Primé libru de Reyes 7:1-51
7 Biaʼsi 13 iza bindaa Salomón para biluxe bicuí guidubi naca lidxi.*
2 Bicuibe ti yoo ni biree lá Bosque stiʼ Líbano —ziuulani ti gayuaa codo,* xilágani* 50 codo ne nasooni 30 codo— ne zúbani lú tapa línea columna de cedru. Ne lu ca columna que didi muríu de cedru.
3 Gudíxhebe yaga cedru lu ca muríu ni didi lu ca columna que; biaʼsi 45,* 15 pur cada línea.
4 Laaca gúpani chonna línea ventana ni napa marcu. Frente de ti ventana nuu sti ventana, ne luguiáʼ de ti ventana nuu xhupa ventana.
5 Guiráʼ ca entrada ne ca poste stiʼ ca puertaʼ que nápacani marcu cuadradu,* cásica marcu stiʼ xcadxi ventana que.
6 Bíʼnibe Corredor* stiʼ ca Columna, ziuulani 50 codo ne xilágani 30 codo. Ne frente de laani bíʼnibe ti entrada ni napa caadxi columna ne nápani íqueni.*
7 Laaca bicuibe Sala* ra nuu Trono —Sala de Juiciu—, raqué nga runi juzgarbe, ne biʼniʼ forrarbe ni de cedru dede lu pisu hasta ra nuu ca muríu que.
8 Yoo ra chindézabe que nuuni lu sti patiu, ne cadi guíʼdini Sala* ra nuu Trono que, peru laaca zaqueca ni. Laaca bíʼnibe ti yoo zaqueca para xiiñiʼ faraón, gunaa ni bichaganáʼ Salomón.
9 Guiráʼ yoo riʼ —dede ca base stini hasta ca pader jma nasoo nápani, ne guiráʼ ni nuu fuera de laacani, dede ra nuu patiu naroʼbaʼ que— bíʼnibe cani de guié risaca ni maca bigá de ti medida, bigácabe ca guié riʼ né sierra ni rugá guié, cásica nezalúcani zaqueca neza déchecani.
10 Guca base stícani de guié risaca ne naroʼbaʼ; caadxi de laacani ziuulacani chii codo, ne xcaadxi de xhono codo.
11 Ne luguiáʼ de laacani gudíxhecabe xcaadxi guié risaca ni bigácabe maca medida ne laaca gudíxhecabe yaga cedru.
12 Guidubi vuelta patiu naroʼbaʼ que gundísacabe ti muru de chonna elada guié ni maca bigá ne gudíxhecabe ti línea muríu de cedru luguiani, cásica nuu guidubi vuelta patiu ra lidxi Jehová ne entrada stiʼ yoo que.
13 Dede guidxi Tiro bisendacaa Salomón Hiram.
14 Xiiñiʼ ti viuda de tribu stiʼ Neftalí laabe. De guidxi Tiro bixhózebe, ne biʼniʼ dxiiñaʼ de cobre;* guizáʼ nánnabe ne nápabe stale gracia para gúnibe intiica dxiiñaʼ de cobre. Ngue runi guyebe nezalú rey Salomón ne bíʼnibe guiráʼ ni biʼniʼ mandar laabe.
15 Bíʼnibe chupa columna de cobre ni guca fundir. Cada columna que nasoo 18 codo, ne para ganda chuʼbiáʼ tiʼxhiʼ cada tobi de ca columna riʼ biquiiñeʼ ti doo ni ziuulaʼ 12 codo.
16 Laaca bíʼnibe chupa adorno* de cobre ni guca fundir para quibaʼ ique ca columna que. Guirópacani nasoocani gaayuʼ codo.
17 Gui’di’ ti malla de caadxi cadenahuiini’ ni daapa ladi cada tobi de ca adorno que; cada adorno que napa gadxe cadena.
18 Lu cada malla bíʼnibe chupa hilera granada ne bigaandabe cani lu cada adorno stiʼ ca columna que.
19 Napa ca adorno stiʼ ca columna ni nuu ra entrada que diseñu stiʼ ti liriu ne biaʼsi tapa codo nga nasoo diseñu riʼ.
20 Cada adorno zuba lu ti columna, ne biaʼsi peʼ ra nuu malla que nga guiʼdinécani ca columna que. Ne guidubi vuelta de cada adorno que nanda chupa gayuaa granada.
21 Zaqué nga bizuhuaabe ca columna ni nuu ra entrada stiʼ templu* que. Primeru bizuhuaabe columna ni nuu ladu derechu* que, ne gulee labe ni Jakín.* De raqué bizuhuaabe stiʼ columna ni nuu ladu bigaʼ* que, ne gulee labe ni Boaz.*
22 Ne luguiáʼ de cada tobi de ca columna que dxi’ba’ ti adorno de liriu. Zaqué nga biluxe bizaʼbe ca columna que.
23 De raqué bíʼnibe ti Tanque de cobre. Redondoni, xilaga ruaani chii codo ne nasooni gaayuʼ codo, ne para chu’bia’ tí’xhini napa xidé iquiiñecabe ti doo de 30 codo.
24 Ne guidubi vuelta ruaani para xagueteʼ bizaʼbe guitu; biaʼsi chii guitu pur cada codo; nápani chupa línea guitu guidubi vuéltani. Dxi guyáʼ Tanque que maca neni ca figura stiʼ ca guitu que cueʼni.
25 Zuhuaa Tanque que deche 12 toro: chonna nudxiilú ladu guiaʼ, chonna nudxiilú ladu gueteʼ, chonna nudxiilú ladu rindani gubidxa ne chonna nudxiilú ladu riaaziʼ gubidxa. Déchecame zuhuaa Tanque que, ne guirácame nudxiidéchecame ni.
26 Nanaande’ Tanque que biaʼ tapa bicuini* ne bíʼnibe ruaani casi ruaa ti copa, casi ti guieʼ liriu. Ridaa chupa mil bato* nisa ndaanini.
27 Laaca bíʼnibe chii carruhuiiniʼ* de cobre. Cada carruhuiiniʼ que ziuulaʼ tapa codo, xilaga tapa codo ne nasoo chonna codo.
28 Sicaríʼ nga guyáʼ ca carruhuiiniʼ que: cada ladu stiʼ cada tobi napa caadxi cuadru, ne lade ca cuadru ca didi caadxi barra.
29 Ne lu ca cuadru que, biza’be lión, toro ne querubín, ne ngueca figura bíʼnibe lu ca barra que. Luguiáʼ ne xagueteʼ de ca figura stiʼ ca lión ne ca toro que, bi’ni’ decorarbe ni né caadxi bidxuhuiini’.*
30 Ne cada carruhuiiniʼ napa tapa rueda de cobre, ne laaca de cobre eje stícani. Ne cada tobi de ca carruhuiiniʼ que napa tapa soporte, tobi cada squina. Ne guidápacani nuácani palangana que, ne dxi guyaʼ ca soporte que maca nécani caadxi bidxuhuiini’* cuéʼcani.
31 Biaʼsi riaba ruaa palangana que ndaaniʼ cinchu stiʼ carruhuiiniʼ que ne nasooni ti codo. Redondo ruaani. Dede ruaa carruhuiiniʼ ca hasta ra nexheʼ palangana stini nasooni ti codo arondaʼ ne laaca nápani caadxi figura ruaani. Ne guidubi vuelta cinchu que napa caadxi cuadru.
32 Guidapaʼ rueda stini guí’dicani lu ca soporte ni naaze carruhuiiniʼ que. Biaʼsi riaanacani xagueteʼ de ca cuadru ni cá cueʼ carruhuiiniʼ que. Cada rueda que nasoo ti codo arondaʼ.
33 Zeeda gaca ca rueda stini casi ca rueda sti’ ti carru, ca soporte stini, ca llanta, ca rayu ne cubu* stini, bí’nibe cani de guiiba’ ni guca fundir.
34 Napa carruhuiiniʼ que tapa soporte, tobi cada squina. Gui’di’ ca soporte que lu carruhuiiniʼ que.
35 Ruaa carruhuiiniʼ que nuu ti cinchu ne nasooni ti galaa codo, ne biquiidibe ca barra ne ca cuadru ni cá luni para gácacani ti pieza si.
36 Lu ca barra ne lu ca cuadru que, biaʼ ra nuu lugar, bizaʼbe querubín, lión ne yaga palmera, ne laaca bíʼnibe bidxuhuiiniʼ* guidubi vuéltani.
37 Zaqué nga biza’be biaʼsi chii carruhuiiniʼ. Ngueca medida napa guiráʼ carruhuiiniʼ que ne tobi si modo bizaʼbe cani.
38 Bíʼnibe chii palangana de cobre, ne cada tobi de laacani riné cuarenta bato nisa, ne xilágani tapa codo. Bíʼnibe chii palangana, tobi para cada carruhuiiniʼ.
39 Bizuhuaabe gaayuʼ carruhuiiniʼ ladu derechu de yoo que ne xcaayuʼ ladu bigaʼ. Ne bizuhuaabe Tanque que ladu derechu de yoo que, neza rindani gubidxa.
40 Laaca biʼniʼ Hiram ca traste para iquiiñeʼ raqué, ca pala ne ca tazón que.
Zaqué nga binduuxeʼ Hiram ca dxiiñaʼ ni biʼniʼ para lidxi Jehová, ca ni biʼniʼ mandar rey Salomón laa guni:
41 guiropaʼ columna ne guiropaʼ adorno ni napa forma de tazón ni dxiʼbaʼ ique ca columna que; guiropaʼ malla ni renda ladi guiropaʼ adorno ni napa forma de tazón ni dxiʼbaʼ ique ca columna que;
42 tapa gayuaa granada —ni nanda cueʼ guiropaʼ malla que— chupa fila granada para cada malla ni renda ladi guiropaʼ adorno ni napa forma de tazón ni dxiʼbaʼ ique guiropaʼ columna que;
43 chii carruhuiiniʼ ne chii palangana ni ribí lu ca carruhuiiniʼ que;
44 Tanque de cobre que ne 12 toro ni nuani que;
45 ne ca bote, ca pala, ca tazón ne guiráʼ ni chiguiquiiñeʼ raqué, biʼniʼ Hiram cani de cobre ni ruzaaniʼ, casi gudxi rey Salomón laa. Guiráʼ ndiʼ nga bíʼnibe para lidxi Jehová.
46 Biʼniʼ mandar rey que guni fundírcabe cani ndaaniʼ molde ni gucané beñe xiñáʼ, gaxha de guiiguʼ Jordán entre guidxi Sucot ne Zaretán.
47 Cumu nabé stale ca cosa que la? qué nigubiaʼ Salomón cani. Ne guirutiʼ ñanna pabiáʼ cobre biquiiñeʼ para guyáʼcani.
48 Ndiʼ nga ni biʼniʼ Salomón para iquiiñeʼ ra lidxi Jehová: altar de oro que; ti mexaʼ de oro para gataʼ pan nezalú Dios;
49 ca candelabru de oro puru que, bizuhuaabe gaayuʼ ladu derechu ne gaayuʼ ladu bigaʼ, frente de cuartu ni nuu dede dentru que; ca guieʼ; ca lámpara ne ca pinza, guirani de oro;
50 guiráʼ traste; ni rusuiʼnécabe mecha; ca tazón ca copa ne ca braseru de oro puru que. Ne laaca de oro bíʼnibe ca base ra riaba eje* stiʼ ca puertaʼ cuartu ni nuu dede dentru o Santísimo, ne ca puertaʼ stiʼ yoo stiʼ templu que.*
51 Binduuxeʼ rey Salomón guiráʼ ca dxiiñaʼ ni naquiiñeʼ gaca para lidxi Jehová. De raqué beedanebe guiráʼ ca cosa ni guleechú David bixhózebe ne guluu chaahuibe guiráʼ plata, oro ne guiráʼ ca cosa que ndaaniʼ ca cuartu ra riaapaʼ tesoro ni nuu ra lidxi Jehová.
Nota
^ O «palaciu stiʼ».
^ Ti codo nga 44.5 cm. Biiyaʼ apén. B14.
^ O «nalágani».
^ Zándaca cani’ni de ca muríu que.
^ O «de tapa ladu», «rectangular».
^ O «Pórtico».
^ O «techu».
^ O «Pórtico».
^ Lit. «yoo stiʼ Sala».
^ O «bronce», raríʼ ne guiráʼ ra guiéteni lu capítulo riʼ.
^ O «gueteʼ».
^ Zándaca riníʼ lá riʼ “né stipa”.
^ O «guiaʼ», «ladu izquierdo».
^ Riníʼ lá riʼ “laabe [Jehová] gucuí dxiichibe ni”.
^ Raríʼ caniʼbe de Santo que.
^ Lit. «ti palmo menor». Biaʼ 7.4 cm. Biiyaʼ apén. B14.
^ Ti bato nga 22 L. Biiyaʼ apén. B14.
^ O «carruhuiiniʼ para cubanécabe nisa».
^ O «adorno nabiʼchoʼ».
^ O «bíʼchohuiiniʼ».
^ O «guipiʼ».
^ O «bíʼchohuiiniʼ».
^ O «pivote».
^ Raríʼ caniʼni de Santo que.
