Guiráʼ ladu caníʼ binni de Jesús. Neca zitu nuu Jesús, yeyubi stale binni laabe para gucaadiágacaʼ ni cusiidibe ne gúʼyacaʼ ca milagru rúnibe. Peru gudiʼdiʼ si chupa chonna gubidxa, bibiguetaʼ Jesús Capernaúm, guidxi ra guyuu jma xadxí ora biʼniʼ xhiiñaʼ Dios, ne nagueendaca gunna binni nuube guidxi riʼ, ni riaana gaxha de nisadóʼ stiʼ Galilea. Ngue runi, guyé stale binni yeguuya laabe ndaaniʼ yoo ra nuube. Lade ca binni riʼ nuu fariseu ne maestru de Ley ni zeeda de guidubi Galilea ne Judea, dede né Jerusalén.

Nuu stale binni ndaaniʼ yoo que ne maʼ qué ganda chuʼ nin stobi, nin ra puertaʼ yoo que. Óraque bizulú Jesús biʼniʼ predicar laacabe «stiidxaʼ Dios» (Marcos 2:2). Despué, zuuyacabe ti cosa ni zadxagayaacabe. Ni chiguizaaca riʼ, zusihuínnini napa Jesús poder para cuee ni runiná binni ne para gusianda guiráʼ tu gacalaʼdxiʼ.

Laga cayuni predicar Jesús ca binni que, beedanécabe ti hombre ni qué rizá nexheʼ lu ti camilla, nuáʼ tapa hombre laabe. Peru cumu dxaʼ binni ndaaniʼ yoo que la? qué ganda chindanécabe hombre riʼ ra nuu Jesús (Marcos 2:4). ¡Guizáʼ triste guyuu ca hombre que! Peru cuyúbicaʼ modo chindacaʼ ra nuu Jesús. Gudxíʼbacabe ique yoo que, bíʼnicabe ti huecu ique ni ne gundétecabe camilla ra nexheʼ hombre ni qué rizá que.

¿Ñee bidxiichi Jesús pur ni bíʼnicabe que la? Coʼ, qué nidxiichibe. Nabé bidxagayaabe fe ni napa ca hombre que ne gúdxibe hombre ni qué rizá que: «Maʼ guca perdonar ca pecadu stiluʼ» (Mateo 9:2). Peru ¿zanda guni perdonar Jesús pecadu la? Ca escriba ne ca fariseu que nacaʼ qué zanda gúnibe ni, ne guníʼ íquecaʼ: «¿Xiñee caníʼ hombre riʼ zacá pue? Cayuube lugar stiʼ Dios. ¿Ñee cadi Dios si nga zanda guni perdonar pecadu la?» (Marcos 2:7).

Cumu bidii Jesús cuenta xi caníʼ íquecabe la? gudxi laacabe: «¿Xiñee caniʼtu zacá ndaaniʼ ladxidoʼto pue? ¿Xii nga jma fácil? ¿Gabeʼ hombre ni qué rizá riʼ “maʼ guca perdonar ca pecadu stiluʼ la?”, o gabeʼ laa “biasa, gucuaa camilla stiluʼ ne guzá”?» (Marcos 2:8, 9). Dxandíʼ, zanda guni perdonar Jesús ca pecadu stiʼ hombre que pur sacrificiu ni chiguni ora gudii xquendanabani.

Ngue runi, bisihuinni Jesús nezalú guiráʼ binni, ne dede nezalú ca binni ni riníʼ mal de laabe, nápabe autoridad para guni perdonarbe pecadu lu Guidxilayú. Bibiguétabe ra nuu hombre ni qué rizá que ne gúdxibe laa: «Biasa, gucuaa camilla stiluʼ, ne guyé ra lídxiluʼ». Oraqueca, nezalú guiráʼ ca binni que, biasa hombre que, gundisaʼ camilla stiʼ, ne zizá ora biree. Bidxagayaa ca binni que ne bisisácacaʼ Dios, ne caniʼcaʼ: «Qué huayuu dxi guidúʼyadu xiixa zacá» (Marcos 2:11, 12).

Risaca gánnanu bichaaga Jesús pecadu né guendahuará, ne bichaagabe gaca perdonar binni né chuʼ nazaaca. Rusiidiʼ Biblia, bichee primé hombre, Adán, nga runi guiranu raca huaranu ne rátinu. Peru ora guni mandar Reinu stiʼ Dios la? zuni perdonar Jesús ca pecadu stiʼ guiráʼ binni nadxii Dios ne ruzuubaʼ stiidxaʼ. Dxi ca, maʼ qué ziuuruʼ dxi gaca huará binni (Romanos 5:12, 18, 19).