Dede lu beeu enero iza 2018, huaree caadxi modo para guzulú guinínenu binni lu portada stiʼ Xhiiñaʼ Dios ne modo nabáninu. Laaca huaguucabe gana laanu guinínenu binni lugar de gusaananésinu laacaʼ xiixa publicación. Ne para ganda gúninu ni, huayacané ca videu stiʼ ca presentación ni reeda lu sección «Modo guinínenu binni» laanu gánnanu ximodo guzulú guinínenu binni ra iquiiñenu Biblia si. Yanna, ¿ñee riníʼ nga qué zanda iquiiñenu xiixa publicación ora maʼ cayuni predicarnu de yoo pur yoo la? Coʼ. Purtiʼ guizáʼ racané ca tratadu laanu guzulú guinínenu binni. Ne ora iquiiñeluʼ cani, zanda gúniluʼ sicaríʼ:

1. Biʼniʼ pregunta ni zeeda lu portada stiʼ tratadu ca ne bidii lugar guicábibe tobi de ca respuesta zeeda luni.

2. Biluíʼ laabe textu ni zeeda lu guiropa yaza. Ne pa napa binni ca tiempu la? biindaʼ ne bisiene laabe xidé caníʼ tratadu ca.

3. Bisaanané binni tratadu ca ne guluu gana laabe guiluxe gúʼndabe ni ora gápabe ti tiempu.

4. Ante cheluʼ, biluíʼ laabe pregunta ni zeeda ra náʼ «Guníʼ ique» ne gudxi laabe zabiguétaluʼ sti dxi para guicábitu ni né Biblia.

Ora guibiguétaluʼ, bisiene respuesta stiʼ pregunta ca ne bisaana sti pregunta para guicábitu sti biaje. Zanda guyúbiluʼ ti pregunta ni zeeda lu sitiu nápanu lu Internet o pregunta stiʼ publicación ni zeeda lu últimu yaza stiʼ tratadu ca. Pa ruluíʼ zanda la? bisaanané laabe folletu Ca diidxaʼ sicarú ni zeeda de Dios o sti publicación ni nápanu lu kit de enseñanza ni riquiiñenu para guidúʼndanenu binni Biblia.