«Cadi zácaxatu qué gánnadu pa malu nga pornografía, purtiʼ nánnadu malu ni. Peru qué nuxuí’ludu pa ñácani ti guendanagana para dxapahuiini’ stidu» (Nicole).

Lu artículo ri’ zadú’yanu:

•  Ni naquiiñe’ gánnalu’

•  Xi zanda gúnilu’ para gápalu’ ca xiiñilu’ de pornografía

•  Xi zanda gúnilu’ pa ma’ biiya’ xiiñilu’ pornografía

 Ni naquiiñe’ gánnalu’

 Nahuiiniru’ ca xcuidi zanda gú’yaca’ pornografía. Caadxi estudiu ni guca rusihuinni, stale xcuidi ruuyaca’ pornografía ora maʼ nápaca’ 11 iza.

 Zanda gu’ya’ ca xcuidi pornografía neca que racalá’dxica’. Ti ejemplu nga málasi zanda guihuínnini ora cuyúbicabe xiixa lu Internet o caquiiñecabe ca red social. Laaca zanda guihuínnini lu xiixa anunciu ora caguítecabe videojuegu lu Internet. Gadxé gadxé modo nga zanda guihuinni pornografía lu Internet. Ne ni jma rihuinni nga foto ne videu. Peru laaca nuucani casi historia ni zanda gúʼndalu’ o gucadiágalu’ ne cadi nagana para guindételu’ de Internet.

 Ne cadi ngasi, laaca zanda guseendacabe ra nuu ca xcuidi mensaje ra zeeda pornografía. Ne ti estudiu ni guca ra gunabadiidxacabe jma de ga’ gayuaa joven, 90% de ca badudxaapa’ ne 50% de ca hombrehuiini’, guni’ca’ ruseendaʼ ca xcompañéruca’ ni rineca’ scuela foto ne videu ra rihuinni binni xieeladi ra nuuca’.

 Pornografía ni jma runibiá’cabe nga ni zeedané violencia. Pornografía ni jma’ nagueenda ridxélacabe nga ra rihuinni cayuninácabe ca gunaa ca.

 Runiná pornografía ca xcuidi. Ca investigación ni huayaca, ma’ bisihuínnicani ca xcuidi ni ruuyaca’ pornografía...

•   ... huaxie’ galán calificación ribeeca’.

•   ... rápacabe ansiedad, depresión ne runi sentírcabe que risácacabe

•   ... zándaca gú’yacabe normal nga gacalá’dxicabe cánacabe ca xcompañérucabe neca qué naca’.

 Zanda guininu: Ca xcuidi ca nga ni jma runiná pornografía, ne bixhózecabe ne jñaacabe nga ni jma zanda gacané laacabe.

 Textu ni zanda gacané lii: «Ca diidxaʼ ni cayabeʼ lii yannadxí riʼ naquiiñeʼ gápaluʼ ni ndaaniʼ ladxidoʼloʼ, ne naquiiñeʼ gusiidiluʼ ni ca xiiñiluʼ ne gábiluʼ laacabe ni nani ora maʼ zúbaluʼ ra yoo, ora maʼ zeluʼ paxaaraa, ora maʼ chigátaluʼ ne ora guiásaluʼ» (Deuteronomio 6:6, 7).

 Xi zanda gúnilu’ para gápalu’ ca xiiñilu’ de pornografía

 Biyubi gánnalu’ jma’. Guní’ ique paraa ne pora málasi zanda guʼyaʼ xiiñilu’ a pornografía. Casi ora riebe scuela ¿ñee zanda chu’be lu Internet ora guiruti’ tu cayuuya’ laabe la?

 Biyubi gánnalu’ xi napa xiiñilu’ lu teléfono sti’, casi ca aplicación ni riquiiñebe ne ca ni riguítebe luni. Nuu aplicación ni ruxhiá ca mensaje, foto ne videu ni napa pornografía. Ne zeʼ dxi jma stale videojuegu napa pornografía ne dede zanda gucaacabe ca personaje ni caguitenécabe gapa ca relación sexual.

 «Pa napa xiiñilu’ teléfono, laatu ca padre, naquiiñe’ gánnatu ximodo iquiiñetu ni, ne zanda guni activarlu’ ti opción ni neni, laani nga control parental para guuyalu’ xi rindete’ xiiñilu’ lu teléfono sti’, ne gatigá quixhe íquelu’ guuyalu’ ni nápabe lu teléfono stibe. Ruzeeteʼ ni purti’ nga nga ni bine’» (David).

 Bi’ni’ bia’ gándati’ para gápalu’ xiiñilu’. Bi’ni’ guirá’ ni nuu lu nalu’ para cadi guniná pornografía xiiñilu’. Zanda guni ajustarluʼ teléfono sti’ xiiñilu’ ne guirá’ dispositivu electrónicu ni nápalu’ ra lídxilu’ para guni bloquear ni mensaje, foto ne videu ni napa pornografía. Bi’ni’ activar control parental ni nápacani ne biyubi gánnalu’ contraseña stiʼ xiiñilu’.

 «Ni huayacané naa nga, gune’ activar control parental lu ca dispositivu electrónicu stidu, ribiee’rxi programa qué zanda gu’ya’ xiiñe’ lu tele ne ranna’ contraseña nápabe lu teléfono stibe» (Maurizio).

 «Que rudiee’ lugar guieguyoo ca xiiñe’ ndaani’ xcuártuca’ para gú’yaca’ videu ne laaca qué rudiee’ lugar chigásica’ né teléfono stica’» (Gianluca).

 Guni’né xiiñilu’. Flavia, ti gunaa ni napa xiiñi’, guní’: «Nuu padre qué rinaca’ güineca’ ca xiiñica’ de pornografía purti’ riní’ íquecabe que zadxaagalú xiiñicabe guendanagana ri’». Ne xcaadxi la? zándaca riní’ íqueca’, pa guini’neca’ ca xiiñica’ de pornografía zándaca gucaani laacabe guyúbicabe gúʼyacabe ni. Peru cadi jneza nga guiní’ ique tobi zacá. Ca padre ni nadxii ca xiiñi’ dede ante naquiiñe’ gusiene laacabe pabia’ malu nga pornografía ante gánnacabe de laani sti ladu. Nga runi ¿xi zanda gúnilu’ ya’?

 Pa nahuiiniru’ ca xiiñilu’, gúdxi laacabe xi naquiiñe’ gúnicabe ora guihuinni xiixa ni cadi jneza lu dispositivu stícabe. Casi, guseegu’ lúcabe o gusuí’cabe dispositivu ca. Ne laaca gudxi laacabe galán gábicabe lii ni bí’yacabe o ni binadiágacabe. b

 «Dede nahuiini’ xiiñidu bisiénedu laa pabiá’ malu nga pornografía. Dxi nápabe 11 iza gundétebe ti videojuegu lu teléfono stibe ne bizulú biree caadxi anunciu ni né pornografía luni. Ne cadi ngasi, laaca biseendacabe mensaje ra canábacabe foto stibe, peru cumu maca gunidu de laani, nagueendaca gúdxibe ni naa» (Maurizio).

 Ne pa ma’ huaniisi ca xiiñilu’ gucané laacabe ti cadi gú’yacabe, gunadiágacabe o gú’ndacabe xiixa ni napa pornografía. Gudxi ca xiiñilu’ ca regla ni nuu ndaani’ yoo, ne gudxi laacabe gucaacabe xi zúnicabe pa gú’yacabe o guluí’cabe laabe pornografía ne xi pur racalá’dxibe gúnibe zacá. Ne gucaabe ca guendanagana ni zándaca gápabe pa laapebe guyúbibe gú’yabe pornografía, casi ma’ que ziuube nayeche’, ma’ que zapa bixhózebe ne jñaabe confianza laabe, ne ma’ qué zaca xhamígube Dios. c

 «Ra ma’ ziniisi ca xiiñilu’ gucané laacabe guiní’ íquecabe ca guendanagana ni zándaca gápacabe pa gú’yacabe pornografía ti cadi guiábacabe lu guendanagana ca» (Lauretta).

 “Pa guiene ca xiiñilu’ malu nga pornografía ne ximodo ruuya Jehová ni, zápani laacabe para cadi guiábacabe luni» (David).

 Gatigá guni’né ca xiiñilu’. Ruluí’ cadi dxandí’ ni, peru racala’dxi’ ca xiiñitu guiní’netu laacabe de sexo ne de pornografía. Rachel de Souza, comisionada de la infancia de Inglaterra, guní’: «Ni racala’dxi’ ca xcuidi nga cadi guindaalu’ para guiní’nelu’ laaca’ ne guni’né laacabe gatigá. Bia’ iza napa ca xcuidi, biquiiñeʼ diidxaʼ ni zanda guiénecabe ne ora jma ma’ ziniisicabe zanda gusiénelu’ laacabe jma».

 «Dxi nahuiine’ que ñuu ora nini’né bixhoze’ ne jñaa’ naa de sexo ne de xcaadxi tema, jma galán pa ninidu de laani. Yanna ra ma’ napa’ xiiñe’, rune’ stipa guinieniá’ laacabe de sexo ne rune’ ni gatigá sin guituíludu» (Flavia).

 Xi zanda gúnilu’ pa ma’ biiya’ xiiñilu’ pornografía

 Cadi guidxiichilu’. Pa gúnnalu’ biiya’, binadiaga o biinda’ xiiñilu’ xiixa ni napa pornografía, cadi nagueendaca guidxiichilu’. Zándaca cadi galán nuube pur ni bí’nibe ca, ne cutuílube. Ne pa guidxiichilu’ jmaru si feu zuni sentir xiiñilu’ ne ma’ que zanabe gábibe lii gasti’.

 Biyubi gánnalu’ xi guca’. Ante guini’lu’ xiixa, jma galán guinabadiidxalu’ xi guca’. Casi ¿ñee nuu tu biseenda’ laabe imagen ca la? o laapebe biyúbibe ni la? ¿Ti biaje si huayuuyabe pornografía la? o maca huayuuyabe ni? ¿Ñee nuu activadu opción ni rucueza para cadi gú’yacabe cosa dxaba’ né control parental la? Pa nuucani activadu, ¿ñee biyúbibe ximodo gucaanabeni la? Peru bietenala’dxi’, ni racalá’dxinu nga guini’be ni nuu ndaani’ ladxido’be, ne cadi guni sentirbe cayuni obligarnu laabe.

 Biyubi gacanelu’ laabe. Pa málasi biiya’ xiiñilu’ pornografía, biyubi quixhe chaahuilu’ opción ni rucueeza para cadi gú’yacabe cosa dxaba’ né control parental.

 Ne pa laapebe biyúbibe ni, guluu jneza laabe né guendarannaxhii. Biquiiñe’ textu casi Job 31:1, Salmo 97:10 ne Salmo 101:3 para gacanelu’ laabe guiénebe xiñee cadi naquiiñe’ gú’yabe pornografía. d Ne gudxi laabe zaní’nelu’ laabe guira’ semana para gú’yalu’ ximodo nuube ne pa nuuruʼ xiixa ra zanda gacanelu’ laabe.