1, 2. ¿Tuu nga caadxi de ca ni guca xhamigu Jehová?

¿TU NIBILUʼ para ñaca xhamíguluʼ? Zándaca nibiluʼ ti binni ni raca llevarluʼ bien, nachaʼhui ne napa cualidad ni riuuláʼdxiluʼ.

² Gulí Jehová caadxi binni ni guca xhamigu. Guca Abrahán tobi de ca xhamigu Jehová (Isaías 41:8; Santiago 2:23). Laaca guca rey David xhamigu Dios. Para Jehová la? guca David ti hombre ni bisiecheʼ ladxidoʼbe (Hechos 13:22). Ne biiyaʼ Jehová profeta Daniel casi ti binni nabé risaca (Daniel 9:23).

3. ¿Xiñee guca Abrahán, David ne Daniel xhamigu Jehová?

³ ¿Xiñee guca Abrahán, David ne Daniel xhamigu Jehová? Sicaríʼ gudxi Jehová Abrahán: «Bizuubaluʼ stiidxaʼ» (Génesis 22:18). Raca xhamigu Jehová ca binni humilde ne ni ruzuubaʼ stiidxabe. Ne dede zanda gaca xhamígube guidubi ti guidxi. Gúdxibe guidxi Israel ca diidxaʼ riʼ: «Laguzuubaʼ stiidxaʼ, ne naa zeeda gacaʼ Dios stitu, ne zácatu guidxi stinneʼ» (Jeremías 7:23). Nga runi, pa dxandíʼ racaláʼdxiluʼ gaca xhamíguluʼ Jehová, caquiiñeʼ guzuubaluʼ stiidxabe.

4, 5. ¿Ximodo racané Jehová ca xhamigu?

⁴ Nápanu ti enemigu ni napa poder ni qué racalaʼdxiʼ gaca xhamígunu Dios. Peru racalaʼdxiʼ Jehová gacané laanu ne gapa laanu (biindaʼ Salmo 55:22). Biblia ná  ruyubi Jehová modo iquiiñeʼ stipa stiʼ para gacané ca ni runi ni nabe de guidubi ladxidóʼ (2 Crónicas 16:9). Lu Salmo 32:8 riete zudii Jehová guendanuuxpiaaniʼ ne conseju galán ca xhamigu.

⁵ Cumu xhamígunu laabe la? rúninu ni nabe de guidubi ladxidoʼno ne qué rusaananu laabe neca tídinu ra jma nagana. Laaca nápanu confianza Jehová casi gupa David. Sicaríʼ guníʼ David de Jehová: «Nuube ladu derechu stinneʼ, qué ziuu dxi guniibi dxáchacabe naa» (Salmo 16:8; 63:8). ¿Xi runi Binidxabaʼ para cadi gaca xhamígunu Jehová?

6. ¿Xi riníʼ Binidxabaʼ de binni?

⁶ Lu capítulo 11 bizíʼdinu bicaalú Binidxabaʼ Jehová ne guniʼbe rusiguii. Laaca guniʼbe qué runi Jehová ni jneza, purtiʼ qué nudii lugar nibí Adán ne Eva xii nga ni jneza ne ni cadi jneza. Lu libru stiʼ Job laaca riete riníʼ Binidxabaʼ mal de ca binni ni racalaʼdxiʼ gaca xhamigu Dios. Binidxabaʼ riníʼ runi binni ni ná Dios pur ni rudiibe laacaʼ, ne cadi purtiʼ nadxiicaʼ laabe. Ne laaca guniʼbe zanda gucaabe tutiica binni gucaalú Dios. Guidúʼyanu xi zanda guizíʼdinu de Job ne pa gúcabe fiel Dios o coʼ.

7, 8. a) ¿Xi guníʼ ique Jehová de Job? b) ¿Xi guníʼ Binidxabaʼ de Job?

⁷ ¿Tuu nga guca Job? Gúcabe ti buen hombre ni bibani raca biaʼ 3,600 iza. Tiempu bibánibe, guníʼ Jehová gástiruʼ sti binni casi laabe lu Guidxilayú. Guizáʼ biʼniʼ respetar Job Jehová ne gucananalaʼdxiʼ cosa malu (Job 1:8). Para Jehová guca Job ti hombre ni dxandíʼ xhamigu.

⁸ Guníʼ Binidxabaʼ runi Job ni ná Dios purtiʼ cudii Dios guiráʼ ni caquiiñebe. Sicaríʼ gudxi Binidxabaʼ  Jehová: «¿Ñee cadi naguuluʼ ti leʼ ni culá laabe, lídxibe, ne guiráʼ ni nápabe la? Huaguuluʼ ndaayaʼ dxiiñaʼ rúnibe, ne maʼ bidale ca maniʼ stibe lu layú. Peru bisigaanáʼ ne bininá guiráʼ ni nápabe, ne zuuyaʼ dxíchiluʼ zaguudibe lii nezaluluʼ» (Job 1:10, 11).

9. ¿Xi bidii Jehová lugar Binidxabaʼ guni?

⁹ Guníʼ Binidxabaʼ runi Job ni ná Jehová pur ca cosa ni rudiibe laa. Laaca guniʼbe zanda gucaabe Job gusaana de guni ni ná Jehová. Neca qué ñuulaʼdxiʼ Jehová ni guníʼ Binidxabaʼ, bidiibe lugar laa gutiidiʼ Job prueba. Zacá zahuinni pa runi Job ni ná Dios purtiʼ nadxii laabe.

10. a) ¿Ximodo bicaalú Binidxabaʼ Job? b) ¿Xi biʼniʼ Job?

¹⁰ Primé cosa biʼniʼ Binidxabaʼ nga bicaabe binni cuanaʼ ca maniʼ stiʼ Job ne xcaadxi maniʼ que guti. Despué, biseendaʼ guutibe casi guiráʼ ca mozo stiʼ Job. Biniti Job guiráʼ ni napa. Ne últimu ni biʼniʼ Binidxabaʼ nga biseendaʼ ti bi nadipaʼ ne biitini 10 xiiñiʼ Job. Peru qué nucheené Job Jehová. Biblia ná «qué nuchee Job ne qué niníʼ cadi jneza ni cayuni Dios» (Job 1:12-19, 22).

11. a) ¿Xiruʼ biʼniʼ Binidxabaʼ Job? b) ¿Xi biʼniʼ Job?

¹¹ Peru qué ñuu Binidxabaʼ conforme ne ngue. Bicaalube Dios ora gúdxibe laa: «Peru bisigaanáʼ ne bininá dxitaládibe ne beela ládibe, ne zuuyaʼ dxíchiluʼ zaguudibe lii nezaluluʼ». Óraque biseendaʼ Binidxabaʼ ti guendahuará guizáʼ feu luguiáʼ Job (Job 2:5, 7). Nin ne ngue bíʼniruʼ Job ni ná Jehová. Guniʼbe qué zucheenebe Jehová dede ora gátibe (Job 27:5).

12. ¿Ximodo bisihuinni Job rusiguii Binidxabaʼ?

¹² Qué ñanna Job pa caníʼ Binidxabaʼ mal de laa ne  qué ñanna xiñee cayacaná. Dede guníʼ íquebe Jehová nga cutiidiʼ laabe prueba (Job 6:4; 16:11-14). Neca zacá, qué nucheené Job Jehová. Bisihuinni Job runi ni ná Jehová cadi pur ni rudiibe laa. Guca xhamígube Dios purtiʼ nadxiibe laa. Nga rusihuinni cadi dxandíʼ guiráʼ ni guníʼ Binidxabaʼ.

13. ¿Xi guleendú Job pur guca ti hombre ni qué nusaana Dios?

¹³ Neca qué ganna Job xi cazaaca guibáʼ, qué nusaanabe Dios ne bisihuínnibe guizáʼ malu Binidxabaʼ. Guluu Jehová ndaayaʼ Job purtiʼ dxandíʼ guca xhamigu laabe (Job 42:12-17).

14, 15. ¿Xi guníʼ Binidxabaʼ de binni?

¹⁴ Zanda guizíʼdinu stale cosa de ni bizaaca Job. Tiempu riʼ, laaca riníʼ Binidxabaʼ mal de ca xpinni Dios. Riniʼbe rúninu ni ná Dios pur ni rudii laanu. Guníʼ Binidxabaʼ: «Guiráʼ ni napa binni zudii ni para gulá xquendanabani» (Job 2:4). Ca diidxaʼ riʼ rusihuínnicani guníʼ Binidxabaʼ runi guiráʼ binni ni ná Dios pur ni rudiibe laacaʼ, cásica guniʼbe de Job. Gayuaa iza despué de guti Job, bicaaluruʼ Binidxabaʼ Jehová ne guniʼbe mal de ca xpinni. Nánnanu ni pur ni ná Proverbios 27:11: «Guluu xpiaanuʼ, xiiñehuiineʼ, ne bisiecheʼ ladxiduáʼ, ti ganda guicabeʼ ni cayuni burla naa».

¹⁵ Zanda cuiluʼ gúniluʼ ni ná Jehová ne cadi gusaana de gaca xhamíguluʼ laa. Zacá zusihuínniluʼ rusiguii Binidxabaʼ. Zándaca caquiiñeʼ guchaaluʼ modo nabániluʼ para gaca xhamíguluʼ Dios, peru nga nga ni jma jneza gúniluʼ. Nabé risaca gúniluʼ ni, purtiʼ riníʼ Binidxabaʼ zusaanaluʼ Jehová ora gápaluʼ guendanagana. Rúnibe  stale cosa para cadi guzúʼbanu stiidxaʼ Dios. ¿Xi rúnibe yaʼ?

16. a) ¿Xi guiráʼ riquiiñeʼ Binidxabaʼ para gucaa binni gusaana de guni ni ná Jehová? b) ¿Xi zanda guni Binidxabaʼ para gusaana de gúniluʼ ni ná Jehová?

¹⁶ Riquiiñeʼ Binidxabaʼ stale modo para gucueeza laanu de gaca xhamígunu Dios. Nuu tiru rucaalube laanu «casi ti lión ni canaguu beedxeʼ ne canayubi tu guxuuxe» (1 Pedro 5:8). Nga runi, cadi guidxagayaaluʼ pa gucueeza ca xhamíguluʼ, familia stiluʼ o xcaadxi binni lii de guni estudiarluʼ Biblia ne gusaana de gúniluʼ ni jneza. Zándaca zuni sentirluʼ casi ora cucaalú Binidxabaʼ lii (Juan 15:19, 20). * Ne nuu biaje raca Binidxabaʼ «casi ti ángel nachaʼhuiʼ». Nga runi ruyúbibe quítebe laanu para cadi guzúʼbanu stiidxaʼ Jehová (2 Corintios 11:14). Sti cosa ni riquiiñeʼ Binidxabaʼ para gusaana de gúninu ni ná Jehová nga rucaabe laanu guiníʼ íquenu qué zanda gúninu ni ná Dios purtiʼ binni ruchee laanu (Proverbios 24:10).

17. ¿Xiñee ruzúʼbanu stiidxaʼ Jehová?

¹⁷ Ora ruzúʼbanu stiidxaʼ Jehová rusihuínninu rusiguii Binidxabaʼ. ¿Xi zacané laanu guzúʼbanu diidxaʼ yaʼ? Biblia ná: «Gunnaxhii Jehová Dios stiluʼ de guidubi ladxidoʼloʼ, de guidubi xhiálmaluʼ, ne guiráʼ stipa stiluʼ» (Lucas 10:27). Ruzúʼbanu stiidxaʼ Jehová purtiʼ nadxiinu laa. Ra jma gannaxhiinu laabe, jma ziuuláʼdxinu  gúninu guiráʼ ni nabe. Bicaa apóstol Juan ca diidxaʼ riʼ: «Sicaríʼ nga gannaxhiinu Dios: gúninu ni ná ca mandamientu stiʼ, ne cadi nagana ca mandamientu stiʼ» (1 Juan 5:3).

18, 19. a) ¿Gunáʼ nga caadxi cosa ni ná Jehová cadi jneza gúninu? b) ¿Xiñee nánnanu qué ziuu dxi guinabaʼ Jehová laanu xiixa ni qué zanda gúninu?

¹⁸ Jehová ná nuu caadxi cosa ni cadi jneza. Zadxélaluʼ caadxi de laacani lu recuadru ni láʼ « Gucananalaʼdxiʼ ca cosa ni nanalaʼdxiʼ Jehová». Zándaca guiníʼ íqueluʼ cadi malu guni binni ca cosa riʼ. Peru, ora gúʼndaluʼ ca textu zeeda luni ne guiníʼ íqueluʼ ni nácani, ziéneluʼ jneza nga chinándaluʼ ca ley stiʼ Dios. Ne laaca zudiiluʼ cuenta caquiiñeʼ guchaaluʼ modo nabániluʼ. Nuu biaje zaca ni nagana. Peru pa gúniluʼ ni la? zápaluʼ guendariuudxi ne zabániluʼ nayecheʼ casi nabani ca xhamigu Jehová  ni qué rusaana de guzuubaʼ stiidxaʼ (Isaías 48:17, 18). ¿Ximodo nánnanu zanda guchaʼnu modo nabáninu yaʼ?

¹⁹ Qué ziuu dxi guinabaʼ Jehová laanu xiixa ni qué zanda gúninu (Deuteronomio 30:11-14). Dxandíʼ nga xhamigu Jehová laanu ne runibiaʼbe laanu jma que biaʼ runibiaʼnu laanu. Nánnabe xi ca cualidad nápanu ne ca defectu stinu (Salmo 103:14). Nabé riguu ca diidxaʼ bicaa Pablo riʼ gana laanu: «Jneza runi Dios ne qué zudii lugar gueeda xiixa prueba luguiatu ni qué zanda guni huantartu, sínuque zacané laatu guni huantartu prueba ca» (1 Corintios 10:13). Nuunu seguru qué zusaana Jehová de gudii stipa laanu para gúninu ni jneza. Ne zudiibe lii «poder» stibe para gudxiiluluʼ ca guendanagana stiluʼ (2 Corintios 4:7). Dxi gudiʼdiʼ apóstol Pablo ra nagana la? gucané Jehová laa. Nga runi guniʼbe ca diidxaʼ riʼ: «Napaʼ stipa para guneʼ  intiica cosa purtiʼ rudii Dios poder naa» (Filipenses 4:13).

20. ¿Gunáʼ nga ca cualidad stiʼ Jehová ni naquiiñeʼ gusihuínninu ne xiñee?

²⁰ Pa racaláʼdxinu gaca xhamígunu Jehová, cadi caquiiñeʼ si gusaana de gúninu ca cosa ni nabe cadi jneza. Caquiiñeʼ gúnirunu xcaadxi cosa (Romanos 12:9). Ca xhamigu Dios nadxiicaʼ ca cosa ni nadxiibe. Rusihuínnicaʼ ca cualidad stibe, rannaxhiicaʼ, nuucaʼ nayecheʼ, nexhedxí ladxidoʼcaʼ, nápacaʼ paciencia, amable laacaʼ, nacháʼhuicaʼ, nápacaʼ fe, nadoʼcaʼ, rucueezacaʼ laca laacaʼ (Gálatas 5:22, 23). Para gánnaluʼ ximodo nga ca xhamigu Jehová la? biindaʼ Salmo 15:1-5.

21. ¿Xi zacané lii gusihuínniluʼ ca cualidad ni riuulaʼdxiʼ Dios?

²¹ ¿Xi zacané laanu gusihuínninu ca cualidad sicarú riʼ yaʼ? Guizíʼdinu xii nga ca cosa ni riuulaʼdxiʼ Jehová. Para nga la? caquiiñeʼ gúʼndaluʼ ne guni estudiarluʼ Biblia (Isaías 30:20, 21). Ra gúniluʼ ni la? jma zannaxhiiluʼ Jehová. Ne jma ziuuláʼdxiluʼ guzuubaluʼ stiidxaʼ.

22. ¿Xi zabeendunu pa guzúʼbanu stiidxaʼ Jehová?

²² Guchaa tuuxa modo nabani la? zeeda gaca ni casi ora ribee tuuxa ti lari yooxhoʼ ladi para gacuʼ ti lari nacubi. Biblia ná naquiiñeʼ gusaananu modo gúcanu «dxiqué» ne guibáninu «modo cusiidiʼ Dios» laanu (Colosenses 3:9, 10). Neca zaca ni nagana para laanu, peru cayuni prometer Jehová zudii laanu ti regalu nabé sicarú pa guchaʼnu ne guzúʼbanu stiidxaʼ (Salmo 19:11). Bizuubaʼ stiidxaʼ Jehová purtiʼ nadxiiluʼ laa ne cadi pur ca cosa galán chigudiibe lii. Zacá zusihuínniluʼ rusiguii Binidxabaʼ ne dxandíʼ peʼ zaca xhamíguluʼ Jehová.