Guiropa libru stiʼ Samuel 7:1-29
7 Dxi maʼ nabeza rey que ndaaniʼ lidxi,* gúpabe guendariuudxi purtiʼ maʼ qué nudii Jehová lugar nucaalú ca enemigu stibe laabe, ca ni nabeza gaxha de laabe.
2 Para ná rey que rabi profeta Natán: «Naa nabezaʼ ndaaniʼ ti yoo de cedru, peru Arca stiʼ Dios ni dxandíʼ, nuuni ndaaniʼ ti yoo de lari».
3 Óraque bicabi Natán rey que: «Bi’ni’ ni ná ladxido’lo’, purtiʼ nuuné Jehová lii».
4 Gueelaʼ queca gudxi Jehová Natán ca diidxaʼ riʼ:
5 «Guyé ne gudxi David, siervu stinneʼ: “Ndiʼ nga ni ná Jehová: «¿Ñee lii peʼ nga caquiiñeʼ gucuiluʼ ti yoo para cuezaʼ ndaaniʼ la?
6 Dede dxi guleeʼ guidxi Israel de Egipto hasta nagasi, qué huabeza’ diaʼ ndaaniʼ nin ti yoo, sínuque huazaya’ cheríʼ chericaʼ ndaaniʼ ti yoo de lari ne ndaaniʼ ti tabernáculo.
7 Biaʼ tiempu guzayaʼ lade ca israelita,* ¿ñee bizeeteʼ ni lu ca xaíque stiʼ ca tribu stiʼ Israel, ca ni gulieeʼ para gapa xquidxeʼ la? ¿Ñee guyuu dxi gudxeʼ laacabe “¿Xiñee qué huayúnitu ti yoo de cedru para naa pue?”?»”.
8 Yanna gudxi David, siervu stinneʼ: “Ndiʼ nga ni ná Jehová, Dios stiʼ ca ejércitu: «Naa guleeʼ lii de lu ca layú ra rigaa guixi, ra rigápalu’ dendxuʼ dxiqué, para gácaluʼ xaíque stiʼ Israel, guidxi stinneʼ.
9 Ne ra tiica cheluʼ, ziuaaʼ gaxha de lii. Zuuyaluʼ modo guniteluáʼ ca enemigu stiluʼ. Pur naa nabé zunibiáʼ binni lii, casi runibiáʼcabe ca hombre risaca stiʼ guidxilayú.
10 Zuyube’ ti lugar para Israel, guidxi stinneʼ. Ne zacaniáʼ laacabe para cuézacabe luni sin guchiiñaʼ guirutiʼ laacabe. Ne maʼ qué zuquichiná’ ca binni malu laacabe casi bí’nica’ ni dxiqué,
11 dxi gudixheʼ chuʼ juez ndaaniʼ guidxi Israel, guidxi stinneʼ. Ne zápaluʼ guendariuudxi purtiʼ maʼ qué zucaalú ca enemigu stiluʼ lii.
»”»Laaca maʼ gudxi Jehová lii zucuí Jehová ti yoo* para lii.
12 Ora guedandá dxi gátiluʼ ne guiziiláʼdxiluʼ casi caziilaʼdxiʼ ca bixhozebiidaluʼ, zuneʼ tobi de ca xiiñiluʼ ni zá de lii rey, ne qué zusaana de guni mandar reinu stibe.
13 Laabe nga chigucuibe ti yoo para guisaca laʼyaʼ,* naa zucueeʼ laabe casi rey ne qué ziuu dxi gusaana de guni mandar reinu stibe.
14 Zacaʼ bixhózebe ne laabe zácabe xiiñeʼ. Ora gúnibe ti cosa malu, zaguaa’ jneza laabe né vara stiʼ ca hombre ne golpe stiʼ ca xiiñiʼ hombre.*
15 Qué zusaanaʼ de gannaxhieeʼ laabe casi bisaana’ de gannaxhieeʼ Saúl, hombre ni bicaanayaʼ para chuʼluʼ lugar stiʼ.
16 Qué ziuu dxi gusaana de guni mandar ca ni zá de lii; zuni mandar reinu stiluʼ para siempre»”».
17 Para gudxi Natán David guiráʼ ni binadiaga ne ni biʼyaʼ lu visión riʼ.
18 Para biree rey David zeʼ, yetí nezalú Jehová ne guníʼ: «Jehová, Señor ni runi mandar guiráʼ xixé ni nuu, ¿tu nacaʼ naa ne tu naca familia stinneʼ para gúniluʼ guiráʼ ndiʼ pur laadu pue?
19 Nérusica cayábiluʼ naa, Jehová, Señor ni runi mandar guiráʼ xixé ni nuu, xadxí zuni mandar guiráʼ ca ni zá de naa; ne naca ndiʼ ti ley para guiráʼ binni, Jehová, Señor ni runi mandar guiráʼ xixé ni nuu.
20 Xiruʼ ndiʼ zanda gabeʼ lii yaʼ, Jehová, Señor ni runi mandar guiráʼ xixé ni nuu, pa lii nga runibiáʼ chaahuiluʼ naa.
21 Maʼ bíʼniluʼ guiráʼ cosa riʼ ne maʼ biluiʼluʼ ni siervu stiluʼ, purtiʼ nga nga ni racaláʼdxiluʼ* ne ni biʼniʼ prometerluʼ.
22 Nápaluʼ stale poder, Jehová, Señor ni runi mandar guiráʼ xixé ni nuu. Gástiruʼ stobi casi lii ne lii si nga Dios; pur guiráʼ ni maʼ binadiágadu, nánnadu dxandíʼ zacá ni.
23 ¿Ñee nuuruʼ sti guidxi lu guidxilayú riʼ casi xquídxiluʼ Israel la? Dios stinneʼ, lii nga bilaluʼ laacabe para gácacabe guidxi stiluʼ; pur laacabe bíʼniluʼ stale cosa ni bidxagayaa binni ne zacá bisisácaluʼ laluʼ. Pur xquídxiluʼ, ni guliluʼ ne guleeluʼ de Egipto, binitiluluʼ stale guidxi ne ca dios sticaʼ.
24 Gudíxheluʼ gaca guidxi Israel xquídxiluʼ para siempre. Ne lii, Jehová, beeda gácaluʼ Dios stícabe.
25 »Yanna, Jehová Dios, canabaʼ lii qué chuʼ dxi gusiaandaluʼ promesa ni bíʼniluʼ siervu stiluʼ ne ca ni zá de laa, ne biʼniʼ cumplir guiráʼ ni maʼ guniʼluʼ.
26 Ne cadi gusaana de guisaca laluʼ, ti zacá guiníʼ binni: “Jehová, Dios stiʼ ca ejércitu, nga Dios stiʼ guidxi Israel”. Ne qué chuʼ dxi gusaana de guni mandar ca ni zá de David, siervu stiluʼ, nezaluluʼ.
27 Purtiʼ lii, Jehová, Dios stiʼ ca ejércitu, Dios stiʼ guidxi Israel, gúdxiluʼ siervu stiluʼ ti cosa ni qué ganna, ora guniʼluʼ: “Zucueeʼ ti yoo* para lii”. Nga runi napa siervu stiluʼ valor para guni orar lii.
28 Jehová, Señor ni runi mandar guiráʼ xixé ni nuu, lii nga Dios ni dxandíʼ ne dxandíʼ guiráʼ ni riniʼluʼ. Ne maʼ biʼniʼ prometerluʼ guiráʼ cosa galán riʼ siervu stiluʼ.
29 Nga runi canabaʼ lii cadi gusaanaluʼ lidxeʼ* sin ndaayaʼ stiluʼ, ne qué chuʼ dxi gusaana de guni adorárcabe lii ne guni mandarcabe. Purtiʼ lii, Jehová, Señor ni runi mandar guiráʼ xixé ni nuu, maʼ biʼniʼ prometerluʼ ni. Ne qué chuʼ dxi gusaana de cuʼluʼ ndaayaʼ ca ni zá de siervu stiluʼ».
Nota
^ O «palaciu stiʼ».
^ Lit. «ca xiiñiʼ Israel».
^ Raríʼ caniʼni de ca ni zá de David, ca ni chigaca rey.
^ O «xlaʼyaʼ».
^ O zándaca «Adán».
^ O «ni ná ladxidoʼlo».
^ Raríʼ caniʼni de ca ni zá de David.
^ Raríʼ caniʼni de ca ni zá de David, ca ni chigaca rey.
