•  Ca diidxaʼ guzuluné ni 2

•  Ca tesoro zeeda lu Biblia 3-5

  •  Discursu 3

  •  Guyúbinu ca perla ni gaʼchiʼ 4

  •  Ra guiuundaʼ Biblia 5

•  Gusíʼdinu jma jneza 6-11

  •  Videu modelo para guinínenu binni 7

  •  Primé biaje guinínenu binni 8

  •  Revisita 9

  •  Estudiu 10

  •  Discursu 11

•  Modo rúninu xhiiñaʼ Dios 12-13

  •  Reunión ra riuundaʼ Biblia 13

•  Ca diidxaʼ guiluxené ni 14

•  Gusíʼdinu ne guidúʼndanu jma jneza 15

•  Diidxaʼ ni uguu gana ne conseju 16

•  Tiempu 17

•  Visita stiʼ superintendente de circuito 18

•  Semana nuu asamblea 19

•  Semana nuu Conmemoración 20

•  Superintendente stiʼ reunión Xhiiñaʼ Dios ne modo nabáninu 21

•  Presidente stiʼ reunión Xhiiñaʼ Dios ne modo nabáninu 22

•  Consejeru auxiliar 23

•  Clase auxiliar 24

•  Videu 25

1. Para gaca reunión Xhiiñaʼ Dios ne modo nabáninu zaquiiñeʼ Ni chigaca lu reunión Xhiiñaʼ Dios ne modo nabáninu ne ca instrucción zeeda raríʼ. Naquiiñeʼ gaca animar guiráʼ ca publicador para gutiidicaʼ asignación estudiantil lu reunión riʼ. Ca binni ni maʼ qué riaadxaʼ ca reunión stinu la? zanda guni participarcaʼ pa maʼ runi crecaʼ guiráʼ ni rusiidiʼ Biblia ne pa maʼ nabánicaʼ modo ná ca principiu ni naquiiñeʼ chinanda ca xpinni Cristu (be-S 282).

  2. Ti minutu. Despué de guiuundaʼ canción ne gaca ti oración, zuzeeteʼ presidente stiʼ reunión Xhiiñaʼ Dios ne modo nabáninu chupa chonna puntu ni zeeda lu programa stini para gucuaaniʼ interés stiʼ auditorio. Zuzeetebe ca puntu ni jma zacané ca hermanu de congregación.

  3. Discursu (10 minutu). Lu Ni chigaca lu reunión zeeda título stini ne laaca zeeda chupa o chonna puntu principal. Ti ancianu o ti siervu ministerial capacitadu nga gudii discursu riʼ. Cada biaje guzulú guiuundaʼ ti libru stiʼ Biblia, zadiʼdiʼ ti videu ni gusiene de laani. Hermanu gudii discursu riʼ zanda guzeeteʼ xiixa ni bihuinni lu videu riʼ para gusiene tema stiʼ discursu ca, peru naquiiñeʼ gusiene ca puntu ni zeeda lu Ni chigaca lu reunión. Ne pa gudii tiempu la? zanda iquiiñebe ca  imagen ni maʼ guca preparar para gusaabe información ni chiguni presentarbe. Zanda iquiiñebe xiixa información ni cadi zeeda lu sección riʼ, peru pa dxandíʼ zacaneni para gusiénebe tema stiʼ asignación riʼ.

 4. Guyúbinu ca perla ni gaʼchiʼ (10 minutu). Naquiiñeʼ tidiʼ asignación riʼ pur pregunta ne respuesta. Ti ancianu o ti siervu ministerial capacitadu nga gutiidiʼ asignación riʼ. Naquiiñeʼ guni hermanu riʼ guiropaʼ pregunta stini. Maʼ hermanu riʼ guʼyaʼ pa ziuundaʼ ca versículo ni zeeda lu sección riʼ. Naquiiñeʼ guindaa comentariu stiʼ ca hermanu 30 segundu o menu.

 5. Ra guiuundaʼ Biblia (4 minutu). Asignación estudiantil riʼ naquiiñeʼ gutiidiʼ ti hermanu ni. Zuundabe ca versículo nexheʼ guiuundaʼ para semana ca, peru qué zaniʼbe gastiʼ ora guzulube nin ora guilúxebe. Jma naquiiñeʼ gucaa ique presidente stiʼ reunión riʼ gacané estudiante riʼ para ganda guiénecabe ni cayuundaʼ, guʼndaʼ jneza, cadi gucá ruaa ora maʼ cayuundaʼ, guni ni né naturalidad, ganna pora gudxiibaʼ lu ridxi stiʼ ne pora guindeteʼ ni, ganna paraa naquiiñeʼ guni pausa ne paraa nuu ca diidxaʼ ni naquiiñeʼ guʼndaʼ né énfasis. Nuu biaje nachucu o ziuulaʼ ra raca caber guiuundaʼ Biblia, nga runi naquiiñeʼ guietenalaʼdxiʼ superintendente stiʼ reunión Xhiiñaʼ Dios ne modo nabáninu modo ruundaʼ cada estudiante ante gudiibe laacaʼ xiixa asignación.

 6. (Quince minutu). Guca sección riʼ para guni practicarnu ne para guni mejorarnu modo runi predicarnu ne modo rusíʼdinu. Jma galán pa iquiiñeʼ ca publicador tema ni zeeda lu Ni chigaca lu reunión. Peru pa cadi zeeda ti instrucción especial para asignación riʼ la? zanda iquiiñeʼ ca publicador sti pregunta, sti textu, sti pregunta ni guicábibe sti biaje o guzeetebe sti cosa ni cazaaca ni rábibe jma ziuulaʼdxiʼ binni lu territorio. Ca publicador ca gúʼyacaʼ pa zuni presentarcaʼ ti publicación o pa zuluiʼcaʼ ti videu ni zeeda lu kit de enseñanza neca cadi zeeda xi peʼ naquiiñeʼ guni presentárcabe lu asignación riʼ. Sti cosa ni zanda gacané laanu nga recuadru «Ra zeeda textu riʼ lu Kit de enseñanza» ni zeeda lu sección «Modo guinínenu binni». Cada estudiante guʼyaʼ pa zaquiiñeʼ ni o pa coʼ lu asignación stiʼ. Lu Ni chigaca lu reunión zeeda pabiáʼ naquiiñeʼ guindaa cada asignación estudiantil ne ziuu biaje zeeda sti instrucción. Cadi caquiiñeʼ diʼ uguu ca estudiante jma información para si gusaacaʼ biaʼ tiempu naquiiñeʼ tídicaʼ. Ora gaca preparar ti demostración jneza la? zanda guiluxe ni ti minutu o chupa minutu ante. Ne pa caquiiñeʼ la? laaca zanda guicaa ca ancianu ca xiixa asignación estudiantil. Nuu biaje zadiʼdiʼ ti videu ni cadi zeeda lade ca videu ni racané laanu para gánnanu modo naquiiñeʼ guinínenu binni. Ti ancianu o ti siervu ministerial capacitadu nga naquiiñeʼ gutiidiʼ asignación riʼ.

 7. Videu modelo para guinínenu binni. Zadiʼdiʼ ca videu ni láʼ: Videu de modo guinínenu binni primé biaje ne videu stiʼ revisita ora cá naquiiñeʼ tidiʼ ca ni, ne zanda guicabi ca ni cucaadiaga. Presidente stiʼ reunión Xhiiñaʼ Dios ne modo nabáninu nga naquiiñeʼ gutiidiʼ asignación riʼ.

 8. Primé biaje guinínenu binni. Zanda gutiidiʼ ti hermanu o ti hermana asignación riʼ. Pa gudii ti hermana ni la? napa xidé tidiné sti hermana o tobi de ca familia stiʼ. Zanda cuícabe o guzuhuaacabe. Ora guzulú estudiante riʼ, zugapadiuxi cásica runi ora maʼ ziguni predicar lu territorio stiʼ. Naquiiñeʼ gaca basar presentación riʼ lu sección ni láʼ «Modo guinínenu binni».

 9. Revisita. Zanda gutiidiʼ ti hermanu o ti hermana asignación riʼ. Pa gutiidiʼ ti hermanu ni la? napa xidé tidiné sti hermanu, qué zanda diʼ tidiné ti gunaa (km-S 5/97 2). Zanda cuícabe o guzuhuaacabe. Napa xidé gusihuinni estudiante riʼ xi guininu ora chigánnanu tuuxa ni bisihuinni interés primé biaje gunínenu laa. Naquiiñeʼ gaca basar presentación riʼ lu sección ni láʼ «Modo guinínenu binni».

 10. Estudiu. Zanda gutiidiʼ ti hermanu o ti hermana asignación riʼ. Pa gutiidiʼ ti hermanu ni la? napa xidé tidiné sti hermanu, qué zanda diʼ tidiné ti gunaa (km-S 5/97 2). Zanda cuícabe o guzuhuaacabe. Lu asignación riʼ zahuinni ti partehuiiniʼ stiʼ ti estudiu ni maʼ bizulú. Cadi caquiiñeʼ diʼ  guiniʼbe xiixa para guzulube ne para guilúxebe, peru zúnibe ni pa cayúnibe dxiiñaʼ lu xiixa aspectu de introducción o conclusión. Cadi caquiiñeʼ peʼ guiuundaʼ guiráʼ información stini en voz alta, peru laaca zanda gaca ni. Ne pa zedané asignación riʼ ti videu la? cadi naquiiñeʼ guluiʼbe videu ca, peru napa xidé gusiénebe ni nani. Naquiiñeʼ gusihuinni estudiante ca ximodo gusíʼdinu jma jneza.

 11. Discursu. Ti hermanu nga naquiiñeʼ gutiidiʼ asignación riʼ ne naquiiñeʼ tidiʼ ni casi ti discursu.

 12. Zuzulú sección riʼ né ti canción. Lu ca primé 15 minutu ca zándaca zadiʼdiʼ tobi o chupa sección ra zusiidicabe laanu ximodo gúninu ni ná Stiidxaʼ Dios lu xpídanu. Pa cadi zeeda xiixa instrucción gadxé la? siempre zutiidiʼ ti ancianu o ti siervu ministerial capacitadu ni. Ca ancianu si nga naquiiñeʼ gaca asignar para gutiidicaʼ ni caquiiñeʼ congregación. Ora zeeda ti tema lu Ni chigaca lu reunión ra zanda guicabi ca ni cucaadiaga la? hermanu ni chigutiidiʼ ni zanda guni xcaadxi pregunta ni cadi zeeda luni para guiénecabe ca puntu jma risaca stiʼ tema ca.

  13. Reunión ra riuundaʼ Biblia. (30 minutu). Naquiiñeʼ gutiidiʼ ti ancianu capacitadu ni. (Pa huaxiéʼ ancianu nuu ndaaniʼ ti congregación la? zanda iquiiñeʼ ca siervu ministerial capacitadu). Cuerpu de ancianu nga guʼyaʼ tuu nga ca hermanu nuu capacitadu para gutiidiʼ asignación riʼ. Ca hermanu ni gaca aprobar, cadi naquiiñeʼ tídicaʼ de tiempu, gusiénecaʼ ca textu clave ne gacanecaʼ ca ni cucaadiaga guidxélacaʼ modo gúnicaʼ ni biziidicaʼ. Zadxélatu conseju ni zanda iquiiñetu lu ca información ni cusiene ximodo gaca conducir Estudiu stiʼ Torre stiʼ ni rapa. Pa maʼ bisiene chaahuitu información ni raca caber gaca estudiar semana ca la? cadi caquiiñeʼ diʼ guyúbitu xiruʼ guiniʼtu para si gusaatu 30 minutu. Pa ganda la? cada semana naquiiñeʼ tidiʼ gadxé gadxé hermanu para guni conducir ne ni gaca lector. Ora guinabaʼ presidente stiʼ reunión conductor riʼ cuee tiempu lu asignación riʼ la? maʼ conductor riʼ nga guʼyaʼ ximodo guni ni. Ti modo zanda gúnibe ni nga cadi guiuundaʼ chupa chonna párrafo.

  14. Chonna minutu. Zuni presidente stiʼ reunión riʼ ti repasu stiʼ ca idea jma risaca ni biete lu reunión. Laaca zucuaanibe interés stiʼ ca hermanu para reunión de sti semana ni zeeda ca. Pa gudii tiempu la? zanda guzeetebe lá ca estudiante ni chigutiidiʼ discursu sti semana zeeda ca. Pa cadi zeeda xiixa instrucción gadxé la? zudii presidente riʼ xiixa anunciu o zuundaʼ xiixa carta lu repasu stiʼ reunión riʼ. Ca actividad stiʼ congregación, casi ca horariu de predicación ne ca grupu ni raca caber guni limpieza, maʼ qué zaníʼcabe ni dede lu plataforma, sínuque zacá ni lu tableru. Pa qué zudii tiempu para gaca anunciu ne para guiuundaʼ xiixa carta la? zanabaʼ presidente stiʼ reunión riʼ ca hermanu ni napa asignación lu sección «Modo rúninu xhiiñaʼ Dios» cueecaʼ tiempu lu discursu sticaʼ (biiyaʼ  párrafo 13 ne  17). Ziuundaʼ ti canción ne zaca ti oración para guiluxe reunión riʼ.

 15. Cada estudiante naquiiñeʼ chiné folletu Gusíʼdinu ne guidúʼndanu lu guiʼchiʼ o formatu electrónicu. Zaquiiñeʼ presidente stiʼ reunión Xhiiñaʼ Dios ne modo nabáninu folletu ca para gudii conseju ne guni animar ca estudiante. Naquiiñeʼ chinanda cada estudiante lección ni zeeda ndaaniʼ paréntesis, ni cá cueʼ asignación sticaʼ ni zeeda lu Ni chigaca lu reunión. Napa folletu riʼ ti sección ni láʼ «Pabiáʼ ziyuneʼ progresar», guca ni para si ca estudiante. Cadi naquiiñeʼ diʼ gucaa presidente ca xiixa nota luni.

  16. Tidiʼ si cada tobi de ca asignación estudiantil, zaquiiñeʼ presidente stiʼ reunión riʼ biaʼ ti minutu para guni felicitar cada estudiante ne zudii laabe conseju ni zeeda lu folletu Gusíʼdinu ne guidúʼndanu. Ora guiníʼ presidente riʼ maʼ chitidiʼ ti asignación la? cadi naquiiñeʼ guiníʼ xi lección  zinanda estudiante ca. Guiluxe si estudiante riʼ, zuni felicitar presidente ca laabe, de racá maʼ zanda guzeeteʼ xi lección yenándabe ne zaníʼ xiñee biaʼsi modo gudíʼdibe o zuyubi modo gabi laabe paraa naquiiñeʼ guni mejorarbe. Laaca zanda guzeeteʼ presidente riʼ xiixa ni biʼyaʼ lu demostración ca, ni rabi zanda gacané estudiante ca o auditorio. Guiluxe si reunión o sti ora la? zanda gudii presidente riʼ xiixa conseju ni zanda gacané estudiante ca, ne gaca basar ni lu folletu Gusíʼdinu ne guidúʼndanu o lu libru Benefíciese. Zanda gudiibe conseju estudiante ca de lección ni yenanda o de sti lección, peru gaca ni privadu. (Biiyaʼ  párrafo 17,  22 ne  23 para gánnaluʼ gunáʼ nga ca dxiiñaʼ napa presidente stiʼ reunión Xhiiñaʼ Dios ne modo nabáninu ne xi dxiiñaʼ napa consejeru auxiliar).

     17. Nin ti asignación, (dede né ni guiníʼ presidente) cadi naquiiñeʼ tidiʼ ni de tiempu maʼ nexheʼ para laani. Neca cadi cá diidxaʼ «menu» cueʼ diidxaʼ «minutu» stiʼ cada asignación la? zanda guilúxebe ante de tiempu pa maʼ bisiene chaahuibe información ni cutiidibe. Pa maʼ gudiʼdiʼ ca estudiante ca de tiempu la? zuyubi presidente ca modo gudiibe cuenta maʼ gudíʼdibe de tiempu, peru sin gudii guiráʼ cuenta. Pa tidiʼ xcaadxi hermanu de tiempu lu asignación ni raca caber laacaʼ la? zaniʼné consejeru auxiliar laacaʼ, peru gaca ni privadu (biiyaʼ  párrafo 23). Guidubi naca programa riʼ zandaa ni 1 hora ne 45 minutu, maca né canción ne oración.

 18. Ora chuʼ visita stiʼ superintendente de circuito, zinándanu programa stiʼ Ni chigaca lu reunión, xi si la? zadxaa chupa chonna cosa. Maʼ qué zaca diʼ «Reunión ra riuundaʼ Biblia», lugar stini zudii superintendente de circuito riʼ ti discursu de 30 minutu. Ante tidiʼ discursu riʼ, zuni presidente stiʼ reunión riʼ ti repasu stiʼ programa riʼ, zuzeeteʼ xiixa puntu ni zadúʼyanu sti semana ca, zuzeetebe ca anunciu ni caquiiñeʼ ne zuundabe ca carta ni caquiiñeʼ guiuundaʼ, de racá maʼ zuni presentarbe superintendente de circuito. Guiluxe si superintendente de circuito ca discursu stiʼ, zunduuxeʼ reunión riʼ né ti canción ni maca gulí. Zanda guni invitar superintendente de circuito sti hermanu para guni oración. Qué ziuu diʼ clase auxiliar lu idioma stiʼ congregación ora chuʼ visita. Ca grupu ni riníʼ ti idioma extranjeru zanda gúnicaʼ reunión sticaʼ neca napa congregación anfitriona sticaʼ visita. Peru naquiiñeʼ gucaadiágacaʼ discursu de serviciu ni chigudii superintendente de circuito para congregación.

 19. Qué zapa diʼ congregación nin ti reunión semana chigaca ti asamblea. Cada familia o cada hermanu nga guni estudiar información ni chiguiuunda semana ca.

 20. Ora guiaba Conmemoración ndaaniʼ semana, qué zaca diʼ reunión Xhiiñaʼ Dios ne modo nabáninu. Peru ziuu predicación dxi chigaca Conmemoración.

 21. Cuerpu de ancianu nga cuí ti ancianu para gaca superintendente. Dxiiñaʼ stibe nga gúʼyabe gaca reunión riʼ jneza ne gaca ni casi ná ca instrucción zeeda raríʼ. Gatigá naquiiñeʼ guiníʼnebe consejeru auxiliar. Casi peʼ guʼyaʼ superintendente riʼ maʼ nuu ti Ni chigaca lu reunión la? naquiiñeʼ gudiibe guiráʼ asignación stiʼ guiropaʼ beeu ca (biiyaʼ  párrafo 2 hasta 14). Lade ca asignación ca zeeda ca asignación estudiantil, ca ni cadi estudiantil ne stiʼ presidente para reunión. Naquiiñeʼ gutiidiʼ ca hermanu si ni maʼ biʼniʼ aprobar cuerpu de ancianu guiropaʼ ni biete últimu ca. Naquiiñeʼ gaca entregar ca asignación ca biaʼ chonna semana ante. Ne para gudiibe ca asignación estudiantil zaquiiñebe formulariu Asignación para reunión Xhiiñaʼ Dios ne modo nabáninu (S-89). Ne naquiiñeʼ gúʼyabe guicá programa stiʼ reunión riʼ lu tableru. Zanda guni asignar cuerpu de ancianu sti ancianu o ti siervu ministerial para gacané laabe. Peru ca ancianu si nga naquiiñeʼ guni asignarcaʼ ca asignación ni cadi estudiantil.

  22. Cada semana ziuu ti ancianu ni gaca presidente stiʼ guidubi reunión Xhiiñaʼ Dios. (Ndaaniʼ ca congregación ra huaxiéʼ ancianu la? zanda iquiiñeʼ ca siervu ministerial capacitadu). Naquiiñeʼ quixheʼ chaahuiʼ presidente riʼ xi guiníʼ lu introducción ne conclusión stiʼ reunión riʼ, ne guni analizar ca videu modelo para guinínenu binni. Naquiiñeʼ guni introducirbe guiráʼ asignación, ne pa huaxiéʼ ancianu la? naquiiñeʼ gaca encargarbe de xiixa asignación, casi ra naquiiñeʼ tidiʼ ti videu si. Cadi naquiiñeʼ guiniʼbe stale diidxaʼ ora maʼ biluxe ti asignación ne ante guzulú stobi. Cuerpu de ancianu nga guiníʼ tuu nga de ca ancianu nuu capacitadu para gaca asignar para dxiiñaʼ riʼ. Naquiiñeʼ gaca turnar ca hermanu ni gaca nombrar. Según modo nuu cada congregación la? stale biaje superintendente stiʼ reunión riʼ nga hermanu ni jma stale biaje guni presidir que xcaadxi ancianu. Stale biaje, pa runi calificar ti ancianu para gutiidiʼ «Reunión ra riuundaʼ Biblia» ndaaniʼ congregación, zándaca laaca runi calificarbe para gácabe presidente stiʼ reunión riʼ. Peru cadi guiaandaʼ laatu, hermanu guni presidir reunión riʼ naquiiñeʼ ganna guni felicitar cada estudiante ne gudii conseju né diidxaʼ nadóʼ. Laaca naquiiñeʼ gúʼyabe guiluxe reunión riʼ hora stini (biiyaʼ  párrafo 14 ne  17). Pa nuu lugar lu plataforma ne pa guinabaʼ presidente riʼ ni la? zanda guzuhuaa ti micrófono lu plataforma ni iquiiñebe para guni presentarbe ca estudiante laga cuzuhuaa chaahuicaʼ ra nuu atril. Laaca zanda gúnitu sti cosa para cadi guiniti stale tiempu, zanda cuí presidente riʼ ruaa ti mexaʼ lu plataforma ora tidiʼ asignación ra guiuundaʼ Biblia ne sección ni láʼ «Gusíʼdinu jma jneza».

   23. Pa ganda la? galán iquiiñetu ti ancianu ni maʼ napa experiencia. Ora caquiiñeʼ gúnibe ni la? zudiibe conseju ca ancianu ne ca siervu ministerial ni ridiʼdiʼ lu reunión Xhiiñaʼ Dios ne modo nabáninu, ca ni rudii discursu públicu, ca ni runi dirigir Estudiu stiʼ revista Torre stiʼ ni rapa, o «Reunión ra riuundaʼ Biblia», ne ca lector (biiyaʼ  párrafo 17). Pa nuu stale ancianu ni rudii discursu galán ne nanna gusiidiʼ la? zanda gaca nombrar ti consejeru auxiliar cada iza. Cadi naquiiñeʼ diʼ gudiibe conseju ca hermanu riʼ guiráʼ biaje gudiicaʼ ti discursu.

 24. Zanda gapa ca congregación clase auxiliar pa nuu stale estudiante. Zapa cada clase ca ti consejeru capacitadu, pa ganda ti ancianu. Pa caquiiñeʼ peʼ la? zanda gaca asignar ti siervu ministerial capacitadu. Cuerpu de ancianu nga guiníʼ tuu nga ca ni zanda guni dxiiñaʼ riʼ ne pa zaca turnarcaʼ. Naquiiñeʼ chinanda consejeru riʼ ca instrucción zeeda lu  párrafo 16. Zanábacabe ca estudiante riʼ checaʼ ndaaniʼ sala auxiliar ora maʼ biluxe asignación ni láʼ «Guyúbinu ca perla ni gaʼchiʼ», ni zeeda lu sección «Ca tesoro zeeda lu Biblia». Zabiguétacabe ndaaniʼ sala principal ora guiluxe sección «Gusíʼdinu jma jneza». Pa zanda la? ora gaca analizar ti videu, guiráʼ ca ni nuu ndaaniʼ sala auxiliar ca gúʼyacabe videu ca dede racá ne gucaadiágacabe ora gaca analizar ni. Peru pa gastiʼ modo gúʼyacabe ni ndaaniʼ sala ca la? zanda chiné consejeru ca ti dispositivu electrónicu para gutiidiʼ videu ca, ne laa guni analizarné ni laacabe.

 25. Zadiʼdiʼ caadxi videu lu reunión ni raca ndaaniʼ semana, zanda gúʼyatu ca videu riʼ lu aplicación JW Library® ni guca para gadxé gadxé clase dispositivu electrónicu. Caadxi de ca videu riʼ, casi ca videu modelo para guinínenu binni, zanda iquiiñetu ni gatigá lu ca reunión ni raca ante chiguni predicarnu.