Coʼ, cadi ngueca nga ni rusiidiʼ guiráʼ ca religión ca. Lu Biblia riete ejemplu stiʼ stale binni ni qué ñuulaʼdxiʼ Dios modo biʼniʼ adorárcabe laa. Guidúʼyanu chupa de laacani.

Primé: Gaca adorar Dios falsu

 Biblia ná qué ribeendú binni gastiʼ ora runi adorarcaʼ dios falsu (Jeremías 10:3-5; 16:19, 20). Gudxi Jehová guidxi Israel ca diidxaʼ riʼ: «Cadi naquiiñeʼ gápaluʼ xcaadxi dios aparte de naa» (Éxodo 20:3, 23; 23:24). a Ora biʼniʼ adorar ca israelita que xcaadxi dios la? bidxiichiné Jehová laacaʼ (Números 25:3; Levítico 20:2; Jueces 2:13, 14).

 Tiempu riʼ laaca qué riuulaʼdxiʼ Jehová guni adorárcabe ca «ni ruuyaʼ binni casi dios» (1 Corintios 8:5, 6; Gálatas 4:8). Nga runi, ca binni ni racalaʼdxiʼ guni ni ná Jehová naquiiñeʼ guixélecaʼ de religión falsu. Biblia ná: «Laguiree de ládecabe ne laguixeleʼ de laacabe» (2 Corintios 6:14-17). Pa ñaca tobi si ni rusiidiʼ guiráʼ ca religión ca ne ñacané cani binni ñuu gaxha de Dios, ¿xiñee guni Dios ca diidxaʼ riʼ yaʼ?

Guiropa: Gaca adorar Dios ti modo qué riuulaʼdxiʼ

 Ma’ qué ñuulaʼdxiʼ Jehová modo runi adorar ca israelita laa purtiʼ biquiiñecabe costumbre stiʼ ca binni ni bi’ni’ adorar dios falsu ne zaqué biguuchacabe ni rusiidiʼ religión ni dxandíʼ ne ni rusiidiʼ religión falsu (Éxodo 32:8; Deuteronomio 12:2-4). Guníʼ Jesús cadi jneza modo runi adorar ca xaíque yu’du’ que Dios. Gúdxibe laacaʼ: «¡Aque hipócrita laatu! Purtiʼ […] qué rúnitu ca cosa jma risaca stiʼ Ley: gúnitu ni jneza, guiatu binni ne gácatu fiel» (Mateo 23:23).

 Tiempu riʼ religión ni rusiidiʼ ni dxandíʼ zeeda lu Biblia nga ni racané binni chuʼ gaxha de Dios (Juan 4:24; 17:17; 2 Timoteo 3:16, 17). Peru ca religión ni qué rusiidiʼ ni zeeda lu Biblia ruxheleʼ ca ni binni de Dios. Stale binni runi cré rusiidiʼ Biblia de Trinidad, napa binni ti alma ni qué rati ne dxandíʼ nuu infiernu. Peru ca religión ni runi adorar Dios falsu nga rusiidiʼ cani. Qué rusiidicabe ni ná Dios, sínuque rusiidicabe ni runi crécabe ne nga qué racané diʼ ni binni ganna ni dxandíʼ (Marcos 7:7, 8).

 Laaca nanalaʼdxiʼ Dios ca religión ni riniʼcaʼ runibiaʼcaʼ laabe, peru pur ni rúnicaʼ rihuinni cadi dxandíʼ ni (Tito 1:16). Para ganda gacané ti religión laanu chuʼnu gaxha de Dios, cadi naquiiñeʼ si gúnicabe ca ritual o ca saa ni rúnicabe, sínuque gacané ni laanu gúninu ni ná Dios. Guzéʼtenu ti ejemplu, Biblia ná: «Pa nuu binni riníʼ napa religión stiʼ peru qué rucueeza ruaa la? caguite laca laa, ne qué risaca modo runi adorar Dios. Para ganda gaca religión stinu nayá casi racalaʼdxiʼ Dios Bixhózenu ne cadi gaca ni nabiidiʼ la? naquiiñeʼ gápanu ca huérfano ne ca viuda ni cadiʼdiʼ ra nagana, ne gucáʼnanu ca cosa nadxabaʼ nuu ndaaniʼ guidxilayú riʼ» (Santiago 1:26, 27; nota). Biblia ni nuu lu versión La Palabra de Dios para Todos, lu versículo riʼ biquiiñeʼ ni diidxaʼ «religión nayá» para guiníʼ ni gaca adorar Dios nayá ne jneza.