1, 2. Xi para riquiiñeʼ ti brújula, ne xiñee zanda guchaaganu ni ne xconciéncianu.

ÑEE nannuʼ xiñee tobi si guendanagana ridxaagalú ti hombre ni rizané barcu lu nisadóʼ, ti hombre ni zeʼ lu ti desiertu ne tobi ni rusá avión la? Tobi si ni, purtiʼ pa guiónnacabe qué gápacabe xiixa aparatu ni gacané laacabe gánnacabe paraa nuucabe la? zaníticabe. Zanda iquiiñecabe ti brújula ne cadi caquiiñepeʼ gacaʼ ni ti aparatu de cani jma nacubi ni nuu yanna riʼ.

² Ti brújula nga ti cosa ni napa ti aguxaʼ ne imán, ne laani ruluíʼ ni binni pa neza riaana ladu guiaʼ. Pa galán runi ni dxiiñaʼ zanda gulá ni binni, jmaruʼ si pa nápacabe ti mapa. Jiobá bisigaʼdeʼ laanu xiixa ni zeeda gaca casi ti brújula: laani nga xconciéncianu. Biblia na racané ni laanu para gudiʼnu cuenta pa cayúninu ni jneza o coʼ. Ora guzeeteʼ Stiidxa Dios Didxazá de laani riquiiñeʼ chupa diidxaʼ: ladxidóʼ ne guendabiaaniʼ (Romanos 13:5; 1 Timoteo 1:5; 1 Pedro 3:16). Pa ñaca qué ñacané xconciéncianu laanu para nudiʼnu cuenta xii nga ni jneza ne ni cadi jneza la? qué ñánnanu xi ñúninu. Pa gudiʼnu lugar gacané ni laanu, zanda guibáninu galán ne qué zusaana de gúninu ni jneza. Guizáʼ galán ni bisigaʼdeʼ Dios laanu ca. Nga runi, caquiiñeʼ gánnanu xipeʼ nga laani ne ximodo runi ni dxiiñaʼ, ne óraca caquiiñeʼ gánnanu: 1) xi zacané xconciéncianu para gánnanu xii nga ni jneza ne ni cadi jneza; 2) xiñee galán gánnanu xi riníʼ ique  xcaadxi binni, ne 3) xi zabeendunu pa gápanu xconciéncianu nayá.

3. Xi riníʼ diidxaʼ ni biquiiñecabe lu diidxaʼ griegu para «conciencia», ne ximodo racané ni binni.

³ Biblia biquiiñeʼ ti diidxaʼ griegu para «conciencia» ni riníʼ «gánnanu de laanu». Pur modo bizáʼ Dios laanu la? zanda gunibiaʼnu laca laanu. Ca binni guidxilayú si nga bidii Jiobá xconciencia; qué nudiidibe ni ca maniʼ ca. Xconciéncianu racané laanu guidúʼyanu pa jneza guiráʼ ni cayúninu. Ora qué rúninu ni jneza laaca laani runiná ni ne ruchiiñaʼ ni laanu. Ne racané ni laanu cuinu xi racaláʼdxinu gúninu. Pa quixhe íquenu gúninu ni jneza qué zuchiiñaʼ diʼ xconciéncianu laanu.

4, 5. 1) Ximodo nánnanu bidii Jiobá conciencia Adán ne Eva, ne xi bizaaca ora bicheenécabe Dios. 2) Xi ejemplu nápanu ndaaniʼ Biblia ni gucuá lu diidxaʼ hebreu ni rusihuinni guyuu tu bicaadiaga xconciencia.

⁴ Dxi bizáʼ Dios primé hombre ne primé gunaa, Adán ne Eva, bidiibe laacaʼ ti conciencia ni zacané laacaʼ gudiicaʼ cuenta xii nga jneza ne ni cadi jneza. Ngue runi, dxi bicheenécabe Dios bichiiñaʼ xconciénciacabe laacabe (Génesis 3:7, 8). Peru neca bichiiñaʼ ni laacabe maʼ qué ñanda ñúnicabe xiixa  para ñuucabe galán nezalú Dios. Xiñee yaʼ. Purtiʼ ante gucheecabe gúcacabe binni sin donda, nga runi nánnacabe xi cayúnicabe dxi bidxiidéchecabe Dios ne pur ni bíʼnicabe que gúcacabe xhenemígube. Ngue runi, maʼ qué ñanda ñuucabe gaxha de Dios.

⁵ Stale binni neca gulenecaʼ donda ruyúbicaʼ gúnicaʼ ni jneza, ne qué rúnicaʼ casi biʼniʼ Adán ne Eva. Lade ca binni ni caninu riʼ nuu Job, tobi hombre ni bizuubaʼ stiidxaʼ Dios. Laabe guniʼbe: «Qué zusaanaʼ de guneʼ ni jneza ne qué zundaaʼ ni; qué ziuubaʼ ladxiduáʼ biaʼ dxi nabaneʼ» (Job 27:6). * Job bicaadiaga xconciencia ante quixhe ique guni xiixa. Ngue runi gunda guniʼbe qué nuchiiñaʼ ni laabe purtiʼ bíʼnibe ni nani. Peru David qué ñuni casi biʼniʼ Job. Biblia na biuubaʼ ladxidoʼbe dxi qué ñuni respetarbe Saúl, rey ni gulí Jiobá para guni mandar (1 Samuel 24:5). Ni biʼniʼ sentirbe que gucané ni laabe para cadi nibiguetaʼ ñúnibe ni sti biaje.

6. Xiñee zanda guininu guiráʼ binni zanda quixhe ique guni ni jneza.

⁶ Peru ca binni ni qué runi ni na Jiobá laaca zanda gánnacaʼ xii nga ni jneza ne ni cadi jneza. Apóstol Pablu bicaa ca diidxaʼ riʼ: «Laguuya cani cadi judíu. Qué gapa di cabe libru sti ley, peru pa guni cabe jneza casi na ley la? ngue ma de laasi cabe napa cabe ley neca iruti nudii ni laacabe. Zacá rihuinni ma napa cabe ley ndaani ladxidóʼ cabe. Stubi stubi cabe ranna cabe uná nga jneza ne uná nga ni cadi jneza, ne xquenda biaani cabe rusiene laacabe pa nayá ladxidóʼ cabe o pa coʼ» (Romanos 2:14, 15). Nuu tiru stubi si binni nanna xi naquiiñeʼ guni ne rúnicaʼ ni modo na Dios neca qué gánnacaʼ xiná ley Stibe.

7. Xiñee nuu tiru cadi jneza guiráʼ ni riguixhe ique binni guni.

 ⁷ Peru cadi guiráʼ diʼ ora zucaa xconciéncianu laanu gúninu ni jneza. Xiñee yaʼ. Para ganda guiénenu ni la? chiguzéʼtenu sti biaje de brújula ni guninu que. Xi zazaaca pa guchíñanu ti imán gaxha de laani yaʼ. Aguxaʼ ni nuu ndaaniʼ ni que zuluíʼ laanu gadxé ladu riaana neza guiaʼ. Yanna, pa racaláʼdxinu iquiiñenu brújula ca ne qué gápanu ti mapa la? qué zanda diʼ gacané ni laanu. Zacaca reeda gaca né xconciéncianu. Pa gudiʼnu lugar guchaa ca cosa malu ca xconciéncianu la? zucaa ni laanu gúninu ni cadi jneza. Ne pa qué guyúbinu gacané Stiidxaʼ Dios laanu la? qué zanda diʼ gánnanu xii nga jneza ne ni cadi jneza ora quixhe íquenu gúninu xiixa. Para quixhe íquenu gúninu ni jneza caquiiñenu espíritu santu stiʼ Dios. Apóstol Pablu bicaa: «Nanna dxiʼche cadi cusiguiee diaʼ, ne nga ca rabi Espíritu Santu naa» (Romanos 9:1). Zanda gacanenu xconciéncianu gucaa laanu gúninu ni jneza casi racalaʼdxiʼ espíritu santu stiʼ Jiobá. Ximodo zanda gaca nga yaʼ. Caquiiñeʼ guizíʼdinu xii nga ni jneza ne ni cadi jneza.

8. 1) Ximodo zanda gucaa ladxidoʼno xconciéncianu guni xiixa, peru xi naquiiñeʼ guiníʼ íquenu ante quixhe íquenu gúninu xiixa. 2) Xiñee cadi galán diʼ gúninu xiixa purtiʼ si qué ruchiiñaʼ xconciéncianu laanu (biiyaʼ ni cá ñee yaza).

⁸ Ximodo zanda gacané xconciéncianu laanu ora quixhe íquenu gúninu xiixa. Nuu tu riníʼ galán gúninu ni na ladxidoʼno. Ne zándaca guiniʼcaʼ: «Qué ruchiiñaʼ diʼ xconciéncianu naa guneʼ ni». Peru naquiiñeʼ gánnanu nuu tiru nadipaʼ nga ni rinabaʼ ladxidoʼno laanu gúninu ne dede maʼ qué racané xconciéncianu laanu gudiʼnu cuenta cadi jneza ni racaláʼdxinu gúninu. Guidúʼyanu xiná Biblia de laani: «Ladxidóʼ binni nga ni jma riguite laa que intiica si cosa, ne qué ridxela ni xi guni ni. Tu zanda gunibiaʼni yaʼ» (Jeremías 17:9). Nga  runi, ni jma risaca para laanu nga gusiéchenu ladxidóʼ Jiobá ne cadi gúninu ni na ladxidoʼno. *

9. Ximodo rusihuínninu ridxíbinu Dios, ne ximodo racané ni laanu para quixhe íquenu gúninu ni jneza.

⁹ Pa maʼ bisiaʼnu xconciéncianu guni ni na Dios, intiica si gacaláʼdxinu gúninu zusihuínninu ridxíbinu laabe ne qué zúninu ni racaláʼdxisinu. Guidúʼyanu ni bizaaca Nehemías, ti hombre ni bizuubaʼ stiidxaʼ Dios. Dxi gúcabe gobernador ndaaniʼ guidxi Jerusalén, ñanda nucaabe guiráʼ ca binni que niguíxecaʼ impuestu, peru qué ñúnidibe ni purtiʼ ridxíbibe Dios (Nehemías 5:15). Qué ninádibe nucheenebe Dios ra nuquiichinabe ca binni que. Laanu laaca naquiiñeʼ guidxíbinu Dios, purtiʼ zacané ni laanu guidúʼyanu xiná Biblia ora chigúninu xiixa.

10, 11. Xi conseju zeeda lu Biblia ni zanda gacané laanu guidúʼyanu pa zanda guideʼnu nisa dxuʼniʼ o coʼ, ne xi naquiiñeʼ gúninu ti gacané Dios laanu gúninu ni na ca conseju stiʼ.

¹⁰ Casi pa jneza nga gueʼ binni nisa dxuʼniʼ o coʼ. Pa rápanu gana chuʼnu nayecheʼ ne ca xhamígunu ti ratu la? zándaca guinabadiidxanu laca laanu: «Zanda gueeʼ la? o coʼ». Para ganda quixhe íquenu gúninu ni jneza la? caquiiñeʼ gánnanu xiná Biblia. Stiidxaʼ Dios na cadi malu diʼ nga gueʼ binni caadxi nisa dxuʼniʼ. Dede Biblia rusisaca Dios pur nápanu vinu (Salmo 104:14, 15). Peru laaca cayabi ni laanu malu nga gueʼ xhaataʼ binni ni ne gúnicaʼ guendaquéiquiiñeʼ lu ca saa sticaʼ (Lucas 21:34; Romanos 13:13). Ne cadi guiaandaʼ laanu, gueʼ xhaataʼ binni nisa dxuʼniʼ ca zeeda ni lade ca cosa ni  qué riuulaʼdxiʼ Dios casi guendarapa jnadxii ne chuʼné binni ni cadi xheelaʼ (1 Corintios 6:9, 10). *

¹¹ Cani cá lu Stiidxaʼ Dios ca racané cani laanu gánnanu quixhe íquenu gúninu ni jneza. Nga runi, ora guni invitárcabe laanu ti reunión social ra zándaca gudiicabe nisa dxuʼniʼ naquiiñeʼ guinabadiidxanu laca laanu: «Tu guiráʼ cheʼ racá. Ñee zadxé íquecabe ne dede zúnicabe guendaquéiquiiñeʼ racá la? Naa yaʼ. Ñee rápapiaʼ gana gueʼ nisa dxuʼniʼ la? Caquiiñeʼ ni para ganda chuaaʼ galán ne guneʼ ni gapaʼ gana la? Ñee zanda guiniéʼ maʼ qué zeeruaʼ la?». Ora guiníʼ íquenu ximodo chinándanu ca conseju zeeda lu Biblia galán guni orarnu Jiobá. Biblia na: «Dios, biiyaʼ chaahuiʼ guidubi nacaʼ, ne biiyaʼ xi nuu ndaaniʼ ladxiduáʼ. Biiyaʼ chaahuiʼ naa, biiyaʼ chaahuiʼ xi ruchiiñaʼ xquendabiaaneʼ, biiyaʼ pa canazayaʼ lu ti neza ra zacanaʼyaʼ, ne biluíʼ naa ximodo sayaʼ lu neza ni qué zaluxe» (Salmo 139:23, 24). Pa gúninu zacá la? canábanu gacané espíritu santu stibe laanu ne zusíʼdinu xconciéncianu guni ni jneza casi rinabaʼ Dios ni laanu. Peru nuuruʼ sti cosa ni naquiiñeʼ gánnanu ora gacaláʼdxinu gúninu xiixa.

12, 13. Xiñee gadxé gadxé modo riníʼ ique cani ridagulisaanenu, ne xi naquiiñeʼ gúninu pa qué ruuyaʼ tuuxa ca cosa ca casi ridúʼyanu cani.

¹² Nuu tiru zadxagayaanu ora guidúʼyanu dede ca binni ni ridagulisaanenu gadxé gadxé modo riníʼ íquecaʼ. Zándaca chuʼ ti xpinni Cristu guiníʼ cadi jneza gúninu xiixa, peru sti xpinni Cristu guiníʼ gastiʼ naca gúninu ni. Guininu sti biaje de nisa dxuʼniʼ. Zándaca nuu tuuxa náʼ cadi malu guené ca xhamigu caadxi nisa dxuʼniʼ ora maʼ caziiláʼdxicaʼ, peru para xcaadxi cadi jneza diʼ ni. Xiñee gadxé gadxé modo riníʼ íquecabe, ne ximodo zanda gacané ni laanu gánnanu xi zanda quixhe íquenu gúninu.

 ¹³ Nuu stale razón para guiníʼ íquenu gadxé gadxé modo. Ne tobi de laacani nga modo biniisi cada tobi de laanu. Nuu tu laa bidxiilú ti viciu ni gupa ne guca nagana para laa bisaana ni ne guyuu tiru biaba luni sti biaje (1 Reyes 8:38, 39). Guiníʼ íquenu ñeeda ganna ti xpinni Cristu laanu ni biʼniʼ stipa para gunda bisaana nisa dxuʼniʼ, zándaca para laabe malu nga guebe ni. Pa guni invitarnu laabe guénebe laanu caadxi nisa dxuʼniʼ, zándaca xconciénciabe gabi laabe cadi jneza ni ne pur ngue gábibe laanu coʼ. Ñee zadxiichinenu laabe la? Zucaʼnu laabe guebe pa qué nabe la? Coʼ xa. Cumu nadxiinu laabe la? zuni respetarnu ni gábibe laanu, neca qué gusiénebe laanu xiñee qué nabe guebe.

14, 15. Cumu gadxé gadxé modo guníʼ ique ca xpinni Cristu que, xi conseju bidii Pablu.

¹⁴ Lu primé siglu, apóstol Pablu biiyaʼ gadxé gadxé modo guníʼ ique ca xpinni Cristu que. Nuu de laacabe na cadi jneza gó binni guendaró ni guta lu bidóʼ ni cadoo luguiaa (1 Corintios 10:25). Peru Pablu qué nuchiiñaʼ diʼ xconciencia laa pa ñó ni, purtiʼ para laabe cadi nabani ca bidóʼ que ne cadi sticaʼ ca guendaró que, sínuque Jiobá nga bidii ni laacabe. Maca nánnabe cadi guiráʼ diʼ ca xpinni Cristu que riníʼ íquecaʼ casi riníʼ íquebe, purtiʼ nuu de laacabe biʼniʼ adorarcaʼ bidóʼ ante gácacaʼ xpinni Cristu, ne pur ngue para laacabe cadi jneza diʼ gó binni xiixa guendaró ni guta lu bidóʼ. Xi bíʼnibe óraque yaʼ.

¹⁵ Pablu guníʼ: «Laanu pa ma zuhuáʼ dxiichi nu la? cadi ixhacalaʼdxi nu de acané nu ca hermanu ni huaxiéʼ ru riene, ne cadi guni nu ni chuʼlaʼdxi si nu, nin Cristu qué ñuni di ni gucalaʼdxi laa si» (Romanos 15:1, 3). Nga racané laanu guiníʼ ique chaahuinu xi gúninu para cadi guchiiñaʼ cani gúninu xconciencia sti binni, cásica biʼniʼ Jesús. Pablu bizeeteʼ sti biaje maʼ qué ziuuruʼ dxi gó beela purtiʼ zándaca gueeda guchee ti xpinni Cristu pur ni guni, purtiʼ laaca guti Cristu pur laabe (biindaʼ 1 Corintios 8:13 ne 10:23, 24, 31-33).

16. Xiiñeʼ cadi galán guininu mal de ca xpinni Cristu ora gúnicaʼ xiixa ni cadi jneza para laanu.

 ¹⁶ Xi naquiiñeʼ gúninu pa ti xpinni Cristu guni xiixa ni cadi jneza para laanu yaʼ. Cadi galán diʼ guininu mal de laabe, purtiʼ qué zanda diʼ guiníʼ íquebe casi riníʼ íquenu (biindaʼ Romanos 14:10). Dios bidii laanu conciencia para guidúʼyanu pa cayúninu ni jneza ne cadi para guidúʼyanu paraa cuchee xcaadxi. Galán guietenaláʼdxinu ca diidxaʼ ni guníʼ Jesús riʼ: «Cadi gudxiiba lu donda ique stobi, ti qué quiba donda ique luʼ» (Mateo 7:1). Nin ti xpinni Cristu cadi naquiiñeʼ tinde diidxaʼ purtiʼ si tuuxa cayuni xiixa ni cadi jneza para laa. Nga runi, caquiiñeʼ gannaxhiisaanu ti ganda chuʼnu tobi si ne cadi tíndenu (Romanos 14:19).

17. Xi maʼ bizaaca né xconciencia stale binni.

¹⁷ Guidúʼyanu xi gudxi apóstol Pedru ca xpinni Cristu de dxiqué: «Lagapa xconciénciatu nayá» (1 Pedro 3:16, TNM). Galán nga gápanu xconciéncianu nayá nezalú Dios, peru stale binni qué gápadicaʼ xconciénciacaʼ nayá. Pablu guníʼ maʼ biguidxi xconciénciacabe «dede maʼ qué racaná» ni (1 Timoteo 4:2). Ora gucaacabe fierru yuze la? rucaacabe ni né ti guiibaʼ ndaʼ ni ruzaaquiʼ guidi ládime ne ra guicá ni rati beela ladi yuze ca. Zacaca nga reeda gaca xconciencia stale binni: casi ñaca rati ni purtiʼ maʼ qué racaná diʼ ni ora gúnicabe ni cadi jneza. Maʼ qué ruchiiñaʼ diʼ ni laacabe ora gucheecabe ne qué rusietenalaʼdxiʼ diʼ ni laacabe pa nápacabe donda ne maʼ qué rituí diʼ lúcabe. Ne modo nabánicabe ca rusihuinni ni maʼ qué lica rucaa íquecabe gúnicabe ni jneza.

18, 19. 1) Xi naquiiñeʼ gúninu ora nisi maʼ caníʼ íquenu de xiixa ni cadi jneza bíninu. 2) Xi zanda gúninu pa qué gusaanaʼ de guchiiñaʼ xconciéncianu laanu neca maʼ guca arrepentirnu.

¹⁸ Stale biaje nisi maʼ caníʼ íquenu de xiixa ni cadi jneza bíninu. Ora chuʼnu zacá casi ñaca cayabi xconciencianu laanu maʼ bicheʼnu. Pa gucaʼdiáganu ni gabi ni laanu ne gaca  arrepentirnu la? zutiidilaʼdxiʼ Dios stóndanu nin ñaca ni ti pecadu jma naroʼbaʼ. Zacapeʼ bizaaca rey David. Bitiidilaʼdxiʼ Dios stóndabe purtiʼ guca arrepentirbe de guidubi ladxidoʼbe, neca nabé malu cani bíʼnibe. Ne bihuinni guca arrepentirbe purtiʼ guca nanaláʼdxibe ca cosa malu bíʼnibe que ne gudixhe íquebe maʼ qué ziuuruʼ dxi gucheenebe ley stiʼ Dios. Zaqué bidiibe cuenta naca Jiobá ti Dios nachaʼhuiʼ ni nuuca listu para gutiidilaʼdxiʼ donda (Salmo 51:1-19; 86:5). Pa nánnanu maʼ guca arrepentirnu ne maʼ bitiidilaʼdxiʼ Jiobá stóndanu, xi zanda gúninu pa ruchiiñaruʼ xconciéncianu laanu ne rituiruʼ lunu yaʼ.

¹⁹ Pa maʼ guca arrepentirnu ne cayuubaruʼ ladxidoʼno la? galán quixhedxinu ni ra gánnanu jma nandxóʼ Jiobá que cani runi sentirnu. Ne ora nuunu zacá naquiiñeʼ gúninu cani rábinu binni guni: «Naquiiñeʼ guietenaláʼdxinu nadxii  Jiobá laanu ne gánnanu maʼ bitiidiláʼdxibe stóndanu» (biindaʼ 1 Juan 3:19, 20). Ora maʼ gastiʼ cuchiiñaʼ xconciéncianu, zatadxí ladxidoʼno ne ziuʼnu nayecheʼ, neca nagasi huaxiéʼ si binni runi sentir zacá. Stale binni ni biʼniʼ cosa malu dxiqué yanna maʼ gastiʼ qué ruchiiñaʼ laacaʼ ne maʼ cayúnicaʼ ni ná Jiobá né ti conciencia nayá (1 Corintios 6:11).

20, 21. 1) Xi para guca libru riʼ. 2) Xi bisaana Dios guni ca xpinni Cristu laasicaʼ, ne ximodo iquiiñenu ni.

²⁰ Libru riʼ guca ni para gacané ni laanu chuʼnu nayecheʼ ne gápanu ti conciencia nayá lu ca últimu dxi ra cudxíʼlunu guiráʼ guendanagana nuu ndaaniʼ guidxilayú riʼ. Dxandíʼ, cadi cuzeeteʼ diʼ ni guiráʼ ley ne conseju ni caquiiñeʼ gúninu lu xquendanabáninu. Laaca cadi cayabi diʼ ni laanu xi caquiiñeʼ gúninu lu cada cosa ni riguixhe íquenu gúninu. Ni jma  cuzeeteʼ ni nga ximodo gúninu ni na Stiidxaʼ Dios lu xquendanabáninu para ganda gusíʼdinu xconciéncianu ne gápanu ni nayá. Ley ni bidii Dios Moisés que gudixhe ni xi naquiiñeʼ guni ca israelita que, peru ley ni gudixhe Cristu jma rucaa ni binni guʼyaʼ pa jneza ni chiguni ne chinanda guiráʼ conseju stiʼ Biblia (Gálatas 6:2). Nánnanu rudii Jiobá lugar laasinu quixhe íquenu xi gúninu. Peru Biblia rabi laanu cadi purtiʼ si zanda gúninu ni gacaláʼdxinu la? gúninu cosa malu, sínuque iquiiñenu ni para gusihuínninu pabiáʼ nadxiinu Jiobá (1 Pedro 2:16).

²¹ Dxi bizulú binibiaʼluʼ Jiobá, de dxiqué bizulú bibániluʼ jma galán. Para cadi gucheeneluʼ laabe la? caquiiñeʼ guni orarluʼ ti gánnaluʼ ximodo chinándaluʼ ca conseju stiʼ Biblia ne guʼnuʼ ni na cani. Ne ora maʼ cayuʼnuʼ cani zannuʼ «uná nga jneza ne uná nga ni cadi jneza» (Hebreos 5:14). Ora maʼ bisiidiʼ chaahuiluʼ xconciéncialuʼ ca conseju stiʼ Biblia óraca huaxa zacané ni lii. Ne cásica racané ti brújula tuuxa ni zeʼ biaje, zacaca zacané xconciéncialuʼ lii ti gannuʼ xi guʼnuʼ, ne zacané ni lii guʼnuʼ ni jneza ti ganda gusiécheluʼ Bixhózeluʼ ni nuu guibáʼ. Ne cadi guixéleluʼ de Dios ni nadxii lii.