaaniʼ ti familia, ne guiráʼ xpinni Cristu, galán gúnicaʼ stipa pur gápacaʼ fe cásica gupa José.