Gule Saulo ndaaniʼ guidxi Tarso peru gúpabe ciudadanía stiʼ Roma. Gúcabe ti fariseu ni nanna stale de ley stiʼ ca judíu ne gucananaláʼdxibe ca xpinni Cristu, dede guxubiyube ne guleebe laacaʼ de ndaaniʼ lídxicaʼ para cuʼbe laacaʼ ndaaniʼ cárcel. Ti dxi biiyabe ximodo bichá ti grupu de binni malu guié discípulo Esteban dede ra biiticabe laa.

Qué ñuu Saulo conforme guseguyoo ca xpinni Cristu ndaaniʼ guidxi Jerusalén. Ngue runi gúdxibe sumo sacerdote que guseendaʼ laabe Damasco para sanándabe ca xpinni Cristu de raqué. Ora mayaca chindá Saulo guidxi que, málasi bizaaniʼ ti biaaniʼ ra zuhuaabe, ne biábabe layú. Óraque binadiágabe ti ridxi: «Saulo, ¿xiñee canazanándaluʼ naa pue?». Para gunabadiidxaʼ Saulo: «¿Tuu lii yaʼ?». Ridxi que bicabi laabe: «Naa nga Jesús. Guyé Damasco, ne raqué zábicabe lii xi gúniluʼ». Oraqueca maʼ qué ñanda ñuuyaʼ Saulo, gupa xidé gunaazecabe nabe para chindabe ndaaniʼ guidxi que.

Ndaaniʼ guidxi Damasco guyuu ti xpinni Cristu láʼ Ananías. Lu ti visión gudxi Jesús laabe: «Guyé ra lidxi Judas, ndaaniʼ calle láʼ Recta, ne biyubi Saulo». Bicabi Ananías: «Huayunadiagaʼ stale cosa de hombre riʼ Señor. Laabe cuseguyoobe ca discípulo stiluʼ». Peru gudxi Jesús laabe: «Guyé ra nuube, purtiʼ maʼ gulieeʼ Saulo para guni predicar ca noticia galán stiʼ Dios ndaaniʼ stale guidxi».

Ngue runi guyé Ananías ra nuu Saulo ne gudxi laabe: «Saulo, bicheʼ, biseendaʼ Jesús naa ra nuuluʼ para ganda gúʼyaluʼ sti biaje». Óraque biiyaʼ Saulo sti biaje. Biziidiʼ Saulo stale cosa de Jesús ne gúcabe tobi de ca xpinni. Guyuunísabe ne bizulú biʼniʼ predicarbe ndaaniʼ sinagoga né xcaadxi xpinni Cristu. ¿Ñee ruxuíʼluluʼ pabiáʼ bidxagayaa ca judíu ora bíʼyacaʼ laabe cusiidibe binni de  Jesús la? Dede gunabadiidxacaʼ: «¿Ñee cadi ndiʼ nga hombre ni guzananda ca discípulo stiʼ Jesús la?».

Chonna iza biʼniʼ predicar Saulo ca binni de Damasco. Gucananalaʼdxiʼ ca judíu laabe dede guníʼ íquecaʼ guuticaʼ laabe. Peru gunna ca hermanu ni cá ique ca judíu que gúnicaʼ ne gucanecaʼ laabe guxooñebe de raqué. Guluucabe laabe ndaaniʼ ti dxumi ne guleecabe laabe ruaa ti huecu nuu lu muru stiʼ guidxi que.

Ora yendá Saulo ndaaniʼ guidxi Jerusalén, gucalaʼdxiʼ niganna ca hermanu de raqué. Peru ca hermanu que bidxíbicaʼ laabe. Ngue runi ti discípulo nabé nachaʼhuiʼ láʼ Bernabé yené laabe ra nuu ca apóstol ne gúdxibe laacaʼ dxandipeʼ maʼ bichaa Saulo. Guca reunir Saulo né ca hermanu de Jerusalén ne bizulú biʼniʼ predicarbe né stale gana ca noticia galán stiʼ Reinu stiʼ Dios. Ra gudiʼdiʼ dxi, binibiáʼ binni laabe casi Pablo.