Biree si Jesús ne ca discípulo stiʼ de Galilea, guyecaʼ chericaʼ guiiguʼ Jordán ne zecaʼ ladu gueteʼ neza Perea. Últimu biaje guyé Jesús Perea, gúdxibe ca fariseu ximodo ruuyaʼ Dios gaca divorciar tuuxa de xheelaʼ (Lucas 16:18). Peru bibiguetaʼ guniʼcaʼ de laani para gutiidicaʼ Jesús prueba.

Moisés bicaa zanda gaca divorciar ti hombre de xheelaʼ pa guʼyaʼ xiixa ni cadi jneza de laabe (Deuteronomio 24:1). Peru gadxé gadxé modo ruuyaʼ binni divorcio. Nuu tu laa ná zanda gaca divorciar tuuxa pur intiica cosa. Ngue runi gunabadiidxaʼ ca fariseu Jesús: «¿Ñee jneza gaca divorciar ti hombre de xheelaʼ pur intiica si cosa la?» (Mateo 19:3).

Guizáʼ jneza modo bicabi Jesús laacabe purtiʼ lugar de ñabi laacabe chinándacabe ni riníʼ binni, bisiene laacabe xii ngue ni cá ique Dios dxi bizáʼ guendaxheelaʼ: «¿Ñee qué huayuundatu ra ná dede dxi bizáʼ Dios binni, bíʼnibe hombre ne gunaa la? Ne guniʼbe: “Nga runi, zusaana hombre bixhoze ne jñaa ne ziaanané xheelaʼ, ne zaca guirópacaʼ tobi si”. Zacá maʼ cadi chúpacabe, sínuque maʼ tobi si. Nga runi, ni maʼ bichaaga Dios, cadi guchiá nin ti hombre» (Mateo 19:4-6). Ngue runi, ora bicheelaʼ Dios Adán ne Eva bisihuinni cadi naquiiñeʼ guilaa ti guendaxheelaʼ.

Peru cadi nuu diʼ ca fariseu de acuerdu, ne gunabadiidxacaʼ laabe: «Yanna, ¿xiñee biʼniʼ mandar Moisés gudii ti hombre ti certificadu de divorcio xheelaʼ para gusaana laabe yaʼ?» (Mateo 19:7). Para bicabi Jesús: «Cumu biiyaʼ Moisés naguidxi ladxidoʼto la? bidii lugar gaca divorciartu de xheelatu. Peru cadi zacá guca ni dxi bizulú ni» (Mateo 19:8). Ora guníʼ Jesús «dxi bizulú ni», cadi caniʼbe de dxi bibani Moisés, sínuque dxi bicheelaʼ Dios primé hombre ne primé gunaa, ndaaniʼ jardín ni guyuu Edén.

De raqué, bizeeteʼ Jesús ti cosa nabé risaca: «Naa cayabeʼ laatu, guiráʼ hombre gaca divorciar de xheelaʼ —peru zanda gaca ni pur ti pecadu sexual [lu diidxaʼ griegu, pornéia]— ne guichaganáʼ sti gunaa la? maʼ guendarapa jnadxii nga» (Mateo 19:9). Nga runi, casi ná Biblia, zanda gaca divorciar tuuxa de xheelaʼ pa tobi de laacabe biʼniʼ ti pecadu sexual.

Ngue runi, ná ca discípulo que: «Pa zacá nga guibaniné hombre xheelaʼ la? jma galán cadi guichaganáʼ» (Mateo 19:10). Nga runi, pa nuu tuuxa cá ique guichaganáʼ, naquiiñeʼ gusisaca guendaxheelaʼ, purtiʼ cadi para chupa gubidxa si ni.

Despué, guníʼ Jesús de ora naca binni solteru, ne bisiene nuu caadxi maca rale casi eunuco, purtiʼ qué randa rápacaʼ relación sexual. Ne nuu tu laa rúnicabe laacaʼ eunuco, ne maʼ qué randa rápacaʼ relación sexual. Ne nuu xcaadxi rucueezaʼ laaca laa para guni jma lu xhiiñaʼ Dios. De raqué, guníʼ Jesús: «Tu zanda guni nga la? [guiaanaʼ solteru] guni ni» (Mateo 19:12).

Óraque yené binni xiiñiʼ ra nuu Jesús. Peru gudindené ca discípulo laacaʼ, zándaca purtiʼ qué racaláʼdxicaʼ chuʼ tu guchiichi laabe. Ora biʼyaʼ Jesús ni cayúnicabe, bidxiichi ne gudxi laacabe: «Lagudii lugar gueeda ca xcuidihuiiniʼ ca ra nuaaʼ. Cadi gucueezatu laacabe, purtiʼ stiʼ ca ni naca casi laacabe nga Reinu stiʼ Dios. Gábecaʼ laatu, ni qué guicaa Reinu stiʼ Dios casi ti xcuidihuiiniʼ la? qué ziuu luni» (Marcos 10:14, 15; Lucas 18:15).

¡Pabiáʼ sicarú ni bisiidiʼ Jesús laanu! Para ganda guicaanu ca ndaayaʼ ni guedané Reinu stiʼ Dios, naquiiñeʼ gácanu humilde ne chuʼnu dispuestu gusiidicabe laanu, casi runi ca xcuidi. De raqué, gucuaa Jesús ca xcuidihuiiniʼ que, guluube laacaʼ ndaaniʼ nabe ne guluube ndaayaʼ laacaʼ, zacá bisihuínnibe guizáʼ nadxiibe laacaʼ. Ne laaca nadxiibe ca binni ni naca casi xcuidihuiiniʼ ne ricaa Reinu stiʼ Dios (Lucas 18:17).