Rut 1:1-22
1 Ca dxi bibani* ca juez, guyuu ti hambre ndaaniʼ guidxi Israel. Ne ti hombre de Belén de Judá yené xheelaʼ ne guiropaʼ xiiñiʼ lu región* stiʼ Moab para cuézacaʼ xquidxi binni.
2 Elimélec* láʼ hombre que, xheelabe láʼ Noemí* ne guiropaʼ xiiñicabe láʼ Mahlón* ne Kilión.* De Efrata laacabe, laca laani nga Belén de Judá. Yendácabe Moab ne biaanacabe raqué.
3 Gudiʼdiʼ si ti tiempu, guti Elimélec. Ngue runi biaana Noemí stubi né guiropaʼ xiiñiʼ.
4 Despué, bichaganáʼ ca xiiñibe gunaa de Moab, tobi que láʼ Orpá ne stobi que láʼ Rut. Biaʼ chii iza gulézacabe raqué.
5 Despué laaca guti Mahlón ne Kilión, ne biaana Noemí sin ca xiiñiʼ ne sin xheelaʼ.
6 Óraque bireenebe guiropaʼ xuaalídxibe zinebe laacaʼ xquídxibe, purtiʼ binadiágabe caníʼ ca binni de Moab maʼ bietenalaʼdxiʼ Jehová xquidxi ne cudii laacabe guendaró.*
7 Ngue runi bisaana Noemí lugar ra nabeza, ne ziné guiropaʼ xuaalidxi. Laga zizácabe zécabe Judá,
8 gudxi Noemí guiropaʼ xuaalidxi: «Mejor laibiguetaʼ ra lidxi jñaatu. Ne cadi gusaana Jehová de gannaxhii laatu cásica qué nusaana de ñannaxhiitu naa ne ca xiiñeʼ.*
9 Gudii* Jehová cada tobi de laatu ti xheelatu ne gápatu ti lídxitu ra guiziiláʼdxitu». Óraque bidiibe bixiduʼ cada tobi de laacaʼ ne guizáʼ biinacabe.
10 Ne gúdxicaʼ laabe: «Qué zabiguétadidu. Zinedu lii ne zindézadu xquídxiluʼ».
11 Peru gudxi Noemí laacabe: «Laibiguetaʼ xiiñecaʼ. ¿Xiñee nuutu chinándatu naa pue? ¿Ñee rábitu zándaruʼ gapaʼ xiiñeʼ para guichaganatu la?
12 Laibiguetaʼ xiiñecaʼ, laché, purtiʼ guizáʼ maʼ biooxhuaʼ para guichaganaʼyaʼ sti biaje. Ne pa nichaganaʼyaʼ gueelaʼ riʼ ne ñapaʼ xiiñeʼ,
13 ¿ñee nibézatu niniisicabe para nichaganatu laacabe la? ¿Ninatu ñuutu xadxí sin nichaganatu la? Coʼ, xiiñecaʼ. Maʼ bidxiideche* Jehová naa, ne ora riníʼ iqueʼ pabiáʼ cayuniná ndiʼ laatu, guizáʼ racanaʼyaʼ».
14 Ne bizulú biinacabe sti biaje. Despué bidii Orpá ti bixiduʼ suegra ne biree zeʼ, peru Rut qué niná nusaana laabe.
15 Ngue runi gudxi Noemí laabe: «Biaa, maʼ zeʼ xconcúñaluʼ xquidxi ne ra nuu ca dios stiʼ. Yenanda laabe».
16 Peru ná Rut rabi laabe: «Cadi guinábaluʼ naa gusaanaʼ lii o guixeleʼ de lii; purtiʼ ra cheluʼ naa ziaaʼ, ne ra tídiluʼ gueelaʼ naa zadideʼ gueelaʼ. Guidxi stiluʼ zaca guidxi stinneʼ, ne Dios stiluʼ zaca Dios stinneʼ.
17 Ra gátiluʼ racá gateʼ, ne racá igaacheʼ. Guni castigar Jehová naa pa cadi guendaguti si nga guxheleʼ naa de lii».
18 Ora biʼyaʼ Noemí cá Rut tema chiné laa, maʼ qué ñábiruʼ laabe gastiʼ.
19 Ne bireecabe zécabe Belén. Casi peʼ yendácabe guca ti bulla ndaaniʼ guidxi que, ne caníʼ ca gunaa que: «¿Ñee Noemí nga la?».
20 Óraque rábibe laacaʼ: «Cadi gábitu naa Noemí.* Lagabi naa Mara,* purtiʼ guizáʼ maʼ bininá Dios ni jma napa poder naa.
21 Napaʼ stale cosa dxi bireeʼ de raríʼ, peru maʼ bidxiguetaʼ Jehová naa xieenaʼyaʼ. ¿Xiñee ndiʼ cayábitu naa Noemí, pa maʼ bidxiideche Jehová naa pue? Guizáʼ maʼ bininá Dios ni jma napa poder naa».
22 Zacá nga biguetaʼ Noemí de Moab ne xuaalídxibe Rut, moabita que. Yendácabe Belén tiempu cuzulú cayasa cosecha stiʼ cebada.
Nota
^ O «biʼniʼ juzgar».
^ Lit. «ca layú».
^ Riníʼ lá riʼ «Dios stinneʼ nga rey».
^ Riníʼ lá riʼ «ni riuuladxeʼ» o «ni rusiecheʼ naa».
^ Zándaca zeeda ni de ti diidxaʼ hebreu ni riníʼ «chuʼ tuuxa débil» o «gaca huará».
^ Riníʼ lá riʼ «ni ziyaba» o «ni napa ra riluxe».
^ Lit. «pan».
^ O «ca hombre ni maʼ guti».
^ O «Gusigaʼdeʼ».
^ O «maʼ bicaanáʼ».
^ Riníʼ lá riʼ «ni riuuladxeʼ» o «ni rusiecheʼ naa».
^ Riníʼ lá riʼ «nandáʼ» o «amarga».
