ÑEE runibiaʼluʼ oración ni bisiidiʼ Jesús ca discípulo stiʼ la?... Pa coʼ la? zanda gúʼndanu ni ndaaniʼ Biblia, lu Mateu 6:9-13. Oración riʼ stale tu runibiáʼ ni casi padrenuestro. Ti ndaa de laani na sicaríʼ: «Idxiña dxi guni mandar [reinu sti]luʼ». Ñee nannuʼ xii nga Reinu stiʼ Dios la?...

Ndaaniʼ Biblia la? ti reinu nga ti modo raca mandar. Ca dxi stinu riʼ laaca nuu stuudxi modo raca mandar. Stale de laani la? ni runi mandar ti guidxi ca nga presidente. Peru lu gobiernu ni napa Dios, ni rábicabe Reinu riʼ la? ni chiguni mandar lu ni ca nga ti Rey.

Ñee nannuʼ tuu nga gulí Jiobá Dios para gaca Rey lu gobiernu stiʼ la?... Xiiñibe, Jesucristu. Xiñee naca Jesús ti Rey ni jma  nuu xpiaaniʼ, jma que sti hombre ni nibícabe yaʼ.... Purtiʼ cumu dxandíʼ nadxiibe Bixhózebe la? nabé bíʼnibe ni jneza.

Ante gale Jesús Belén la? Biblia maca guníʼ zeedabe lu Guidxilayú ne zácabe ti xaíque ni gulí Dios. Gúʼndanu xiná Isaías 9:6, 7: «Purtiʼ maʼ gule ti baʼduhuiiniʼ para laanu, tuuxa bidii laanu ti xiiñiʼ; ne guendaruni mandar ca ziuuni lu xíʼquebe. Ne zaree labe [...] Príncipe ni rudii Guendariuudxi. Dede ra ugaanda guni mandarbe ne guendariuudxi qué ziuu diʼ dxi guiluxe» (cursiva stidu; laguuyaʼ ni cá ñee yaza stiʼ La Biblia de las Américas).

Ñee nannuʼ xiñee rábicabe «Príncipe» ni chiguni mandar lu Reinu stiʼ Dios ca la?... Purtiʼ ti príncipe nga xiiñiʼ ti rey, ne Jesús la? nácabe Xiiñiʼ Rey ni Jma Risaca, Jiobá. Peru Jiobá laaca maʼ gulibe Jesús para gaca Rey stiʼ Reinu stibe, ni chiguni mandar Guidxilayú riʼ pur ti mil iza (Apocalipsis 20:6). Despué de guyuunisa Jesús la? «bizulú byuíʼ né be binni stiidxa Dios, rabi be laacaʼ: Lainaba perdón Dios purti ma zeda dxiña dxi guni mandar[be]» (Mateo 4:17).

Xiñee raʼbuʼ gudxi Jesús ca binni nuu raqué maʼ zeeda guidxiña Reinu que yaʼ.... Purtiʼ Rey ni chiguni mandar guibáʼ despué que, nuu ládecabe. Nga runi, Jesús gudxi laacabe: «Ma cayuni mandar Dios lade tu» (Lucas 17:21). Ñee qué ñuuláʼdxiluʼ ñápaluʼ Rey ni gulí Dios gaxha de lii dede ñanda nigápiluʼ laabe la?...

Yanna, gudxi naa: xi dxiiñaʼ guizáʼ risaca beeda guni Jesús lu Guidxilayú riʼ yaʼ.... Laapebe bicábibe ca diidxaʼ ca ra guniʼbe: «Napa xidé chaa xcaadxi guidxi. Chi güe nia binni modo runi mandar Dios, purti para nga bendáʼ»  (Lucas 4:43). Peru Jesús gúnnaca qué zanda diʼ gucheechebe diidxaʼ ca laasibe. Ngue runi, xi bíʼnibe yaʼ....

Jesús yenebe caadxi binni yegucheechenebe laacaʼ diidxaʼ para guluiʼbe laacaʼ ximodo gúnicaʼ dxiiñaʼ que. Cani bisiidibe primé nga ca doce apóstol stibe (Mateo 10:5, 7). Peru, ñee laasicabe nga bisiidiʼ Jesús gucheechecabe diidxaʼ la? Coʼ, Biblia na laaca bisiidibe xcaadxi discípulo. Despué biseendabe setenta de laacaʼ checaʼ chupa chupa. Xi bisiidicabe binni yaʼ.... Jesús gudxi laacabe: «Lagabi laacabe ma zeda dxiña dxi guni mandar Dios» (Lucas 10:9). Zacá la? ca binni que biziidicaʼ de gobiernu stiʼ Dios.

Maʼ xadxí, ndaaniʼ guidxi Israel ni guyuu dxiqué, cani nacubi gácacaʼ rey riuucaʼ ndaaniʼ guidxi que maʼ dxíʼbacaʼ ti burruhuiiniʼ para guʼyaʼ binni laacaʼ. Ngueca nga biʼniʼ Jesús ora guyebe Jerusalén últimu biaje stibe. Nánnanu Jesús nga chigaca rey lu Reinu stiʼ Dios ca, peru, nouʼ guyuulaʼdxiʼ ca binni que gácabe Rey sticaʼ la?...

Stale binni bizulú bichiaa xhaba neza ra zidíʼdibe. Xcaadxi la? bichuugucaʼ ziña ne guláʼquicaʼ ni ra zidíʼdibe. Zaqué bisihuínnicabe racaláʼdxicabe gaca Jesús Rey stícabe. Nácabe: «Cuʼ Dios ndaaya ni biseenda gueda tí de rey». Peru cadi guiráʼ diʼ ca binni que biéchecaʼ. Ya, nuu tuudxi xaíque stiʼ ca religión que dede gúdxicaʼ Jesús: Gudxi ca discípulo stiluʼ guiaanadxicaʼ (Lucas 19:28-40).

Gaayuʼ gubidxa despué, gunaazecabe Jesús ne yenécabe laa ra palaciu stiʼ xaíque, ni láʼ Poncio Pilatu. Ca xhenemigu Jesús bigaanicaʼ donda laabe ne nacaʼ caniʼbe nácabe rey ne cucaalube gobiernu stiʼ Roma. Pilatu gunabadiidxaʼ laabe, peru laabe bisihuínnibe cadi nuudibe guni mandarbe laacaʼ. Gúdxibe laa: «Cadi beda aca diaʼ rey ndaani guidxilayú riʼ» (Juan 18:36).

 Oraqueruʼ biree Pilatu ne gudxi ca binni que qué nidxéladibe gastiʼ cosa malu luguiáʼ Jesús. Peru laacabe maʼ qué ninádicabe ñaca Jesús Rey stícabe, ne maʼ qué ninácabe nilaabe (Juan 18:37-40). Despué de guniʼné Pilatu Jesús sti biaje la? gúnnaca qué ñuni diʼ Jesús nin ti cosa malu, últimu guleebe Jesús ne guniʼbe: «Rarí nuu rey stitu». Peru ca binni que bicaacaʼ ridxi: «¡Yené laabe! ¡Yeucaa laabe lu [yaga]!».

Pilatu gunabadiidxaʼ: «Rey stitu ucaa lu [yaga] la?», óraque bicabi ca xaíque ni ruzaaquiʼ guʼxhuʼ que nacaʼ: «César si nga rey stidu, ne iruti ruʼ». Ñee riníʼ íqueluʼ ndiʼ la? Ca ni ruzaaquiʼ guʼxhuʼ que gunda  bicaacabe guidubi guidxi que gucaalucaʼ Jesús (Juan 19:1-16).

Ca dxi stinu riʼ laaca zacaca raca. Stale binni qué racaláʼdxicaʼ gaca Jesús Rey sticaʼ. Zándaca guiníʼcabe runi crécabe Dios, peru qué nácabe gabi Dios ne Cristu laacabe xi riquiiñeʼ gúnicabe. Jma nga riuláʼdxicabe cuícabe tu guni mandar laacabe.

Yanna, laanu yaʼ. Ora rizíʼdinu de Reinu stiʼ Dios ne guiráʼ cosa sicarú chigúnibe, cadi dxandíʼ rannaxhiinu Dios la?... Yanna, ximodo zanda gusihuínninu nadxiinu laabe ne racaláʼdxinu guni mandar Reinu stibe laanu yaʼ....

Ra chinándanu ejemplu stiʼ Jesús. Ximodo bisihuinni Jesús nadxii Jiobá yaʼ.... Laabe guniʼbe: «Qué riaana dxie de gune ni riulaʼdxi be» (Juan 8:29). Ya, Jesús beeda lu Guidxilayú para guni ni na Dios ne para «gunduuxe dxiiña stiʼ[be]» (Hebreos 10:7; Juan 4:34). Guidúʼyanu xi bíʼnibe ante guzulú gucheechebe diidxaʼ.

Jesús guyé ra nuu Juan ni Ruguunisa ndaaniʼ guiiguʼ Jordán. Guyuusicabe guirópacabe ndaaniʼ nisa que la? Juan guluu guidubi naca Jesús ndaaniʼ nisa, óraque guleebe laa. Nannuʼ xiñee guluunisa Juan laabe la?...

 Purtiʼ Jesús gunabaʼ laabe gúnibe ni. Peru ximodo nánnanu gucalaʼdxiʼ Dios chúʼnisa Jesús yaʼ.... Purtiʼ ora biree Jesús ndaaniʼ nisa que, binadiágabe ridxi stiʼ Dios de guibáʼ na: «Lii nga Xiiñe ni nadxiee ne ni rusieche naa». Dios laaca biseendaʼ espíritu santu stiʼ casi ti paloma luguiáʼ Jesús. Ora guyuunisa Jesús la? bisihuínnibe racaláʼdxibe gúnibe ni na Jiobá biaʼ dxi guibánibe (Marcos 1:9-11).

Lii la? nahuiiniruluʼ, peru xi gúniluʼ ora guiniisiluʼ yaʼ.... Ñee zinándaluʼ ejemplu stiʼ Jesús ne ziuunisaluʼ la?... Naquiiñeʼ gúniluʼ ni, purtiʼ Biblia na bisaanabe ti ejemplu para chinándanu laabe ne stale cuidadu ne guyachaahuinu laabe (1 Pedro 2:21). Ora chuʼnísaluʼ la? zusihuínniluʼ dxandipeʼ racaláʼdxiluʼ guni mandar Reinu stiʼ Dios lii. Peru cadi ngasi diʼ ni.

Naquiiñeʼ gúninu guiráʼ ni bisiidiʼ Jesús. Laabe guniʼbe cadi naquiiñeʼ chinándanu binni «guidxilayú». Ñee cuzúʼbanu diidxaʼ nga pa gúninu ni runi binni guidxilayú la? Jesús ne ca apóstol stiʼ bixálecabe de laani (Juan 17:14). Xi bíʼnicabe yaʼ.... Guníʼcabe de Reinu stiʼ Dios. Nga nga dxiiñaʼ ni jma bisaca lu xquendanabánicabe. Ñee zanda gúninu zacaca la?... Zanda pue, ne zúninu ni pa guinábanu Dios de guidubi ladxidoʼno guseendaʼ Reinu stiʼ.