Ca binni bibani Egipto, ni zá de familia stiʼ Jacob biree lácabe israelita. Despué de guti Jacob ne José, bizulú biʼniʼ gobernar ti Faraón cubi. Bidxibi Faraón riʼ ca israelita purtiʼ zeʼ dxi ziyácacaʼ jma nadipaʼ que ca egipciu. Ngue runi bíʼnibe laacaʼ esclavu. Bicaabe laacaʼ gúnicaʼ ladríu ne gúnicaʼ dxiiñaʼ layú. Neca zeʼ dxi jma feu biʼniʼ tratar ca egipciu ca israelita, zeʼ dxi zidálecaʼ. Cumu qué ñuulaʼdxiʼ Faraón ngue la? biʼniʼ mandar guuticabe ca hombrehuiiniʼ israelita ni deruʼ gule, peru cadi guuticabe ca dxaapahuiiniʼ. ¿Ruxuíʼluluʼ pabiáʼ bidxibi ca israelita ora gúnnacaʼ ndiʼ la?

Gupa ti gunaa israelita ni biree lá Jokébed ti baʼduhuiiniʼ guizáʼ sicarú. Para ganda gulabe baʼduhuiiniʼ que guluube laa ndaaniʼ ti dxumi ne bicaachibe ni lade caadxi guixi gáʼ nuu ndaaniʼ guiiguʼ Nilo. Míriam, bizanaʼ baʼduhuiiniʼ que, biaana gaxha de raqué para guʼyaʼ xi guizaaca.

Ora zigaze xiiñidxaapaʼ Faraón ndaaniʼ guiiguʼ que, biiyaʼ ti dxumi. Ne cayuunaʼ ti  baʼduhuiiniʼ ndaaniʼ ni ne biabe laa. Para gunabadiidxaʼ Míriam laabe: «¿Ñee zaa guyubeʼ ti gunaa para gusiniisi baʼduhuiiniʼ riʼ pur lii la?». Laabe bicábibe zaa, ne oraqueca yecaa Míriam jñaa. Xiiñidxaapaʼ Faraón que gudxi Jokébed: «Yené baʼduhuiiniʼ riʼ, gupa laabe ne naa zaguixe lii pur gápaluʼ laabe».

Biniisi si hombrehuiiniʼ que, yené Jokébed laabe ra nuu xiiñidxaapaʼ Faraón. Laa gule lá hombrehuiiniʼ que Moisés ne bisiniisi laabe casi xiiñiʼ. Biniisi Moisés casi príncipe ne ñanda ñapa guiráʼ ni ñacalaʼdxiʼ. Peru qué ñuu dxi nusiaandabe Jiobá. Gunna Moisés cadi egipciu diʼ laa sínuque israelita, ngue runi gulibe guni adorarbe Jiobá.

Dxi napa Moisés 40 iza, gudixe ique gacané binni xquidxi. Ti dxi, biiyabe caguiñe ti egipciu ti israelita. Ora bíʼyabe ngue, gudíñebe egipciu que dede ra biitibe laa, ne bicaachibe laa ndaaniʼ yuxi. Ora gunna Faraón ni bíʼnibe, gucalaʼdxiʼ ñuuti laabe, peru bixooñeʼ Moisés ne zeʼ Madián. Raqué gupa Jiobá laabe.