Jehosafat nga ti rey ni biʼniʼ mandar Judá ni binitilú ca altar stiʼ dios Baal ne ca bidóʼ guyuu ndaaniʼ xquidxi. Cumu nuube gunibiáʼ ca binni de guidxi que ca ley stiʼ Jiobá la? ngue runi biseendabe ca príncipe ne ca levita ndaaniʼ guidubi guidxi Judá para gusiidicaʼ guidxi que ca ley stiʼ Jiobá.

Bidxibi ca guidxi ni guyuu gaxha de Judá que nucaalucaʼ laacabe purtiʼ nánnacaʼ zacané Jiobá xquidxi. Dede rinecaʼ regalu para rey Jehosafat. Peru ca binni de Ammón, Moab ne xcaadxi guidxihuiiniʼ nuu Seír yetíndenecaʼ ca binni de Judá. Gunna Jehosafat caquiiñeʼ gacané Jiobá laa. Ngue runi bichíñabe guiráʼ hombre, gunaa ne xcuidi ndaaniʼ guidxi Jerusalén. Ne bíʼnibe ti oración nezalucaʼ: «Jiobá, pa qué gacaneluʼ laadu qué zanda guni ganardu. Canábadu lii, gábiluʼ laadu xi gúnidu».

Bicaadiaga Jiobá oración stiʼ Jehosafat ne bicabi laabe: «Cadi guidxíbiluʼ, naa zacaniáʼ laatu. Laguzuhuaa lugar stitu, laguzuhuaadxí ne laguuyaʼ modo chigulaʼyaʼ laatu». ¿Ximodo gulá Jiobá laacabe yaʼ?

Sti dxi que, gulí Jehosafat caadxi hombre ni ruundaʼ ne gúdxibe laacaʼ sanírucaʼ lú ejércitu que. Bireecabe de Jerusalén ne zécabe lugar ra ridinde ca soldadu que, lugar que lani Tecoa.

Nayecheʼ ne nadipaʼ cayuundaʼ ca hombre que para Jiobá. Laga cadinde Jiobá pur xquidxi. Bichebe lú ca ammonita ne ca moabita, ne gudindesaacaʼ. Guiracaʼ gúticaʼ. Peru gupa Jiobá ca binni de Judá, ca soldadu ne ca sacerdote. Gunna guiráʼ ca guidxi nuu gaxha de Judá ni biʼniʼ Jiobá ne bidiicaʼ cuenta rápabe xquídxibe de ca enemigu sticaʼ. ¿Ximodo rulá Jiobá xquidxi yaʼ? De stale modo. Laabe cadi caquiiñebe gacané binni laabe.