MODO RÚNINU XHIIÑAʼ DIOS
Guyuu nayecheʼ ora guni predicarluʼ ca noticia nacubi ne galán
¿Ñee raca nagana para lii chiguni predicarluʼ nuu tiru la? Pa zacá ni, cadi lii siouʼ nga rizaacaluʼ ni; stale de laanu rizaacanu zacá. Zándaca purtiʼ nuu binni qué riná gucaadiaga laanu, o purtiʼ raca nagana guinínenu binni ni qué runibiaʼnu. Cani bizéʼtenu riʼ zanda cuee cani gana laanu, peru runi adorarnu ti Dios ni nayecheʼ, ne laa racalaʼdxiʼ guni adorarnu laa né guendanayecheʼ (Sl 100:2; 1Ti 1:11,TNM). Yanna, ¿xi chonna razón nápanu para chuʼnu nayecheʼ ora guni predicarnu yaʼ?
Primé riʼ nga, purtiʼ canazanenu ti mensaje de esperanza para binni. Neca maʼ huaxiéʼ esperanza napa binni yanna, zanda gusiéchenu ladxidóʼcabe né ca noticia de xiixa galán ni chigueeda (Isa 52:7). Ca noticia nacubi ne galán de Reinu stiʼ Dios laaca zanda gusiecheʼ cani laanu. Ante chiguni predicarluʼ, guníʼ ique ca ndaayaʼ guedané Reinu stiʼ Dios lu Guidxilayú.
Guiropa, ribeendú binni stale cosa galán en sentidu físico ne espiritual ora runi predicarnu laacaʼ, purtiʼ racané ni laacaʼ gusaanacaʼ de gúnicaʼ cosa malu ne ganda guicaacaʼ guendanabani ni qué zaluxe (Isa 48:17, 18; Ro 1:16). Guxuíʼlunu nácanu ti rescatista, neca nuu binni qué naʼ gacanenu laacaʼ guilacaʼ, qué zusaananu de guyúbinu ca binni ni dxandíʼ rapa gana guilá (Mt 10:11-14).
Guionna riʼ nga ni jma risaca: rusisácanu Jiobá ora runi predicarnu. Nabé rusisácabe dxiiñaʼ rúninu riʼ (Isa 43:10; Heb 6:10). Rudiibe laanu espíritu santu stibe para gúninu ni. Nga runi, guinábanu laabe espíritu santu stibe para gápanu guendanayecheʼ (Gál 5:22). Racané Jiobá laanu para guni predicarnu sin guidxíbinu (Hch 4:31). Nga runi, pa gucaadiaga binni laanu o pa coʼ, né stale guendanayecheʼ zuni cumplirnu né dxiiñaʼ ni maʼ gucuaanu (Eze 3:3).
Ora chiguni predicarluʼ, ¿ximodo riuuláʼdxiluʼ gúniluʼ ni? ¿Ximodo zanda gusihuínniluʼ nuuluʼ nayecheʼ?
GÚʼYASITU VIDEU NI LÁʼ XI GUCANÉ NAA GUNEʼ NI NÁ JIOBÁ NE GUENDANAYECHEʼ STI BIAJE, ZANDA GUICÁBITU CA PREGUNTA RIʼ:
-
¿Xiñee naquiiñeʼ cueenu tiempu para gaca alimentar chaahuinu en sentidu espiritual neca runi predicarnu stale hora lu ti beeu?
-
¿Ximodo zanda chinándanu ejemplu stiʼ María?
-
¿Pora ribeeluʼ tiempu para guni meditarluʼ ni zeeda lu Stiidxaʼ Dios?
-
¿Xii nga ni jma riuuláʼdxiluʼ ora runi predicarluʼ?
