Ndaaniʼ ti guidxi biree lá Uz, bibani ti hombre ni biʼniʼ adorar Jiobá. Biree labe Job, nabé gúpabe bueltu ne gúpabe ti familia naroʼbaʼ. Gúcabe nachaʼhui ne gucanebe ca pobre, ca viuda, ne ca xcuidi ni maʼ guti jñaa ne bixhoze. Biʼniʼ Job stale cosa galán. ¿Ñee raʼbuʼ qué ñuu dxi nidxagalube guendanagana purtiʼ si nacháʼhuibe la?

Qué ganna diʼ Job pa cayuuyadxí Binidxabaʼ laa. Gudxi Jiobá Binidxabaʼ: «¿Maʼ biiyaluʼ Job, siervu stinneʼ la? Gástiruʼ stobi casi laabe lu Guidxilayú. Ruzuubabe diidxaʼ ne qué rúnibe cosa malu». De raqué bicabi Binidxabaʼ: «Ximodo qué guzuubabe stiidxaluʼ, rápaluʼ laabe, riguuluʼ ndaayaʼ laabe, rudiiluʼ laabe maniʼ ne layú... Guxhá laabe guiráʼ ni guʼyuʼ ne maʼ qué ziuu dxi guni adorarbe lii». Para bicabi Jiobá laabe: «Zanda gutiidiluʼ laabe intiica prueba, peru runeʼ prohibir lii guutiluʼ laabe». Bidii Jiobá lugar gutiidiʼ Binidxabaʼ Job prueba, ¿nánnaluʼ xiñee la? Purtiʼ nuube seguru qué zusaana Job de guzuubaʼ stiidxabe.

Bitiidiʼ Binidxabaʼ Job stale prueba para guniná laabe. Primeru biquiiñebe caadxi binni ni binibiáʼcabe laacaʼ casi sabeu para cuánacaʼ ca yuze, ca vaca ne ca burru stibe. Laaca biquiiñebe ca caldeu para cuánacaʼ ca camellu stibe. De raqué gucuá guí ra nuu ca dendxuʼ stibe ne guti guirácame. Laaca guti ca sirviente stibe ra cayápacaʼ ca maniʼ stibe. Peru desgracia ni jma feu gudiʼdiʼ Job nga: bixiá yoo ra nuu ca xiiñibe cayocaʼ, ne guti guiracaʼ. Guizáʼ triste guyuu Job, peru qué nusaana de ñuni adorarbe Jiobá.

Cumu nuuruʼ Binidxabaʼ guniná Job la? guleebe caadxi guiʼdxuʼ guidubi ladi. Ca guiʼdxuʼ riʼ guizáʼ bininá cani laabe. Qué ñánnabe xiñee  cazaacabe stale cosa malu, neca zaqué qué nusaanabe de ñuni adorarbe Jiobá. Nabé biecheʼ Dios ora biʼyaʼ ni bíʼnibe que.

Despué, biseendaʼ Binidxabaʼ chonna hombre para gutiidicaʼ prueba Job. Laacaʼ gúdxicaʼ laabe: «De seguru bicheeluʼ ne nuuluʼ gucaachiluʼ ni, nga runi cayuni castigar Dios lii». Para bicabi Job laacabe: «Qué huayuneʼ cosa malu». Peru despué guníʼ íquebe napa Jiobá donda pur ca guendanagana cadíʼdibe ne guníʼ íquebe cayaca Dios injusto né laabe.

Ti joven ni biree lá Elihú binadiaga guiráʼ ni cayábicabe Job, neca zaqué qué niníʼ gastiʼ. Peru despué guniʼbe: «Cadi jneza ni caniʼtu ca. Guizáʼ nachaʼhuiʼ Jiobá, jma que biaʼ riníʼ íquenu, qué ziuu dxi gúnibe xiixa cosa malu. Ruuyabe guiráʼ ni ne racanebe binni ora cadiʼdiʼ lu guendanagana».

Laaca guniʼné Jiobá Job. Gúdxibe laa: «¿Paraa nuuluʼ ora bineʼ guibáʼ ne Guidxilayú? ¿Xiñee naluʼ napaʼ donda pur ni cazaacaluʼ pue? Riniʼluʼ sin gánnaluʼ xiñee rizaaca ca cosa ca». Biene Job bichee ne guníʼ: «Biʼniʼ perdonar naa. Bicheeʼ pur ni gunieeʼ. Huayunadiagaʼ siáʼ de lii, peru yanna dxandipeʼ runebiaʼyaʼ lii ne nannaʼ zanda gúniluʼ guiráʼ ni gacaláʼdxiluʼ».

Biluxe si guiráʼ ca prueba que, bisianda Jiobá Job ne bidii laabe jma qué biaʼ gúpabe dxiqué. Stale iza bibani Job ne nayecheʼ guyuu. Guluu Jiobá ndaayaʼ laabe purtiʼ qué nusaanabe de nuzuubabe stiidxaʼ, neca guyuu ora guca ni nagana para laabe. ¿Lii yaʼ? ¿Ñee zácaluʼ casi Job ne qué zusaana de guni adorarluʼ Jiobá neca guidxaagaluluʼ intiica guendanagana la?